ངས་པ་ཀུ་ལ་ལ་དྭགས་དེང་རབས་ཅན་དུ་བསྒྱུར་མཁན་ཞིག་ལ་ངོས་འཛིན་གནང་གི་ཡོད།

དེ་རིང་ཕྱི་ཚེས་ ༢༩ ཉིན་གྱི་ཞོགས་པའི་ཆུ་ཚོད་ ༨།༠༠ ཡས་མས་སུ་༸གོང་ས་མཆོག་ལ་དྭགས་ལྕོག་ལམ་ས་ཞི་བའི་ཚལ་ཕོ་བྲང་ནས་རྒྱལ་ས་སླེ་རུ་ཆིབས་བསྒྱུར་གནང་སྟེ། མཆོད་མཇལ་དང་འབྲེལ་དགའ་ལྡན་ཁྲི་རིན་པོ་མཆོག་དང་ལ་དྭགས་ནང་ཚོགས་ཀྱི་ཚོགས་མི། མི་མང་ཁག་ཅིག་ལ་བཅས་དམིགས་བསལ་མཇལ་ཁ་དང་བཀའ་སློབ་སོང་། སྐབས་དེར་༸གོང་ས་མཆོག་གིས་སྔར་ལོ་ང་འདིར་ཚར་གཅིག་བསླེབས་རྗེས་སྨོན་ལམ་བརྒྱབ་ཏེ་བདུན་ཕྲག་གསུམ་རིང་བསྡད་དེ་མཐའ་མ་དེར་ཇོ་ཁང་ནང་མཆོད་མཇལ་དུ་ཡོང་བ་རེད། སྐབས་དེར་ཇོ་བོ་མཇལ་རྒྱུ་རེད་མི་འདུག ང་རང་རང་གི་བཞུགས་ཁྲིར་མཇལ་རྒྱུ་རེད་འདུག སྐབས་དེར་ངས་ཁོང་ཚོར་རྩེད་མོའི་ཚུལ་དུ་བཤད་རྒྱུ་བྱུང་། ངས་ནམ་རྒྱུན་སངས་རྒྱས་བཅོམ་ལྡན་འདས་ཕྱོགས་གཅིག་ནས་བླ་ན་མེད་པའི་དགེ་རྒན་ཆེན་མོ་ཞིག་དང་ཕྱོགས་གཞན་ཞིག་ནས་མཚན་ཉིད་རིག་པའི་མཁས་དབང་ཞིག ད་དུང་སྤྱི་ཚོགས་གསར་བརྗེ་བ་ཞིག་ཀྱང་རེད་ཅེས་བརྗོད་ཀྱི་ཡོད། ༡༩༥༤ལོར་ང་པེ་ཅིན་དུ་གཟིགས་སྐོར་སྐབས་མའོ་ཙེ་ཏུང་ལ་ཐེངས་འགར་ཐུགས་འཕྲད་བྱས་པ་ཡིན།  ཁོས་སངས་རྒྱས་བཅོམ་ལྡན་འདས་སྤྱི་ཚོགས་གསར་བརྗེ་བ་ཞིག་ཡིན་པར་ངོས་འཛིན་བྱེད་བཞིན་པའི་སྐོར་ང་ལ་བརྗོད་བྱུང་། ང་རང་གི་བསམ་པར་སྐབས་དེ་གཅིག་པུ་མ་ཡིན་པར་རྒྱ་གར་རིག་གཞུང་ནང་རིགས་རུས་དབྱེ་འབྱེད་བྱེད་པར་སངས་རྒྱས་བཅོས་ལྡན་འདས་ཀྱིས་མཐའ་གཅིག་ཏུ་དགག་པ་གནང་སྟབས། མའོ་ཙེ་ཏུང་གིས་བཅོམ་ལྡན་འདས་སྤྱི་ཚོགས་གསར་བརྗེ་བ་ཞིག་ལ་ངོས་འཛིན་གནང་ཡོད། སངས་རྒྱས་བཅོམ་ལྡན་འདས་ཕྱོགས་གཞན་ཞིག་ནས་བསམ་བློ་བ་དང་ཚན་རིག་པ་ཞིག་རེད། ཁོང་གིས་རྒྱུ་མཚན་དང་བརྟག་དཔྱད་གནང་བར་གལ་ཆེན་བརྩི་བཞིན་འདུག