དེ་རིང་སྔ་དྲོར་རྒྱལ་སྤྱིའི་ཁྲག་སྦྱིན་གྱི་ཉིན་མོ་སྲུང་གཙི་བྱས་པའི་མཛད་སྒོ་ཐོག བོད་མིའི་སྒྲིག་འཛུགས་ཀྱི་འཕྲོད་བསྟེན་དྲུང་ཆེ་བསོད་ནམས་ཆོས་འཕེལ་ལགས་ཀྱིས་ཁྲག་སྦྱིན་གཏོང་བ་དེ་བོད་ཀྱི་ལོ་རྒྱུས་ནང་གལ་ཆེན་པོ་ཆགས་སྐོར་བརྗོད་སོང་།
ཟླ་འདིའི་ཕྱི་ཚེས་ ༡༤ ཉིན་རྒྱལ་སྤྱིའི་ཁྲག་སྦྱིན་ཉིན་མོ་ཡིན་པ་ལྟར། དེ་རིང་སྔ་དྲོའི་ཆུ་ཚོད་ ༡༠ ཙམ་ལ། དྷ་ས་བོད་ཀྱི་བདེ་རྩ་ཚོགས་པའི་གོ་སྒྲིག་འོག རྒྱལ་སྤྱིའི་ཁྲག་སྦྱིན་ཉིན་མོ་སྲུང་གཙི་དང་འབྲེལ་བའི་མཛད་སྒོ་ཞིག་ཚོགས་སོང་བ་དང་། སྐབས་དེར་སྐུ་མགྲོན་གཙོ་བོ་འཕྲོད་བསྟེན་དྲུང་ཆེ་བསོད་ནམས་ཆོས་འཕེལ་ལགས་དང་བདེ་ལེགས་སྨན་ཁང་གི་སྨན་པ་བསྟན་འཛིན་བརྩོན་འགྲུས་ལགས། ཛོ་ནཱལ་སྨན་ཁང་ཁྲག་མཛོད་སྡེ་ཚན་གྱི་སྨན་པ་ (Anju Puri )ལགས་དང་། ཊན་ཌཱ་སྨན་ཁང་ཁྲག་མཛོད་ཀྱི་སྨན་པ་ (Bal Chandra)། དེ་བཞིན། བོད་ཀྱི་བདེ་རྩ་ཚོགས་པའི་འགན་འཛིན་དང་ལས་བྱེད། སློབ་ཕྲུག་བཅས་འདུ་འཛོམས་གནང་འདུག
མཛད་སྒོའི་ཐོག་སྐུ་མགྲོན་སྨན་པ་རྣམ་པས་ཁྲག་སྦྱིན་གཏོང་མཁན་ཚོས་ཚད་ལྡན་སྨན་ཁང་གིས་དཔྱད་བརྟག་བྱས་པ་བརྒྱུད་དེ་ཁྲག་སྦྱིན་བཏང་བ་ཡིན་ན། རང་གཞན་གཉིས་ཀྱི་ལུས་སེམས་ཀྱི་འཕྲོད་བསྟེན་ལ་ཕན་པ་མང་བ་མ་ཟད། མི་ཞིག་གི་ཚེ་སྲོག་བསྐྱབས་པ་ཡིན་སྟབས་ཆོས་ཕྱོགས་ནས་བཤད་ནའང་དགེ་བའི་ལས་ཆེན་པོ་ཞིག་ཡིན་སྐོར་སོགས་གཏམ་བཤད་གནང་སོང་བ་དང་། གཞན་ཡང་། སྐབས་དེར་ཁྲག་སྦྱིན་རུ་ཁག་ཆེད་འཛུགས་བྱས་ནས་འདས་པའི་ལོ་ངོ་ ༣ ལྷག་གི་ནང་ཁྲག་སྦྱིན་ཐེངས་མང་གནང་མཁན་སྒྲོལ་མ་སྐྱབས་དང་། ཁྲག་སྦྱིན་གྱིས་དྲག་སྐྱེད་བྱུང་བའི་ཨ་ཅག་ཧ་ལོའི་མེ་ཏོག་གཉིས་ཀྱིས་རང་ཉིད་ཀྱི་ཉམས་མྱོང་དང་ཕན་ཐོགས་སོགས་ངོ་སྤྲོད་གནང་སོང་།
སྐབས་དེར་བོད་ཀྱི་བདེ་རྩ་ཚོགས་པའི་འགན་འཛིན་ཚེ་རིང་དོན་འགྲུབ་ལགས་ཀྱིས་བརྗོད་དོན། “སྤྱིར་བཏང་སྨན་ཁང་ཆེ་ཁག་ཏུ་ཁྲག་མཛོད་(Blood