ཁ་སང་ཨི་སི་རེལ་ནང་ཡོད་པའི་པཱ་ལི་སི་ཐན་གྱི་བཙོན་པ་ཁག་ཅིག་གིས་ཨི་སི་རེལ་གཞུང་ལ་ཟས་བཅད་ངོ་རྒོལ་གྱི་ལས་འགུལ་སྤེལ་འདུག
ཁ་སང་ཨི་སི་རེལ་ནང་ཡོད་པའི་པཱ་ལི་སི་ཐན་གྱི་བཙོན་པ་ ༡༨༠ ཙམ་ལ་ཨི་སི་རེལ་གཞུང་གིས་དུས་བཀག་ངེས་མེད་ཀྱི་བཙོན་འཇུག་ཁྲིམས་ཐག་བཅད་ཡོད་སྟབས། བཙོན་པ་ཚོས་གཞུང་གི་ཐག་གཅོད་དེར་ངོས་ལེན་མེད་པའི་ཟས་བཅད་ངོ་རྒོལ་གྱི་ལས་འགུལ་ཞིག་སྤེལ་ཡོད་འདུག
འདིའི་ཐད་པཱ་ལི་སི་ཐན་གྱི་བཙོན་པའི་གནད་དོན་ཐད་ཀྱི་བློན་ཆེན་གཞོན་པ་ཨ་བྷུ་ཨེན་ (Ziad Abu Ain) ལགས་ཀྱིས། “ང་ཚོས་ཨི་སི་རེལ་སྲིད་གཞུང་གིས་བཙོན་པ་ཚོ་ཀློད་གྲོལ་མ་བཏང་བར། བཙོན་པ་ཚོས་ཟས་བཅད་ངོ་རྒོལ་གྱི་ལས་འགུལ་མཚམས་འཇོག་བྱ་རྒྱུ་མེད་པའི་སྐུལ་མ་བྱེད་བཞིན་ཡོད།” ཅེས་བརྗོད་འདུག
པཱ་ལི་སི་ཐན་གྱི་བཙོན་པའི་ལྷན་ཁང་གི་ཡིག་ཆ་ནང་། ཨི་སི་རེལ་ནང་ཡོད་པའི་པཱ་ལི་སི་ཐན་གྱི་བཙོན་པ་ ༥༠༠༠ ཡོད་པ་ལས། བཙོན་པ་བརྒྱ་ཆ་ ༦༠ ཙམ་ཞིག་ལ་དུས་བཀག་ངེས་མེད་ཀྱི་བཙོན་འཇུག་བྱ་རྒྱུའི་བཀའ་ཁྱབ་བསྒྲགས་ཡོད་པ་མ་ཟད། བཙོན་པ་ ༡༨༠ ཙམ་ཞིག་ལ་དུས་བཀག་ངེས་མེད་ཀྱི་བཙོན་འཇུག་ཁྲིམས་ཐག་བཅད་ཡོད་སྐོར་འཁོད་འདུག
ཉེ་ཆར་ཨི་སི་རེལ་སྲིད་གཞུང་གིས་ཨི་སི་རེལ་ནང་ཡོད་པའི་པཱ་ལི་སི་ཐན་གྱི་བཙོན་པ་ཚོར་ཟླ་དྲུག་དུས་བཀག་བཙོན་འཇུག་གི་དུས་ཡུན་ཕར་འགྱངས་བྱེད་བཞིན་པ་དག་མི་དགོས་པར། དུས་ཆད་ངེས་མེད་ཀྱི་ཁྲིམས་སྒྲིག་ལག་བསྟར་བྱས་ཏེ་བཙོན་པ་ཚོར་སྡུག་གཅོང་མནར་གཅོད་གཏོང་གི་ཡོད་སྟབས། ༢༠༡༣ ལོར་བཙོན་པ་སཱ་མེར་ (Samer Essawi) ལགས་ཀྱིས་ཨི་སི་རེལ་གྱི་བྱ་སྤྱོད་དེར་འདོད་པ་མེད་པའི་དུས་ཆད་ངེས་མེད་ཀྱི་ཟས་བཅད་ངོ་རྒོལ་བྱས་པར་བརྟེན། རྒྱལ་སྤྱིའི་སྒྲིག་འཛུགས་ཁག་གིས་ཨི་སི་རེལ་སྲིད་གཞུང་ལ་ཁོང་ཀློད་གྲོལ་དགོས་པའི་གནོན་ཤུགས་སྤྲད་མཐར། ཁོང་ ༢༠༡༣ ལོའི་ཟླ་ ༡༢ ནང་བཙོན་གྲོལ་ཐོབ་ཡོད་འདུག
