བོད་མི་ཚོས་ལས་འགུལ་མཚམས་མི་འཇོག

དེ་རིང་ཉིན་རྒྱབ་ཆུ་ཚོད་ ༡ ཐོག་དྷ་ས་མེག་གྷན་རླངས་འཁོར་འབབ་ཚུགས་སུ། བོད་རང་བཙན་སློབ་ཕྲུག་ཚོགས་པ་དང་། ས་གནས་གཞོན་ནུ་དང་བུད་མེད་བཅས་ཀྱི་གོ་སྒྲིག་འོག པཎ་ཆེན་སྐུ་ཕྲེང་བཅུ་གཅིག་པ་དགེ་འདུན་ཆོས་ཀྱི་ཉི་མ་མཆོག་རྒྱ་གཞུང་གིས་བཙན་འཁྲིད་བྱས་ཏེ་ལོ་ངོ་ ༡༩ འཁོར་བའི་དུས་དྲན་སྲུང་གཙི་དང་འབྲེལ། རྒྱ་ནག་གཞུང་གིས་ཁོང་འཕྲལ་དུ་ཀློད་གྲོལ་གཏོང་དགོས་བའི་ངོ་རྒོལ་ལས་འགུལ་ཞིག་སྤེལ་སོང་།

ལས་འགུལ་དེའི་དམིགས་ཡུལ་སྐོར་ལ། བོད་རང་བཙན་སློབ་ཕྲུག་ཚོགས་པའི་ཨེ་ཤ་ཡའི་འགན་འཛིན་རྡོ་རྗེ་ཚེ་བརྟན་ལགས་ཀྱིས། དེ་རིང་པཎ་ཆེན་ཆུང་སྲིད་རིན་པོ་ཆེ་མཆོག་རྒྱ་གཞུང་གིས་བཙན་ཁྲིད་བྱས་ཏེ་ལོ་ ༡༩ འཁོར་བཞིན་ཡོད། རྒྱ་གཞུང་གིས་ཁོང་བཙན་འཁྲིད་བྱེད་སྐབས་དགུང་ལོ་ ༦ ཡིན་ཞིང་རྒྱལ་སྤྱིའི་ཐོག་གི་ཆབ་སྲིད་བཙོན་པ་ཆུང་ཤོས་དེ་ཆགས་ཡོད། འདས་པའི་ལོ་ངོ་བཅུ་དྲུག་རིང་བོད་གཞིས་བྱེས་གཉིས་ཀྱི་བོད་མི་ཚོས་པཎ་ཆེན་རིན་པོ་ཆེ་སེམས་ནས་མ་བརྗེད་པར་དུས་ནས་དུས་སུ་ལས་འགུལ་དང་འདུ་འཛོམས། མཆོད་འབུལ་སོགས་གནང་གི་ཡོད། རྒྱ་གཞུང་གིས་བོད་ཀྱི་ཆོས་བརྒྱུད་ཀྱི་ཐུན་མོང་མིན་པའི་ཡང་སྲིད་ཁྲི་འདོན་བྱ་རྒྱུའི་བརྒྱུད་རིམ་ལ་ཐེ་ཇུས་བྱས་ཏེ། པཎ་ཆེན་ཡང་སྲིད་རྫུན་མ་ཞིག་ཁྲི་འདོན་གྱིས་རྒྱལ་སྤྱིར་ཁྱབ་བསྒྲགས་བྱེད་བཞིན་ཡོད། འོན་ཀྱང་བོད་གཞིས་བྱེས་གཉིས་ཀྱི་བོད་མི་ཚོས་ཞིང་གཤེགས་པཎ་ཆེན་ཨེར་ཏི་ནི་ཆོས་ཀྱི་རྒྱལ་མཚན་མཆོག་གི་ཡང་སྲིད་ངོ་མ་དེ་༧གོང་ས་མཆོག་གིས་ངོས་འཛིན་གནང་བའི་པཎ་ཆེན་དགེ་འདུན་ཆོས་ཀྱི་ཉི་མ་ཡིན་པར་སེམས་གཏིང་ནས་ཡིད་ཆེས་དང་དད་པ་བྱེད་ཀྱིན་ཡོད། ཅེས་དང་།

