གྲོས་ཚོཊ་དྲ་ཚིགས་ནང་ལྐོག་འཛུལ།

རྒྱ་ནག་གསང་བའི་ལས་ཁུངས་ཀྱིས་ཨོ་སི་ཊོ་ལི་ཡའི་གྲོས་ཚོགས་དྲ་ཚིགས་ནང་གསང་འཛུལ་བྱས་ཏེ་གྲོས་ཚོགས་འཐུས་མི་ཚོའི་གློག་འཕྲིན་ལ་ལྐོག་ལྟ་བྱས་ཡོད་འདུག

དེ་རིང་རྒྱལ་སྤྱིའི་གསར་ལམ་ཁག་ཏུ་གནས་ཚུལ་ཐོན་ལྟར་ན། ཨོ་སི་ཊོ་ལི་ཡའི་དངུལ་རྩིས་བསྐྱར་ཞིབ་དུས་དེབ་ (Financial Review) ཞེས་པས་སྙན་ཐོ་ཞིག་བཏོན་པའི་ནང་། ༢༠༡༡ ལོར་རྒྱ་ནག་གཞུང་གི་གསང་བའི་ལས་ཁུངས་ལོ་གཅིག་རིང་ཨོ་སི་ཊོ་ལི་ཡའི་གྲོས་ཚོགས་ཀྱི་དྲ་ཚིགས་ནང་གསང་འཛུལ་བྱས་ཏེ། གྲོས་ཚོགས་ཀྱི་ལས་རིམ་དང་གྲོས་ཚོགས་འཐུས་མི་དག་གི་གློག་འཕྲིན་ལ་ལྐོག་ལྟ་བྱས་ཡོད་སྐོར་འཁོད་ཡོད་འདུག

ཨོ་སི་ཊོ་ལི་ཡ་གཞུང་དང་བདེ་འཇགས་ལས་ཁུངས་ཀྱིས་གསར་འགོད་པར། རྒྱ་ནག་གསང་བའི་ལས་ཁུངས་ཀྱིས་དྲ་ཚིགས་ལ་འཇབ་རྒོལ་བྱས་པའི་ཁྱབ་ཁོངས་རྒྱ་ཆེ་བ་ཙམ་མ་ཟད། དྲ་ཚིགས་མ་ལག་ཡོངས་རྫོགས་ལ་སྟངས་འཛིན་བྱེད་པའི་ཤུགས་རྐྱེན་བཟོ་ཐུབ་ཀྱི་འདུག་ཅེས་བརྗོད་འདུག

ཨོ་སི་ཊོ་ལི་ཡའི་གྲོས་ཚོགས་དྲ་ཚིགས་འདི་གྲོས་ཚོགས་འཐུས་མི་དང་སློབ་སྟོན་པ། ལས་བྱེད་སོགས་ཀྱིས་གཞུང་འབྲེལ་ལས་དོན་གལ་ཆེན་ཁག་གྲོས་བསྡུར་དང་ཕན་ཚུན་འབྲེལ་ལམ་ཆེད་བེད་སྤྱོད་བྱེད་ཀྱི་ཡོད་ཅིང་། གཞུང་ངོས་ནས་དམིགས་བསལ་གསང་རྒྱ་ཆེན་པོ་བྱེད་ཀྱི་མེད་སྟབས། ཐེངས་འདིར་རྒྱ་ནག་གི་དྲ་ཚིགས་གསང་མྱུལ་བ་ཚོ་འཛུལ་ཏེ་རྒྱལ་ཁབ་ཀྱི་སྲིད་བྱུས་དང་ལས་འཆར་ཁག་ལ་ལྐོག་ལྟ་བྱས་ཡོད་འདུག