བཅོམ་ལྡན་འདས་ཀྱིས་ཁོང་གི་རྗེས་འབྲང་པ་ཚང་མར་ཁོང་གི་གསུང་ལ་དད་པའི་ངོ་བོའི་ཐོག་ནས་མ་ཡིན་པར་བརྟག་དཔྱད་བྱེད་དགོས་ཞེས་གསུངས་ཡོད། དེར་བརྟེན། སངས་རྒྱས་བཅོམ་ལྡན་འདས་ནི་རྒྱ་གར་གྱི་གནའ་བོའི་ཚན་རིག་པ་ཞིག་ཡིན་ལ། དེང་དུས་ཀྱི་ཚན་རིག་པ་མང་པོས་ཀྱང་སངས་རྒྱས་བཅོམ་ལྡན་འདས་ཚན་རིག་པ་ཞིག་ལ་ངོས་འཛིན་གནང་ཡོད། ཅེས་སོགས་གསུངས་སོང་།

ཆུ་ཚོད་ ༩།༠༠ ཡས་མས་སུ་༸གོང་ས་མཆོག་སླེ་ནས་ཀེ་ལོ་མུ་ཊར་ ༧ གྱི་མཚམས་སུ་ཡོད་པའི་པ་ཀུ་ལ་བློ་བཟང་ཐུབ་བསྟན་ཆོས་ནོར་རིན་པོ་ཆེ་མཆོག་གི་དྲན་རྟེན་གླིང་གར་ཆིབས་བསྒྱུར་གནང་སྟེ་དྲན་རྟེན་སྐུ་བརྙན་ལ་རབ་གནས་དང་མི་མང་ལ་བཀའ་སློབ་གནང་སོང་། སྐབས་དེར་༸གོང་ས་མཆོག་གིས།  དེ་རིང་འདིར་ཞིང་གཤེགས་དམ་པ་པ་ཀུ་ལ་རིན་པོ་ཆེ་མཆོག་དྲན་གསོ་བྱེད་ཀྱི་ཡོད། ཁོང་ནི་ངའི་གྲོགས་པོ་ཡག་ཤོས་དང་ང་རང་དགའ་མོས་ཡོད་མཁན་ཞིག་ཀྱང་ཡིན། ཁོང་གིས་ལོ་མང་པོར་བོད་ནང་སློབ་སྦྱོང་བྱས་མྱོང་ཡོད་སྟབས། ངས་ཁོང་གི་དགེ་རྒན་ངོ་ཤེས་ཀྱི་ཡོད། སྐབས་འགར་ཁོང་ལ་དགེ་རྒན་གྱི་བཀའ་བཀྱོན་རག་མྱོང་ལ། ང་ལ་ཡང་ཡོངས་འཛིན་རྣམ་གཉིས་དང་དམིགས་བསལ་ཡོངས་འཛིན་རྒན་པའི་བཀའ་བཀྱོན་རག་མྱོང་ཡོད། ཁོང་གིས་བོད་ནང་དགེ་བཤེས་རྒྱུགས་སྤྲོད་གནང་སྟེ་ཕྱིར་ལ་དྭགས་སུ་ཕེབས་རྗེས་སྲིད་བློན་ནེ་རོ་མཆོག་ལ་འབྲེལ་ལམ་ཡག་པོ་བཙུཊ་ཐུབ་ཡོད། ངས་ཁོང་ལ་དྭགས་དེང་རབས་ཅན་དུ་བསྒྱུར་ མཁན་ཞིག་ལ་ངོས་འཛིན་གནང་གི་ཡོད། ཁོང་གིས་ལ་དྭགས་མི་མང་ཆེད་དུ་ཕྱག་ལས་བླ་མེད་གནང་བར་མ་ཟད་། ལ་དྭགས་ནང་གི་དགོན་སྡེ་ཁག་ལ་རོགས་སྐྱོར་དང་ཞབས་ཞུ་གནང་ཡོད། ཁྱེད་ཚོས་སྐུ་བརྙན་བཞེངས་སྐྲུན་གྱིས་ཁོང་གི་མཛད་རྗེས་དྲན་གསོ་བྱ་རྒྱུ་གལ་ཆེན་པོ་རེད། ངས་ཐག་རིང་པོ་ནས་སྐུ་བརྙན་ལ་ལྟ་དུས་རིན་པོ་ཆེ་མཆོག་གི་དབུ་འདྲ་བོ་འདུག