ཨུ་རུ་སུའི་རྒྱབ་སྐྱོར་ཡོང་བར་རེ་སྐུལ།

ཡུའུ་ཁུ་རེན་ཤར་ཕྱོགས་གྲོང་ཁྱེར་ཁག་ནང་གི་གྱེན་ལོག་པ་ཚོས་གཞུང་གི་ལས་ཁུངས་བཙན་བཟུང་དང་ཨུ་རུ་སུའི་རོགས་སྐྱོར་འཚོལ་བཞིན་ཡོད་འདུག

ཁ་སང་ཕྱི་ཚེས་ ༢༠ ཉིན་ཡུའུ་ཁུ་རེན་ཤར་ཕྱོགས་གྲོང་ཁྱེར་སི་ལོབ་བེན་སི་ཁུ་ (Sloviansk) ཡི་ཞིབ་བཤེར་ས་ཚིགས་སུ། ཨུ་རུ་སུར་དགའ་མོས་བྱེད་མཁན་གྱེན་ལོག་པ་ཚོས་འཇབ་རྒོལ་བྱས་ཏེ་བདེ་འཇགས་སྲུང་སྐྱོབ་དམག་མི་གསུམ་དམར་གསོད་བཏང་ཡོད་སྟབས། བར་བརྒལ་སྲིད་གཞུང་གིས་ཨུ་རུ་སུའི་བཙན་འཛུལ་ཡིན་པར་སྐྱོན་བརྗོད་དང་སྦྲགས། ས་ཁུལ་དེར་དམིགས་བསལ་དམག་དཔུང་བཏང་ནས་གྱེན་ལོག་པ་ཚོར་རྒོལ་རྡུང་གཏོང་རྒྱུ་ཡིན་པའི་ཉེན་བརྡ་བཏང་ཡོད་འདུག

འདིའི་ཐད་ཡུའུ་ཁུ་རེན་གྱི་སྲིད་བློན་ཡྰ་ཌི་སིན་ཡོ་ཁུ་ (Arseniy Yatsenyuk)ལགས་ཀྱིས། ཇི་ནེ་ཝའི་གྲོས་ཆོད་གྲུབ་འབྲས་མ་བྱུང་བར་ཨ་རི་གཞུང་གིས་ཡུའུ་ཁུ་རེན་ལ་སྔར་ལས་ལྷག་པའི་རྒྱབ་སྐྱོར་བྱས་ཏེ། ཨུ་རུ་སུའི་བཙན་འཛུལ་ལ་རྒོལ་ལན་བྱེད་དགོས་པའི་རེ་སྐུལ་ཞུས་ཡོད་ཀྱང་། ཨ་རིའི་གཞུང་ཚབ་ཆེན་མོས་གསར་འགོད་པར། ཨ་རིས་དམག་དོན་གྱི་ཐོག་ནས་ཡུའུ་ཁུ་རེན་ལ་རོགས་སྐྱོར་བྱེད་ཐུབ་ཀྱང་། ཕྱི་སྲིད་འབྲེལ་ལམ་བརྒྱུད་ནས་ཡུའུ་ཁུ་རེན་གྱི་དཀའ་རྙོག་སེལ་དགོས་སྐོར་སོཊ་བརྗོད་ཡོད་འདུག

ཁ་སང་གྱེན་ལོག་པ་ཚོས་འཇབ་རྒོལ་བྱས་པའི་གནས་ཚུལ་ལ་ཨུ་རུ་སུའི་ཕྱི་སྲིད་ལས་ཁུངས་ཀྱིས། ཡུའུ་ཁུ་རེན་གྱི་མི་རིགས་རིང་ལུགས་པའི་ཚོགས་པར་སྐྱོན་འཛུགས་བྱས་ཡོད་པ་མ་ཟད་། ཡུའུ་ཁུ་རེན་གཞུང་གིས་ཨུ་རུ་སུའི་སྐད་ཤོད་མཁན་མི་རིགས་ལ་དེ་ཙམ་གྱིས་སྲུང་སྐྱོབ་བྱེད་ཀྱི་མི་འདུག་ཅེས་བརྗོད་འདུག

