ཆབ་མདོ་མཛོ་སྒང་རྫོང་གི་བོད་མི་ཞིག་གིས་གཏེར་ཁ་སྔོག་འདོན་པར་ངོ་རྒོལ་སྐད་འབོད་དང་མཉམ་ལུས་ལ་གྲི་བཙུཊ་ཡོད་པ་མ་ཟད། ཁང་པའི་ཡང་སྟེང་ནས་མཆོངས་ཏེ་རང་ཤི་བརྒྱབ་འདུག
ཟླ་འདིའི་ཚེས་ ༧ ཉིན་གྱི་ཞོགས་པར་བོད་ནང་གི་ཆབ་མདོ་ཁུལ་མཛོ་སྒང་སྟོང་འབར་ཡུལ་ཚོའི་རང་ལོ་ ༣༩ ཡིན་པའི་བོད་མི་འཕགས་པ་རྒྱལ་མཚན་ཞུ་བ་ཞིག་གིས། རྒྱ་གཞུང་གི་རྒྱལ་མོ་རྔུལ་ཆུའི་ཉེ་འགྲམ་དང་ས་གནས་ཀྱི་ཟེར་གེ་ཨར་གྲོང་གི་ལུང་པའི་མདོར་གསེར་གྱི་གཏེར་ཁ་སྔོག་འདོན་བྱ་འཆར་ཡོད་པའི་ཐད་ངོ་རྒོལ་སྐད་འབོད་དང་མཉམ་དུ་རང་ལུས་ལ་གྲི་བཙུགས་པ་དང་། ཡུལ་ཚོའི་ཐོག་ཁང་གི་ཡང་སྟེང་ནས་མར་མཆོངས་ཏེ་རང་ཤི་བརྒྱབ་ཡོད་འདུག
འདིའི་ཐད་ཨེ་ཤ་རང་དབང་རླུང་འཕྲིན་ཁང་གིས་གནས་ཚུལ་སྤེལ་བ་ལྟར་ན། གནས་ཚུལ་བྱུང་བའི་ཉིན་དེར་འཕགས་པ་རྒྱལ་མཚན་ལགས་ཀྱིས་སྟོང་འབར་ཡུལ་མི་ཚོའི་བོད་མི་ཚོར་ཁྱེད་རྣམ་པས་ངོ་རྒོལ་སྐད་འབོད་བྱེད་མི་དགོས། ངས་གོ་ཆོད་པ་ཞིག་བྱེད་ཆོག་ཟེར་ནས་ཡུལ་ཚོའི་ཁང་པའི་ཐོག་འཛེགས་ཏེ། རྒྱ་ནག་གིས་ང་ཚོའི་ས་གནས་སུ་གཏེར་ཁ་སྔོག་འདོན་བྱེད་མི་ཆོག བོད་མི་ཚོར་རང་དབང་མི་འདུག་ཅེས་སྐད་འབོད་བྱས་ཡོད་འདུག་ལ། སྐབས་དེར་མི་འགའ་ཞིག་གིས་བཀག་འགོག་དང་ཁ་བརྡ་བྱས་ཡོད་ཀྱང་མ་ཉན་པར་མུ་མཐུད་སྐད་འབོད་བྱེད་ཞོར་ལུས་ལ་གྲི་བཙུགས་པ་དང་། ཁང་པའི་ཡང་སྟེང་ནས་མར་མཆོངས་ཏེ་འདས་གྲོངས་སུ་ཕྱིན་ཡོད་འདུག
གནས་ཚུལ་ནང་བཀོད་པ་ལྟར་ན། ཐེངས་འདིའི་གནས་ཚུལ་དེ་ནི་རྒྱ་གཞུང་གིས་ཟླ་གཉིས་ཙམ་གྱི་གོང་ནས་ཆབ་མདོ་ས་ཁུལ་མཛོ་སྒང་རྫོང་སྟོང་འབར་ཡུལ་ཚོ་གེ་ཨར་གྲོང་དུ་གཏེར་ཁ་སྔོག་འདོན་བྱ་རྒྱུའི་འཆར་གཞི་བསྒྲིགས་ཡོད་པར་མ་ཟད། ལས་གཞི་དེའི་ཆེད་དུ་ས་གནས་སུ་ལམ་ཁ་གསར་བཟོ་དང་ཉེ་འདབས་ཀྱི་རྒྱལ་མོ་རྔུལ་ཆུར་ཟམ་པ་ཞིག་ཀྱང་བརྒྱབ་ཚར་ཡོད་འདུག་ལ། གནས་སྟངས་དེ་དག་གི་ཐད་ས་གནས་བོད་མི་ཚོས་ངོ་རྒོལ་བྱ་རྒྱུའི་གྲ་སྒྲིག་བྱེད་སྟབས། ཟླ་ ༤ ཚེས་ ༢༨ ཙམ་ལ་བོད་མི་གཞོན་སྐྱེས་༢༠ ཙམ་སྟོང་འབར་ཡུལ་ཚོར་འཇུ་བཟུང་བཀག་ཉར་བྱས་ཡོད་འདུག སྐབས་དེ་དག་ཏུ་ཡུལ་ཚོའི་ལས་བྱེད་ཚོས་ས་གནས་ཡུལ་མི་དང་བཀག་ཉར་འོག་ཡོད་པའི་བོད་མི་ཚོར་སློབ་གསོ་གཏོང་བ་དང་། ནང་མི་རེར་རྒྱ་སྒོར་ ༡༠༠༠༠ རེ་སྤྲོད་རྒྱུའི་ཁས་ལེན་བྱས་ཀྱང་། ས་གནས་ཡུལ་མི་ཚོས་ངོས་ལེན་མ་བྱས་པར་ལྷག་ཡོད་འདུག ཉེ་ལམ་འཛིན་བཟུང་བྱས་པའི་བོད་མི་དེ་དག་ཀློད་གྲོལ་བཏང་ཡོད་ཀྱང་། འཕགས་པ་རྒྱལ་མཚན་ལགས་ཀྱིས་རྒྱ་ནག་གི་བྱེད་སྟངས་ལ་འདོད་བློ་མ་ཁེངས་པར་རང་ཤི་བརྒྱབས་ཡོད་འདུག
འཕགས་པ་རྒྱལ་མཚན་ལགས་ནི་ཆབ་མདོ་མཛོད་སྒང་རྫོང་། སྟོང་འབར་ཡུལ་ཚོའི་ཆོས་ཤོས་ཚང་གི་བུ་ཆེ་བ་དེ་ཡིན་འདུག་ལ། ཁོང་དང་བཟའ་ཟླ་གཉིས་ལ་ཕྲུ་གུ་གསུམ་ཡོད་འདུག
གསར་འགོད་པ། དོན་གོ
![Changpa nomads walk on a rugged path in Ladakh's Chushul valley [Tarushi Aswani/Al Jazeera]](https://tibettimes.net/wp-content/uploads/2026/10/Screen-Shot-2026-10-16-at-2.29.07-PM-360x180.png)
