བུད་མེད་ཅིག་ལ་མཚོན་ན་རང་ཉིད་ཀྱི་གཟུགས་པོར་སྲུང་སྐྱོབ་བྱ་རྒྱུ་དེ་ལས་འགན་གལ་ཆེ་ཤོས་ཤིག་ཡིན་སྟབས། མི་སུ་ཡིན་གྱིས་གང་བྱུང་ལག་པ་འཆང་ཡོང་སྐབས་དེ་ལ་མཇུག་འབྲས་ངན་པ་མི་འབྱུང་ཆེད། ཁ་ཐུག་ལ་ལུས་ངག་གི་རྣམ་འགྱུར་བསྟན་ཏེ་གདོང་ལེན་བྱེད་རྒྱུ་གལ་ཆེན་པོ་ཡིན་ཟེར།
གསར་འགོད་པས་དེ་སྔོན་གཞིས་ཆགས་ཁག་ ༨ ཙམ་ལ་ཆེད་སྐྱོད་ཀྱིས་རང་ལོ་ ༡༨ ཡན་གྱི་བུད་མེད་ ༢༠༠༠ ལྷག་ལ་བཅར་འདྲི་བྱས་ཏེ། བུད་མེད་ཀྱི་གནས་བབ་ཉམས་ཞིབ་གནང་མཁན་དང་། ཐེངས་འདིའི་ཟབ་ཁྲིད་པ་བསྟན་འཛིན་ཚེ་དབྱངས་ལགས་སུ་ཟབ་སྦྱོང་གི་བརྗོད་གཞི་དང་འབྲེལ་བའི་སྐོར་ལ་གླེང་མོལ་བྱས་བར། བསྟན་འཛིན་ཚེ་དབྱངས་ལགས་ཀྱིས་ཐེངས་འདིའི་ཟབ་སྦྱོང་ཐོག་བུད་མེད་ཚོར་གལ་སྲིད་བཙན་གཡེམ་བརྙས་བཅོས་རིགས་བྱུང་སྐབས་སོ་སོའི་ལུས་ངག་ཐོག་ནས་ཕ་རོལ་པོར་གདོང་ལེན་ཇི་ལྟར་བྱེད་དགོས་པའི་ཐད་ལ། བུད་མེད་ཅིག་ལ་མཚོན་ན་སོ་སོའི་གཟུགས་པར་སྲུང་སྐྱོབ་བྱ་རྒྱུ་དེ་ལས་འགན་གལ་ཆེ་ཤོས་ཤིག་ཆགས་ཡོད། ང་ཚོའི་སྤྱི་ཚོགས་ནང་ནམ་རྒྱུན་འཚོ་བའི་ཁྲོད་ནས་སྐྱེས་པ་གཞན་གྱིས་སོ་སོའི་གཟུགས་པོར་གང་བྱུང་ལག་པ་འཆིང་བ་སོགས་བྱེད་སྐབས། བུ་མོ་མང་ཆེ་བས་དེ་ནི་གྲོགས་པོ་བློ་ཐག་ཉེ་བོ་ཞིག་གི་བྱེད་སྟངས་ཡིན་ཤག་གིས་ལམ་སང་གདོང་ལེན་མ་གནང་བར་ཡ་མེད་གཏོང་གི་ཡོད་པ་རེད། དེ་རིགས་ལ་དོ་སྣང་སྤྲོད་དགོས་པ་རེད། ད་རེབ་ཀྱི་ཟབ་སྦྱོང་སྐབས་གཙོ་ཆེ་ཤོས་བརྙས་བཅོས་རིགས་བྱུང་སྐབས་ཀུན་སློང་ག་རེ་ཡིན་མིན་ལ་བསམ་བློ་མ་བཏང་བར། གཙོ་བོ་བྱེད་སྟངས་དེས་ཁྱེད་རང་མ་བདེ་བ་དང་སུན་པོ་བཟོ་ཡི་ཡོད་མེད། དེ་བཞིན། བྱ་བ་དེར