ཨི་རག་གི་གནས་སྟངས་ཛ་དྲག་ཆཊ་འདུག

གཟའ་འཁོར་སྔོན་མ་ནས་བཟུང་ཨི་རག་གི་གྲོང་ཁྱེར་དང་ས་གནས་ཁག་ཅིག་འཇིགས་སྐུལ་དྲག་སྤྱོད་པས་བཙན་བཟུང་བྱས་ཡོད་པ་དང་ད་ཆར་གནས་སྟངས་ཧ་ཅང་ཛ་དྲག་གི་ངོ་བོར་འགྱུར་བཞིན་ཡོད་འདུག

དེ་རིང་ཨི་རག་ནང་གི་ཁ་ཆེ་སུ་ནེ་ཆོས་ལུགས་ཀྱི་རྗེས་འབྲང་པ་ཚོས་སྣེ་ཁྲིད་པའི་ཁ་ཆེ་འཇིགས་སྐུལ་དྲག་སྤྱོད་ཚོགས་པ་ (ISIS) ཡིས་ཨི་རག་གི་ས་གནས་བྷེལ་ཇེ་ (Baiji) ནང་ཡོད་པའི་རྡོ་སྣུམ་བཟོ་གྲྭ་ཆེ་ཤོས་དང་བྱང་ཕྱོགས་གྲོང་ཁྱེར་ར་མཱ་ཊི་ (Ramadi)ལ་འཇབ་རྒོལ་དང་། དེ་ལ་ཨི་རག་གཞུང་དམག་གིས་ཁ་གཏད་བཅག་སྟེ་གནས་སྟངས་ཛ་དྲག་ཆགས་ཡོད་འདུག

ཟླ་འདིའི་ཚེས་ ༡༢ ཉིན་བཟུང་འཇིགས་སྐུལ་དྲག་སྤྱོད་ཚོགས་པས་ཨི་རག་གི་གྲོང་ཁྱེར་ཆེ་ཤོས་གཉིས་པ་མཱོ་སོལ་དང་ཌིར་ཀི་རེ་ཌི་ (Tikrit)། ཌེལ་ཨ་ཧྥར་ (Tal Afar)། ར་མྰ་ཊི་ (Ramadi)། ར་ཁྰ་ (Raqqa) བཅས་བཙན་བཟུང་བྱས་ཏེ་ཁྱོན་མི་ ༡༠༠ ལྷག་བསད་ཡོད་སྟབས། མཉམ་འབྲེལ་རྒྱལ་ཚོགས་གཙོས་ཨ་རི་དང་དབྱིན་ཡུལ། ཨི་རན་སོགས་ཀྱིས་ཨི་རག་གཞུང་ལ་རྒྱབ་སྐྱོར་བྱས་ཏེ་འཇིགས་སྐུལ་པ་ཚོ་རྩ་མེད་གཏོང་རྒྱུར་འབད་བརྩོན་བྱེད་བཞིན་ཡོད་འདུག

ཨ་རི་གཞུང་གིས་ཨི་རག་ནང་གི་ཨ་རིའི་གཞུང་ཚབ་ཁང་དང་ལས་བྱེད་ཚོ་སྲུང་སྐྱོབ་ཆེད་ཨ་རིའི་དམག་མི་ ༢༧༥ ལྷག་བཏང་ཡོད་པ་མ་ཟད། དཀྱིལ་ཤར་ཨེ་ཤ་ཡའི་མཚོ་ཁུག་ཏུ་གནམ་གྲུ་འཕུར་སྐྱོད་ཐུབ་པའི་གྲུ་གཟིངས་ཆེན་པོ་གཅིག་དང་མཚོ་དམག་གྲུ་གཟིངས་གཉིས་བཏང་ཡོད་ཅིང་། ཨི་རག་གཞུང་གིས་འཇིགས་སྐུལ་པ་ཚོ་དུས་ཐོག་ཕམ་ཉེས་བྱེད་མ་ཐུབ་ཚེ་ཨ་རིས་བར་སྣང་ནས་འཇབ་རྒོལ་བྱེད་པར་གྲ་སྒྲིག་བྱེད་བཞིན་ཡོད་འདུག

ཁ་སང་ཨི་རག་གི་སྲིད་བློན་ནཱོ་རེ་ (Nouri al-Maliki)ཡིས་རྒྱལ་ཁབ་བདེ་འཇགས་ཐད་ཀྱི་མཐོ་རིམ་དཔོན་རིགས་ཁག་ཅིག་དང་ཉེན་རྟོག་པ་འགའ་ཕྱིར་འཕུད་བཏང་སྟེ། ཁོང་གིས་བརྙན་འཕྲིན་བརྒྱུད་ཁ་ཆེ་སུ་ནེ་ (Sunni)དང་ཀོ་ཌེ་ཞི་ (Kurdish) མགོ་ཁྲིད་ཚོས་རྒྱལ་ཁབ་ཆིག་སྒྲིལ་ལ་སྲུང་སྐྱོབ་བྱེད་དགོས་པའི་འབོད་སྐུལ་དང་སོལ་དྷི་ཨ་རབ་གཞུང་གིས་འཇིགས་སྐུལ་པ་ཚོར་རོགས་སྐྱོར་བྱེད་ཀྱི་ཡོད་པར་སྐྱོན་བརྗོད་བྱས་ཡོད་འདུག

