ཁ་སང་དྷ་ས་ཉིན་སློབ་ཚོགས་ཁང་དུ་པཎ་ཆེན་སྐུ་ཕྲེང་བཅུ་བའི་སྐོར་ལ་བགྲོ་གླེང་ཞིག་ཚོགས་པའི་སྟེང་བཀའ་ཤག་གི་གྲོས་སྟོན་པས། ཧོའུ་ཡོ་པང་བོད་དུ་བསླེབས་སྐབས་བོད་རིགས་མི་མང་གིས་དཀའ་སྡུག་མྱངས་ཡོད་པ་དང་བོད་སར་ཡོད་པའི་རྒྱ་མི་ཕྱིར་ལོག་པ། བོད་ཁུལ་གྱི་བྱ་བ་བོད་མིས་བསྒྲུབ་དགོས་ལུགས་བརྗོད་པ་སོགས་ནི། པཎ་ཆེན་རིན་པོ་ཆེ་མཆོག་གི་ཡིག་འབྲུ་ཁྲི་བདུན་གྱི་གྲུབ་འབྲས་ཡིན་སྐོར་གསུངས་སོང་།
ཤུགས་ཀྱི་གྲུབ་ཁ་སང་ཕྱི་དྲོ་ཆུ་ཚོད་ ༥།༠༠ པ་ཙམ་ལ་དྷ་ས་ཉིན་སློབ་ཚོགས་ཁང་དུ། དབུས་བོད་ཀྱི་བུད་མེད་ལྷན་ཚོགས་ཀྱི་གོ་སྒྲིག་འོག ༸པཎ་ཆེན་སྐུ་ཕྲེང་བཅུ་པ་མཆོག་དགོངས་པ་དང་སྐུ་ཕྲེང་བཅུ་གཅིག་པ་དགེ་འདུན་ཆོས་ཀྱི་ཉི་མ་མཆོག་དགུང་གྲངས་ ༢༥ ལ་ཕེབས་པའི་འཁྲུངས་སྐར་ཉིན་མོ་དང་བསྟུན་ཏེ། ༼པཎ་ཆེན་སྙིང་སྟོབས། ཡིག་འབྲུ་ཁྲི་བདུན་བསྐྱར་དུ་གླེང་བ།༽ཞེས་པའི་བགྲོ་གླེང་ཞིག་སྐོང་ཚོགས་སོང་། བགྲོ་གླེང་ཐོག་བཀའ་ཤག་གི་གྲོས་སྟོན་པ་ཚེ་རིང་དབང་ཕྱུག་ལགས་དང་སྤྱི་འཐུས་སྨོན་ལམ་མཐར་ཕྱིན་ལགས། སྤྱི་འཐུས་གསེར་རྟ་ཚུལ་ཁྲིམས་ལགས་བཅས་ཀྱི་གཙོས་བོད་ཀྱི་བུད་མེད་ལྷན་ཚོགས་ཀྱི་རྒྱུན་ལས་དང་ཚོགས་མི། དེ་བཞིན་དྷ་ས་ཁུལ་གྱི་སེར་སྐྱ་མི་མང་བཅས་འཛོམས་འདུག
བགྲོ་གླེང་གི་ཐོག་མར་བོད་ཀྱི་བུད་མེད་ལྷན་ཚོགས་ཀྱི་པཎ་ཆེན་རིན་པོ་ཆེའི་ཡིག་འབྲུ་ཁྲི་བདུན་གྱི་སྙན་ཞུ་བསྐྱར་དཔར་དབུ་འབྱེད་དང་སྦྲགས། ཚོགས་གཙོ་བཀྲ་ཤིས་སྒྲོལ་མ་ལགས་ཀྱིས་དཔེ་དེབ་དེ་བསྐྱར་དུ་པར་སྐྲུན་གནང་བའི་དགོས་དམིགས་བརྗོད་དོན། “རྒྱ་ནག་གཞུང་གི་མགོ་ཁྲིད་ཚོས་དང་པོ་བོད་ལ་བཙན་འཛུལ་བྱེད་སྐབས་ག་རེ་བཤད་ཡོད་པ་དང་། དངོས་སུ་ལག་བསྟར་ག་རེ་བྱས་ཡོད་པ་སོགས་ཁ་ཁོག་མི་མཚུངས་བའི་བྱ་སྤྱོད་དེ་དག་གིས། བོད་ལ་ཚད་ལས་བརྒལ་བའི་དོ་ཕོག་དང་གྱོང་གུད་བཟོས་པའི་གནས་སྟངས་དེ་ཚོ་དེབ་འདིའི་ཐོག་གསལ་བོར་བལྟ་རྒྱུ་ཡོད་སྟབས། དེང་སང་ཤེས་སྤྱོད་གཉིས་ལྡན་གྱི་ཐོག་ནས་བོད་རིགས་གཞོན་སྐྱེས་མང་པོ་ཞིག་སྤྱི་ཚོགས་ནང་སླེབ་བཞིན་པ་དེ་ཚོར་་པཎ་ཆེན་རིན་པོ་ཆེས་བོད་མི་རིགས་དང་རྒྱལ་ཁབ་ཆེད་སྐུ་ངལ་ག་ཚོད་བསྐྱོན་ཡོད་པ་དང་། རྒྱ་ནག་གཞུང་གིས་བོད་མིར་སྡུག་སྦྱོང་ཅི་ཙམ་བཏང་ཡོད་པའི་ཐོག་ཉམས་ཞིབ་གནང་བའི་ཆེད་དུ་ཡིན། ”ཞེས་བརྗོད་སོང་།
དེའི་རྗེས་ཚེ་རིང་དབང་ཕྱུག་ལགས་ཀྱིས་༼༧པཎ་ཆེན་སྐུ་གོང་མའི་བོད་ཁུལ་རང་སྐྱོང་དང་དབུ་མའི་ལམ་གྱི་མིང་དོན་མཚུངས་པའི་རང་སྐྱོང་རྩོད་སྟངས་བསྡུར་དཔྱད།༽ཞེས་པའི་བརྗོད་གཞིའི་ཐོག་བརྗོད་དོན། “པཎ་ཆེན་རིན་པོ་ཆེ་སྐུ་ཕྲེང་བཅུ་པ་མཆོག་གིས་ཡིག་འབྲུ་ཁྲི་བདུན་གྱི་སྙན་ཞུ་ཕུལ་དུས་དང་། བཙན་བྱོལ་བོད་མིའི་དབུ་མའི་ལམ་གྱི་སྲིད་བྱུས་གཏན་འབེབས་གནང་བའི་ལོ་དུས་བར་ཕལ་ཆེར་ལོ་ ༣༠ ལྷག་གི་ཁྱད་པར་ཡོད་པ་རེད། ཡིན་ནའང་། དགོས་འདུན་དང་དམིགས་ཡུལ་གྱི་ཆ་ནས་གཅིག་མཚུངས་ཆགས་ཀྱི་ཡོད་པ་རེད་བསམ་གྱི་འདུག གང་ཡིན་ཟེར་ན། དབུ་མའི་ལམ་གྱི་དགོས་འདུན་ནང་བོད་རིགས་ཡོངས་ལ་མིང་དོན་མཚུངས་པའི་རང་སྐྱོང་དགོས་ཀྱི་ཡོད་གསུངས་ཡོད་པ་དང་། དེ་བ
