དཔལ་འབྱོར་བརྒྱུད་ལག་མེད་ན་སློབ་གཉེར་ཆོག་མཆན་ཡང་རག་དཀའ་ཟེར།

བོད་ནས་གསར་དུ་འབྱོར་བ་ཞིག་གིས་བརྗོད་པ་ལྟར་ན་རྒྱ་ནག་གཞུང་གིས་བོད་པའི་ས་ཁུལ་དུ་སྲིད་བྱུས་སྣ་ཚོགས་ཤིག་སྤེལ་ཏེ་འབྲོག་པའི་འཚོ་སྟངས་བསྒྱུར་ནས་ཁང་པ་རྒྱག་གི་ཡོད་པ་དང་ཞིང་པའི་ས་ཞིང་འཕྲོག་ནས་ཤིང་སྡོང་འཛུགས་བཞིན་ཡོད་སྐོར་ངོ་སྤྲོད་གནང་སོང་།

ཟླ་འགའི་སྔོན་ལ་དྷ་རམ་ས་ལའི་སྣེ་ལེན་ཁང་ལ་བོད་ནས་གསར་དུ་འབྱོར་བའི་བློ་བཟང་བསྟན་འཛིན་ལགས་སུ། གསར་འགོད་པས་ཁོང་གི་ཕ་ཡུལ་གྱི་གནས་སྟངས་དང་། ཁོང་ལ་རྒྱུས་མངའ་ཡོད་པའི་ཉིས་སྟོང་བརྒྱད་ཀྱི་གནས་ཚུལ་སོགས་ཀྱི་སྐོར་ལ་གླེང་མོལ་བྱས་སྐབས། ཁོང་གིས་དེ་སྔ་ས་བྱི་ཞི་རྒོལ་སྐབས་ཁོའི་ཕ་ཡུལ་རྔ་པ་ས་ཁུལ་གྱི་མཐོང་ཐོས་སྐོར་ཞིག་ཕྱིར་དྲན་གྱི་ཚུལ་དུ་ངོ་སྤྲོད་གནང་བར། ༢༠༠༨ ལོ་ནས་བཟུང་རྒྱ་གཞུང་གིས་རྔ་པ་ཁུལ་གྱི་དགོན་ཁག་ཡོངས་ལ་དམ་དྲག་བྱས་ཤིང་། ཀྲུང་དབྱང་དབུས་གཞུང་གི་བཀའ་ཡིན་ཚུལ་བརྗོད་དེ། རང་ལོ་ཧྲིལ་བོ་ ༡༨ མ་ཟིན་པ་དག་སློབ་གྲྭར་འགྲོ་དགོས་པ་དང་། གྲྭ་པ་མ་བྱས་སྔོན་ལ་སྤྱི་ཚོགས་རིག་གནས་ཡག་པོ་ཤེས་དགོས་པ། རང་ལོ་ ༡༨ ལོན་རྗེས་གྲྭ་པ་བྱེད་པར་ཡང་རང་མོས་རང་འདོད་ཡིན་པ་ལས། ཕ་མ་གཉེན་འབྲེལ་སུས་ཀྱང་བཙན་བཀའ་བཏང་མི་ཆོག་ཅིང་། གྲྭ་པ་དང་ཆོས་ཕྱོགས་ཀྱི་སློབ་གསོ་ཡང་བརྒྱབ་མི་ཆོག་པ། དགོན་པ་ཁག་ནང་གྲྭ་བའི་ཐོབ་ཐང་ལག་འཁྱེར་མེད་པར་སྡོད་མི་ཆོག་པ་དང་། ས་གནས་མང་ཚོགས་ཀྱང་དོན་དག་མེད་པར་གང་བྱུང་དགོན་ནང་ཡོང་བ་དང་གྲྭ་པར་འབྲེལ་གཏུག་བྱེད་མི་ཆོག་པ་སོགས་བཟོས་ཡོད་འདུག ལྷ་སྡེའི་དགོན་གོང་མ་ཟེར་བར་ད་ཆ་གྲྭ་པ་ ༡༥༠ ལྷག་ཡོད་པའི་ཁྲོད་ལག་ཁྱེར་ཡོད་མཁན་ ༥༠ ཙམ་ལས་མེད་པ་དང་། སྲིད་བྱུས་དེ་དག་ཐད་དུས་ཚོད་ངེས་མེད་དུ་སྲིད་གཞུང་གི་ལས་བྱེད་ཡོང་སྟེ་རྟོག་ཞིབ་བྱེད་ཀྱིན་ཡོད་འདུག