ཡིན་ནའང་། སྐུ་བརྙན་གྱི་མདུན་ནས་ལྟ་སྐབས་དབུ་དེ་ཙམ་འདྲ་བོ་མི་འདུག གང་ལྟར་ངས་སྐུ་བརྙན་བཞེངས་སྐྲུན་གནང་མཁན་དང་འབྲེལ་ཡོད་ཚང་མར་ཐུགས་རྗེ་ཆེ་ཞུ་རྒྱུ་ཡིན། ཞེས་གསུངས་སོང་།

དེའི་རྗེས་༸གོང་ས་མཆོག་དཔེ་ཐུབ་དགོན་པར་ཆིབས་བསྒྱུར་གྱིས་དཔལ་རྡོ་རྗེ་འཇིགས་བྱེད་ཀྱི་སྐུ་བརྙན་ཞིག་གསོ་ལེགས་འགྲུབ་དང་ཆོས་ཚང་བཀྲ་ཤིས་རབ་གནས་བཅས་གནང་སོང་། ཐེངས་འདིའི་༸གོང་ས་མཆོག་གི་ཆིབས་བསྒྱུར་ཐད་དགོན་པའི་དགེ་བཤེས་དཀོན་མཆོག་དབང་འདུས་ལགས་ཀྱིས་བརྗོད་པ་ལྟར་ན། དཔེ་ཐུབ་དགོན་ནི་ལོ་ ༡༠༠༠ ལྷག་གི་ཡར་སྔོན་དུ་ལྷ་ཁང་ཐོག་མ་ཆགས་པ་དང་། ལོ་ ༦༠༠ ཡར་སྔོན་དུ་གུ་རུ་རིན་པོ་ཆེ་དང་བྱང་ཆུབ་པ་ཆོས་དབང་གྲགས་པའི་དངོས་སློབ་བཟང་པོ་གླིང་དབང་བློ་གྲོས་ཀྱིས་བཏབ་པ་ཞིག་ཡིན་འདུག ལོ་ཙཱ་བ་རིན་ཆེན་བཟང་པོ་དཔེ་ཐུབ་དགོན་པར་བརྒྱུད་ནས་མར་ཕེབས་སྐབས། ས་ཆ་དེར་ཕྱག་མཛུབ་མོ་བཙུགས་ཏེ་མ་འོངས་པར་དཔེ་ཐུབ་པའི་དགོན་པ་ཞིག་ཆགས་ཀྱི་རེད་ཅེས་གསུངས་ཏེ་དགོན་པའི་མིང་ཐོགས་ཡོད་འདུག དེའི་རྗེས་རྗེ་རིན་པོ་ཆེས་བྱང་ཆུབ་དུ་བསྒྲུབ་པའི་འཚེ་དཔག་མེད་ཀྱི་སྐུ་ཞིག་རྒྱལ་བོ་ལ་བསྐུར། རྒྱལ་པོས་བྱ་བྲལ་ཉིད་ལ་སྤྲད་རྗེས་སྟོད་ཀྱི་ཕྱོཊ་སུ་རྗེ་རིན་པོ་ཆེའི་བསྟན་པ་སྤེལ་མཁན་སྟོད་བྱང་ཆུབ་ཤེས་རབ་བཟང་པོ་ཁོ་རང་ཡིན་ཚུལ་སོགས་ཀྱི་བཤད་ཚུལ་ཡོད་འདུག ཐེངས་འདིར་༸གོང་ས་མཆོག་རྗེ་རིན་པོ་ཆེས་བྱང་ཆུབ་དུ་བསྒྲུབ་པའི་འཚེ་དཔག་མེད་ཀྱི་སྐུ་དེ་གཟུངས་བཞུགས་བྱས་ཏེ་བཞེངས་བའི་སྟོན་པའི་སྐུ་བརྙན་རབ་གནས་ཆེད་༸གོང་ས་མཆོག་ཕེབས་པ་ཡིན་འདུག 

