དེ་རིང་ཕྱི་དྲོར་གནས་ཚུལ་འབྱོར་བར། དེ་རིང་བོད་ནང་གི་ཆུ་ཚོད་༢།༣༠ ཙམ་ལ་རྔ་པ་ཀིརྟི་དགོན་པའི་རང་ལོ་ ༡༩ ཡིན་པའི་གྲྭ་བློ་བཟང་བསྟན་པ་ལགས་ཀྱིས་མགོ་ལ་བོད་ཀྱི་རྒྱལ་དར་བྲིས་མ་ཞིག་དཀྲིས་ཤིང་། ལག་ཏུ་༧གོང་ས་མཆོག་གི་སྐུ་པར་ཆེན་པོ་ཞིག་བཟུང་ནས་རྔ་པ་རྫོང་མཁར་གྱི་གཞུང་ལམ་དུ་ཐོན་ཏེ། རྒྱ་གཞུང་གི་སྲིད་བྱུས་ལ་ངོ་རྒོལ་སྐད་འབོད་གནང་བཞིན་གོམ་བགྲོད་བྱས་འདུག་ཅིང་། སྐར་མ་ཁ་ཤས་ལས་མ་འགོར་བར་སྔ་ས་ནས་གྲ་སྒྲིག་བྱས་ཡོད་པའི་ཉེན་རྟོག་དམག་མི་ཐོན་ཏེ་ཁོང་བཙན་ཁྲིད་བྱས་ཡོད་འདུག
དེའི་རྗེས་ཀྱི་གནས་ཚུལ་དང་སྐད་འབོད་ཀྱི་ནང་དོན་སོགས་ད་སྔ་ཤེས་རྟོགས་ཐུབ་མེད་པ་དང་། ཁོང་ནི་བོད་མདོ་སྨད་རྔ་པ་རང་སྐྱོང་ཁུལ་རྔ་པ་རྫོང་རྨེའུ་རུ་མའི་རུ་ཆེན་གཉིས་པ་ནས་ཡིན་ཞིང་། ཕ་ངག་ཆུང་དང་མ་སྒྲོལ་མ་ཆོས་ཁོ་གཉིས་ཀྱི་བུ་ཆུང་བ་ཡིན་པ་དང་། ཆུང་དུས་ནས་རྔ་པ་ཀིརྟི་དགོན་པར་གྲྭ་པ་བྱས་ནས་དེང་སྐབས་རྔ་པ་ཀིརྟི་དགོན་པའི་ནང་བསྟན་སྔོན་འགྲོའི་སློབ་གྲྭའི་འཛིན་གྲྭ་དགུ་བ་ཡིན་འདུག ཁོང་ལ་མ་གཅིག་གི་སྤུན་རྒན་པ་གྲྭ་པ་གཉིས་ཡོད་པའི་གཅིག་དེང་སྐབས་རྒྱ་གར་ལྷོ་ཕྱོགས་འབྲས་སྤུངས་སུ་སློབ་གཉེར་གནང་བཞིན་ཡོད་ལ། གཅིག་རྔ་པ་ཀིརྟི་དགོན་པའི་ནང་དུ་ཡོད་འདུག
དེང་སྐབས་ཀྱི་རྔ་པ་ནི་སྔར་བཞིན་དྲག་ཆས་ཉེན་རྟོག་པ་དང་དམིགས་བསལ་ཉེན་རྟོག་པ་བརྒྱ་ཕྲག་མང་པོས་གོམ་པ་གང་གི་རྒྱབ་ལོགས་ན་དྲག་གནོན་བྱེད་ཆོག་ཆོག་གི་གྲ་སྒྲིག་བྱས་ནས་ཡོད་པའི་དམ་དྲག་གི་འོག་ཏུ་ཡོད་ཅིང་། ནམ་རྒྱུན་ཞི་བའི་མི་མང་ལ་མེ་མདའ་ཁ་གཏད་ནས་ཡོད་པའི་ཉེན་རྟོག་དམག་དཔུང་གི་སྐོར་སྲུང་དང་། བརྙན་ལེན་འཕྲུལ་ཆས་ཧ་ཅང་མང་པོས་ག་ས་གང་དུ་ཁེབ་པར་བྱས་པའི་གནས་སྟངས་ཧ་ཅང་སྡུག་པོ་ཞིག་གི་འོག་ལ་ཡོད་འདུག