་མཇུག་འབྲས་ག་རེ་ཡོང་ས་རེད། དེ་ལ་བསམ་བློ་གཏོང་རྒྱུ་གལ་ཆེན་པོ་རེད་མ་གཏོགས། ཕ་རོལ་པོའི་ཀུན་སློང་བཟང་ངན་གང་ཡིན་གལ་ཆེན་པོ་མ་རེད། སོ་སོར་བདེ་བོ་མེད་པ་དང་གནོད་པའི་རིགས་བྱུང་ཚེ་ཐད་ཀར་ལབ་དགོས་པ་དང་། ལབ་ཀྱང་མི་ཉན་ན། འཇིགས་སྣང་མེད་པའི་ཐོག་ནས་འབྲེལ་ཡོད་ལ་ཞུ་གཏུག་བྱེད་དགོས་པའི་སྐོར་སོགས་ལམ་སྟོན་ཞུས་ཡོད་ཟེར།
ཁོ་མོའི་ཉམས་ཞིབ་ཀྱི་བརྒྱུད་རིམ་ཁྲོད་བོད་པའི་སྤྱི་ཚོགས་ནང་བུད་མེད་ཀྱི་དཀའ་ངལ་ཆེ་ཤོས་དང་བརྙས་བཅོས་རིགས་ཐེབས་པ་མང་ཤོས་ག་རེ་ཆགས་འདུག་དྲིས་པར། “ཉམས་ཞིབ་ཀྱི་བརྒྱུད་རིམ་ནང་དམིགས་བསལ་གྱིས་བཙན་གཡེམ་གྱི་གནད་དོན་རིགས་ཐོན་མ་སོང་། གང་ཡིན་ཟེར་ན། བརྙས་བཅོས་དེ་རིགས་བྱུང་ན་ང་ཚོའི་སྤྱི་ཚོགས་ནང་འབྲེལ་ཡོད་ལ་ཞུ་གཏུག་དང་། ཉེན་རྟོག་པར་རྩིས་སྤྲོད་མི་བྱེད་པའི་ལུགས་སྲོལ་མང་པོ་ཡོད་པ་རེད། གལ་སྲིད་གནད་དོན་དེ་འདྲ་ཞིག་ཞུ་གཏུག་བྱས་ན་དཀྲོག་གཏམ་དང་སྤྱི་ཚོགས་ལ་བརྡབ་གསིག་བཟོས་པ་ཞིག་ཏུ་ངོས་འཛིན་བྱས་ཏེ། ཁུ་སིམ་སིམ་འཇོག་ཐབས་ལ་འབད་བརྩོན་བྱེད་ཀྱི་ཡོད་པ་རེད། ཡིན་ནའང་། ང་ཚོས་གཞིས་ཆགས་ཁག་ཏུ་ཉམས་ཞིབ་བྱེད་སྐབས། ཁྱོ་གས་སྐྱེས་སྨན་ལ་བརྡུང་བ་དང་མགོ་སྐོར་བཏང་བ། དེ་བཞིན་ཕྱི་ནས་བཟའ་ཟླ་གཞན་བཙལ་བ་དང་། ཁྱིམ་གྱི་རྒྱུ་དངོས་ཁྱོ་གས་བདག་བཟུང་བྱས་ཏེ་སྐྱེས་སྨན་ལ་རྒྱུ་དངོས་ལོངས་སྤྱོད་ཀྱི་ཐོབ་ཐང་མ་སྤྲད་པ་སོགས་མང་པོ་འདུག དམིགས་བསལ་གྱིས་བོད་མིའི་གཞིས་ཆགས་ཁག་ནང་བཟའ་ཚང་བར་གྱི་རྙོག་དྲ་དེ་ཤུགས་ཆེ་རུ་འགྲོ་བཞིན་འདུག ཡང་བཟའ་ཚང་ཁ་ཁ་བྱེད་ཀྱི་ཡོད་ན་ཁྲིམས་ཐོག་ནས་ཁ་ཁ་བྱེད་མ་ཐུབ་པའི་བུད་མེད་ཧ་ཅང་མང་པོ་འདུག ཁྲིམས་ཐོག་ནས་ཁ་ཁ་བྱེད་མ་ཐུབ་ཚེ། ཕྲུ་གུ་དང་རྒྱུ་དངོས་བདག་དབང་སོགས་ཀྱི་ཐོག་ནས་བུད་མེད་ལ་གྱོང་ཆེན་པོ་རག་གི་འདུག”ཅེས་བརྗོད་སོང་།