རང་ལུས་མེར་བསྲེཊ་གནས་ཚུལ་བྱུང་རྗེས་དགོན་པ་ཁག་ནང་དམ་དྲག་ཆེན་པོ་བྱས་ཏེ། གྲྭ་པ་ཚོ་དགོན་པ་ཕན་ཚུན་བར་དཔེ་ཁྲིད་དུའང་འགྲོ་མི་ཆོག་པ་དང་། སློབ་གཉེར་བ་མང་པོ་ཞིག་རྫ་སེར་ཤུལ་དགོན་པ་དང་ཁམས་ཕྱོགས་ཀྱི་ལབ་དགོན་པ། ཟིལ་དཀར་དགོན་པ་བཅས་སུ་འགྲོ་བཞིན་ཡོད་ཀྱང་། རྗེས་སུ་ཟིལ་དཀར་དགོན་པའི་ཉེ་འགྲམ་དུ་རྔ་པའི་གཞོན་སྐྱེས་ཤིག་དང་། ཟིལ་དཀར་དགོན་པའི་གྲྭ་པ་ཞིག་གིས་རང་ལུས་མེར་བསྲེཊ་བཏང་རྗེས། ཟིན་དཀར་དགོན་པར་ཡང་ཕྱོགས་ཕེབས་སློབ་གཉེར་བ་བཀག་སྡོམ་བྱས་ཡོད་པ་དང་། གལ་སྲིད་དགོན་པ་དེར་ཞུགས་འདོད་ཡོད་ན་སོ་སོ་ཡོང་ཁུངས་དགོན་པ་དང་ས་གནས་སྲིད་གཞུང་གི་ཆོག་མཆན་ཡི་གེ་དགོས་ཤིང་། དེར་བརྒྱུད་ལག་རྒྱབ་རྩ་དང་ལྐོག་རྔན་སོགས་ཀྱི་ཆ་རྐྱེན་མེད་མཁན་ཚོར་སློབ་གཉེར་གྱི་གོ་སྐབས་ཡང་མེད་པ་ཆགས་ཡོད་འདུག

༢༠༠༨ ལོ་ནས་ ༢༠༡༠ ལོའི་བར། རྒྱ་ནག་གཞུང་གིས་རྔ་པ་རྫོང་དུ་དམག་མི་མང་པོ་འགྲེམས་འཇོག་བྱས་ཏེ། མི་མང་གི་འགྲོ་སྐྱོད་བཀག་སྡོམ་དང་། དམིཊ་བསལ་གྲྭ་པ་ཚོའི་འགུལ་སྐྱོད་ལ་དམ་དྲག་ཆེན་པོ་བྱས་ཡོད་ཀྱང་། ༢༠༡༠ ལོའི་རྗེས་ལ་གློ་བུར་དུ་དམག་མི་ཉུང་དུ་ཕྱིན་ཡོད་པ་དང་། མང་ཚོགས་ཀྱི་བཤད་ཚུལ་ཞིག་ལ་དེ་ནི་ཀྲུང་དབྱང་སྲིད་གཞུང་གིས་ས་གནས་ལ་བཀའ་བཏང་སྟེ། དམག་མི་མང་པོ་འགྲེམས་འཇོག་བྱས་ཚེ་ས་གནས་མི་མང་ལ་འཇིགས་སྣང་སྐྱེས་ཏེ་གནས་ཚུལ་སྣ་ཚོགས་འབྱུང་གི་ཡོད་པ་དང་། ལྷག་པར་དུ་མང་ཚོགས་སྲིད་གཞུང་གི་སྟེང་ལ་སྡང་སེམས་ཇེ་ཆེར་འགྲོ་སྲིད་པ་སོགས་བཀོད་ཡོད་སྟབས། ས་གནས་སྲིད་གཞུང་གིས་ཐབས་ལམ་གཞན་བཙལ་ཏེ། རང་ལུས་མེར་བསྲེཊ་སོགས་གནས་ཚུལ་ཛ་དྲག་རིགས་བྱུང་སྐབས་མ་གཏོགས་མཚོན་ཆ་ཐོགས་པའི་དྲག་ཆས་དམག་མི་རྣམས་ཕྱིར་མི་མངོན་པར་ལྐོག་ཏུ་ཡིབ་བཅུག་ཅིང་། ཉེན་རྟོག་པ་མང་པོར་མི་སེར་དཀྱུས་མའི་ལྭ་བ་གྱོན་བཅུག་སྟེ་མང་ཚོགས་ནང་བཀྲམས་ཡོད་པ་དང་། རྒྱ་མི་དང་ས་གནས་བོད་མི་རེ་ཟུང་དངུལ་གྱིས་བསླུ་འགུག་བྱས་ཏེ་མི་མང་གི་འགྲོ་འདུག་སྤྱོད་གསུམ་ལ་ལྟ་རྟོག་དང་། དོགས་གཞི་ཅན་རིགས་ལ་རྗེས་འདེད། གལ་སྲིད་གནས་ཚུལ་བྱུང་ཚེ་ཁ་ཐུག་ལ་འཛིན་བཟུང་བྱེད་ཀྱི་ཡོད་འདུག

