ཡུའུ་ཁུ་རེན་ཁ་འཐོར་སྲིད་དམ།

ཡུའུ་ཁུ་རེན་གྱི་གནད་ཡོད་བཟོ་ལས་གྲོང་ཁྱེར་ཊོབ་ནེ་ཌི་སི་ཁུ་ནང་གི་གྱེན་ལོག་པ་ཚོས་ཁུ་རེ་མཱེ་དང་འདྲ་བར་ཁོ་ཚོ་ལའང་རང་ཐག་རང་གཅོད་ཀྱི་འོས་བསྡུའི་ཐོབ་ཐང་དགོས་སྐོར་བརྗོད་འདུག

ཁ་སང་ཕྱི་ཚེས་ ༡༨ ཉིན་ཡུའུ་ཁུ་རེན་ཤར་ཕྱོགས་གྲོང་ཁྱེར་ཊོབ་ནེ་ཌི་སི་ཁུ་ (Donetsk)རུ། ཨུ་རུ་སུར་དགའ་མོས་བྱེད་མཁན་གྱེན་ལོག་པའི་མགོ་ཁྲིད་ཊིན་ནེ་སི་ (Denis Pushilin) ཡིས། ཊོབ་ནེ་ཌི་སི་ཁུ་གྲོང་ཁྱེར་རང་སྐྱོང་ས་ཁུལ་ཞིག་ཡིན་པའི་གསལ་བསྒྲགས་དང་འབྲེལ་ཡུའུ་ཁུ་རེན་གྱི་རྒྱལ་ཁོངས་སུ་སྡོད་མིན་ལ་ཁུ་རེ་མཱེ་ནང་བཞིན་རང་ཐག་ རང་གཅོད་ཀྱི་མང་མོས་འོས་བསྡུ་བྱ་དགོས་པའི་དགོས་འདུན་བཏོན་ཡོད་པ་དང་། ཁོ་ཚོས་བཙན་བཟུང་བྱས་པའི་གཞུང་གི་ལས་ཁུངས་ཁག་དང་མཚོན་ཆ་སོགས་ཡུའུ་ཁུ་རེན་བར་བརྒལ་སྲིད་གཞུང་ལ་ཕྱིར་སློག་བྱ་རྒྱུ་མིན་པ་མ་ཟད། ཇི་ནེ་ཝའི་གྲོས་ཆོད་ལ་ངོས་ལེན་མེད་ཚུལ་སོགས་བརྗོད་འདུག

ཟླ་འདིའི་ཚེས་ ༡༧ ཉིན་སུད་སིའི་གྲོང་ཁྱེར་ཇི་ནེ་ཝའི་ནང་། ཨ་རིའི་རྒྱལ་དོན་དྲུང་ཆེ་དང་ཨུ་རུ་སུའི་ཕྱི་སྲིད་བློན་ཆེན། ཡུ་རོབ་མཐུན་ཚོགས་ཕྱི་འབྲེལ་སྲིད་བྱུས་འགན་འཛིན། ཡུའུ་ཁུ་རེན་བར་བརྒལ་གཞུང་གི་ཕྱི་སྲིད་བློན་ཆེན་བཅས་ཀྱིས་ཡུའུ་ཁུ་རེན་གྱི་དཀའ་རྙོག་གཙོས་རྒྱལ་ཁབ་ནང་ཁ་བྲལ་གྱི་ཟིང་འཁྲུག་ཞི་འཇགས་ཡོང་ཐབས་སྐོར་ལ་ཚོགས་འདུ་ཞིག་བསྐོངས་ཏེ། ཚོགས་ཞུགས་རྒྱལ་ཁབ་ཚང་མས་ཡུའུ་ཁུ་རེན་ནང་ཟིང་འཁྲུག་ཇི་བྱུང་ལ་རང་ཚོད་འཛིན་དགོས་པ་དང་། རྒྱལ་ཁབ་ནང་དྲག་སྤྱོད་དང་མི་རིགས་དབྱེ་འབྱེད། ཆོས་ལུགས་འཐེན་འཁྱེར་བཅས་ལས་བྱུང་བའི་དཀའ་རྙོག་ལ་སྐྱོན་བརྗོད། གྱེན་ལོག་པ་ཚོས་བཙན་བཟུང་བྱས་པའི་སྲིད་གཞུང་ལས་ཁུངས་དང་མཚོན་ཆ་ཕྱིར་སློག་བྱས་ཚེ་ནག་ཉེས་གུ་ཡངས་གཏོང་རྒྱུ་བཅས་ལ་གྲོས་ཆོད་བཞག་ཡོད།

གྱེན་ལོག་པའི་མགྲིན་ཚབ་པས་གསར་འགོད་པར། ད་ལྟའི་ཡུའུ་ཁུ་རེན་བར་བརྒལ་སྲིད་གཞུང་ཁྲིམས་མཐུན་གྱི་གཞུང་ཞིག་མིན་སྟབས། མི་མང་ལ་སྲིད་དབང་རྩིས་སྤྲོད་མ་བྱས་བར་ཁོ་ཚོས་བཙན་བཟུང་བྱས་པའི་གཞུང་གི་ལས་ཁུངས་ཕྱིར་སློག་རྒྱུ་མིན་ཞེས་དང་། གཞན། གྱེན་པ་ལོག་པ་ཁག་ཅིག་གིས་ཇི་ནེ་ཝའི་གྲོས་མོལ་དེས་སྲིད་འཛིན་པུ་ཊིན་གྱེན་ལོག་པ་ཚོར་དགའ་བོ་བྱེད་ཀྱི་མེད་པ་ཤེས་རྟོགས་ཡོད་ཅེས་བརྗོད་ཡོད་འདུག