ཡང་ཁོང་མོས་བཙན་གཡེམ་བརྙས་བཅོས་རིགས་བྱུང་སྐབས་གནས་ཡུལ་རྒྱལ་ཁབ་ཀྱི་ཁྲིམས་ལ་ཞུ་གཏུག་བྱེད་རྒྱུ་གལ་ཆེན་ཡིན་སྐོར་བརྗོད་དོན། “ང་ཚོ་བཙན་བྱོལ་བོད་མིའི་སྒྲིག་འཛུགས་ཀྱིས་ནག་ཉེས་དེ་རིགས་ལ་ལག་པ་འཆིང་ཆོག་ གི་ཡོད་པ་མ་རེད། བཙན་གཡེམ་བརྙས་བཅོས་རིགས་ཚང་མ་ནག་ཉེས་ནང་ཚུད་ཀྱི་ཡོད་སྟབས། གནས་ཡུལ་རྒྱ་གར་གཞུང་གི་ཁྲིམས་ལྟར་ཐག་གཅོད་དགོས་སྟབས། ཡུལ་ཁྲིམས་ལ་ཞུ་གཏུག་བྱེད་རྒྱུ་གལ་ཆེན་པོ་རེད་བསམ་གྱི་འདུག ཕྱི་ལོ་ ༢༠༡༣ ལོར་རྒྱ་གར་གཞུང་གིས་ལས་ཀ་བྱེད་ཡུལ་ཀྱི་ཁོར་ཡུག་ནང་བཙན་གཡེམ་བརྙས་བཅོས་རིགས་བྱུང་བ་ཡིན་ན་གདོང་ལེན་ཇི་ལྟར་བྱེད་དགོས་པ་དང་དེ་འགོག་ཐབས་ག་རེ་ཡོད་མེད། ལས་ཀ་སྤྲོད་མཁན་ལ་འགན་ཅི་ཡོད་སོགས་ཀྱི་སྐོར་ལ་ཁྲིམས་ཞིག་གཏན་འབེབས་བྱས་ཡོད་སྟབས། ལས་ཀ་བྱེད་མཁན་བུད་མེད་ཅིག་ལ་བཙན་གཡེམ་བརྙས་བཅོས་རིགས་ཀྱི་གནས་ཚུལ་བྱུང་སྐབས། ལས་ཀ་སྤྲོད་མཁན་སྦྱིན་བདག་ལ་ཞུ་གཏུག་བྱས་ཀྱང་ཁ་ཡ་མ་བྱས་པ་ཡིན་ན། ཁྲིམས་ཐོག་ནས་ལས་ཀ་སྤྲོད་མཁན་དེར་ཧིན་སྒོར་ཁྲི་ ༥ ཡི་ཉེས་པ་ཕོག་གི་ཡོད་པ་རེད། ཁོས་མུ་མཐུད་དུ་ཡ་མེད་བཏང་ན་ཉེས་ཆད་ལྡབ་ནས་ལྡབ་འཕར་འགྲོ་བཞིན་ཡོད་པ་རེད། དེ་ཚོའི་རིགས་ང་ཚོས་ཤེས་དགོས་པ་གལ་ཆེན་པོ་རེད་ལ། ཁྲིམས་དེ་གཞིར་བཟུང་འགྲོ་ཐུབ་པ་ཡིན་ན་དཀའ་ངལ་ཉུང་དུ་འགྲོ་ངེས་རེད་བསམ་གྱི་འདུག ལས་ཀ་སྤྲོད་མཁན་ཟེར་དུས་གཞུང་དང་གཞུང་འབྲེལ་མ་ཡིན་པའི་ཚོགས་པ། སློབ་གྲྭ སྨན་ཁང་། དེ་བཞིན་ཚོང་ལས་གཉེར་མཁན་དང་། ཐ་ན་ཁྱིམ་ཚང་ཞིག་གི་ནང་ཡིན་ནའང་ཁྲིམས་དེས་ཁྱབ་ཀྱི་ཡོད་པ་རེད”ཅེས་བརྗོད་བྱུང་།