 གྲོང་ཁྱེར་སི་ལོབ་བེན་སི་ཁུའི་གྱེན་ལོག་མགོ་ཁྲིད་བོབ་ནོབ་མྰ་རེ་བེ་ (Vyacheslav Ponomarev) ཡིས། ཨུ་རུ་སུའི་སྲིད་འཛིན་པུ་ཊིན་གྱིས་ཡུའུ་ཁུ་རེན་ཤར་ཕྱོགས་ས་ཁུལ་ཁག་ལ་དམག་དཔུང་དང་ཟ་མ། མཚོན་ཆ་སོགས་གཏོང་དགོས་པའི་རེ་སྐུལ་ཞུས་ཡོད་པ་དང་། དེ་བཞིན་ཁོ་ཚོས་ས་ཁུལ་ཊོབ་ནེ་ཌི་སི་ཁུ་ (Donetsk) དང་ལོ་ཧན་སི་ཁུ་ (Luhansk) བཅས་ཀྱི་བར་བཙན་བཟུང་བྱ་རྒྱུ་ཡིན་ཚུལ་བརྗོད་ཡོད་འདུག

ཟླ་འདིའི་ཚེས་ ༡༧ ཉིན་སུད་སི་གྲོང་ཁྱེར་ཇི་ནེ་ཝའི་ནང་ཨ་རི་དང་ཨུ་རུ་སུ། ཡུ་རོབ་མཐུན་ཚོགས། ཡུའུ་ཁུ་རེན་བར་བརྒལ་སྲིད་གཞུང་བཅས་ཀྱིས། ཡུའུ་ཁུ་རེན་ནང་ཟིང་འཁྲུག་ཞི་འཇགས་ཡོང་བར་གྲོས་ཆོད་བཞག་པར་བརྟེན། ཡུའུ་ཁུ་རེན་བར་བརྒལ་སྲིད་གཞུང་གིས་གྱེན་ལོག་པ་ཚོའི་ནག་ཉེས་གུ་ཡངས་དང་ཁོ་ཚོའི་དགོས་འདུན་ལ་དང་ལེན་བྱེད་པའི་རྣམ་འགྱུར་བསྟན་སྟབས། གྱེན་ལོག་པ་ཚོས་གོ་སྐབས་དམ་འཛིན་གྱིས་ཡུའུ་ཁུ་རེན་ཤར་ཕྱོགས་ཀྱི་གྲོང་ཁྱེར་དང་གྲོང་རྡལ་ཁག་ཅིག་གི་སྲིད་གཞུང་ལས་ཁུངས་མུ་མཐུད་བཙན་བཟུང་བྱེད་བཞིན་ཡོད་འདུག

རྒྱལ་སྤྱིའི་གསར་འགྱུར་བརྒྱུད་ལམ་ཁག་ཅིག་ནང་། ད་ལྟའི་ཆར་ཨ་རིའི་གསང་བའི་ལས་ཁུངས་ཀྱིས་ཡུའུ་ཁུ་རེན་ས་མཚམས་སུ་ཡོད་པའི་ཨུ་རུ་སུའི་དམག་དཔུང་གི་གྲ་སྒྲིག་དང་ཐབས་ཇུས་གང་བྱེད་པའི་གནས་ཚུལ་སྐོར་གསལ་བོ་ཤེས་རྟོགས་ཡོད་ཀྱང་། ཡུའུ་ཁུ་རེན་བར་བརྒལ་སྲིད་གཞུང་ལ་གང་ཡང་བཤད་མེད་པར་གཞིགས་ན། ཨ་རིས་དོན་དངོས་ཐོག་ཨུ་རུ་སུ་སྣང་མེད་བཞག་ཡོད་ཚུལ་བརྗོད་བཞིན་ཡོད་འདུག

