རང་མོས་གཉེན་སྒྲིག་པ་དམར་གསོད།

ཉེ་སྔོན་པཱ་ཀི་སི་ཐན་གྱི་བུ་མོ་ཞིག་གིས་རང་མོས་གཉེན་སྒྲིག་བྱས་སྟབས་ཁྱིམ་མི་ཚོས་ཁོ་མོར་མེ་མདའ་བརྒྱབ་སྟེ་མཚོའི་ནང་དུ་གཡུགས་ཡོད་ཀྱང་། མཚོ་འགྲུལ་བ་གཉིས་ཀྱིས་ཁོ་མོ་བསྐྱབས་ཡོད་འདུག

པཱ་ཀི་སི་ཐན་གྱི་རང་ལོ་ ༡༨ ཡིན་པའི་བུ་མོ་སཱ་བྷ་མཱ་སོ་ཌི་ (Saba Maqsood) ཟེར་བ་ཞིག་གིས། རང་ཉིད་དགའ་བའི་སྐྱེས་པ་ཞིག་དང་གཉེན་སྒྲིག་བྱས་པར་བརྟེན། ཁ་སང་ཕྱི་ཚེས་ ༦ ཉིན་ཁྱིམ་མི་ཚོས་ཁོ་མོར་མེ་མདའ་བརྒྱབ་ཡོད་པ་མ་ཟད། གདོང་དང་ལག་པ་སོགས་ལ་གྲི་ཡིས་བརྒྱབ་སྟེ་རྨས་སྐྱོན་ཚབས་ཆེན་བཟོས་རྗེས། ཁོ་མོ་སྒྱེ་མོ་ཞིག་གི་ནང་བཅུག་སྟེ་ཧཱ་ཧྥི་ཛ་བྷ་ཌི་གྲོང་ཁྱེར་ཉེ་འགྲམ་གྱི་མཚོ་ནང་དུ་གཡུགས་ཡོད་པ་དང་། སྟབས་ལེགས་པ་ཞིག་ལ་མཚོ་འགྲུལ་བ་གཉིས་ཀྱིས་ཁོ་མོ་སྲོག་ཉེན་ལས་བསྐྱབས་ཏེ། ད་ལྟ་སྨན་ཁང་ཞིག་ཏུ་ཉེན་རྟོག་པའི་ལྟ་སྲུང་འོག་སྨན་བཅོས་བྱེད་བཞིན་ཡོད་འདུག

ས་གནས་ཉེན་རྟོག་ཁང་ནས་དབྱིན་ལན་གྱི་ཨ་ཡེ་བརྙན་འཕྲིན་ཁང་ལ་བརྗོད་པ་ལྟར་ན། བུ་མོ་དེར་མེ་མདའ་དང་གྲི་རྒྱག་མཁན་ཁོ་མོའི་པ་ལགས་དང་ཨ་ཞང་། ཕུ་བོ། ཨ་སྲུ་བཅས་ཡིན་པ་དང་། ཁོ་མོ་མཚོའི་ནང་དུ་གཡུགས་རྗེས་སྒྱེ་མོའི་ནང་ནས་ཕྱིར་ཐོན་ཐུབ་ཡོད་པ་དང་། དེ་ནས་མཚོ་འགྲུལ་བ་ཚོས་ཁོ་མོ་བསྐྱབས་ཡོད་ལུགས་བརྗོད་འདུག ཁོ་མོར་བཤག་བཅོས་བྱེད་མཁན་གྱི་སྨན་པ་མོ་ཧཱ་མཱ་ཌི་ཨེ་ཊི་ཛ་ཧྥར་( Muhammad Atif Zafar) ལགས་ཀྱིས། མེ་མདའ་རྒྱག་མཁན་དེས་དང་ཐོག་བརྒྱ་ཆ་བརྒྱ་ཁོ་མོ་གསོད་རྩིས་བྱས་ཡོད་ཀྱང་། མེ་མདའ་རྒྱག་སྐབས་ཅུང་ཙམ་ཐེ་ཚོམ་ཤོར་ཏེ་གསོད་ཐུབ་མེད་སྐོར་བརྗོད་འདུག

བུ་མོ་སཱ་བྷ་མཱ་སོ་ཌི་ལགས་ཀྱིས་གསར་འགོད་པར་བརྗོད་དོན། “ད་ལྟ་ཉེན་རྟོག་པའི་ལྟ་སྲུང་འོག་ང་ལ་སྨན་བཅོས་བྱེད་བཞིན་ཡོད་ཀྱང་། ངའི་ཁྱིམ་མི་ཚོས་ང་དང་ངའི་ཁྱོ་ག་གསོད་རྩིས་བྱེད་ངེས་རེད་བསམ་ནས་ཞེད་སྣང་ཆེན་པོ་འདུག ”ཅེས་བརྗོད་འདུག