༢༠༠༠ ལོར་པཱ་ལི་སི་ཐན་མི་རིགས་ཀྱིས་ཨི་སི་རེལ་སྲིད་གཞུང་ལ་ཡར་ལངས་ལས་འགུལ་ཆེན་མོ་གཉིས་པ་བྱས་པ་ནས་བཟུང་། ཨི་སི་རེལ་གཞུང་གིས་པཱ་ལི་སི་ཐན་གྱི་བཙོན་པ་ ༢༣༠༠༠ ཙམ་ལ་དུས་བཀག་ངེས་མེད་ཀྱི་བཙོན་འཇུག་ཁྲིམས་ཐག་བཅད་ཡོད་སྟབས། ༢༠༡༢ ལོར་བཙོན་པ་ ༡༥༠༠ གིས་ཉིན་ ༢༨ ཙམ་རིང་ཟས་བཅད་ངོ་རྒོལ་གྱི་ལས་འགུལ་ཞིག་སྤེལ་ཡོད་འདུག
ཨི་སི་རེལ་སྲིད་གཞུང་དང་བཙོན་པའི་བར་རྩོད་རྙོག་དེ་ཇེ་ཆེར་མི་འགྲོ་བའི་ཆེད་ཨི་ཇིབ་གཞུང་གིས་ཨི་སི་རེལ་གཞུང་དང་ནང་མོལ་བྱས་ཏེ། བཙོན་པའི་གནས་སྟངས་ལེགས་བཅོས་གཏོང་ཐབས་དང་། དུས་བཀག་ཚང་བའི་བཙོན་པ་དག་བཙོན་གྲོལ་ཐོབ་ཐབས་སོགས་ཀྱི་སྐོར་ལ་གྲོས་མཐུན་བཞག་ཡོད་ཀྱང་། ཨི་སི་རེལ་གཞུང་གིས་ཨི་ཇིབ་བར་བཞག་པའི་གྲོས་མཐུན་དག་ལག་བསྟར་མ་བྱས་པ་མ་ཟད། དེ་ལས་ལྡོག་སྟེ་བཙོན་པ་ཚོར་དུས་བཀག་ངེས་མེད་ཀྱི་བཙོན་འཇུག་ཁྲིམས་ཐག་གཅོད་པའི་སྲིད་ཇུས་འདྲ་མིན་ལག་བསྟར་བྱེད་བཞིན་ཡོད་སྟབས། ད་བར་པཱ་ལི་སི་ཐན་བཙོན་པ་ཚོས་ཟས་བཅད་ངོ་རྒོལ་གྱི་ལས་འགུལ་ཐེངས་ ༧ ཙམ་སྤེལ་ཡོད་འདུག
ཆབ་སྲིད་དབྱེ་ཞིབ་པ་ཚོས། པཱ་ལི་སི་ཐན་དང་ཨི་སི་རེལ་བར་གྱི་རྩོད་རྙོག་དེ་ནི་ལོ་རྒྱུས་ཐོག་གི་དཀའ་རྙོག་ཆེན་པོ་ཞིག་ཆགས་ཡོད་སྟབས། རྒྱལ་ཁབ་གཉིས་བར་དམག་འཁྲུག་ཅིག་མ་ལངས་ཀྱང་ཞི་བདེ་བརྟན་བརླིང་ལྡན་པའི་མཐུན་གྲོགས་ཁྱིམ་མཚེས་རྒྱལ་ཁབ་ཅིག་ཏུ་འགྱུར་རྒྱུ་ཁག་པོ་ཡིན་སྐོར་བརྗོད་འདུག
གསར་འགོད་པ། དོན་གྲུབ།