ཞིན། ཡིག་འབྲུ་ཁྲི་བདུན་གྱི་ནང་དོན་གཙོ་བོའང་བོད་མི་མང་ལ་བརྡབ་གསིག་དང་དཀའ་ངལ་མི་བཟོ་པར་འཚོ་བ་ཡག་པོ་སྐྱེལ་འཇུག་དགོས་པ་དེ་རེད། སྤྱིར་བཏང་ཡིག་འབྲུ་ཁྲི་བདུན་ལ་དམིགས་བསལ་གྱི་གྲུབ་འབྲས་ཐོན་མེད་ནའང་། ཧོའུ་ཡོ་པང་བོད་དུ་བསླེབས་སྐབས་བོད་རིགས་མི་མང་གིས་དཀའ་སྡུག་མྱངས་ཡོད་པ་དང་བོད་སར་ཡོད་པའི་རྒྱ་མི་ཕྱིར་ལོག་པ། བོད་ཁུལ་གྱི་བྱ་བ་བོད་མིས་བསྒྲུབ་དགོས་ལུགས་བརྗོད་པ་སོགས་ཤུགས་ཀྱི་གྲུབ་འབྲས་གང་ལ་གང་འཚམ་ཐོན་ཡོད་ལ། དེ་བཞིན་དབུ་མའི་ལམ་ལའང་ད་ལྟའི་ཆར་གྲུབ་འབྲས་ཐོན་མེད་ཀྱང་། རྒྱལ་སྤྱིའི་ཐོག་ནས་རྒྱ་ནག་གཞུང་གིས་ལྟ་བ་མཁྲེགས་བཟུང་བྱས་ཡོད་པ་དང་བོད་པར་བདེན་པ་ཡོད་པ་ར་འཕྲོད་ཡོད་པ་རེད། ”ཅེས་བརྗོད་སོང་།
སྤྱི་འཐུས་སྨོན་ལམ་མཐར་ཕྱིན་ལགས་ཀྱིས་༼བོད་ལ་ངོ་མ་འཕྲོད་པའི་༸པན་ཆེན་མཆོག་གི་མཛད་པ་ཁག༽ཞེས་པའི་ ཐོག་ “པཎ་ཆེན་རིན་པོ་ཆེ་ནས་ཁྱེད་ཀྱིས་བྱ་བ་བཟང་པོ་ཞིག་བསྒྲུབ་ན་མི་མང་གི་སེམས་ན་ཡོད་ལ། བྱ་བ་ངན་པ་ཞིག་བསྒྲུབ་ནའང་མི་མང་གི་སེམས་སུ་ཡོད་པ་རེད་ཅེས་སྡོམ་ཚིག་བཀོད་ཡོད་པ་རེད། ང་ཚོ་ལྟ་བུ་སྡིངས་ཆ་དང་ལས་གནས་ཤིག་གི་ཐོག་ཡོད་མཁན་དང་། བགྲོ་གླེང་གོ་སྒྲིག་པ་རྣམ་པ་ཡང་སྤྱི་ཚོགས་ལ་སྣེ་ཁྲིད་མཁན་ཡིན་སྟབས། པཎ་ཆེན་རིན་པོ་ཆེའི་བསླབ་བྱ་དེ་གཞི་ལ་བཞག་ནས་བོད་བསྟན་པ་ཆབ་སྲིད་དང་རྒྱལ་ཁབ། མི་རིགས་ཀྱི་ཆེད་དུ་བྱ་བ་བཟང་པོ་ཞིག་བསྒྲུབ་པ་ཡིན་ན། བོད་རྒྱ་ཆེའི་མང་ཚོགས་ཀྱིས་ཤེས་ཀྱི་ཡོད་ལ། ངན་པ་ཞིག་བསྒྲུབ་པ་ཡིན་ནའང་ཤེས་ཀྱི་ཡོད་པ་གཞིར་བཞག་གིས་འགན་ཁུར་དགོས་པ་གལ་ཆེན་པོ་རེད། ”ཅེས་བརྗོད་སོང་།