གནས་ཚུལ་གཏོང་མཁན་བཞུགས་སྒར་ཀིརྟིའི་བྱེས་པ་གྲྭ་ཚང་གི་བོད་གནས་འབྲེལ་མཐུད་པ་བློ་བཟང་ཡེ་ཤེས་དང་ཀ་ཉག་ཚེ་རིང་གཉིས་ཡིན།
ཚོར་ཤུགས་དྲག་པོས་གསོལ་བ་འདེབས་དོན། ཞི་བདེ་དང་དྲང་བདེན་ལ་དགའ་བའི་ལྷ་མི་ཀུན་གྱིས་སྐུ་ཞབས་ཁོང་ལ་བར་ཆད་མེད་པ་དང་། ཁོང་གི་བསམ་དོན་གྲུབ་པའི་གྲོགས་དང་འཕྲིན་ལས་མཛད་རོགས།
སྙིང་སྟོབས་ཅན་གྱི་དཔའ་བོ་དག། རིམ་བཞིན་གཟི་བརྗིད་ཀྱིས་འདི་ལྟར་བྱོན་ན། ཕང་སེམས་ཀྱི་ན་ཟུག་ཤིན་ཏུ་ཆེ་ཡང་། ང་ཚོའི་མི་རིགས་འདིའི་གནད་དོན་འདི། ལས་དོན་གནད་ཆེན་ཞིག་ཡིན་པས། བྱས་རྗེས་འདི་འདྲ་མེད་ན། ནམ་ཞིག་ལ་སུ་ཞིག་གིས་རང་དབང་སྤྲོད་སྲིད། དཔའ་བོ་ལགས། ཐུགས་རྗེ་ཆེ།
གྲྭ་བ་ཁོང་གིས་སྙིང་སྟོབས་དང་ལྷག་བསམ་ལ་གུས་ཞབས་འབུལ། དཔའ་བོ་ཁོང་གིས་ལམ་སྟོན་ལྟར། བོད་ཕྱི་གཉིས་ནས་ཞི་བའི་ཡར་ལང་སྔར་ལས་ཆེ་རུ་བཏང་ན་རྒྱ་གཞུང་ནས་ཀྱང་འགོག་ཐུབ་རྒྱུ་ཕྱོགས་གང་ལ་བལྟས་ན་བཀའ་མོ་རེད། གནས་སྐབས་སུ་རང་སྲོག་གཏོང་བ་ལྟ་བུའི་ཞི་རྒོལ་མ་གནང་ན་སྙམ།
ལས་འགུལ་འདི་གཉིས་སྨན་དབུ་མའི་ལམ་གྱི་གྲོས་མོལ་བར་ཆད་བྱེད་སྲིད་པ་རེད། བྱུང་ན་གནས་ཚུལ་འདི་རིགས་མ་ལྷག་ན་ཡག་ག་ཡོད་རེད། འོནད་ཀྱང་། རང་ལུས་མེར་སྲེག་མ་བཏང་བར་ལས་འགུལ་འདི་ལྟ་བུ་བྱས་ནས་བཙོལ་ལ་། འགྲོ་ན་སྤྱི་དོན་ལ་ཕན་ཐོགས་ཆེན་པོ་འོངས་ངེས་རེད།
སྙིང་རྗེ་ད་ཁོང་གི་མནར་གཅོད་ཚད་མེད་མྱོང་གི་ཡོད་པ་རེད། ལས་འགུལ་འདི་ཙམ་ལ་ན་གཞོན་ཁོང་གི་སྲོག་ཤོར་ན་ཕངས་པོ་རེད། ང་ཚོ་ལ་བོད་མི་གཅིག་གི་སྲོག་གལ་ཆེན་པོ་རེད་མ་གཏོགས་ལས་འགུལ་འདི་དང་འདི་འདྲ་ཙམ་སྤེལ་པ་དགོས་པ་ཆེན་པོ་མཐོང་མ་སོང་།