བོད་ཀྱི་རིག་གཞུང་དུས་སྟོན།

ཟླ་འདིའི་ཚེས་ ༣ ནས་ ༤ ཉིན་བར། ཧྥ་རན་སིའི་རྒྱལ་ས་ཕ་རི་སིའི་བན་སེན་སྐྱེས་ཚལ་ནང་པའི་དགོན་པའི་ར་སྐོར་དུ། བོད་ཀྱི་རིག་གཞུང་དུས་སྟོན་ཞེས་པ་ཚོགས་ཡོད་ཅིང་། དུས་སྟོན་མཛད་སྒོའི་ཐོག་ཧྥ་རན་སིའི་གྲོས་ཚོགས་གོང་མའི་འཐུས་མི་སྐུ་ཞབས་ཨང་ངྷི་རིས་རྒ་དོང་ལིན་ (Andre Gattolin ལགས་དང་། ཧྥ་རན་སིའི་མཁས་དབང་(katia bufftrille)ཁྭ་ཏ་བྷོ་ཧྥུ་ཐི་རེ་ཡེ་ལགས། ཡུ་རོབ་སྤྱི་འཐུས་གྲྭ་ཐུབ་བསྟན་དབང་ཆེན་ལགས། ཧྥ་རན་སིའི་བོད་རིགས་ཚོགས་པའི་ཚོགས་གཙོ་ཐུབ་བསྟན་རྒྱ་མཚོ་ལགས་གཙོས་བོད་པ་དང་བོད་དོན་རྒྱབ་སྐྱོར་བ་བརྒྱ་ལྷག་འཛོམས་ཡོད་འདུག

རིག་བཟང་ལགས་ཀྱིས་གནས་ཚུལ་བཏང་བ་ལྟར་ན། བོད་ཀྱི་རིག་གཞུང་དུས་སྟོན་འདི་ཧྥ་རན་སིའི་བོད་རིགས་ཚོགས་པས་ལོ་ལྟར་རྒྱལ་ས་ཕ་རི་སིར་གོ་སྒྲིག་ཞུ་བཞིན་ཡོད་ཅིང་། ད་ལོའི་ཉིན་གཉིས་རིང་གི་དུས་སྟོན་སྐབས་སྐུ་མགྲོན་ཚོས་བོད་དོན་གཏམ་བཤད་དང་། སེར་བྱེས་དགེ་བཤེས་བསྟན་འཛིན་མཁས་གྲུབ་ལགས་ཀྱིས་སྒོམ་སྒྲུབ་སྐོར་འཆད་ཁྲིད། རྒྱུད་སྟོད་སྔགས་རམས་པ་བསྟན་འཛིན་སྤེན་པ་ལགས་ཀྱིས་སྤྱན་རས་གཟིགས་ཀྱི་དཀྱིལ་འཁོར་གསར་བཞེངས། མ་འོངས་སོན་རྩ་ཚོགས་པས་བོད་དོན་པར་རིས་འགྲེམས་སྟོན། ཧྥ་རན་སིའི་གློག་བརྙན་འཁྲབ་སྟོན་པ་(Veronique jannot)བེ་རོ་ནེ་ཁོ་བཞོན་ནོག་ལགས་ཀྱིས་བོད་དོན་ཆེད་གླུ་གཞས། ས་གནས་སྐྱིད་སྡུག་ཚོགས་པ་ཁག་དང་ཐང་སྟོང་གཞས་དབྱངས་ཚོགས་པས་གཞས་སྣ་གཟིགས་འབུལ། དེ་བཞིན། བོད་དོན་དངོས་བྱུང་གློག་བརྙན་དང་བོད་ཀྱི་ཅ་དངོས་དང་གྱོན་ཆས་འགྲེམས་ཚོང་། བོད་ཟས་ངོ་སྤྲོད་སོགས་གནང་ཡོད་འདུག