འཛམ་གླིང་རྐང་སྤོལ་འགྲན་སྡུར་མགོ་འཛུགས།

སང་ཉིན་བྷར་ཛིལ་རྒྱལ་ཁབ་ཀྱི་གྲོང་ཁྱེར་ཆེ་ཤོས་སོན་ཕོབ་ལོར་འཛམ་གླིང་རྐང་སྤོལ་འགྲན་སྡུར་ཐེངས་ཉི་ཤུ་པ་དེ་མགོ་འཛུགས་བྱེད་བཞིན་ཡོད་འདུག

ཁ་སང་བྷར་ཛིལ་གྱི་སྲིད་འཛིན་ལྕམ་ཌེལ་མཱ་ (Dilma Rousseff) མཆོག་གིས། སང་ཉིན་ཚེས་ ༡༢ ཉིན་བྷར་ཛིལ་གྲོང་ཁྱེར་ཆེ་ཤོས་སོན་ཕོབ་ལོ་ (San Paulo) ཡི་རྩེད་ཐང་དུ། ༢༠༡༤ ལོའི་འཛམ་གླིང་རྐང་རྩེད་སྤོ་ལོ་འགྲན་བསྡུར་ཐེངས་ ༢༠ པ་དེ་མགོ་འཛུགས་བྱེད་རྒྱུ་ཡིན་པ་དང་། སྲིད་གཞུང་གིས་ཐེངས་འདིའི་རྐང་སྤོལ་འགྲན་སྡུར་གྱི་ལས་རིམ་དང་མང་ཚོགས་ཀྱི་བདེ་འཇགས་ལ་འགན་འཁུར་ཡག་པོ་བྱ་རྒྱུ་ཡིན་ཞེས་སོགས་བརྗོད་འདུག

ཉེ་བའི་ལོ་བཞིའི་རིང་བྷར་ཛིལ་གཞུང་གིས་ཨ་སྒོར་ཐེར་འབུམ་ ༡༢ ཙམ་བཏང་སྟེ་རྐང་སྤོལ་རྩེད་ཐང་ ༡༢ ཙམ་གསར་རྒྱག་བྱས་ཡོད་པ་དང་། གཞུང་ལམ་འཛུགས་སྐྲུན་བཅས་ཀྱི་འགྲོ་གྲོན་ཆེད་གྲོང་ཁྱེར་ཁག་ནང་གི་སྤྱི་སྤྱོད་རླངས་འཁོར་དང་མེ་འཁོར། ས་འོག་མེ་འཁོར་བཅས་ཀྱི་འགྲུལ་གླ་སྤར་བ་དང་། རྐང་སྤོལ་འགྲན་སྡུར་གྱི་འཛུགས་སྐྲུན་ལས་གཞིའི་ནང་ལྐོག་ཟ་རུལ་སུངས་ཤུགས་ཆེན་བྱུང་བར་བརྟེན། ༢༠༡༢ ལོ་ནས་བཟུང་མི་མང་ཁྲི་ཕྲག་མང་པོས་གཞུང་ལ་ངོ་རྒོལ་རབ་དང་རིམ་བྱས་པ་མ་ཟད། རྐང་སྤོ་འགྲན་སྡུར་མགོ་འཛུགས་བྱེད་ལ་ཉེ་བའི་སྐབས་འདིར། མང་ཚོགས་ཀྱིས་སྲིད་གཞུང་ལ་ངོ་རྒོལ་བྱས་ཏེ་འགྲོ་གྲོན་དེ་དག་ཤེས་ཡོན་དང་འཕྲོད་བསྟེན། འགྲིམ་འགྲུལ་སོགས་ཀྱི་ཐད་གཏོང་བའི་དགོས་འདུན་རྗོད་བཞིན་ཡོད་འདུག

