མཉམ་འབྲེལ་རྒྱལ་ཚོགས་བདེ་འཇགས་ཚོགས་ཆུང་གི་ཚོགས་མའི་རྒྱལ་ཁབ་ཚོས། ནེ་ཇི་རི་ཡའི་བྷོ་ཁཱོ་ཧཱ་རམ་ཤོག་ཁག་དེ་འཇིགས་སྐུལ་དྲག་སྤྱོད་པ་ཡིན་པའི་ངོས་འཛིན་འོག་མཉམ་འབྲེལ་གྱིས་ཁ་གཏད་གཅོག་རྒྱུ་ཡིན་ཟེར།
གཟའ་ཕུར་བུའི་ཉིན། མཉམ་འབྲེལ་རྒྱལ་ཚོགས་བདེ་འཇགས་ལྷན་ཁང་གི་ཚོགས་མིའི་རྒྱལ་ཁབ་ཁག་ཐུན་མོང་གིས་གསར་འགོད་གསལ་བསྒྲགས་སྤེལ་ཏེ། ཨ་ཧྥི་རི་ཁའི་རྒྱལ་ཁབ་ནེ་ཇི་རི་ཡའི་ནང་གི་བྷོ་ཁཱོ་ཧཱ་རམ་(Boko Haram) ཤོག་ཁག་དང་། ཨལ་ཁཱ་ཌ་(Al-Qaeda) འཇིགས་སྐུལ་དྲག་སྤྱོད་རུ་ཁག་བར་འབྲེལ་བ་ཡོད་པ་དང་། བྷོ་ཁཱོ་ཧཱ་རམ་ཤོག་ཁག་གིས་གང་བྱུང་མི་གསོད་ཁྲག་སྤྱོར་དོན་རྐྱེན་བཟོས་པ་དང་ཉེས་མེད་སློབ་ཕྲུག་བཙན་འཁྲིད་བྱས་པ་སོགས་ལ་བརྟེན། འཇིགས་སྐུལ་རིང་ལུགས་པར་ངོས་འཛིན་བྱ་རྒྱུ་ཡིན་པ་མ་ཟད། ཁོ་ཚོའི་འགྲོ་འོང་དང་གོ་མཚོན། རོགས་དངུལ་སོགས་བཀག་སྡོམ་གྱིས་གདོང་ལེན་བྱ་རྒྱུ་ཡིན་སྐོར་བསྒྲགས་འདུག
འདིའི་ཐད་མཉམ་འབྲེལ་རྒྱལ་ཚོགས་ཀྱི་འཇིགས་སྐུལ་དྲག་སྤྱོད་རྒོལ་རྡུང་ཚོགས་ཆུང་གི་ཚོགས་གཙོ་གྷེ་རི་ཁུན་ལན་ (Gary Quinlan) གྱིས། “ང་ཚོར་ཨལ་ཁཱ་ཌ་འཇིགས་སྐུལ་རིང་ལུགས་པས་བྷོ་ཁཱོ་ཧཱ་རམ་དྲག་སྤྱོད་པར་འབར་རྫས་བཟོ་སྟངས་ཀྱི་སྦྱོང་བརྡར་སྤྲད་ཡོད་པ་མ་ཟད། ཧྥི་ལི་ཕིན་གྱི་རྒྱལ་ས་མཱ་ལེ་གཙོས་རྒྱལ་སྤྱིའི་ནང་དྲག་སྤྱོད་ལས་འགུལ་སྤེལ་བཅུག་ཡོད་པའི་ཁུངས་སྐྱེལ་བྱ་རྒྱུ་ཡོད་སྟབས། རྒྱལ་ཚོགས་ངོས་ནས་བྷོ་ཁཱོ་ཧཱ་རམ་ལ་ཁ་གཏད་དང་ཉེས་ཆད་གཏོང་རྒྱུ་ཡིན།” ཞེས་བརྗོད་འདུག
ནེ་ཇི་རི་ཡའི་མཉམ་འབྲེལ་རྒྱལ་ཚོགས་ཀྱི་སྐུ་ཚབ་ཡུ་ཇོའུ་ (U. Joy Ogwu) ཡིས། “ ནེ་ཇི་རི་ཡའི་བརྟན་བརླིང་སྲུང་སྐྱོབ་ལ་འགོག་རྐྱེན་བཟོ་མཁན་གཙོ་བོ་བྷོ་ཁཱོ་ཧཱ་རམ་དྲག་སྤྱོད་ཤོག་ཁག་ཡིན་སྟབས། ང་ཚོས་རྒྱལ་ཚོགས་ཀྱི་དཔུང་རོགས་ལ་བརྟེན་ཏེ་ཁོ་ཚོ་རྩ་མེད་བཟོ་རྒྱུ་ཡིན།” ཞེས་བརྗོད་འདུག
