དྲུག་བཞི་གསང་ནས་ལྔ་བཞི་བསྒྲཊ།

བོད་ཀྱི་དུས་བབ་གསར་ཤོག་སྤྱིའི་འདོན་ཐེངས་ ༦༢༩ སྟེང་གི་རྩོམ་སྒྲིག་པའི་གཏམ།

རྒྱ་ནག་ལ་ཨང་རྟགས་ཅན་གྱི་དུས་ཚིགས་མང་པོ་ཞིག་བརྩི་སྲོལ་ཡོད། དྲུག་བཞི་དང་ང་བཞིའི་དོན་རྐྱེན། གསུམ་རྒོལ་དང་ལྔ་རྒོལ་ལས་འགུལ། བདུན་ལྔ་དང་གསུམ་གཅིག་བཞིའི་རྡུང་གཅོག་འཕྲོག་བསྲེག་སོགས་ཀྱི་མིང་གིས་བཏགས་ཏེ། ཁག་ཅིག་གསང་བ་བྱེད་པ་དང་ཁག་ཅིག་ཁྱབ་བསྒྲགས་བྱེད་པ། ཁག་ཅིག་གསང་བསྒྲགས་གཉིས་དང་བྲལ་བའི་ཏིང་སྙོམས་ལ་གནས་ཐབས་བྱེད་བཞིན་ཡོད།

       ལྔ་བཞིའི་ལས་འགུལ་ཟེར་བ་དེ་སྲིད་གཞུང་གི་སྐུལ་སློང་འོག་སློབ་མ་དང་བཟོ་ཚོང་མང་ཚོགས་ཀྱིས་ ༡༩༡༩ ཟླ་ ༥ ཚེས་ ༤ ཉིན་པེ་ཅིན་དུ་ཕྱིའི་རྒྱལ་ཁབ་ཀྱི་བཙན་འཛུལ་དང་ཤུགས་རྐྱེན་འགོག་རྒོལ་བྱས་པའི་ལས་འགུལ་ཞིག་ཡིན། འདི་ལ་རྒྱ་ནག་གཞུང་གིས་བསྟོད་བསྔགས་བྱེད་པ་མ་ཟད། གཞུང་འབྲེལ་ཐོག་ཉིན་མོ་འདིར་རྒྱལ་གཅེས་ལས་འགུལ་གྱི་ཉིན་མོར་གཏན་འབེབས་ཀྱིས་ད་ལྟའང་སྲུང་གཙི་དང་དྲིལ་བསྒྲགས་བྱེད་ཀྱིན་ཡོད། 

       དྲུག་བཞིའི་དོན་རྐྱེན་ཟེར་བ་འདི་རྒྱ་ནག་གི་མཐོ་རིམ་སློབ་མ་གཙོས་པའི་བཟོ་བ་དང་མི་མང་དཀྱུས་མས་རང་འགུལ་ཐོག་ ༡༩༨༩ ཟླ་ ༦ ཚེས་ ༤ ཉིན་པེ་ཅིན་གནམ་སྡེ་སྒོ་མོ་ཆེའི་ཐང་ཆེན་དུ་རང་དབང་དང་དམངས་གཙོའི་རེ་འདུན་འོག་ཚེ་སྲོག་གི་རྔམ་སྟོན་བྱས་པའི་ལས་འགུལ་ཞིག་རེད། འདི་ལ་རྒྱ་ནག་གཞུང་གིས་ད་དུང་དཀར་འདོན་བྱས་མེད་པ་མ་ཟད་དྲག་ཟིང་གི་མིང་འདོགས་བྱས་ཏེ་སྦ་གསང་དང་ནག་གསུབ་གཏོང་ཐབས་བྱེད་ཀྱིན་ཡོད། 

       ༢༠༠༨ ལོའི་བོད་ནང་གི་གསུམ་གཅིག་བཞིའི་དོན་རྐྱེན་དང་། ༢༠༠༩ ལོའི་ཡུ་གུར་གྱི་བདུན་ལྔའི་དོན་རྐྱེན་སོགས་གང་ཡང་མ་བྱུང་ཅི་ཡང་མ་བྱས་པའི་ཚུལ་གྱིས་ཏིང་སྙོམས་སུ་འཇོག་ཐབས་དང་། རྒྱལ་སྤྱིའི་ཐོག་ནས་རྩ་ཡལ་དུ་འགྲོ་རྒྱུར་རེ་སྒུག་བྱེད་བཞིན་ཡོད་ཀྱང་། རྒྱ་ནག་གི་བསམ་ཡུལ་ལས་འདས་པ་ཞིག་ལ་དོན་རྐྱེན་འདི་དག་རྒྱལ་སྤྱིའི་གནད་དོན་དུ་གྱུར་ཏེ་རྒྱ་ནག་ནང་ཁུལ་དང་ཕྱི་ལོགས་གང་ས་ན་འབར་བཞིན་ཡོད།