བཙན་གཡེམ་གྱི་གནད་དོན་རིགས་ཞུ་གཏུག་བྱེད་པར་ཆ་རྐྱེན་དང་བདེན་དཔང་ག་རེ་དགོས་མིན་དྲིས་པར་ཁོང་མོས། “གནས་ཚུལ་དེ་རིགས་གློ་བུར་དུ་བྱུང་བ་ཡིན་ན་རང་ངོས་ནས་ང་ལ་འདི་འདྲ་བྱས་སོང་ཟེར་ནས་བཤད་རྒྱུ་མ་གཏོགས་བདེན་དཔང་སྟོན་རྒྱུ་ཁག་པོ་རེད། ཡིན་ནའང་། གློག་འཕྲིན་དང་ཁ་པར་ནང་འཕྲིན་ཐུང་བཏང་སྟེ་བསྙད་བཀོལ་མཁན་རིགས་བྱུང་ན། ཡི་གེ་དེ་ཚོ་མ་གསུབ་པར་བདེན་དཔང་དུ་ཉར་རྒྱུ་གལ་ཆེན་རེད། ཁ་པར་བཏང་ནས་བསྙད་བཀོལ་བ་ཡིན་ན། སྒྲ་དང་ཟླ་ཚེས་སོགས་ཉར་རྒྱུ་གལ་ཆེན་པོ་རེད། དེ་བཞིན། ལས་རོགས་སོགས་ཀྱིས་གནས་ཚུལ་དེ་འདྲ་བྱུང་སོང་ཟེར་ནས་བདེན་དཔང་བྱེད་དགོས། བཙན་གཡེམ་བརྙས་བཅོས་རིགས་བྱུང་སྐབས་སོ་སོའི་ཉེ་འཁོར་གྱི་མི་ལ་བཤད་པ་དང་ཡི་གེར་འགོད་རྒྱུ་སོགས་དཔེ་གལ་ཆེན་པོ་རེད། ”ཅེས་བརྗོད་བྱུང་།
ང་ཚོ་བོད་པའི་སྤྱི་ཚོགས་བུད་མེད་ལ་བཙན་གཡེམ་བརྙས་བཅོས་རིགས་བྱུང་སྐབས། གང་ཐུབ་ཀྱིས་སྦ་གསང་བྱེད་པའི་ལུགས་སྲོལ་དེར་ལྟ་ཚུལ་གང་འདྲ་ཡོད་མེད་དྲིས་པར། “ང་ཚོའི་སྤྱི་ཚོགས་འདི་གུ་ཡངས་པོ་དང་ལྷུག་པོ་བཟོ་རྒྱུ་གལ་ཆེན་པོ་རེད་བསམ་གྱི་འདུག ང་ཚོ་ནང་པའི་རྗེས་འཇུག་པ་ཡིན། བྱམས་སྙིང་རྗེ་ཅན་གྱི་སྤྱི་ཚོགས་ཤིག་ཡིན་ཟེར་ནས་ང་ཚོས་སོ་སོ་ཚད་མཐོན་པོ་ཞེ་དྲག་ཅིག་ལ་བཞག་སྟེ། གཞན་གྱི་སྤྱི་ཚོགས་ཚད་དམའ་བོ་ཞེ་དྲག་ཅིག་ལ་རྩིས་བསྡད་ན་འགྲིག་གི་མི་འདུག