ཨ་རིའི་མཉམ་འབྲེལ་རྒྱལ་ཚོགས་ཀྱི་སྐུ་ཚབ་ལྕམ་སོ་མན་ཌ་(Samantha Power) ཡིས། “ རྒྱལ་ཚོགས་ཀྱིས་བྷོ་ཁཱོ་ཧཱ་རམ་དྲག་སྤྱོད་པར་རྒོལ་རྡུང་གཏོང་རྒྱུའི་གྲོས་ཆོད་དེར་ཨ་རིས་མཐའ་གཅིག་ཏུ་རྒྱབ་སྐྱོར་ཡོད།”ཅེས་བརྗོད་འདུག
ཐོག་མ་ ༢༠༠༢ ལོར་ཡུ་སེབ་ (Mohammed Yusuf) ཟེར་བའི་མི་ཞིག་གིས་ནེ་ཇི་རི་ཡའི་བྱང་ཕྱོགས་སུ། བྷོ་ཁཱོ་ཧཱ་རམ་ཞེས་པའི་སྒྲིག་འཛུགས་དེ་བཙུགས་ཡོད་ཅིང་། ད་ལྟའི་བྷོ་ཁཱོ་ཧཱ་རམ་གྱི་མགོ་གཙོ་ཨ་བྷུ་བྷ་ཁར་ (AbubakarShekau)གྱིས། ནེ་ཇི་རི་ཡའི་བྱང་ཕྱོགས་ས་ཁུལ་གྱི་ཁ་ཆེ་མི་རིགས་ཚོར་རྒྱལ་ཁབ་ལོགས་སུ་དགོས་པའི་རེ་འདུན་འོག་དྲག་སྤྱོད་སྣ་ཚོགས་སྤེལ་ཏེ། ༢༠༠༩ ལོ་ནས་ད་བར་མི་སེར་ ༡༢༠༠༠ ལྷག་གི་ཚེ་སྲོག་ཤོར་ཡོད་པ་དང་མི་ ༨༠༠༠ ཙམ་ཞིག་ལ་རྨས་སྐྱོན་བཟོས་ཡོད་འདུག
ཉེ་ལམ་ཕྱི་ཟླ་ ༤ ཚེས་ ༡༤ ཉིན་རྒྱལ་ས་ཨ་བྷུ་ཇཱའི་སྤྱི་སྤྱོད་རླངས་འཁོར་འབབ་ཚུགས་སུ་འབར་གས་དོན་རྐྱེན་བཟོས་ཏེ་མི་ ༧༠ བསད་ཅིང་། ཆི་བྷོག་(Chibok)འབྲིང་རིམ་སློབ་གྲྭའི་སློབ་ཕྲུག་བུ་མོ་ ༢༧༦ བཙན་འཁྲིད་བྱས་ཡོད་ལ། ཟླ་འདིའི་ཚེས་ ༢ ཉིན་རླངས་འཁོར་གྱི་འབར་གས་དོན་རྐྱེན་བཟོས་ཏེ་མི་ ༡༩ བསད་ཡོད།
ཚེས་ ༥ ཉིན་བྷོ་ཁཱོ་ཧཱ་རམ་དྲག་སྤྱོད་པས་གྷམ་བྷོ་རུ་གྷ་ལཱ་ (GamboruNgala) གྲོང་བརྡལ་དུ་འཇབ་རྒོལ་བྱས་ཏེ་མི་ ༣༠༠ དམར་གསོད་བཏང་ཡོད་ཅིང་། ཚེས་ ༡༨ ཉིན་ནེ་ཇི་རི་ཡའི་འདུ་ཚོགས་ཆེ་བའི་ཁཱ་ནོ་ (Kano) གྲོང་ཁྱེར་གྱི་ཁྲོམ་གཞུང་དུ་རང་མེད་མི་མེད་བཟོ་མཁན་གྱི་བྱ་སྤྱོད་སྤེལ་ཏེ་མི་ ༣ བསད་ཡོད་འདུག་ལ། ཚེས་ ༢༠ ཉིན་ཇོའོ་སེ་ (Jos) གྲོང་ཁྱེར་གྱི་དཀྱིལ་དུ་འབར་གས་དོན་རྐྱེན་གཉིས་བཟོས་ཏེ་མི་ ༡༡༨ བསད་ཡོད།
