ཆུ་བཞི་སྒང་དྲུག་གི་ཚོཊ་ཆེན་ཐོག་བོད་མི་མང་སྤྱི་འཐུས་ལྷན་ཚོགས་ཀྱིས་གསུང་འཕྲིན་བསྩལ་བའི་ནང་དབུ་མའི་ལམ་གྱི་སྲིད་བྱུས་ལ་རྒྱལ་སྤྱིའི་ཁྱོན་ནས་རྒྱབ་སྐྱོར་གནང་བཞིན་པའི་སྐབས་འདིར་ཚང་མས་ནུས་པ་མཉམ་སྤུངས་བྱེད་དགོས་པ་དང་། ༸གོང་ས་མཆོག་ལ་གཞི་མེད་མཚན་སྨོད་ཞུ་རིགས་ལ་སྤྱི་འཐུས་ཀྱི་གྲོས་ཆོད་འབྲུ་དོན་དོལ་འཁྱོལ་བྱེད་དགོས་པ་སོགས་བཀོད་འདུག
འདས་པའི་ཉིན་གསུམ་རིང་རྒྱ་གར་བྱང་ཕྱོགས་ལྡེ་ར་རྡུན་དོན་གྲུབ་གླིང་གཞིས་ཆགས་ཀྱི་སློབ་གྲྭའི་ཚོགས་ཁང་དུ། ཆུ་བཞི་སྒང་དྲུག་རྒྱལ་ཡོངས་ཚོགས་ཆེན་ཐེངས་ ༢༠ པ་དང་འགན་འཛིན་ལྷན་ཚོགས་ཐེངས་ ༤༤ པ་དེ་སྐོང་ཚོགས་གནང་ཡོད་པ་དང་། ཚོགས་ཆེན་དབུ་འབྱེད་ཐོག་སྐུ་མགྲོན་གཙོ་བོ་གྲའུ་དཔོན་རིན་ཆེན་ཚེ་རིང་དང་། སྨིན་གླིང་མཁན་ཆེན་རིན་པོ་ཆེའི་སྐུ་ཚབ། དེ་བཞིན་བོད་མི་མང་སྤྱི་འཐུས་ལས་ཐོག་དང་སྤྱི་ཟུར། དགོན་པ་ཁག་གི་དབུ་ཁྲིད། ཚོགས་པ་ཁག་གི་སྐུ་ཚབ། ཆུ་སྒང་དབུས་རྒྱུན་གསར་རྙིང་གཉིས་དང་ས་གནས་ཁག་བཅས་ཀྱི་མི་ ༤༠༠ ཙམ་འདུ་འཛོམས་བྱུང་ཡོད་འདུག
ཚོགས་ཆེན་དབུ་འབྱེད་ཐོག་ཆུ་བཞི་སྒང་དྲུག་གསར་འཛུགས་གནང་སྟེ་ལོ་ངོ་ ༥༦ འཁོར་བར། བོད་མི་མང་སྤྱི་འཐུས་ལྷན་ཚོགས་ཀྱིས་གསུང་འཕྲིན་ཞིག་བསྩལ་ཡོད་པ་སྒྲོག་སྦྱངས་དང་། རྒྱུན་ལས་སྐབས་ ༡༩ པའི་འདས་པའི་ལོ་ ༣ རིང་གི་ལས་བསྡོམས་དང་བྱུང་སོང་རྩིས་ཁྲ་སྙན་སྒྲོན་སོགས་གྲུབ་རྗེས། རིམ་པ་བཞིན་གྲོས་གཞི་ཁག་གི་ཐོག་བགྲོ་གླེང་གནང་མཐར། དེ་རིང་ཕྱི་དྲོར་ཉེ་ཆར་འོས་འདེམས་བྱུང་བའི་དབུས་རྒྱུན་གསར་པ་ ༡༡ ལ་ལས་བགོས་བྱས་ཏེ། སྐབས་ ༢༠ པའི་དབུས་རྒྱུན་ཚོགས་གཙོ་པདྨ་བདེ་ལེགས་ལགས་དང་། ཚོགས་གཞོན་བཀྲ་ཤིས་དཔལ་འབྱོར་ལགས་དང་གླིང་ཚང་ཚེ་རྡོར་ལགས། དྲུང་ཆེ་འཆམ་ར་དྲི་མེད་རྒྱལ་མཚན་ལགས། དྲུང་གཞོན་ངག་དབང་ཐར་པ་ལགས་བཅས་ཡིན་པ་དང་། ཟླ་འདིའི་ཕྱི་ཚེས་ ༢༥ ཉིན་རྒྱུན་ལས་གསར་རྙིང་བར་རྩིས་ལེན་རྩིས་སྤྲོད་བྱ་རྒྱུ་ཡིན་འདུག
