ཡུ་གུར་བ་ ༡༣ བསད་འདུག

དེ་རིང་སྔ་དྲོར་ཤིན་ཅང་ཡུ་གུར་རིགས་རང་སྐྱོང་ཁུལ་ཁི་ཧྲི་ས་ཁུལ་ཡེ་ཁྲིན་རྫོང་གི་ཉེན་རྟོག་པས་མེ་མདས་བརྒྱབ་ཏེ་ཡུ་གུར་བའི་མི་ ༡༣ དམར་གསོད་བཏང་ཡོད་འདུག

བྷེ་བྷེ་སེ་གསར་ཁང་གིས་གནས་ཚུལ་སྤེལ་བ་ལྟར་ན། དེ་རིང་ཕྱི་ཚེས་ ༢༡ ཉིན་གྱི་སྔ་དྲོར་ཤིན་ཅང་ཉེན་རྟོག་པས། ཁི་ཧྲི་ས་ཁུལ་དུ་ཡུ་གུར་བའི་མི་ཁག་ཅིག་གིས་རླངས་འཁོར་བསྐོར་ཡོང་སྟེ་ཡེ་ཁྲིན་རྫོང་ཉེན་རྟོག་རུ་ཁག་གི་ལས་ཁུངས་ལ་རྡུང་ཡོད་པར་མ་ཟད། རླངས་འཁོར་ནང་འགད་རྫས་རིགས་བཅུག་ཏེ་གཏོར་རྒོལ་བྱེད་འཆར་བྱས་ཡོད་ཚུལ་བཤད་དེ་ཡུ་གུར་བའི་མི་ ༡༣ དམར་གསོད་བཏང་ཡོད་འདུག

ཐེངས་འདིའི་དོན་རྐྱེན་ཁྲོད་ཉེན་རྟོག་པ་ ༣ རྨས་སྐྱོན་བཟོས་ཡོད་པ་ལས། ས་གནས་མི་མང་ལ་རྨས་སྐྱོན་གྱི་གནས་ཚུལ་བྱུང་མེད་ཀྱང་། གནས་ཚུལ་བྱུང་རྗེས་ཉེན་རྟོག་པ་དང་དམག་མིས་ས་གནས་ལ་དམ་དྲག་དང་རྟོག་ཞིབ་བྱེད་ཀྱི་ཡོད་འདུག

གནས་ཚུལ་ཤེས་གསལ་ལྟར་ན། བདུན་ཕྲག་གཉིས་གྱི་རྗེས་སུ་ཤིན་ཅང་ཝུ་རུ་མུའུ་ཆིར་ ༧།༥ དྲག་རྡུང་ཟིང་འཁྲུག་གི་དོན་རྐྱེན་བྱུང་སྟེ་ལོ་ལྔ་འཁོར་བའི་དུས་ཚོད་ལ་བསླེབ་ཀྱི་ཡོད་འདུག་ལ།  ལོ་ལྔའི་ཡར་སྔོན་དུ་བྱུང་བའི་ཤིན་ཅང་གི་དྲག་རྡུང་ཟིག་འཁྲུག་དོན་རྐྱེན་དེའི་ཁྲོད་མི་ ༢༠༠ འདས་གྲོངས་དང་། མི་ ༡༧༠༠ ལྷག་ལ་རྨས་སྐྱོན་བཟོས་ཡོད་འདུག རྒྱ་ནག་གཞུང་གིས་སྐབས་དེའི་དོན་རྐྱེན་དེ་ཕྱི་ཕྱོགས་ཀྱི་ཡུ་གུར་ཁ་བྲལ་བས་སྐུལ་སློང་བྱས་པ་ཞིག་ཡིན་སྐོར་བརྗོད་ཡོད་འདུག

