ཨ་རིའི་སྲིད་འཛིན་ཨོ་བྷ་མས་ཡུ་རོབ་རྒྱལ་ཁབ་ཁག་ཅིག་ནང་གཟིགས་སྐོར་དང་བསྟུན་ཏེ་ཡུ་རོབ་དང་མཉམ་འབྲེལ་ཐོག་ཡུའུ་ཁུ་རེན་གྱི་དཀའ་ངལ་དང་ཨུ་རུ་སུའི་ཤུགས་རྐྱེན་འགོག་ཐབས་ལ་གྲོས་མོལ་བྱེད་བཞིན་ཡོད་འདུག
ཁ་སང་ནས་བཟུང་ཉིན་བཞིའི་རིང་ཨ་རིའི་སྲིད་འཛིན་ཨོ་བྷ་མ་ཡུ་རོབ་རྒྱལ་ཁབ་པོ་ལན་ཌི་དང་སྤེལ་ལྗམ། ཧྥ་རན་སི་བཅས་གསུམ་ནང་གཟིགས་སྐོར་མགོ་འཛུགས་བྱས་ཡོད་ཅིང་། ཁ་སང་ཕྱི་ཚེས་ ༣ ཉིན་པོ་ལན་ཌིའི་རྒྱལ་ས་ཝར་སཱར་འབྱོར་ནས་པོ་ལན་ཌིའི་སྲིད་འཛིན་ཀོབ་མོ་རོབ་སི་ཀེ་ (Bronislaw Komorowski) དང་ཐུག་འཕྲད་གནང་སྟེ། རྒྱལ་ཁབ་གཉིས་བར་གྱི་ཚོང་དོན་ཁག་ཅིག་ལ་མིང་རྟགས་བཀོད་ཡོད་པ་མ་ཟད། ཡུ་རོབ་ཤར་ཕྱོགས་རྒྱལ་ཁབ་ཁག་གི་བདེ་འཇགས་སྲུང་སྐྱོབ་ཆེད་རྒྱལ་ཁབ་དེ་དག་ནང་ཨ་རིའི་རྟེན་སྡོད་དམག་མི་མང་དུ་གཏོང་རྒྱུ་དང་། ནུབ་ཕྱོགས་མཉམ་འབྲེལ་དམག་དཔུང་གི་དམག་སྦྱོང་དང་མཁའ་སྲུང་ཆེད་ཨ་སྒོར་ཐེར་འབུམ་གཅིག་གཏོང་རྒྱུ་བཅས་ཀྱི་ཐག་གཅོད་བྱས་ཡོད་འདུག
ཐེངས་འདིར་སྲིད་འཛིན་ཨོ་བྷ་མ་པོ་ལན་ཌིའི་ནང་དམར་ཤོག་རིང་ལུགས་མཇུག་རྫོགས་ནས་མི་ལོ་ ༢༥ འཁོར་བའི་དུས་དྲན་སྲུང་གཙིའི་མཛད་སྒོར་མཉམ་ཞུགས་བྱས་ཡོད་པ་མ་ཟད། ཡུའུ་ཁུ་རེན་གྱི་སྲིད་འཛིན་གསར་བ་སྐུ་ཞབས་པོ་རོབ་ཤེན་ཀོ་ (Petro Poroshenko) ལགས་ལ་ཐུག་འཕྲད་གནང་སྟེ། ཡུའུ་ཁུ་རེན་གྱི་སྲིད་དོན་དང་དཔལ་འབྱོར། ལྷག་པར་དུ་ཡུའུ་ཁུ་རེན་གྱིས་ཨུ་རུ་སུར་སོལ་རླངས་བུ་ལོན་ཨ་སྒོར་ཐེར་འབུམ་ ༢།༥ ཙམ་ཡོད་པ་དེ་དུས་ལྟར་སྤྲོད་འཇལ་མ་ཐུབ་ཚེ་ཨུ་རུ་སུས་སོལ་རླངས་གཏོང་མཚམས་འཇོག་རྒྱུའི་དཀའ་ངལ་ལ་གདོང་ལེན་བྱེད་ཕྱོགས་བཅས་ལ་གྲོས་མོལ་བྱས་ཡོད་འདུག
རྒྱལ་ཁབ་གཉིས་ཀྱིས་ཐུན་མོང་གི་གསར་འགོད་གསལ་བསྒྲགས་ཤིག་སྤེལ་བའི་སྟེང་སྲིད་འཛིན་ཨོ་བྷ་མས། ཨུ་རུ་སུས་ཡུའུ་ཁུ་རེན་གྱི་ས་མཚམས་སུ་ཡོད་པའི་དམག་དཔུང་ཕྱིར་འཐེན་བྱས་ཏེ། ཡུའུ་ཁུ་རེན་ཤར་ཕྱོགས་གྲོང་ཁྱེར་ནང་གི་གྱེན་ལོག་པ་ཚོར་སྟངས་འཛིན་བྱས་ཏེ་སྲིད་གཞུང་གསར་བར་རོགས་འདེགས་བྱེད་དགོས། གལ་སྲིད་ཨུ་སུ་སུས་དེ་ལྟར་མ་བྱས་ཚེ་སྔར་ལྷག་གི་དཔལ་འབྱོར་ཉེས་ཆད་གཏོང་རྒྱུའི་གྲ་སྒྲིག་ཡོད། ཅེས་དང་། མུ་མཐུད་དུ་ “པོ་ལན་ཌི་གཙོས་ཡུ་རོབ་དཀྱིལ་ཤར་གཉིས་ནང་གི་ཨ་རིའི་མཐུན་ཕྱོགས་རྒྱལ་ཁབ་ཚོའི་བདེ་འཇགས་ནི་ང་ཚོའི་བདེ་འཇགས་ཀྱི་རྨང་རྡོ་ཡིན་”ཞེས་བརྗོད་ཡོད་འདུག པོ་ལན་ཌིའི་སྲིད་འཛིན་ཀོབ་མོ་རོབ་སི་ཀེས་ཀྱང་། ཨུ་རུ་སུས་ཡུའུ་ཁུ་རེན་གྱི་རང་སྐྱོང་མངའ་ཁུལ་ཁུ་རེ་མཱེ་ཡ་བཙན་བཟུང་བྱས་པ་ནས་བཟུང་། ཡུ་རོབ་ཤར་ཕྱོགས་ས་ཁུལ་གྱི་བདེ་འཇགས་ལ་འཇིགས་སྐུལ་བྱེད་ཀྱི་ཡོད་སྟབས། ཨ་རིའི་དམག་དཔུང་གི་གདོང་ལེན་བྱེད་པར་རྒྱབ་སྐྱོར་ཡོད་ཅེས་སོགས་བརྗོད་འདུག
གནད་དོན་དབྱེ་ཞིབ་པ་ཚོས། ཨ་རིའི་དམག་དཔུང་ཡུ་རོབ་ཤར་ཕྱོགས་རྒྱལ་ཁབ་ནང་གཏན་སྡོད་བྱེད་པར་ཡུ་རོབ་བྱང་ཕྱོགས་རྒྱལ་ཁབ་མང་པོ་ཞིག་གིས་འདོད་མོས་མེད་པའི་རྒྱུ་མཚན། ཨུ་རུ་སུས་ཡང་བསྐྱར་ཤར་ནུབ་གཉིས་བར་གོ་མཚོན་འགྲན་རྩོད་འབྱུང་སྲིད་པར་ཚོད་དཔག་བྱེད་བཞིན་ཡོད་འདུག
སྲིད་འཛིན་ཨོ་བྷ་མ་པོ་ལན་ཌིའི་ནང་གཟིགས་སྐོར་གྲུབ་རྗེས་བྷེལ་ལྗམ་རྒྱལ་སར་འབྱོར་ཏེ། འཛམ་གླིང་གི་བཟོ་ལས་ཡར་ཐོན་རྒྱལ་ཁབ་བདུན་ཏེ་ཨ་རི་དང་དབྱིན་ཡུལ། འཇར་མན། ཧྥ་རན་སི། ཨི་ཊ་ལི། ཁེ་ཎ་ཌ། ཉི་ཧོང་བཅས་ཀྱི་མགོ་ཁྲིད་ཚོས་ཡུའུ་ཁུ་རེན་གྱི་གནད་དོན་གཙོས་འཛམ་གླིང་གི་དཔལ་འབྱོར་དང་ཚོང་འབྲེལ། གནམ་གཤིས། ལྷག་པར་དུ་ཡུ་རོབ་རྒྱལ་ཁབ་ཁག་ཨུ་སུ་རུའི་སོལ་རླངས་ལ་བརྟེན་མི་དགོས་པར་ཐབས་ལམ་གསར་པ་འཚོལ་ཕྱོགས། དེ་བཞིན། ད་ལྟ་སེ་རི་ཡའི་ནང་འགྲོ་བཞིན་པའི་སྲིད་འཛིན་འོས་བསྡུ་ཁྲིམས་མཐུན་མིན་པའི་གནད་དོན་བཅས་ལ་གྲོས་མོལ་བྱ་འཆར་ཡོད་འདུག
ཚེས་ ༦ ཉིན་ཧྥ་རན་སིའི་མཚོ་འགྲམ་ནོར་མན་ཌི་ (Normandy)རུ་འཛམ་གླིང་དམག་འཁྲུག་ཐེངས་གཉིས་པའི་སྐབས། ཨ་རི་དང་དབྱིན་ཡུལ་གཉིས་ཀྱིས་སྣེ་ཁྲིད་པའི་མཐུན་ཕྱོགས་རྒྱལ་ཁབ་ཚོས་ཧེད་ཊི་ལི་དམག་དཔུང་ལ་འཇབ་རྒོལ་བྱས་ཏེ་ལོ་ངོ་ ༧༠ འཁོར་བའི་དུས་དྲན་སྲུང་གཙི་བྱེད་སྐབས། འཇར་ནམ་གྱི་སྲིད་བློན་ལྕམ་ཨན་རྗི་ལཱ་ (Angela Merkel)དང་། ཧྥ་རན་སིའི་སྲིད་འཛིན་ཧོད་ལན་ཌི་ (Francois Hollande)། དབྱིན་ཡུལ་གྱི་སྲིད་བློན་ཁེམ་མེ་རོན་ (David Cameron)གསུམ་ཨུ་རུ་སུའི་སྲིད་འཛིན་པུ་ཊིན་ལ་ཐུག་འཕྲད་བྱ་རྒྱུ་ཡིན་ཡང་། ཨ་རིའི་སྲིད་འཛིན་ཨོ་བྷ་མ་ཐུག་འཕྲད་གནང་འཆར་མི་འདུག
གསར་འགོད་པ། ལྷ་སྐྱབས་རྒྱལ།