སྤྱི་འཐུས་གསེར་རྟ་ཚུལ་ཁྲིམས་ལགས་ཀྱིས་༼གལ་སྲིད་༸པཎ་ཆེན་ཆུང་སྲིད་མཆོག་བཞུགས་མེད་ན་ག་རེ་བྱེད་ཀ༽ཞེས་པའི་བརྗོད་གཞི་དང་འབྲེལ་ནས་བརྗོད་དོན། “པཎ་ཆེན་རིན་པོ་ཆེ་ལྟ་བུའི་མི་སྣ་རླབས་ཆེན་ཞིག་ང་ཚོའི་སྤྱི་ཚོགས་ནང་བྱུང་མ་མྱོང་བའི་གནས་སྟངས་ཤིག་རེད། ཁོང་ལ་རྒྱ་ནག་གཞུང་གིས་མནར་གཅོད་མང་པོ་བཏང་ཡོད་པ་དང་། དེའི་སྔོན་ལ་བོད་ལ་ཛ་དྲག་གི་གནས་སྟངས་མང་པོ་བྱུང་ཡོད་པ་དེ་ཚོའི་གནས་སྟངས་ལ་བརྟེན་ནས་པཎ་ཆེན་རིན་པོ་ཆེའི་སྙིང་སྟོབས་དེའང་ལྷོད་ལྷོད་བྱས་ཏེ་ཁ་རྒྱགས་པ་བཤད་ནས་བྱུང་བ་ཞིག་རྩ་བ་ནས་མ་རེད། དཀའ་སྡུག་ཆེན་པོ་ཞིག་གི་ནང་གདོང་ལེན་མང་པོ་ཞིག་བྱེད་དགོས་པའི་སྐབས་སུ། པཎ་ཆེན་རིན་པོ་ཆེས་གདོང་ལེན་གནང་སྟངས་དེ་དངོས་གནས་གཞལ་དུ་མེད་པའི་གནས་སྟངས་ཤིག་ཆགས་བསྡད་ཡོད་སྟབས། སྐུ་གོང་མའི་མཛད་པ་འཕྲིན་ལས་དེ་ཚོ་བོད་མི་རིགས་ཀྱི་ཆེད་དུ་འབད་བརྩོན་གནང་བ་དང་དེ་ལ་བརྟེན་ནས་དཀའ་ངལ་མང་པོ་ཞིག་མྱངས་བསྡད་པ་རེད་མ་གཏོགས། པཎ་ཆེན་རིན་པོ་ཆེ་ལྟ་བུའི་མཚན་དང་གོ་གནས་ཡོད་པའི་མི་སྣ་ཞིག་གིས། སོ་སོ་སྒེར་གྱི་དོན་དག་བསྒྲུབ་བསྡད་པ་ཡིན་ན། སྐྱིད་པོ་དང་ལྷོད་པོ་བྱས་ནས་མི་ཚེ་སྐྱེལ་རྒྱུ་བྱུང་ཡོད་པ་བརྒྱ་ཆ་བརྒྱ་ཐམ་པ་རེད། ”ཅེས་བརྗོད་སོང་།
གསར་འགོད་པ། པདྨ་མཚོ།
ད་འདི་ལྟར་བསྟས་ཡོང་དུས་བཙན་བྱོལ་ལ་ཡོད་མཁན་ཚོས་ཐབས་བརྒྱ་ཅུས་སྟོང་གི་ང་ཚོའི་རླབས་ཆེན་མི་སྣ་རྣམས་རེ་རེ་བྱས་ནས་ནག་པོ་བཟོ་གི་འདུག ཁ་སང་ཕུན་དབང་མཆོག དེ་རིང་པན་ཆེན་མཆོག་དང་དབུ་མའི་ལམ་་་་་་་་་་་།
ཁ་རྒྱུན་ལ་བསྟོད་མི་ཤེས་པའི་བསྟོད་པ་ལས་སྨོད་མི་ཤེས་མཁན་གྱི་སྨད་པ་དགའ་ཞེས་པ་རང་རེད།