ད་རེབ་ཀྱི་ཚོགས་ཆེན་ཐོག་གྲོས་ཆོད་ཁག་ཅིག་བཞག་ཡོད་པའི་ནང་། ༧གོང་ས་མཆོག་གི་སྐུ་ཕྱྭའི་ཆེད་ཞབས་རིམ་གསོག་སྒྲུབ་དང་དོལ་ཚོགས་ཀྱི་བཤད་སྤྱོད་ལ་མཐའ་གཅིག་ཏུ་ངོ་རྒོལ་བྱ་རྒྱུ། རྒྱ་གར་གཞུང་དང་རང་གཞུང་བདེ་སྲུང་སོགས་སུ་སྐུ་ཕྱའི་ཉེན་སྲུང་གཟབ་ནན་དགོས་པའི་སྙན་སེང་ཞུ་རྒྱུ། གཞིས་བཞུགས་བོད་མིའི་ཁོངས་རང་ལུས་མེར་བསྲེགས་ཀྱིས་མཚོན་པའི་ཛ་དྲག་ལས་འགུལ་སྤེལ་བཞིན་པ་དག་ལ་མྱ་ངན་དང་ཤུལ་ལུས་ནང་མི་རྣམས་ལ་གདུང་སེམས་མཉམ་བསྐྱེད། རྒྱལ་གཅེས་དཔའ་བོ་དཔའ་མོ་རྣམ་པའི་ལོ་རྒྱུས་དེབ་ཅིག་དང་ས་གནས་གལ་ཆེན་ཞིག་ཏུ་རྗེས་དྲན་རྡོ་རིང་བཞེངས་ཐབས་གནང་དགོས་པ། ད་ལྟ་འགྲོ་བཞིན་པའི་དགེ་རྩ་ཚོགས་པའི་ལས་རིམ་དག་ཧ་ཅང་ཡག་པོ་ཡིན་སྟབས། མ་འོངས་བོད་ཕྲུག་ཚོའི་ཤེས་ཡོན་ལ་རམ་འདེགས་སླད་མཐོ་སློབ་ཀྱི་སློབ་མ་ ༢༠ ལ་སློབ་ཡོན་གྱི་མཐུན་རྐྱེན་བསྐྲུན་རྒྱུ་དང་། རྒན་རབས་ཉམ་ཐག་ ༩༨ ལ་འཚོ་སྣོན་འབུལ་རྒྱུ་སོགས་འཁོད་ཡོད་འདུག
ཉིན་དེར་ངྷ་རམ་ས་ལའི་ཕྱི་སྐོར་ལྷ་རྒྱལ་རིར་ཡང་དུས་དྲན་སྲུང་གཙིའི་བསང་གསོལ་གྱི་མཛད་སྒོ་ཞིག་ཚོགས་ཡོད་པའི་སྟེང་། བོད་མི་མང་སྤྱི་འཐུས་རྒྱུན་ལས་ཀྱི་སྐུ་ཚབ་རོང་བོ་བློ་བཟང་སྙན་གྲགས་ལགས་ཕེབས་ཏེ་བོད་མི་མང་སྤྱི་འཐུས་ལྷན་ཚོགས་གསུང་འཕྲིན་སྒྲོགས་སྦྱང་གནང་བའི་ནང་། ད་ལྟའི་བོད་ནང་གི་ཛ་དྲག་དཀའ་ངལ་སེལ་ཐབས་དང་། མ་འོངས་བོད་དང་བོད་མི་ཞེས་པའི་ངོ་བོ་དང་། ཆོས་དང་རིག་གཞུང་། གོམས་གཤིས་བཟང་པོ་རྣམས་དར་སྤེལ་ཡོང་ཆེད་བོད་རྒྱའི་དབར་གྱི་དཀའ་ངལ་གནས་བབ་འདི་དག་སེལ་རྒྱུར་དངོས་ཡོད་གནས་སྟངས་དང་འཚམས་པའི་ཐབས་ལམ་བཟང་ཤོས་ནི་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་དགོངས་གཞི་དང་། བོད་རྒྱ་ཆེའི་མང་ཚོགས་ཀྱི་ཚད་མཐོའི་མང་མོས་ལྟར་བོད་མིའི་སྒྲིག་འཛུགས་ཀྱིས་གཏན་ལ་ཕབ་པའི་གཉིས་སྨན་དབུ་མའི་ལམ་གྱི་སྲིད་བྱུས་འདིར་རྒྱལ་སྤྱིའི་ཁྱོན་ནས་ཀྱང་མོས་མཐུན་རྒྱབ་སྐྱོར་གང་ལེགས་གནང་དང་གནང་བཞིན་ཡོད་པ་སོགས་ཀྱི་དུས་སྐབས་འདི་དག་དམ་འཛིན་གྱིས་བོད་མིའི་རང་དབང་རྩོད་ལེན་གྱི་རྩ་དོན་ལངས་ཕྱོགས་ཀྱི་སྲིད་བྱུས་འདིར་བོད་མི་ཀུན་གྱིས་ནུས་ཤུགས་མཉམ་སྒྲིལ་གྱི་འཁུར་འགན་ཆེ་ཙམ་ལེན་དགོས་པའི་སྐུལ་མ་ཞིག་ཀྱང་ད་རེས་ཀྱི་དུས་སྐབས་འདི་དང་བསྟུན་ནས་ཞུ་རྒྱུ་ཡིན།