གནད་དོན་དབྱེ་ཞིབ་པ་ཚོས། ནུབ་ཕྱོགས་རྒྱལ་ཁབ་ཚོས་ཁུ་རེ་མཱེའི་ནང་ཨུ་རུ་སུའི་དམག་དཔུང་གིས་བཙན་འཛུལ་བྱེད་སྐབས་བཀག་འགོག་མ་བྱས་པར་བརྟེན། ད་ལྟའི་ཆར་ཡུའུ་ཁུ་རེན་ཤར་ཕྱོགས་གྲོང་ཁྱེར་ཁག་ཅིག་ནང་ཨུ་རུ་སུའི་སྐད་ཤོད་མཁན་གྱེན་ལོག་པ་ཚོས་རིམ་བཞིན་ས་ཁུལ་རང་སྐྱོང་དང་ཨུ་རུ་སུའི་རྒྱལ་ཁོངས་སུ་འགྲོ་འདོད་ཡོད་པའི་རྣམ་འགྱུར་ཤུགས་ཆེར་འགྲོ་ཡོད་སྐོར་བརྗོད་འདུག

ན་ནིང་ཟླ་ ༡༡ ཚེས་༢༩ ཉིན། ཡུའུ་ཁུ་རེན་གཙོས་ཡུ་རོབ་ཤར་ཕྱོགས་ཀྱི་རྒྱལ་ཁབ་འགས་ཡུ་རོབ་མཐུན་ཚོགས་མཉམ་དུ་དཔལ་འབྱོར་དང་གཞུང་ལམ་འཛུགས་སྐྲུན་བྱེད་ཕྱོགས་སྐོར་ལ་ཚོགས་འདུ་ཞིག་འཚོགས་སྐབས། ཡུའུ་ཁུ་རེན་གྱི་སྲིད་འཛིན་ཡཱ་ནོ་ཁོ་བེ་ཆི་ (Viktor Yanukovich) ཡིས་གྲོས་ཆོད་ལ་མིང་རྟགས་བཀོད་མེད་སྟབས། ཕྱོགས་འགལ་ཚོགས་པས་སྣེ་འཁྲིད་འོག་ཡུའུ་ཁུ་རེན་མང་ཚོགས་ཀྱིས་སྲིད་གཞུང་ལ་ངོ་རྒོལ་རིམ་པར་བྱས་ཤིང་། ད་ལོའི་ཟླ་ ༢ ཚེས་ ༢༢ ཉིན། ཡུའུ་ཁུ་རེན་གྲོས་ཚོགས་ཀྱིས་དམིགས་བསལ་ཚོགས་འདུ་བསྐོངས་ཏེ། གཞུང་འཛིན་ཚོགས་པ་རྩིས་མེད་དང་སྲིད་འཛིན་ཡཱ་ཎོ་ཁོ་བེ་ཆི་ཕྱིར་འཕུད་བྱས་པར་བརྟེན། ཡུའུ་ཁུ་རེན་མང་ཚོགས་ཁྲོད་ཡུ་རོབ་དང་ཨུ་རུ་སུ་གཉིས་ལ་དགའ་མོས་བྱེད་མཁན་ཕྱོགས་གཉིས་ཆགས་ཏེ།  ཨུ་རུ་སུ་ལ་དགའ་མཁན་གྱེན་ལོག་པ་ཚོས་ཡུའུ་ཁུ་རེན་ཤར་ཕྱོགས་གྲོང་ཁྱེར་ཁག་གི་ལས་ཁུངས་བཙན་བཟུང་གིས་བར་བརྒལ་སྲིད་གཞུང་ལ་ངོ་རྒོལ་བྱེད་བཞིན་ཡོད་པ་རེད།

ད་ལོའི་ཕྱི་ཟླ་ ༥ ཚེས་ ༢༥ ཉིན་རྒྱལ་ཡོངས་སྲིད་འཛིན་འོས་བསྡུ་བྱ་རྒྱུའི་ཐག་གཅོད་བྱས་ཡོད་འདུག

གསར་འགོད་པ། ལྷ་སྐྱབས་རྒྱལ།