ཟླ་འདིའི་ཚེས་ ༦ ཉིན་ཨ་རིའི་སྲིད་འཛིན་ཨོ་བྷ་མས། ནེ་ཇི་རི་ཡའི་གཞུང་ལ་རོགས་རམ་བྱས་ཏེ་བྷོ་ཁཱོ་ཧཱ་རམ་གྱིས་བཙན་འཁྲིད་བྱས་པའི་སློབ་ཕྲུག་དག་འཚོལ་རྒྱུ་ཡིན་སྐོར་བསྒྲགས་པ་ལྟར། ཚེས་ ༢༡ ཉིན་ནེ་ཇི་རི་ཡའི་ཆཱ་ཌེ་མངའ་ཁུལ་ནང་ཨ་རིའི་དམིགས་བསལ་རྒོལ་རྡུང་དམག་མི་ ༨༠ བཏང་ཡོད་ཅིང་། ཧྥ་རན་སི་དང་དབྱིན་ཡུལ། རྒྱ་ནག རྒྱ་གར། ཨི་ཛི་རལ། ཨ་ཧྥི་རི་ཀའི་མཐུན་གྲོགས་རྒྱལ་ཁབ་ཁག་བཅས་ཀྱིས་ཀྱང་ནེ་ཇི་རི་ཡར་ཆེད་ལས་མི་སྣ་བཏང་སྟེ་བྷོ་ཁཱོ་ཧཱ་རམ་ལ་རྒོལ་རྡུང་གཏོང་བཞིན་ཡོད་འདུག
ཟླ་འདིའི་ཚེས་ ༡༧ ཉིན་ཧྥ་རན་སིའི་སྲིད་འཛིན་ཧྥེན་ཁཱོ་ (François Hollande) ཡིས་གཙོ་སྐྱོང་འོག ཧྥ་རན་སིའི་རྒྱལ་ས་ཧྥེ་རི་སེར་ཨ་ཧྥི་རི་ཀའི་བརྟན་བརླིང་སྲུང་སྐྱོབ་ཀྱི་ཚོགས་འདུ་ཞིག་ཚོགས་ཏེ། ཨ་ཧྥི་རི་ཀའི་རྒྱལ་ཁབ་ ༥༣ གྱི་སྲིད་འཛིན་དང་སྲིད་འཛིན་གཞོན་པ། སྲིད་བློན་སོགས་འཛོམས་ཏེ་བྷོ་ཁཱོ་ཧཱ་རམ་གྱི་འཇིགས་སྐུལ་དྲག་སྤྱོད་པར་གདོང་ལེན་བྱེད་ཕྱོགས་ཐད་གྲོས་བསྡུར་བྱས་ཡོད་འདུག
ཆབ་སྲིད་དབྱེ་ཞིབ་པ་ཚོས། ཐེངས་འདིར་མཉམ་འབྲེལ་རྒྱལ་ཚོགས་བདེ་འཇགས་ལྷན་ཁང་གི་ཚོགས་མིའི་རྒྱལ་ཁབ་ཚོས་བྷོ་ཁཱོ་ཧཱ་རམ་དྲག་སྤྱོད་ཤོག་ཁག་རྩ་གཏོར་གཏོང་རྒྱུའི་སྐོར་ལ་བསྒྲགས་གཏམ་སྤེལ་ཡོད་པ་དེས། མ་འོངས་པར་ནེ་ཇི་རི་ཡའི་ནང་མི་བསད་དོན་རྐྱེན་ཉུང་དུ་འགྲོ་རྒྱུར་ཤུགས་རྐྱེན་ཐེབས་སྲིད་སྐོར་བརྗོད་འདུག
ཁ་སང་མང་ཚོགས་དང་དགེ་རྒན་ཚོས་རྒྱལ་ས་ཨ་བྷུ་ཇཱའི་གཞུང་ལམ་ཐོག་ཐོན་ཏེ། ནེ་ཇི་རི་ཡའི་གཞུང་དང་རྒྱལ་སྤྱིའི་སྒྲིག་འཛུགས་ཁག་གིས་བྷོ་ཁཱོ་ཧཱ་རམ་གྱིས་བཙན་འཁྲིད་བྱས་པའི་སློབ་ཕྲུག་དེ་དག་འཕྲལ་དུ་ཀློད་གྲོལ་ཡོང་ཐབས་བྱ་དགོས་སྐོར་ངོ་རྒོལ་བྱས་འདུག
གསར་འགོད་པ། དོན་གྲུབ།