      ད་ལོའི་ཕྱི་ཟླ་དྲུག་པའི་ཚེས་བཞི་ཉིན་ནི་པེ་ཅིན་གནམ་སྡེ་སྒོ་མོ་ཆེའི་ཐང་ཆེན་དུ་དྲུག་བཞིའི་དོན་རྐྱེན་བྱུང་སྟེ་ལོ་ངོ་ཉེར་ལྔ་འཁོར་བའི་དུས་དྲན་རེད། ད་ལོ་སྔར་ལོ་ལས་ལྷག་གི་སྐབས་དེའི་ལས་འགུལ་ནང་ཚེ་སྲོག་ཤོར་ཟིན་པའི་ཕ་མ་གཉེན་ཉེ་དང་། འཛམ་གླིང་རྒྱལ་ཁབ་གང་སར་སྐབས་དེར་བཙན་བྱོལ་དུ་ཕྱིན་པའི་རྒྱ་རིགས་ཤེས་ཡོན་ཅན་ཚོས་དོན་རྐྱེན་དེར་དྲན་གསོ་དང་མྱ་ངན་ཞུས་སོང་ལ། རྒྱལ་སྤྱིའི་གསར་ལམ་ཁག་ཏུའང་དོན་རྐྱེན་དེའི་སྔ་ཕྱི་རྒྱབ་མདུན་ཤུགས་ཀྱིས་བསྔོགས་སོང་།

      ཉིན་དེར་བོད་མིའི་དབུ་ཁྲིད་༧གོང་ས་མཆོག་གིས་ཀྱང་རྡ་རམ་ས་ལ་ནས་འདི་ལྟར་གསུང་འཕྲིན་བསྩལ། དེ་རིང་རྒྱ་རིགས་གཅེན་གཅུང་རྣམས་ཀྱིས་དུས་དྲན་སྲུང་བརྩི་ཞུ་བཞིན་པའི་སྐབས་དང་བསྟུན། ངོས་ཀྱིས་དྲུག་བཞིའི་དོན་རྐྱེན་འོག་རང་དབང་དང་དམངས་གཙོ། འགྲོ་བ་མིའི་ཐོབ་ཐང་ཆེད་ཚེ་སྲོག་ཤོར་བ་རྣམས་ལ་སྨོམ་ལམ་རྒྱག་རྒྱུ་ཡིན། རིན་ཐང་དེ་དག་ནི་རང་དབང་དང་ནུས་པ་ལྡན་པའི་སྤྱི་ཚོགས་ཤིག་བསྐྲུན་རྒྱུའི་རྨང་གཞི་ཆགས་ཡོད་པ་མ་ཟད། སྤྱི་ཚོགས་ནང་དོན་དམ་གྱི་ཞི་བདེ་བརྟན་ལྷིང་ཡོང་རྒྱུའི་རྐྱེན་རྩ་གཙོ་བོ་ཞིག་ཀྱང་ཆགས་ཡོད། ཅེས་དྲུག་བཞིའི་དོན་རྐྱེན་ནུས་པ་དང་ཤུགས་རྐྱེན་ལ་གདེང་འཇོག་གནང་ཡོད། 

      ལས་འགུལ་འདིའི་སྙིང་སྟོབས་ད་ལྟ་ད་དུང་རྒྱ་ནག་གི་མཐོ་རིམ་སློབ་མ་ཚོའི་ཁྲག་རྩའི་ནང་ལྷོག་ལྷོག་ཏུ་ལྡིང་གི་ཡོད་ལ། ཞིང་པ་དང་བཟོ་བ། གཞུང་གི་ལས་བྱེད་བཅས་ཀྱི་སྙིང་ཁམས་སུའང་གསོན་པོར་གནས་ཡོད། ལས་འགུལ་འདིའི་ཤུགས་རྐྱེན་གྱིས་བོད་དང་ཡུ་གུར་གཙོས་པའི་གྲངས་ཉུང་མི་རིགས་ཁག་གི་འཐབ་རྩོད་ལའང་བློ་སྟོབས་དང་ཡིད་ཆེས་བསྐྲུན་ཡོད།