ཁོང་གིས་མུ་མཐུད་དུ། དེ་སྔ་ང་ཚོས་ལས་འགུལ་རབ་དང་རིམ་པ་སྤེལ་སྐབས་རྒྱ་གཞུང་དང་། ཕྱི་རྒྱལ་དུ་ཡོད་པའི་རྒྱ་ནག་གཞུང་ཚབ་ཁང་ཁག་གིས་གསལ་བཤད་ལན་འདེབས་མི་བྱེད་ཐབས་མེད་ཆགས་མྱོང་ཡོད། རྒྱ་གཞུང་གིས་པཎ་ཆེན་རིན་པོ་ཆེ་མཆོག་བདེ་ཐང་ཡིན་པ་དང་། ཡབ་ཡུམ་ལྷན་དུ་ཡོད་པ་སོགས་ཕྱི་ལོགས་བོད་མི་ཚོས་ཁོང་གི་སྐུ་ཕྱྭར་བྱུས་གཏོགས་བྱེད་མི་དགོས་པའི་ལན་འདེབས་བྱས་ཡོད་ཀྱང་། རྒྱལ་སྤྱིའི་ཐོག་ནས་རྒྱ་གཞུང་གི་སྐད་ཆར་ཡིད་ཆེས་མ་བྱས་པར། དོན་དངོས་ཐོག་ཆུང་སྲིད་རིན་པོ་ཆེ་ག་པར་འཚོ་བཞུགས་ཡོད་མེད་དང་ག་རེ་གནང་གི་ཡོད་མེད་ཐད་གནོན་ཤུགས་མང་པོ་སྤྲད་ཡོད་ཀྱང་། རྒྱ་གཞུང་གིས་ད་བར་ཁ་གསལ་གཏིང་གསལ་གྱི་ལན་ཞིག་འདེབས་ཐུབ་མེད། དེ་རིང་གསར་ལམ་ཁག་བརྒྱུད་ནས་རྒྱ་གཞུང་ལ་བཤད་རྒྱུ་ཞིག་ནི། པཎ་ཆེན་ཆུང་སྲིད་རིན་པོ་ཆེ་མཆོག་ཀློད་གློལ་མ་བཏང་བར་བོད་མི་ཚོས་ལས་འགུལ་དུས་ནམ་ཡང་མཚམས་འཇོག་བྱ་རྒྱུ་མིན་ལ། རྒྱ་གཞུང་གིས་བསྐོ་བཞག་བྱས་པའི་པཎ་ཆེན་རྫུན་མ་དེར་བོད་གཞིས་བྱེས་གཉིས་ཀྱི་བོད་མི་སུ་གང་གིས་ཀྱང་ངོས་ལེན་བྱེད་རྒྱུ་མིན། ཞེས་སོགས་བརྗོད་སོང་།

དྷ་ས་ས་གནས་གཞོན་ནུའི་རྒྱུན་ལས་ཉི་མ་དབྱངས་མཚོ་ལགས་སུ། པཎ་ཆེན་རིན་པོ་ཆེའི་གནས་སྟངས་དང་འབྲེལ་བའི་ཐོག་བཅར་འདྲི་ཞུས་པར་ཁོ་མོས། པཎ་ཆེན་རིན་པོ་ཆེ་མཆོག་ད་དུང་མཇལ་རྒྱུ་མེད་སྟབས་སེམས་པ་ཧ་ཅང་སྐྱོ་བོ་འདུག ང་ཚོའི་བླ་མ་རྩ་ཆེན་པོ་དེ་དགུང་ལོ་ ༦ ནས་བཟུང་སུ་གང་ལའང་མཇལ་རྒྱུ་བྱུང་མེད་སྟབས། པཎ་ཆེན་ཆུང་སྲིད་རིན་པོ་ཆེ་མཆོག་ལ་ག་དུས་ཞལ་མཇལ་འཐོབ་ཀྱི་ཡོད་ན་བསམས་ནས་རེ་སྒུག་བྱས་བསྡད་ཡོད་པ་རེད། ཅེས་བརྗོད་བྱུང་།

དྷ་ས་ས་གནས་བུད་མེད་ལྷན་ཚོགས་ཀྱི་རྒྱུན་ལས་བདེ་སྐྱིད་ལྷ་མོ་ལགས་ཀྱིས། རྒྱ་གཞུང་གིས་ཀུན་གཟིགས་པཎ་ཆེན་རིན་པོ་ཆེ་མཆོག་ཆུང་བྱིས་པའི་དུས་ནས་འཇུ་བཟུང་བྱས་ཏེ་ད་བར་གར་སོང་ཆ་མེད་ཆགས་ཡོད་སྟབས། གཞུང་འབྲེལ་མིན་པའི་ཚོགས་པ་ཁག་གིས་མ་སྐུལ་དང་བླངས་ཐོག རྒྱ་ནག་གཞུང་གིས་ཁོང་གང་མགྱོགས་ཀློད་གྲོལ་དགོས་པའི་ལས་འགུལ་སྤེལ་བཞིན་ཡོད། ང་ཚོར་མཚོན་ན། ཆུང་དུས་ནས་ཕ་མ་དང་མཉམ་དུ་རྒྱ་གར་ནང་བསླེབས་ནས་སྐྱིད་པོ་བྱས་ཏེ་འཚོ་བ་སྐྱེལ་རྒྱུའི་གོ་སྐབས་ཐོབ་ཡོད་ཀྱང་། པཎ་ཆེན་ཆུང་སྲིད་མཆོག་ཕྲུ་གུ་ཆུང་ཆུང་ཡིན་དུས་ནས་བཟུང་རྒྱ་གཞུང་གིས་འཛིན་བཟུང་བྱས་ཏེ་བཙོན་མུན་དུ་བཞུགས་དགོས་བྱུང་ཡོད་པ་དེར་བསམ་ན་སེམས་སྡུག་དང་བློ་ཕམ་ཆེན་པོ་སྐྱེ་ཡི་འདུག ཅེས་བརྗོད་བྱུང་།

གསར་འགོད་པ། དོན་གྲུབ།