ང་ཚོ་ཡང་འགྲོ་བ་མི་གཞན་དང་འདྲ་བར་སྐྱོན་ཡོད་མཁན་ཞིག་ཡིན་པ་ང་ཚོས་ཧ་གོ་དགོས་པ་གལ་ཆེན་པོ་རེད། མི་རིགས་གཞན་ཚོས་ང་ཚོར་སྐྱོན་འཛུགས་བྱེད་སྐབས་བོད་མི་ཚོ་བཅོས་མ་ཞེ་དྲག་འདུག་ལབ་ཀྱི་ཡོད་པ་རེད། གང་ཡིན་ཟེར་ན། ང་ཚོས་ང་ཚོའི་ཁྲིམས་འདི་འདྲ་ཡིན། གཤིས་ཀ་འདི་འདྲ་ཡིན་ཟེར་ནས་སོ་སོ་ཚད་མཐོ་བོ་ཞིག་ཏུ་བཞག་ཡོད་ཀྱང་། དངོས་སུ་ལག་བསྟར་བྱེད་ཡོང་སྐབས་ཁྱད་མཚར་བོ་དེ་འདྲ་བྱུང་སྐབས། ཕྱིའི་མི་རིགས་དེ་ཚོ་ཧོན་འདྲ་བོ་འཐོར་འགྲོ་གི་འདུག་གཱ། སྤྱིར་བཏང་མིའི་རིན་ཐང་དེ་ཚོ་འཛིན་དགོས་པ་གལ་ཆེན་པོ་ཡིན་ཡང་། དེ་བཟུང་བ་ལྟར་ལག་བསྟར་བྱེད་ཐུབ་པ་ཞིག་བཟོ་དགོས་རྒྱུ་དང་། བཀའ་མོལ་ག་རེ་གནང་བ་ཡིན་ནའང་གནང་བདེ་བོ་དང་གུ་ཡངས་པོ་ཞིག་བཟོ་དགོས་རྒྱུ་གལ་ཆེན་པོ་རེད་འདུག ” ཅེས་བརྗོད་བྱུང་།
མ་འོངས་པར་ཟབ་སྦྱོང་དེ་རིགས་རྒྱ་སྐྱེད་གཏོང་བའི་འཆར་གཞི་ཡོད་མེད་དྲིས་པར་ཁོང་མོས། ༢༠༠༦ ཙམ་ནས་བཟུང་ཟབ་སྦྱོང་འདི་མགོ་བཙུགས་ཏེ། གཞིས་ཆགས་ཁག་དང་གཏན་སློབ་ཁག་མང་པོའི་ནང་སྤྲད་པ་རེད། སྔོན་མ་བརྗོད་གཞི་འདིའི་རིགས་ཀྱི་ཐོག་ཟབ་སྦྱོང་སྤྲོད་སྐབས། ང་ཚོའི་སྤྱི་ཚོགས་ནང་གནས་ཚུལ་འདི་འདྲ་བྱུང་གི་ཡོད་པ་མ་རེད་ཟེར་བ་འདྲ་བོ་དང་འདོད་པ་མེད་པའི་རྣམ་འགྱུར་སྟོན་མཁན་འདུག བུད་མེད་ལ་ལ་ཞིག་གིས་ཁུ་སིམ་སིམ་གནས་ཚུལ་དེ་འདྲ་བྱུང་ཡོད་པ་ཤོད་ཀྱི་འདུག བསྟན་འཛིན་སྒང་གཞིས་ཆགས་དང་མོན་གྷོར་གཞིས་ཆགས། གྷོ་པལ་པུར་བོད་ཁྱིམ་བཅས་སུ་གནས་ཚུལ་འདི་རིགས་རིམ་པར་བྱུང་སྟེ། ད་ལྟ་གནད་དོན་འདི་ལ་ལག་པ་འཆིང་ས་ཡོད་པ་ཞིག་ཆགས་ཡོང་དུས། ང་ཚོ་ངར་ཤུགས་ཀྱི་ཐོག་ནས་ཕྱི་ལ་ཐོན་ཏེ་སྔར་ལས་གནད་དོན་འདིའི་ཐོག་ལས་ཀ་མང་པོ་བྱེད་དགོས་ངེས་རེད་བསམ་གྱི་འདུག ”ཅེས་བརྗོད་བྱུང་།