རྒྱ་ནག་གཞུང་གིས་ཞིང་ས་ཤིང་ནགས་སུ་བསྒྱུར་བའི་སྐོར་ཞིག་ངོ་སྤྲོད་གནང་དོན། “ རྒྱ་ནག་གཞུང་གིས་ལོ་དྲུག་བདུན་གོང་ནས། ཞིང་ལས་ས་ཁུལ་ཁག་ཏུ་སྲིད་བྱུས་གསར་པ་ཞིག་ལག་བསྟར་བྱས་སོང་། དེ་ག་རེད་ཟེར་ན། ཞིང་པ་ཚང་མའི་ས་ཞིང་ཐོག་རྩྭ་དང་ཤིང་ནགས་འདེབས་དགོས་པ་དང་། སྲིད་གཞུང་གིས་ཞིང་པའི་ཁྱིམ་ཚང་དག་ལ། སྔོན་ཆད་ཀྱི་ཞིང་ལས་ཡོང་འབབ་ལས་ལྷག་གི་དངུལ་དང་གྲོ་བྱེ་སོགས་སྟེར་རྒྱུ་ཡིན་ཚུལ་བརྗོད་ཡོད་སྟབས། ཁྱིམ་ཚང་མང་པོ་ཞིག་གིས་སོ་སོའི་ས་ཞིང་ཐོག་རྩྭ་བཏབ་པ་དང་། ཁ་ཤས་ཀྱིས་ཤིང་སྡོང་འདེབས་འཛུགས་བྱས་པ་རེད། ཐོག་མའི་ལོ་གཅིག་གཉིས་རིང་གཞུང་གིས་དངུལ་དང་ཟ་འབྲུ་སོགས་སྤྲད་ཡོད་ཀྱང་། རིམ་པས་དངུལ་སྤྲོད་མཚམས་བཞག་ཡོད་པ་མ་ཟད། ས་ཞིང་དེ་དག་སྟེང་ཁང་པ་བརྒྱབ་པ་དང་རྒྱ་མི་མང་པོ་སྡོད་བཅུག་སྟེ་ས་ཆ་བདག་བཟུང་བྱས་སོང་། ས་ཞིང་ཁག་ཅིག་སྟེང་རྩྭ་དང་ཤིང་སྡོང་སྐྱེས་ཏེ་འཕྲོ་བརླག་ཆཊ་ཚར་འདུག” ཅེས་བརྗོད་བྱུང་།