ཉེ་ལམ་རྒྱ་ནག་གཞུང་གིས་ཤིན་ཅང་དུ་ལོ་གཅིག་རིང་དྲག་རྡུང་ལས་འགུལ་མགོ་འཛུཊ་གནང་ཡོད་ཚུལ་བསྒྲགས་ཏེ། ཟླ་འདིའི་ཚེས་ ༡༦ ཉིན་ཤིན་ཅང་ཨ་ཁུ་སུའུ་དང་ཐུའུ་ལུའུ་ཧྥན། ཧོ་ཐན་བཅས་ས་གནས་ཁག་གསུམ་གྱི་འབྲིང་རིམ་ཁྲིམས་ཁང་གིས་ཡུ་གུར་བའི་མི་ ༡༣ ལ་དྲག་སྤྱོད་ལས་འགུལ་ཇུས་འགོད་བྱེད་མཁན་གྱི་ཉེས་མིང་འོག་སྲོག་ཁྲིམས་བཅད་ཡོད་པར་མ་ཟད། ཉིན་དེར་ཝུའུ་རུའུ་མུའུ་ཆི་འབྲིང་རིམ་ཁྲིམས་ཁང་གིས་སྔར་ལོའི་ཕྱི་ཟླ་ ༡༠ ཚེས་ ༢༨ ཉིན་གནམ་སྡེ་སྒོ་མོ་ཆེའི་ཐང་ཆེན་དུ་རླངས་འཁོར་བརྡབ་སྐྱོན་གྱི་ལམ་ནས་གཏོར་རྒོལ་བྱེད་རྒྱུའི་ཇུས་འགོད་བྱས་ཡོད་པའི་ཉེས་མིང་འོག་འཛིན་བཟུང་བྱས་པའི་ཡུའུ་ཧྲན་ཅང་ཝུའུ་ཞི་ཨར་གཙོས་པའི་མི་གསུམ་ལ་སྲོག་ཁྲིམས་དང་། གྷི་རི་ནོ་ཨར་ཐོ་ཧུའུ་ཐེར་ཞེས་པར་ཚེ་བཙོན། གཞན་མི་ ༤ ལ་ལོ་ ༥ ནས་ ༢༠ བཅས་ཀྱི་བཙོན་འཇུག་ཁྲིམས་ཐག་བཅད་ཡོད་འདུག

ཉེ་བའི་ལོ་འགའི་རིང་རྒྱ་ནག་གཞུང་གིས་ཤིན་ཅང་དུ་དམག་མི་མང་པོ་འགྲེམས་འཇོག་གིས་ཁ་བྲལ་ལ་ངོ་རྒོལ་ཞེས་པའི་ལས་འགུལ་འོག་དྲག་གནོན་རབས་དང་རིམ་པ་བྱས་ཡོད་ཀྱང་། ཤིན་ཅང་གི་དྲག་སྤྱོད་ལས་འགུལ་མཚམས་འཇོག་བྱས་མེད་པར་མ་ཟད། ཤིན་ཅང་ན་བྱུང་བཞིན་པའི་དྲག་སྤྱོད་ཀྱི་ལས་འགུལ་སྔར་ལས་འཆར་གཞི་ལྡན་པ་དང་བློ་ཁོག་ཆེ་རུ་ཕྱིན་ཏེ། འདི་ལོའི་ཕྱི་ཟླ་ ༤ ཚེས་ ༣༠ ཉིན་ཝུའུ་རུའུ་མུའུ་ཆི་མེ་འཁོར་ས་ཚིགས་ལྷོ་ཕྱོགས་སུ་འགད་རྫས་གས་གཏོར་གྱི་དོན་རྐྱེན་བྱུང་སྟེ། མི་ ༣ རྐྱེན་ལམ་དུ་བཏང་བ་དང་། མི་ ༧༩ ལ་རྨས་སྐྱོན་བཟོས་ཡོད། གནས་ཚུལ་དེ་བྱུང་བའི་ཉིན་གཅིག་གི་སྔོན་དེར་རྒྱ་ནག་གི་སྲིད་འཛིན་ཞི་ཅིན་ཕིན་གྱིས་ཤིན་ཅང་གི་བསྐོར་སྐྱོད་མཇུག་སྒྲིལ་ཏེ་ཕྱིར་པེ་ཅིན་ལོག་ཡོད་འདུག

འདི་ལོའི་ཕྱི་ཟླ་ ༥ ཚེས་ ༢༢ ཉིན་ཤིན་ཅང་ཝུའུ་རུའུ་མུའུ་ཆི་རུ་ཡང་བསྐྱར་འགད་རྫས་གས་གཏོར་གྱི་དོན་རྐྱེན་བྱུང་སྟེ། མི་ ༣༡ རྐྱེན་ལམ་དུ་ཕྱིན་ཡོད་པ་དང་། མི་ ༩༠ ལ་རྨས་སྐྱོན་བཟོས་ཡོད་འདུག

གསར་འགོད་པ། དོན་གོ