རང་སྲེག་གི་བྱུང་རྐྱེན་དང་རྒྱབ་ལྗོངས་ལ་རྟོག་ཞིབ་བྱ་རྒྱུའི་འགན་རྒྱ་གཞུང་ལ་ཡོད།

༧གོང་ས་མཆོག་གིས་ནོར་ཝེ་རྒྱལ་ས་ཨོ་སི་ལོར་བོད་ནང་གི་རང་ལུས་མེར་བསྲེཊ་སྐོར་ནས་གསར་འགོད་པའི་དྲི་བར་ལན་འདེབས་གནང་སྟེ། རང་སྲེག་གནས་ཚུལ་དེ་བོད་མི་ཚོའི་སེམས་ནང་འདོད་བློ་མ་ཁེངས་པའི་རྣམ་པ་སྟོན་བཞིན་ཡོད་སྟབས། རྒྱུ་རྐྱེན་དང་རྒྱབ་ལྗོངས་གནས་སྟངས་ལ་རྟོག་ཞིབ་བྱ་རྒྱུའི་འགན་རྒྱ་ནག་གཞུང་ལ་ཡོད་པ་དང་། རྒྱ་གཞུང་གིས་གནས་ཚུལ་དེའི་སྐོར་ནས་ཁོང་ལ་ཁག་དཀྲི་མི་འདུག་པར། གསར་འགོད་པ་ཚོ་བོད་དུ་བཏང་ནས་དངོས་ཡོད་གནས་སྟངས་ཇི་ཡིན་ཐོག་ངེས་པར་དུ་ཞིབ་འཇུག་བྱེད་འཇུག་དགོས་སྐོར་གསུངས་འདུག

ཉིན་འདི་གར་༧གོང་ས་མཆོག་གིས་ནོར་ཝེར་ཆོས་ཕྱོཊ་ཀྱི་མཛད་འཕྲིན་སྐྱོང་བཞིན་པ་ལྟར། ཁ་སང་ཚེས་ ༨ ཉིན་མང་ཆོཊ་དང་སློབ་ཕྲུག་ཚོར་གང་ཟག་སྒེར་གྱི་ལུས་ངག་ཡིད་གསུམ་གྱི་སྤྱོད་ལམ་དང་འགྱུར་ལྡོག་ཅེས་པའི་བརྗོད་གཞིའི་ཐོག་བགྲོ་གླེང་དང་དྲི་བར་ལན་འདེབས་བཅས་གནང་ཡོད་པ་དང་། སྐབས་དེར་སློབ་ཕྲུག་ཚོས་ཁོར་ཡུག་གི་སྐོར་གྱི་དྲི་བའི་ལན་དུ་༧གོང་ས་མཆོག་གིས། སྤྱིར་ཨ་རི་དང་ཨོ་སི་ཊོ་ལི་ཡ་སོགས་ཡར་ཐོན་ཅན་གྱི་རྒྱལ་ཁབ་མང་པོས་དེང་དུས་ཀྱི་ཚན་རིག་ལག་རྩལ་བེད་སྤྱོད་བཏང་སྟེ་རྒྱ་མཚོའི་ཆུ་གཙང་མར་བཟོས་ཏེ་འཚོ་བའི་ནང་བེད་སྤྱོད་བཞིན་པ་སོཊ་ཚན་རིག་ལག་རྩལ་བེད་སྤྱོད་བྱས་ཏེ་མིའི་རིཊ་ལ་ཕན་ཐོཊ་ངེས་ཅན་ཞིག་ཡོང་གི་ཡོད་ཀྱང་། རྒྱ་དཀར་ནག་སོཊ་སུ་དཔལ་འབྱོར་འཕེལ་རྒྱས་ཀྱི་དབང་གིས་མཁའ་རླུང་འབག་བཙོག་ཤུགས་ཆེ་རུ་འགྲོ་གི་ཡོད་པ་དང་། ནུབ་ཕྱོགས་རྒྱལ་ཁབ་ཁག་ཏུ་ཁྱིམ་ཚང་གཅིག་གི་མི་རེ་རེས་རླངས་འཁོར་རེ་བེད་སྤྱོད་གཏོང་གི་ཡོད་པ་སོཊ་ཀྱིས་ཁོར་ཡུག་ལ་འབག་བཙོག་ཤུཊ་ཆེར་བཟོ་བཞིན་ཡོད་སྟབས། རྒྱས་སྤྲོས་ཅན་གྱི་འཚོ་བ་སྐྱེལ་སྟངས་ལ་ངེས་པར་དུ་འགྱུར་བ་གཏོང་རྒྱུ་གལ་ཆེན་ཡིན་ཚུལ་གསུངས་ཡོད་པར་མ་ཟད། སེམས་ཁམས་སློབ་གསོའི་ཕྱོཊ་ནས་ཀྱང་དེང་དུས་དང་རྒྱ་གར་གྱི་སྔ་མོའི་སེམས་ཁམས་སློབ་གསོ་གཉིས་བསྡུར་ན། དེང་དུས་ཀྱི་སེམས་ཁམས་སློབ་གསོའི་གནས་ཚད་ཧ་ཅང་ཞན་པོ་ཡིན་སྟབས། སེམས་ཁམས་སློབ་གསོའི་སྐོར་ལ་སྔར་ལྷག་ཤུགས་སྣོན་རྒྱག་དགོས་པ་དང་། ནོར་ཝེའི་སློབ་གྲྭ་ཆེ་ཁག་ཏུ་སེམས་ཁམས་ཀྱི་སློབ་གསོའི་ལས་རིམ་ངོ་སྤྲོད་བྱ་རྒྱུ་གལ་ཆེན་ཡིན་ཚུལ་སོཊ་གསུངས་ཡོད་འདུག

ཕྱི་ཚེས་ ༧ ཉིན་༸གོང་ས་མཆོག་ནོར་ཝེ་རྒྱལ་ས་ཨོ་སི་ལོར་ཆིབས་བསྒྱུར་སྐབས་གནམ་ཐང་དུ་གསར་འགོད་པ་ཞིག་གིས། ཐེངས་འདིར་ནོར་ཝེ་གཞུང་འཛིན་མི་སྣས་མཇལ་འཕྲད་ཞུ་རྒྱུ་མིན་པའི་ཐག་གཅོད་གནང་བའི་ཐད་དགོངས་ཚུལ་དྲིས་སྐབས་༧གོང་ས་མཆོག་གིས། ངོས་ཀྱི་ངོས་ནས་འདི་རྒྱུན་ལྡན་གྱི་གནས་སྟངས་ཤིག་ལ་ངོས་འཛིན་བྱེད་བཞིན་ ཡོད། རྒྱལ་ཁབ་ཀྱི་རྩ་དོན་གལ་ཆེན་པོ་རེད། ཡིན་ནའང་། ཏཱ་ལའི་བླ་མ་གཞན་ལ་གནོད་སྐྱེལ་མཁན་ཞིག་མིན་པ་ངོས་ཀྱིས་ཁས་ལེན་ཞུ་ཆོག ངོས་ཀྱིས་ལས་དོན་གལ་ཆེ་ཤོས་མང་ཚོགས་དང་ཐུག་ཏེ་ང་ཚོ་འཛམ་གླིང་འདིར་འཚོ་གནས་བྱེད་བཞིན་པའི་མི་ཐེར་འབུམ་ ༧ ཚང་མ་འགྲོ་བ་མིའི་རིཊ་གཅིག་མཚུངས་ཡིན་བསམ་པའི་འདུ་ཤེས་ཐོག་ནས། འགྲོ་ བ་མིའི་གཞི་རྩའི་བཟང་པོའི་ཡོན་ཏན་གོང་མཐོར་གཏོང་ཐབས་བྱ་རྒྱུར་ངོས་འཛིན་བྱེད་བཞིན་ཡོད། དཀའ་ངལ་ཆེན་པོར་འཕྲད་སྐབས་ང་ཚོས་འཛམ་གླིང་སྤྱིར་ཕན་གནོད་ཇི་འདྲ་ཞིག་ཡོང་མིན་ལ་བསམ་བློ་གཏོང་དགོས་པ་ལས། ང་ཚོ་དང་ཁོ་ཚོའི་རྒྱལ་ཁབ་ཀྱི་ཁེ་ཕན་གཙོ་བཟུང་བྱ་རྒྱུ་མེད། ཆབ་སྲིད་དང་དཔལ་འབྱོར། ཆོས་ལུགས། ཤེས་ཡོན་བཅས་ལས་དོན་ཇི་འདྲ་ཞིག་སྤེལ་ཡང་འགྲོ་བ་མིའི་གཞི་རྩའི་རིན་ཐང་གཞི་རྩར་བཞག་ཏེ་ཕུགས་རྒྱང་རིང་པོར་སྨན་པའི་བསམ་བློ་གཏོང་དགོས། ངོས་རང་ཡུལ་འདིར་ཡོང་སྐབས་ཆབ་སྲིད་ཀྱི་དམིགས་ཡུལ་ཡོད་ན་བློ་ཁ་མ་ཁེངས་པ་ཡོང་སྲིད་ཀྱང་། ངོས་ལ་ཆབ་སྲིད་ཀྱི་རེ་དོགས་གང་ཡང་མེད་སྟབས། བློ་ཁ་མ་ཁེངས་པ་བྱེད་དགོས་དོན་གང་ཡང་མེད། ཅེས་གསུངས་འདུག