མུ་མཐུད་དུ་བསྟན་དོན། བླང་དོར་གྱི་གནས་ལ་རྨོངས་ཤིང་བོད་བསྟན་སྲིད་དང་། ༸རྒྱལ་བའི་སྐུ་ཕྱྭ་དང་བཅས་པར་བསམ་ཞིབ་དོ་སྣང་མེད་ཁར། རྒྱ་ནག་གཞུང་གིས་སྲིད་དོན་གྱི་ལག་ཆར་དངུལ་དངོས་ཀྱི་མགོ་བསྐོར་བསླུ་བྲིད་འོག་ཚུད་པ་ཉུང་ཤས་ཀྱིས་རང་ཉིད་མ་ཟད་མི་རིགས་གཞན་ལའང་བརྒྱུད་སྐུལ་བཅས་ཀྱི་ལམ་ནས་གོ་སྐབས་འདྲ་མིན་བཟུང་སྟེ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་གཞི་མེད་ཀྱི་མཚན་སྨོད་ཞུ་བ་སོགས་ཀྱི་བྱ་སྤྱོད་ངན་སྤེལ་བྱེད་མཁན་དེ་རིགས་ ལ་ང་ཚོས་ངོས་འཛིན་གསལ་པོའི་ཐོག་ནས་བྱ་ཕྱོགས་ཀྱི་ལམ་སྟོན་ཁ་གསལ་ཡོད་པའི་ གྲོས་ཆོད་ཅིག་ཉེ་སྔོན་བོད་མི་མང་སྤྱི་འཐུས་སྐབས་ ༡༥ པའི་གྲོས་ཚོགས་ཚོགས་དུས་ ༧ པའི་ཐོག་སྤྱི་མོས་ཀྱིས་གཏན་འབེབས་གནང་ཡོད་པ་ལྟར། རང་ཅག་བོད་མི་དཔྱོད་ལྡན་ཀུན་གྱིས་གྲོས་ཆོད་ཀྱི་འབྲུ་དོན་རྣམས་ལག་བསྟར་དོན་ འཁྱོལ་ཡོང་ཆེད་ཕྱྭར་གྲུ་མཉམ་འདེགས་ཀྱི་འགན་འཁུར་ཆེ་ཙམ་ལེན་དགོས་པའི་སྐུལ་མ་ནན་ཏན་ཞུ་རྒྱུ། ཞེས་སོགས་བཀོད་འདུག
གསར་འགོད་པ། པདྨ་མཚོ།
མདོ་ཁམས་མི་དམངས་ལ་ཆུ་བཞི་སྒང་དྲུག་གཅིག་མ་གཏོགས་གཉིས་མེད་།སྐད་ཆ་དེའི་རིགས་གླེང་སློང་མི་ཡོང་ཞུ།སྨྲ་བརྗོད་རང་དབང་རེད་ཟེར་གང་བྱུང་མ་གསུངས་རོགས་ཞུ་།དེ་མིན་བོད་སྤྱིའི་ལ་དོན་ལ་ཕན་ཐོགས་ཡོད་པའི་རྩོམ་ཡིག་མང་ཙམ་འབྲི་ཐུབ་ན་བཟང་ངོ།
ཁ་སང་རྒྱ་མིའི་གསར་ཤོག་ནང་བརྗོད་རྒྱུར། ཏཱ་ལའི་བླ་མར་གྲོས་མོལ་སྒོ་ཕྱེས་ཡོད། ཡིན་ནའང་། ཏཱ་ལའི་བླ་མ་སྒེར་གྱི་མ་འོངས་པར་གྲོས་མོལ་བྱེད་པ་ལས་བོད་དོན་ཟེར་བ་ཞིག་གླེང་སློང་བྱེད་ས་ལྷག་མེད་ཅེས་འདུག སྲིད་དོན་མཁས་དབང་སྐུ་ངོ་བློ་བཟང་སྙན་གྲགས་ལགས་ཀྱིས་ད་དུང་རང་ལྟ་མཆོག་འཛིན་གནང་གི་འདུག
སྔོན་མ་ཆུ་བཞི་སྒང་དྲུག་གསར་རྙིང་གཉིས་ཡོད་པ་རེད། དེང་སྐབས་གཅིག་པ་ཆགས་པ་རེད་དམ། གལ་སྲིད་ཡིན་ཚེ་ཡག་པོ་འདུག བོད་པ་ཚོས་ཆོལ་ཁ་ཆོས་ལུགས་དང་ལུང་ཚན་ཤོག་ཤག་རྩད་ནས་མི་འདུག་པར་རྩ་དོན་འཐབ་རྩོད་ཐོག་རྡོག་རྩ་ཆིག་སྒྲིལ་གནང་རྒྱུ་ཧ་ཅང་གལ་ཆེན་པོ་རེད། ཚོགས་པ་སྐྱིད་སྡུག་དང་ལྟ་བ་ལངས་ཕྱོགས་ཅི་ཙམ་ཉུང་ཉུང་ཆགས་ན་དེ་ཙམ་གྱི་ནུས་པ་རྡོག་བསྒྲིལ་རྒྱུར་ཕན་ཐོགས་ཆེ་བ་ཡོང་གི་རེད།