གཞུང་གིས་མང་ཚོགས་ལ་ཁང་པ་གསར་རྒྱག་བྱས་པའི་སྐོར་ལ། “ ཡང་ས་ཆ་ལ་ལར་མང་ཚོགས་ལ་ཁང་པ་གསར་རྒྱག་བྱེད་རྒྱུ་ཡིན་སྐོར་བརྗོད་དེ་དངུལ་མང་པོ་བསྡུས་སོང་། རྗེས་སུ་ཁང་པ་བཟོས་ཚར་ཏེ་ ༢༠༡༢ ལོའི་ཟླ་ ༣ པའི་མང་ཚོགས་ཁང་པའི་ནང་སྤོ་སྐབས། ཁང་པ་ཡོངས་རྫོགས་ཆུང་དྲགས་པ་དང་ཁང་པ་ལ་ལའི་ནང་མི་མ་བསྡད་སྔོན་ནས་འཕྲོ་བརླག་ཏུ་ཕྱིན་ཚར་འདུག དེར་བརྟེན། མི་མང་པོ་ཞིག་གིས་ང་ཚོ་འདུག་རྒྱུ་མིན་ཟེར་ནས་ལྡེ་མིག་ཕྱིར་གཞུང་ལ་སྤྲད་རྗེས། རྔ་པ་རྫོང་གི་དམག་མི་དང་ཉེན་རྟོག་པ་བཏང་སྟེ་མི་མང་ལ་ཉེས་རྡུང་བཏང་ཡོད་པ་མ་ཟད། སྐོར་ཞིག་འཇུ་བཟུང་བྱས་ཏེ་ཟླ་ ༩ ཙམ་ལ་བཀག་ཉར་བྱས་སོང་། དེའི་རྗེས་མང་ཚོགས་ལ་ཚོགས་འདུ་བསྐོངས་ཏེ། ཁང་པ་གསར་པའི་ནང་མ་སྤོ་བ་ཡིན་ན་སྲིད་གཞུང་ལ་ངོ་ལོག་བྱས་པའི་ནག་ཉེས་འོག་བཙོན་འཇུག་ཉེས་ཆད་གཅོད་རྒྱུ་ཡིན་སྐོར་ལབ་སྟེ་མི་མང་ཨ་ཆད་ཨུ་ཐུག་ཆགས་པ་རེད” ཅེས་བརྗོད་བྱུང་།

ངེད་གཉིས་གླེང་མོལ་གྱི་མཇུག་ཏུ་ཁོང་ལ་མ་འོངས་བོད་ཀྱི་བདེན་མཐའ་སེལ་བར་རེ་བ་གང་འདྲ་མཐོང་གི་ཡོད་མེད་དྲིས་པར། “ འཛམ་གླིང་གི་དབུ་ཁྲིད་ཁྲོད་ནས་སྐད་གྲགས་ཆེ་ཤོས་༧རྒྱལ་བ་རིན་པོ་ཆེ་རེད། དེའི་ཕྱོགས་ནས་རེ་བ་རྒྱག་ས་ཞིག་འདུག དེ་མིན་བོད་ནང་ལ་མཚོན་ན་ད་ལྟའི་ཆར་རྒྱ་རིགས་དང་རྒྱ་མིའི་དམག་མི་སོགས་ཇེ་མང་ནས་ཇེ་མང་དུ་འགྲོ་བཞིན་འདུག མཚོ་སྔོན་སོགས་ས་ཕྱོགས་མང་པོར་བོད་ཡིག་སློབ་སྦྱོང་ཐོག་བཀག་འགོག་བྱས་འདུག ས་ཆ་མང་པོར་བོད་ཀྱི་ཆོས་དང་རིག་གཞུང་གི་ལས་དོན་མང་པོ་ཞིག་བསྒྲུབ་ཐུབ་ཀྱི་མི་འདུག ད་དུང་གནས་སྟངས་གང་མང་གི་དབང་གིས་བོད་མིའི་ཡུལ་གོམས་གཤིས་ལུགས་མང་པོ་ཞིག་རྒྱ་མའི་ཕྱོགས་སུ་འགྱུར་གྱིན་པ་བཅས་གནས་སྟངས་མང་པོ་ཞིག་འོག་ནས་རེ་བ་མཐོང་གི་མི་འདུག བོད་ནང་གི་བོད་མི་མང་ཆེ་བས་༧རྒྱལ་བ་རིན་པོ་ཆེ་བཀའ་དྲིན་ལ་བརྟེན་ནས་བོད་ལ་སྐྱིད་པའི་ཉི་མ་ཞིག་ཤར་རྒྱུ་དང་། ཁོང་གི་ཞལ་མཇལ་རྒྱུ་དང་གསུང་ཐོས་རྒྱུ་ཁོ་ནར་རེ་བ་བརྒྱབ་བསྡད་འདུག” ཅེས་བརྗོད་བྱུང་།

གསར་འགོད་པ། དོན་གོ