སྔ་ལོར་ཨོ་སི་ཊོ་ལི་ཡའི་ཨད་བྷེ་སེ་ (ABC) གསར་ཁང་གིས། རྒྱ་ནག་གི་དྲ་ཚིགས་གསང་མྱུལ་བ་ཚོས་ཨོ་སི་ཊོ་ལི་ཡའི་དབུས་གསང་བའི་ལས་ཁུངས་ནས་ཨ་སྒོར་ས་ཡ་མང་པོའི་ལས་འཆར་དང་། ཕྱི་སྲིད་ལས་ཁུངས་དང་ཚོང་འབྲེལ་ལས་ཁུངས་གཉིས་ཀྱི་གསང་བའི་ཡིག་ཆ་བརྐུས་ཡོད་སྐོར་བསྒྲགས་ཡོད།

ན་ནིང་སྐུ་ཞབས་ཌོབ་ནེ་ (Tony Abbott) ལགས་ཨོ་སི་ཊོ་ལི་ཡའི་སྲིད་བློན་ཆགས་རྗེས། ཁོང་གིས་རྒྱལ་ཁབ་ཀྱི་དྲ་ཚིགས་བདེ་འཇགས་སྲུང་སྐྱོབ་ཆེད། རྒྱ་ནག་གི་དཔའ་ཝེ་ (Huawei) བཟོ་རྩལ་ཁེ་ལས་དང་ཚོང་འབྲེལ་མཚམས་འཇོག་བྱས་ཡོད་འདུག དེ་བཞིན། ཨ་རིའི་རྒྱལ་སྲུང་བདེ་འཇགས་ལྷན་ཁང་གིས་ཀྱང་རྒྱ་ནག་གཞུང་གིས་དཔའ་ཝེ་བཟོ་རྩལ་ཁེ་ལས་ཀྱི་ལྟག་སྒོ་བརྒྱུད་ནས་ཨ་རིའི་དྲ་ཚིགས་བདེ་འཇགས་ལ་ཉེན་ཁ་ཡོད་པའི་སྐྱོན་འཛུགས་བྱས་ཡོད།

ད་ལྟའི་ཆར་རྒྱ་ནག་གི་དཔའ་ཝེ་བཟོ་རྩལ་ཁེ་ལས་ཀྱིས་འཛམ་གླིང་ནང་གི་གློག་ཆས་དང་ཁ་པར། སྐུད་མེད་དྲ་ཐག་ (wireless Broadband)། མཐེབ་སྡེར་སོགས་ཐོན་སྐྱེད་བྱེད་ཀྱི་ཡོད་ཀྱང་། ལོ་འགའི་སྔོན་རྒྱ་ནག་གཞུང་གིས་དྲ་ཚིགས་བརྒྱུད་ཨ་རིའི་དམག་དོན་དང་ཕྱི་འབྲེལ་སྲིད་བྱུས་སོགས་ཀྱི་གསང་བ་རྐུ་འཁྱེར་བྱས་པའི་གནས་ཚུལ་ཐོན་རྗེས། ནུབ་ཕྱོགས་རྒྱལ་ཁབ་ཁག་གིས་དཔའ་ཝེའི་ཐོན་སྐྱེད་ལ་རྟོག་ཞིབ་དང་ཚོང་འབྲེལ་ཚོད་འཛིན་བྱེད་མགོ་ཚུགས་ཡོད་ཅིང་། རྒྱལ་ཁབ་དང་ཁེ་ལས་རེ་ཟུང་གིས་མུ་མཐུད་དཔའ་ཝེ་དང་ཚོང་འབྲེལ་ཤུགས་ཆེན་པོ་བྱེད་ཀྱི་ཡོད། དཔེར་ན། རྒྱ་གར་ནང་དར་ཁྱབ་འགྲོ་བཞིན་པའི་སྐུ་མེད་དྲ་ཐག་ཡོ་ཆས་ཊ་ཊ་ཌོབ་ཁོ་མོ་ (Tata docomo) དང་། རེའི་ལན་སི་ (Reliance)། ཝོབ་ཊ་ཧྤོན་ (Vodafone) སོགས་དཔའ་ཝེ་ཁེ་ལས་ཀྱི་ཐོན་རྫས་ཡིན་འདུག

གསར་འགོད་པ། ལྷ་སྐྱབས་རྒྱལ།