རྒྱལ་སྤྱིའི་མནའ་འབྲེལ་རྐང་སྤོལ་ལྷན་ཚོགས་ (FIFA) ཡི་ཚོགས་གཙོ་བྷེ་ལྰ་ཊིར་ (Sepp Blatter) ཀྱིས་ཐེངས་འདིའི་བྷར་ཛིལ་གྱི་རྐང་སྤོལ་འགྲན་སྡུར་འགྲོ་གྲོན་སྐོར་ལ་གསར་འགོད་གསལ་བསྒྲགས་སྤེལ་ཏེ། རྒྱལ་སྤྱིའི་མནའ་འབྲེལ་རྐང་སྤོལ་ལྷན་ཚོགས་ (FIFA) ཀྱིས་བྷར་ཛེལ་ནང་རྐང་སྤོལ་འགྲན་སྡུར་གྱི་འགྲོ་གྲོན་ཨ་སྒོར་ཐེར་འབུམ་ ༢ ཙམ་ལས་བཏང་མེད་ལ། དེ་ཡང་ཁོང་ཚོས་འཛམ་གླིང་རྐང་སྤོལ་གཟེངས་རྟགས་ཀྱི་བརྙན་འཕྲིན་དང་ཚོང་ལས་ཁྱབ་བསྒྲགས་སོགས་ལས་རག་པའི་དངུལ་ཡིན་སྐོར་དང་། ཁོང་གིས་མུ་མཐུད་དུ་ “ལྷན་ཚོགས་ཀྱི་ངོས་ནས་བྷར་ཛིལ་གཞུང་ལ་རྐང་སྤོལ་རྩེད་ཐང་ ༡༢ ཙམ་རྒྱག་དགོས་པའི་རེ་འདུན་བཏོན་མྱོང་མེད། དེ་ནི་མགྲོན་བདག་རྒྱལ་ཁབ་ཀྱིས་རྐང་སྤོལ་རྩེད་ཐང་ག་ཚོད་རྒྱག་མིན་རང་མོས་ཐོག་ཐག་གཅོད་གནང་ཡོད་”ཅེས་བརྗོད་འདུག

འཛམ་གླིང་རྐང་སྤོལ་འགྲན་སྡུར་ནི། ༡༩༣༠ ལོར་མགོ་བཙུགས་བྱས་ཏེ་ལོ་ ༤ རེའི་མཚམས་སུ་འགྲན་སྡུར་ཐེངས་གཅིག་རེ་འགྲན་སྡུར་བྱེད་ཀྱིན་ཡོད་ཅིང་། ད་ལྟའི་ཆར་ཚོགས་མིའི་རྒྱལ་ཁབ་ ༢༠༩ ཡོད་པ་དང་། འགྲན་སྡུར་བརྒྱུད་རྒྱལ་ཁབ་ ༣༢ ཡི་རྐང་སྤོལ་རུ་ཁག་འདེམས་ཀྱི་ཡོད་འདུག རྐང་སྤོལ་འགྲན་སྡུར་གྱི་ཨང་དང་པོར་ཨ་སྒོར་ས་ཡ་ ༣༥ དང་གཉིས་པར་ཨ་སྒོར་ས་ཡ་ ༢༥། གསུམ་པར་ཨ་སྒོར་ས་ཡ་ ༢༢ བཅས་བྱ་དགའ་གནང་གི་ཡོད་འདུག

སང་ཉིན་ཕྱི་དྲོའི་ས་གནས་ཆུ་ཚོད་ ༥།༠༠ སྟེང་བྷར་ཛིལ་གྱི་གྲོང་ཁྱེར་ཆེ་ཤོས་སོན་ཕོབ་ལོ་ (San Paulo) ཡི་རྩེད་ཐང་དུ་བྷར་ཛིལ་དང་ཁུ་རེ་ཤེ་ཡ་ (Croatia) རྐང་སྤོ་འགྲན་སྡུར་གྱི་རྩེད་མོ་མགོ་འཛུགས་བྱ་རྒྱུ་ཡིན་པ་དང་། ཟླ་རྗེས་མའི་ཚེས་ ༡༣ ཉིན་མཐའ་མའི་རྐང་སྤོལ་འགྲན་སྡུར་གནང་རྒྱུ་ཡིན་པའི་གཏན་ཁེལ་ཡོད་འདུག

གསར་འགོད་པ། ལྷ་སྐྱབས་རྒྱལ།