 ཨི་རག་གི་རང་སྐྱོང་མངའ་ཁུལ་ཀོ་ཌེ་ཞི་ (Kurdish) ཡི་སྲིད་བློན་བྷར་རྫ་ནེ་ (Nechirvan Barzani) ལགས་ཀྱིས་བྷེ་བྷེ་སེ་གསར་འགོད་པར། ཁ་ཆེ་ཤཱ་སི་ཆོས་ལུགས་ཀྱི་རྗེས་འབྲང་པ་ཚོས་དབང་བསྒྱུར་བྱེད་བཞིན་པའི་ཨི་རག་གཞུང་གིས་ཁ་ཆེ་སུ་ནེ་ཆོས་ལུགས་ཀྱི་རྗེས་འབྲང་པའི་ས་ཁུལ་ལ་སྣང་ཆུང་བྱས་ན་ཨི་རག་ནང་ཆིག་སྒྲིལ་ཡོང་ཐབས་མེད་ཅེས་བརྗོད་འདུག

མཉམ་འབྲེལ་རྒྱལ་ཚོགས་ཀྱི་དྲུང་ཆེ་བྷན་ཁེ་མོན་མཆོག་གིས། ཨི་རག་ནང་ཆོས་ལུགས་ཀྱི་ངོ་བོའི་ཐོག་ནས་དྲག་སྤྱོད་ཀྱི་གནས་སྟངས་རྒྱ་ཆེར་འགྲོ་བའི་ཉེན་ཁ་ཡོད་སྟབས། ཨི་རག་གཞུང་གིས་གང་མགྱོགས་གནད་དོན་འདི་གྲོས་མོལ་གྱི་ལམ་ནས་སེལ་དགོས་བའི་འབོད་སྐུལ་ཞུས་འདུག

ཨི་རན་གྱི་སྲིད་འཛིན་ཨི་རན་གྱི་སྲིད་འཛིན་ཧཱ་སན་ (Hassan Rouhani) མཆོག་གིས་ “ གལ་སྲིད། ཨི་རག་གཞུང་གིས་དྲག་སྤྱོད་པ་ཚོར་ཁ་གཏོད་གཅོག་པར་ཨི་རན་ལ་འབོད་སྐུལ་བྱས་ཚེ། ཨི་རན་གཞུང་གིས་གང་ཅིའི་ཐད་ནས་རོགས་སྐྱོར་བྱེད་ངེས་ཡིན” ཞེས་བརྗོད་འདུག

 གནད་དོན་དབྱེ་ཞིབ་པ་ཚོས། ཁ་ཆེ་ཤཱ་སི་ཆོས་ལུགས་ཀྱི་རྗེས་འབྲང་པ་ཚོའི་སྟངས་འཛིན་འོག་ཡོད་པའི་ཨི་རག་སྲིད་གཞུང་གིས་ཁ་ཆེ་སུ་ནེ་ཆོས་ལུགས་ཀྱི་རྗེས་འབྲང་པ་ཚོའི་མངོན་འདོད་ལྟར་ཐག་གཅོད་མ་བྱས་ཚེ། ཨི་རག་ནང་མུ་མཐུད་ཟིང་ཆ་ཆེན་པོ་བསླངས་ཏེ། ཁ་ཆེ་སུ་ནེ་ཆོས་ལུགས་ཀྱི་རྗེས་འབྲང་པ་ཚོས་ཨི་རག་རྒྱལ་ཁོངས་ནས་རང་སྲིད་རང་སྐྱོང་ངམ་རང་བཙན་རྩོད་ལེན་བྱེད་སྲིད་པར་ཚོད་དཔག་བྱེད་བཞིན་ཡོད་འདུག

འཇིགས་སྐུལ་དྲག་སྤྱོད་ཚོགས་པ་ (ISIS)ཞེས་པའི་ནང་། ཨི་རག་དང་སེ་རི་ཡའི་དྲག་སྤྱོད་པ་ ༡༠༠༠༠ ཙམ་ཡོད་པ་དང་། ད་ལྟའི་ཆར་སྔོན་མ་སཱ་ཊན་ཧོ་སེན་ (Saddam Hussein) སྐབས་ཀྱི་ལས་བྱེད་དང་དམག་མི་ཟུར་བ། ཨི་རག་གཞུང་ལ་ངོ་རྒོལ་བྱེད་མཁན་ཁ་ཆེ་སུ་ནེ་ཆོས་ལུགས་ཀྱི་རྗེས་འབྲང་པ་ཚོའང་འཛུལ་ཞུགས་བྱེད་བཞིན་ཡོད་འདུག

 གསར་འགོད་པ། ལྷ་སྐྱབས་རྒྱལ།