གསར་འགོད་པ། པདྨ་མཚོ།
ཟབ་སྦྱོང་འདིའི་རིགས་སྤྲོད་སྐབས། ཞི་དྲག་གཉིས་ཀའི་ཐབས་ལམ་སྟོན་གལ་ཤིན་ཏུ་ཆེ། ད་རེས་ཀྱི་ཐབས་ལམ་མང་ཆེ་བ་ལྟོས་ས་ལྟོས་འཇོག་གིས་དྲག་པོར་གཏོགས་པའམ། ཞི་བ་མ་ཡིན་པའི་གྲས་རེད། གུས་པས་དོན་དག་འདི་འདྲ་ཞིག་ཀློག་མྱོང་།
ཕྱི་གླིང་གི་ཆང་ཁང་ནང་དུ་ཆང་མ་ཚོར་ང་རང་ཁྱོད་ལ་དགའ་པོ་ཞེ་དྲག་འདུག་ལབ་མཁན་གང་མང་བྱུང་གི་ཡོད་པས། ཆང་མ་ཚོས་ཐབས་མཁས་པོས་གདོང་ལེན་བྱེད་སྟངས་ནི་སོ་སོའི་ལག་པ་གཡོན་པ་ཕར་བསྲིངས་ནས་ལག་པའི་སྒང་འོ་བྱེད་དུ་འཇུག་གི་ཡོད་ཅིང་། དེ་ནི་ཕ་རོལ་བོའི་བསམ་བློར་ཕོག་ཐུག་མ་སོང་བ་ཞིག་དང་། སོ་སོའང་སྲུང་སྐྱོབ་བྱས་ཟིན་པའི་གཉིས་ཕན་མཉམ་རྒྱལ་གྱི་ཐབས་ལམ་ཞིག་རེད། འདི་ནི་དབུ་མའི་ལམ་ངོ་མ་དེའང་རེད་འདོད།
༄༅།།བཙན་བྱོལ་བོད་མི་ཚོའི་སྐྱིད་པོ་རྒྱག་པོ་བསམ་པ་ལས་མི་རིགས་འགན་ཁུར་མི་བྱེད་པ་འམ་ཡང་ན་མི་ཚེ་ཅིག་གི་འཚོ་བ་སྐྱེལ་རྒྱུར་ཞེད་ཐག་ཆོད་ནས་ཕྲུ་གུ་གསོ་སྐྱོང་བྱེད་རྒྱུ་ཞེད་ཐག་ཆོད་ནས་ཕྲུ་གུ་གཅིག་སྐྱེ་བཅུག་ན་ཨང་གུ་དང་པོ་རེད་ཕྲུ་གུ་གཅིག་ལ་ཆ་མཚོན་ན་སྤུན་མེད་མཁན་ཁོ་ལ་ཨ་ལྕག་མེད་ཁོ་ལ་ཅོ་ཅོ་མེད་འོག་མ་མེད་སྒང་མ་མེད་ཁོ་རང་ཅིག་པུ་བཟོ་མཁན་དེ་ཕ་མ་གཉིས་རེད་ཕ་མ་གཉིས་ལ་ཆ་མཚོན་ཕྲུ་ག་ུགཅིག་པུ་དེ་ཤི་ཆད་སོགས་ཡག་པོ་མ་བྱུང་ན་ཚར་རེད་རབས་ཆགས་གྱུར་ཚར་པ་རེད
༄༅།།བོད་པའི་བུད་མེད་མང་པོ་ཞིག་གྲྭ་བ་ཚོར་དགའ་པོ་ཨུ་ཙམ་འདུག་ཡིན་ན་འང་བོད་རང་གི་སྐད་ཡིག་གནས་ལ་དོ་སྣང་ཁྱོན་ནས་བྱེད་ཀྱི་མི་འདུག་པར་སུའི་བཙན་གཡེམ་བྱེད་ན་བྱེད་།
ི