ཉིན་དེར་༧གོང་ས་མཆོག་ནོ་སྦེལ་ཞི་བདེའི་གཟེངས་རྟགས་ཚོགས་ཆུང་གིས་གཟེངས་རྟགས་འབུལ་བཞེས་གནང་སྟེ་ལོ་ ༢༥ འཁོར་བའི་དུས་དྲན་མཛད་སྒོའི་ཐོག་ཕེབས་ཏེ་བཀའ་སློབ་དང་གསར་འགོད་པའི་དྲི་བར་ལན་འདེབས་གནང་ཡོད་འདུག སྐབས་དེར་གསར་འགོད་པ་ཞིག་གིས་༧གོང་ས་མཆོག་ལ་ཐེངས་འདིར་ནོར་ཝེ་གཞུང་འབྲེལ་མི་སྣ་དང་གྲོས་ཚོགས་ཀྱི་ཚོགས་གཙོ་བཅས་ཀྱིས་མཇལ་འཕྲད་ཞུ་རྒྱུ་མིན་པའི་ཐག་གཅོད་ལ་བློ་ཕམ་བྱུང་མིན་དྲིས་པའི་ལན་དུ་༧གོང་ས་མཆོག་གིས། བློ་ཕམ་རྩ་བ་ནས་མེད་ལ་བློ་ཕམ་ཡོང་དགོས་དོན་ཡང་མེད། ངོས་ཀྱི་དམིགས་ཡུལ་གཙོ་བོ་འགྲོ་བ་མིའི་རིན་ཐང་གོང་མཐོར་གཏོང་ཐབས་བྱ་རྒྱུ་དེ་ཡིན། ང་ཚོ་སྐྱེས་པ་ནས་རང་ཉིད་ཀྱིས་བྱམས་བརྩེའི་འཚོ་བ་མྱོང་བ་ཙམ་དུ་མ་ཟད། གཞན་གྱི་བདེ་སྡུག་ལ་ཚོར་བ་ཡོང་བཞིན་ཡོད་སྟབས། ང་ཚོར་བྱམས་བརྩེའི་བློའི་ས་བོན་ཡོད་པ་འདི་སྐྱེད་སྲིང་བྱེད་དགོས། ལུས་པོའི་འཕྲོད་བསྟེན་ཡག་པོ་ཞིག་ཡོང་བ་ལའང་སེམས་ལ་ཞི་བདེ་དགོས་རྒྱུ་ཧ་ཅང་གལ་ཆེན་པོ་ཡིན། དེང་སྐབས་ཚན་རིག་པ་ཚོས་ཤེས་རྟོགས་བྱུང་ཡོད། སྤྱིར་བཏང་མི་ཚོས་བྱམས་པ་དང་བརྩེ་བ་བརྗོད་སྐབས་ཆོས་ཀྱི་སྐད་ཆ་རེད་ཅེས་པའི་བསམ་ཚུལ་འཛིན་བཞིན་ཡོད། འོན་ཀྱང་དོན་དངོས་ཐོག་བྱམས་པ་དང་བརྩེ་བའི་རིན་ཐང་ནི་འགྲོ་བ་མིའི་སྤྱི་ཚོགས་ཀྱི་འཚོ་བའི་གོམས་གཤིས་ནང་ཧ་ཅང་དགོས་མཁོ་ཆེན་པོ་ཞིག་ཡིན། ངོས་རང་ནང་པའི་དགེ་སློང་ཞིག་ཡིན་པའི་ཆ་ནས་ཆོས་ལུགས་མཐུན་སྒྲིལ་གོང་མཐོར་གཏོང་རྒྱུའི་ལས་དོན་ལ་དོ་དབྱིངས་ཡོད། ཅེས་གསུངས་ཡོད་འདུག