གཞན་ཡང་། ཉེ་སྔོན་པཱ་ཀི་སི་ཐན་གྱི་གྲོང་གསེབ་ཅིག་ནས་ཡིན་པའི་མོ་ཧཱ་མཱ་ཌི་ཨེ་བྷལ་ཟེར་བའི་སྐྱེས་པ་ཞིག་དང་། བུད་མེད་ཧྥར་ཛ་ནཱ་པཱར་ཝན་ཞེས་པ་གཉིས་ཀྱིས་རང་མོས་ལྟར་གཉེན་སྒྲིག་བྱས་ཡོད་པ་དང་། བུ་མོའི་ཁྱིམ་ཚང་གིས་སྐྱེས་པ་དེས་ཁོ་མོ་བཙན་ཁྲིད་བྱས་ལུགས་ཀྱི་ཉེས་འཛུགས་བྱས་ཡོད་སྟབས། འདི་ལོའི་ཕྱི་ཟླ་ ༥ ཚེས་ ༢༨ ཙམ་ལ་ཁྱོ་ཤུག་གཉིས་སྲིད་གཞུང་ལ་ཞུ་གཏུག་བྱེད་དུ་སོང་སྟེ། ལཱ་ཧོར་མཐོ་རིམ་ཁྲིམས་ཁང་(Lahore High Court )ཟེར་བའི་ཉེ་འགྲམ་དུ་སླེབ་སྐབས། གློ་བུར་དུ་བུ་མོའི་པ་ལགས་དང་ནུ་མོ། ཕུ་བོ་སོགས་ཁྱིམ་མི་ ༢༠ ལྷག་གིས་ཁོ་མོར་རྡོ་ཡིས་བརྒྱབ་སྟེ་མངལ་དུ་ཡོད་པའི་བྱིས་པ་བཅས་དམར་གསོད་བཏང་ཡོད་འདུག

ཁོ་མོའི་ཁྱོ་གས་གསར་འགོད་པ་ལ། “ཁོ་ཚོས་ངའི་ཆུང་མ་དམར་གསོད་གཏོང་སྐབས། ང་ལམ་སང་ཉེ་འགྲམ་གྱི་མཐོ་རིམ་ཁྲིམས་ཁང་དུ་རྒྱུགས་ཏེ་ཁོ་མོ་སྐྱོབས་རོགས་ཟེར་ནས་ཞུ་བ་བྱས་ཀྱང་། ཁྲིམས་ཁང་གིས་གནད་དོན་དེ་ང་ཚོའི་ལས་འགན་མ་རེད་ཟེར་ནས་རོགས་པ་བྱེད་ཀྱི་མི་འདུག དེ་ནས་ངས་རང་གི་སྟོད་གོས་ཕུད་དེ་ཁོ་མོར་གཡོགས་ནས་སྐྱོབ་ཐབས་བྱས་ཀྱང་སྐྱོབ་ཐུབ་མ་སོང་། ངེད་གཉིས་ཀྱི་བརྩེ་དུང་འདིའི་ཆེད་དུ་ངས་རང་གི་ཆུང་མ་དང་པོ་དེའང་བསད་བཞག་པ་ཡིན། ”ཞེས་བརྗོད་འདུག

འཛམ་གླིང་མཉམ་འབྲེལ་རྒྱལ་ཚོགས་དང་འགྲོ་བ་མིའི་ཐོབ་ཐང་ལྷན་ཚོགས་ཀྱི་བསྡོམས་རྩིས་ལྟར་ན། ད་ལྟའི་བར་འཛམ་གླིང་ཐོག་ཉུང་མཐར་རང་མོས་གཉེན་སྒྲིག་ཆེད་བུད་མེད་ ༥༠༠༠ བརྒལ་བ་ཁྱིམ་མིས་དམར་གསོད་བཏང་ཡོད་པ་དང་། ཕྱི་ལོ་ ༢༠༡༣ ལོར་པཱ་ཀི་སི་ཐན་གཅིག་པུའི་ནང་རང་མོས་གཉེན་སྒྲིག་ཆེད་བུད་མེད་གཞོན་ནུ་མ་ ༨༦༩ ཁྱིམ་མི་གཉེན་འབྲེལ་ཚོས་དམར་གསོད་བཏང་ཡོད་པ་དང་། པཱ་ཀི་སི་ཐན་གྱི་ཁ་ཆེ་བ་ས་ཡ་ ༡༨༠ ལྷག་གིས། བུད་མེད་ཚོས་ཁྱིམ་མིའི་བཀའ་བཀོད་ལྟར་གཉེན་སྒྲིག་བྱེད་དགོས་པ་ལས། རང་མོས་ལྟར་སྐྱེས་པ་ཞིག་ལ་བརྩེ་དུང་ཆགས་པའམ་ཡང་ན་གཉེན་སྒྲིག་བྱས་པ་ཡིན་ན། ཁྱིམ་མི་ཚོས་སྔར་སྲོལ་རྒྱུན་འཛིན་གྱིས་རང་གི་བུ་མོ་དམར་གསོད་གཏོང་རྒྱུ་ནི་རྒྱུན་ལྡན་ཞིག་དང་། ཡབ་མེས་ལ་བསྙེན་བཀུར་བྱས་པའི་མཚོན་རྟགས་ཤིག་ཏུ་ངོས་འཛིན་བྱེད་ཀྱི་ཡོད་འདུག

གསར་འགོད་པ། པདྨ་མཚོ།