ཁ་སང་ཨ་རིའི་རྒྱལ་སྲུང་ལྷན་ཁང་གི་སློབ་སྟོན་པ་ལྕམ་སོ་སན་རི་ཡི་སེ་ (Susan Rice) ལགས་ཀྱིས་གསར་འགོད་པར། མོ་སུ་ཁོ་ (Moscow) ཡིས་ཇི་ནེ་ཝའི་གྲོས་ཆོད་དེ་དག་ལག་བསྟར་དོན་འཁྱོལ་མ་བྱས་ཚེ། ཨ་རིས་ཡང་བསྐྱར་ཨུ་རུ་སུའི་དཔལ་འབྱོར་ལ་དོ་ཕོག་འགྲོ་བའི་དཔལ་འབྱོར་ཉེས་ཆད་གསར་བ་ཞིག་གཏོང་བར་གྲ་སྒྲིག་ཡོད་ཚུལ་དང་། ཁོང་མོས་ “ ཨུ་རུ་སུས་ཡུའུ་ཁུ་རེན་ཤར་ཕྱོགས་ཀྱི་གྲོང་ཁྱེར་ཁག་ནང་ཟིང་ཆ་སློང་བར་རོགས་འདེགས་བྱེད་བཞིན་ཡོད་པར་ངོས་འཛིན་བྱེད་ཀྱི་ཡོད་”ཅེས་བརྗོད་འདུག

ད་ལྟའི་ཆར་ཡུའུ་ཁུ་རེན་བར་བརྒལ་སྲིད་གཞུང་གིས་གྱེན་ལོག་པ་ཚོར་འཇབ་རྒོལ་བྱེད་པའི་ལས་འགུལ་གནས་སྐབས་རིང་མཚམས་འཇོག་བྱས་ཏེ། རྒྱལ་ཁབ་ནང་བརྟན་བརླིང་དང་ཆིག་སྒྲིལ་ཡོང་ཆེད་གྱེན་ལོག་པ་ཚོའི་དགོས་འདུན་ཁག་ཅིག་ལ་དང་ལེན་བྱ་རྒྱུ་ཡིན་པའི་རྣམ་འགྱུར་བསྟན་ཡོད་འདུག

གཟའ་འཁོར་རྗེས་མར་པོ་ལན་ཌིའི་བདེ་སྲུང་བློན་ཆེན་དང་ཨ་རིའི་བདེ་སྲུང་དྲུང་ཆེ་གཉིས་ཀྱིས། ཡུའུ་ཁུ་རེན་གྱི་རྒྱལ་ཁོངས་སྲུང་སྐྱོབ་དང་སྲིད་གཞུང་བརྟན་བརླིང་ཡོང་ཆེད། ནུབ་ཕྱོགས་མཉམ་འབྲེལ་དམག་དཔུང་ (NATO) མིང་ཐོག་ནས་ཨ་རིའི་དམག་དཔུང་ཡུ་རོབ་ཤར་ཕྱོགས་རྒྱལ་ཁབ་ཁག་ཅིག་ནང་གཏོང་རྒྱུ་ཡིན་པའི་གསལ་བསྒྲགས་སྤེལ་འཆར་ཡོད་འདུག

སྲིད་དོན་དབྱེ་ཞིབ་པ་ཚོས། པུ་ཊིན་རིང་ལུགས་ཀྱིས་ཨུ་རུ་སུའི་སྐད་ཤོད་མཁན་མི་རིགས་ལ་སྲུང་སྐྱོབ་བྱེད་ཞོར་དུ་ས་ཁོངས་རྒྱ་སྐྱེད་བཏང་སྟེ་ཨུ་རུ་སུ་གསར་བ་ཞིག་བཟོ་བཞིན་ཡོད་སྟབས། ནུབ་ཕྱོགས་རྒྱལ་ཁབ་ཁག་གིས་ཀྱང་ཡུའུ་ཁུ་རེན་གྱི་བདག་དབང་དང་དམངས་གཙོ་བསྐྱར་གསོ་ལ་ཁ་གཡར་ཏེ་ཨུ་རུ་སུའི་རྒྱ་སྐྱེད་རིང་ལུགས་ལ་བཀག་འགོག་བྱེད་ཀྱི་ཡོད། གལ་སྲིད། བཀག་འགོག་བྱེད་མ་ཐུབ་ཚེ་ཡུའུ་ཁུ་རེན་རྒྱལ་ཁབ་ཁ་འཐོར་རུ་འགྲོ་སྲིད་པའི་ཚོད་དཔག་བྱེད་བཞིན་ཡོད་འདུག

གསར་འགོད་པ། ལྷ་སྐྱབས་རྒྱལ།