བོད་ནང་གི་རང་ལུས་མེར་བསྲེཊ་ཐད་ཀྱི་དྲི་བར་ལན་འདེབས་གནང་སྐབས་༧གོང་ས་མཆོག་གིས། གནས་སྟངས་འདི་ནི་ཧ་ཅང་བློ་ཕམ་གྱི་རང་བཞིན་རེད། ཚབས་ཆེའི་ལས་འགུལ་དེ་དག་ནད་ཀྱི་མཚོན་རྟགས་ལྟ་བུ་རེད། གནས་ཚུལ་དེ་དག་གི་རྒྱབ་ལྗོངས་དུ་བོད་མི་ཚོའི་སེམས་ནང་འདོད་བློ་མ་ཁེངས་པའི་རྣམ་པ་ཡོད་པ་མཚོན་བཞིན་ཡོད་སྟབས། གནས་ཚུལ་དེ་དག་ཡོང་དགོས་པའི་རྒྱུ་རྐྱེན་གཙོ་བོ་གང་ཡིན་གྱི་རྒྱབ་ལྗོངས་གནས་སྟངས་ལ་རྟོག་ཞིབ་བྱ་རྒྱུར་རྒྱ་ནག་གཞུང་ལ་འགན་ཡོད། འོན་ཀྱང་། རྒྱ་ནག་གཞུང་གིས་དངོས་ཡོད་གནས་ཚུལ་ལ་རྟོག་ཞིབ་མ་བྱས་པར་ངོས་ལ་ཁག་དཀྲི་བྱེད་བཞིན་ཡོད། རྒྱ་ནག་གཞུང་གིས་གསར་འགོད་པ་ཚོ་བོད་དུ་བཏང་ནས་དངོས་ཡོད་གནས་སྟངས་ཇི་ཡིན་ཐོག་ངེས་པར་དུ་ཞིབ་འཇུག་བྱེད་འཇུག་དགོས། རང་ལུས་མེར་སྲེག་གཏོང་མཁན་བོད་མི་དེ་དག་ཆང་སོགས་ཀྱི་བཟི་བ་དང་ནང་མིའི་དཀའ་ངལ་འཕྲད་ནས་རང་སྲེག་བྱས་པ་དེ་འདྲ་མིན། ཁོང་ཚོས་དེ་ལྟར་བྱས་པ་དེར་རྒྱུ་རྐྱེན་གཞན་ཞིག་ཡོད། ཅེས་གསུངས་ཡོད་འདུག

དོལ་རྒྱལ་ཚོགས་པས་གཞུང་ལམ་དུ་ངོ་རྒོལ་བྱས་པའི་སྐོར་ལ་ལན་འདེབས་གནང་སྐབས་༧གོང་ས་མཆོག་གིས། ངོས་དུས་རྟག་ཏུ་སོ་སོའི་ཕ་མེས་ཀྱི་ཆོས་ལུགས་རྒྱུན་འཁྱོངས་བྱ་རྒྱུ་ཧ་ཅང་གལ་ཆེ་ཡིན་སྐོར་བརྗོད་བཞིན་ཡོད། མི་ཁ་ཤས་ལ་ནང་ཆོས་དེས་ཕན་ཐོགས་ཆེ་བ་ཡོད་ན་དེ་ལྟར་བྱེད་མིན་སོ་སོའི་རང་དབང་རེད། བཅོམ་ལྡན་འདས་ཀྱིས་རྗེས་འཇུག་ཚོར་བཅོམ་ལྡན་འདས་ལ་དད་པ་ཙམ་ལ་ཆ་མ་བཞག་པར་བཀའ་ལ་དཔྱད་པ་བྱེད་དགོས་གསུངས་ཡོད། ངོ་རྒོལ་བྱེད་མཁན་ཚོར་མཚོན་ན། སྤྱིར་རྡོ་རྗེ་ཤུགས་ལྡན་སྐོར་དེ་ལོ་རྒྱུས་རིང་པོ་རེད། ལོ་ངོ་བཞི་བརྒྱའི་གོང་༸རྒྱལ་བ་ལྔ་པའི་སྐབས་ནས་གླེང་གཞི་ཅན་གྱི་དྲེགས་པ་ཞིག་ཆགས་ཡོད། ༸རྒྱལ་བ་ལྔ་པས་སྨོན་ལམ་ལོག་པའི་དམ་སྲི་འབྱུང་པོ་། བསྟན་པ་དང་འགྲོ་བ་ལ་འཚེ་བ་བྱེད་མཁན་ཞིག་ལ་ངོས་འཛིན་གནང་ཡོད། ༸རྒྱལ་བ་ལྔ་པའི་རྗེས་སུ་བླ་ཆེན་མང་པོས་ཤུགས་ལྡན་ལ་དམ་བསྒྲགས་གནང་ཡོད་པ་མ་ ཟད། ༸རྒྱལ་བ་སྐུ་ཕྲེང་བཅུ་གསུམ་པ་ཆེན་པོ་མཆོག་གིས་ཤུགས་ལྡན་དར་སོ་དེ་ཙམ་མེད་ཀྱང་དེར་དམ་བསྒྲགས་གནང་ཡོད། ངོས་ཀྱིས་ནོར་བ་རེད། ངོས་ཀྱིས་མ་ཤེས་པར་ཕྱི་ལོ་ ༡༩༥༡ ནས་ ༡༩༧༠ འགོ་སྟོད་བར་ཤུགས་ལྡན་བསྟན་པ་རེད།

ཕྱིས་སུ་ངོས་ཀྱིས་དེར་མ་འགྲིག་པ་ཞིག་ཡོད་པ་ཤེས་ནས་བརྟག་དཔྱད་བྱེད་སྐབས། ༸གོང་ས་ལྔ་པ་ཆེན་པོ་མཆོག་དང་༸གོང་ས་སྐུ་ཕྲེང་བཅུ་གསུམ་པ་ཆེན་པོས་དམ་བསྒྲགས་གནང་བ་གཞི་ནས་ཤེས་བྱུང་། དེའི་རྗེས་ངོས་དོལ་རྒྱལ་བསྟེན་རྒྱུ་མཚམས་འཇོག་བྱས་པ་ཡིན། དེ་ནས་རིམ་བཞིན་མང་ཚོགས་ཀྱིས་གནས་ཚུལ་ཤེས་སྟབས་དེའི་སྐོར་མང་ཚོགས་ལ་འགྲེལ་བཤད་རྒྱག་རྒྱུ་ངོས་ཀྱི་ལས་འགན་རེད། དོལ་རྒྱལ་རྗེས་འབྲང་པ་ཚོས་ཚོགས་པ་བཙུགས་ནས་ངོས་ཀྱིས་དོལ་རྒྱལ་བཀག་སྡོམ་བྱེད་ཀྱི་ཡོད་པ་བརྗོད་བཞིན་ཡོད། དངོས་ཡོད་གནས་སྟངས་དེ་འདྲ་མ་རེད། རྒྱ་གར་ལྷོ་ཕྱོགས་ལ་དགོན་པ་ཆེ་ཐག་ཆོད་ཡོད་པའི་ནང་དོལ་རྒྱལ་མུ་མཐུད་བསྟེན་ བཞིན་ཡོད་པ་ཟུར་བལྟས་ལེབ་མཐོང་རེད། བླ་མ་དང་སློབ་མའི་དབར་དམ་ཚིག་གཙང་མ་དགོས་སྟབས་དོལ་རྒྱལ་བསྟེན་འདོད་ཡོད་ན་ངོས་ཀྱི་སར་ནས་ཆོས་མ་ཞུ་རོགས་ཞེས་བརྗོད་ཀྱི་ཡོད། དེ་འདྲ་བརྗོད་པ་དེར་ཁོང་ཚོས་དམ་བསྒྲགས་བྱས་པ་རེད་ཅེས་བརྗོད་བཞིན་ཡོད། དོལ་རྒྱལ་རྗེས་འབྲང་པ་ཚོས་ངོས་ལ་སྐྱག་རྫུན་མ་ཤོད། ཅེས་སྐད་འབོད་རྒྱག་བཞིན་ཡོད། སྐྱག་རྫུན་སུས་ཤོད་ཀྱི་འདུག ངོས་ཀྱིས་ཆོས་ལུགས་རིས་མེད་བྱེད་དགོས་པའི་ལམ་སྟོན་བྱེད་བཞིན་ཡོད། དོལ་རྒྱལ་བསྟེན་པས་ཆོས་ལུགས་འགལ་ཟླ་འགྲོ་བཞིན་ཡོད། ངོས་ལ་ངོ་རྒོལ་བྱེད་མཁན་དོལ་རྒྱལ་རྗེས་འབྲང་པ་ཚོས་དངོས་ཡོད་གནས་ཚུལ་མ་ཤེས་པར་དེ་ལྟར་བྱེད་བཞིན་ཡོད་སྟབས། ཡ་ང་སྙིང་རྗེ་བསམ་པ་དྲན་གྱི་འདུག ཅེས་གསུངས་ཡོད་འདུག

གསར་འགོད་པ། དོན་གོ