Bank)ཟེར་ནས་ཁྲག་ལེན་ཆོག་ཆོག་དེ་འདྲ་ཡོད་པ་རེད། ཡིན་ནའང་། འཛམ་གླིང་ཐོག་ནས་ཁྲག་ཉེན་ཁ་ཆུང་ཤོས་དང་ཁེ་ཕན་ཆེ་ཤོས་དེ་དང་བླངས་ཀྱིས་སྦྱིན་པའི་ཁྲག་ཡིན་པར་ངོས་འཛིན་བྱེད་ཀྱི་ཡོད་པ་རེད། དེང་སང་དཔལ་འབྱོར་གྱི་དཀའ་ངལ་ཡོད་མཁན་ཁ་ཤས་ཀྱིས་དངུལ་ཁོ་ནའི་ཆེད་དུ་ཁྲག་བཙོང་གི་ཡོད་པ་དང་། ཁྲག་ཉོ་མཁན་གྱིས་ཀྱང་དངུལ་ཁོ་ནར་བསམ་བློ་བཏང་ནས་ཁྲག་ཉོ་བཞིན་ཡོད་སྟབས། ཁྲག་དེ་ཚོ་ནད་པར་སྤྲད་ན་འོས་དང་མི་འོས་ཐེ་ཚོམ་ཞིག་ཆགས་བསྡད་ཡོད་པ་རེད། དེའི་ཕྱིར་ང་ཚོ་བོད་ཀྱི་ཁྲག་སྦྱིན་རུ་ཁག་གིས་དང་བླངས་ཀྱི་ཐོག་ནས་སྦྱིན་པའི་ཁྲག་དེ་ཉེན་ཁ་ཆུང་ཤོས་ཆགས་ཀྱི་ཡོད་པ་རེད། ”ཅེས་བརྗོད་སོང་།
འཕྲོད་བསྟེན་དྲུང་ཆེ་བསོད་ནམས་ཆོས་འཕེལ་ལགས་ཀྱིས་ཁྲག་སྦྱིན་རུ་ཁག་གསར་འཛུགས་ཀྱིས་མི་མང་པོར་ཕན་ཐོགས་བཞིན་པ་དེ་ལོ་རྒྱུས་ནང་གལ་ཆེན་ཆགས་ཡོད་སྐོར་ལ། བོད་ཀྱི་ཁྲག་སྦྱིན་རུ་ཁག་ལ་ཚོགས་མི་ ༡༨༠ ལྷག་ཡོད་པ་ཙམ་མིན་པར་མི་གྲངས་ ༡༤༠ ལྷག་གིས་དངོས་སུ་ཁྲག་སྦྱིན་བཏང་ཚར་བ་དེ། བོད་ཀྱི་ལོ་རྒྱུས་ནང་བལྟས་ན་གལ་ཆེན་པོ་ཞིག་ཆགས་བསྡད་ཡོད་པ་རེད། ཟུང་ཁྲག་ག་ཚོད་ཀྱིས་དགོས་གལ་ཆེན་པོ་དང་རྩ་ཆེན་པོ་ཡིན་པ་ཚང་མས་ཤེས་ཀྱི་ཡོད་སྟབས། ཚོགས་མི་ཚོ་དང་བླངས་ཀྱིས་ཁྲག་སྦྱིན་རུ་ཁག་ནང་འཛུལ་ཞུགས་བྱས་ཏེ་བོད་པའི་སྤྱི་ཚོགས་ནང་ཁྲག་སྦྱིན་གཏོང་བཞིན་དེ་གཟི་བརྗིད་ཅིག་ཡིན་པས། བོད་ཀྱི་བདེ་རྩ་ཚོགས་པར་བསྔགས་བརྗོད་དང་སྦྲགས་བྱ་བ་བཟང་པོ་དེ་ཚོ་ཁུངས་འཁྱོལ་དགོས་པ་གལ་གནད་ཆེན་པོ་ཡིན་སྐོར་བརྗོད་སོང་།
བོད་ཀྱི་ཁྲག་སྦྱིན་རུ་ཁག་ཕྱི་ལོ་ ༢༠༡༢ ལོར་གསར་དུ་བཙུགས་ཡོད་པ་དང་། ད་ལྟའི་ཆར་ཚོགས་མི་ ༢༨༠ ལྷག་ཡོད་པའི་ནང་ནས་མི་ ༡༤༠ ལྷག་གིས་ཁྲག་སྦྱིན་བཏང་ཚར་ཡོད་འདུག
གསར་འགོད་པ། པདྨ་མཚོ།
་་་་་་ གཞན་ཡང་། སྐབས་དེར་ཁྲག་སྦྱིན་རུ་ཁག་ཆེད་འཛུགས་བྱས་ནས་འདས་པའི་ལོ་ངོ་ ༣ ལྷག་གི་ནང་ཁྲག་སྦྱིན་ཐེངས་མང་གནང་མཁན་སྒྲོལ་མ་སྐྱབས་དང་། ཁྲག་སྦྱིན་གྱིས་དྲག་སྐྱེད་བྱུང་བའི་ཨ་ཅག་ཧ་ལོའི་མེ་ཏོག་གཉིས་ཀྱིས་རང་ཉིད་ཀྱི་ཉམས་མྱོང་དང་ཕན་ཐོགས་སོགས་ངོ་སྤྲོད་གནང་སོང་། ་་་་་་
༈།།ང་ལ་དངུལ་སྦྱིན་ལས་ཤ་ཁྲག་སློང་ཕོད་ས་མ་རེད་ང་ལ་དངུལ་སྦྱིན་མང་ཙམ་གནང་རོགས་ཞུ་རྒྱུ་ཡིན།