ཁོང་ལ་ཐེངས་འདིའི་ཆིབས་བསྒྱུར་སྐབས་༸གོང་ས་མཆོག་གིས་བཀའ་སློབ་ག་རེ་གནང་ཡོད་མེད་དྲིས་པར། ང་ཚོའི་ངོས་ནས་༸གོང་ས་མཆོག་ལ་སྙན་སེང་ཁག་ཁ་ཤས་ཤིག་ཞུས་ཡོད། དོལ་རྒྱལ་བསྟེན་གསོལ་གྱི་སྐོར་ལ་ང་ཚོ་སྔོན་མ་རྙོག་གྲ་བྱུང་ཡོད་པ་རེད། རིན་པོ་ཆེ་སྐུ་གོང་མས་ཀྱང་དོལ་རྒྱལ་བསྟེན་གྱི་ཡོད་པ་རེད། དེ་དག་ཚང་མ་མཚམས་འཇོག་བྱས་ནས་སྐུ་མདུན་ལ་སྙན་སེང་ཞུས་པ་རེད། གྲྭ་མང་ནང་སྤྱིར་བཏང་དོལ་རྒྱལ་འབྲེལ་བ་རྩ་བ་ཉིད་ནས་མེད་ཀྱང་། གདན་ས་གྲྭ་ཚང་ཁག་ཏུ་སྐུ་མདུན་གྱིས་གསོལ་ཞིག་གནང་བའི་ལུཊ་སྲོལ་ཞིག་དར་བ་ལྟར། ང་ཚོས་དེ་དག་སྲོལ་ཞིག་གནང་སྟེ་གཙང་མ་གཙང་རྐྱང་བཟོས་པ་རེད། དེ་སྔོན་ཡོད་པའི་སྐུ་འདྲ་དེ་དག་ལོ་ ༡༤ དང་ ༡༥ ཡས་ནས་ཆུ་ལ་བསྐུར་བ་སོགས་ཆ་ཚང་བྱས་ཚར་བ་རེད། གྲྭ་མང་ནང་སྐུ་མདུན་མ་ཕེབས་གོང་ལ་ང་ཚོས་གཙང་མ་གཙང་རྐྱང་བྱས་ནས་མཚམས་འཇོག་བྱས་ཡོད། དེ་ལ་ཁ་སང་ང་ཚོས་སྙན་ཞུ་ཞིག་ཕུལ་ཡོད་པ་དེར་སྐུ་མདུན་གྱིས་གཟིགས་རྗེས་ཐུགས་རྗེ་ཆེ་གསུངས་སོང་། ང་ཚོའི་དགོན་པར་མཚོན་ན་དགེ་བཤེས་དང་སྔགས་རམས་པ་བཅས་ ༢༡ ལྷག་ཡོད། དེ་དག་བོད་ཤོར་རྗེས་བོད་ནས་གསར་འབྱོར་བ་མ་ཕེབས་པའི་སྐབས་སུ་ཧི་མ་ལ་ཡའི་རི་རྒྱུད་ཚོས་གདན་ས་གྲྭ་ཚང་ཁག་ནང་རྐང་བཟུང་སྟེ་བཞུགས་པ་ལ་ཐུགས་རྗེ་ཆེ་ཞུས་གནང་སོང་། མ་འོངས་པར་ང་ཚོ་དཔེ་ཐུབ་པ་དགོན་པ་ཡིན་སྟབས། མི་མང་ལ་ནང་ཆོས་ངོ་སྤྲོད་དང་དགོན་པའི་བསླབ་པ་སློབ་གཉེར་བཅས་དཔེ་ཐུབ་པ་ཞིག་དགོས་ཀྱི་ཡོད་པ་རེད་ཅེས་བཀའ་སློབ་ཁག་གནང་སོང་། ཞེས་བརྗོད་བྱུང་།

དེ་རིང་༸གོང་ས་མཆོག་གིས་སླེ་ཇོ་ཁང་དང་པ་ཀུ་ལ་དྲན་རྟེན་གླིང་ག དཔེ་ཐུབ་དགོན་བཅས་ཀྱི་མཛད་འཕྲིན་གྲུབ་རྗེས་ཀླུ་འཁྱིལ་དགོན་པར་ཆིབས་བསྒྱུར་གནང་སོང་ལ། སང་ཉིན་ཕྱི་ཚེས་ ༣༠ ནས་ཚེས་ ༡ བར་དེ་གར་ཆོས་ཕྱོཊ་ཀྱི་མཛད་འཕྲིན་ཁག་བསྐྱང་རྒྱུ་ཡིན་འདུག

གསར་འགོད་པ་དོན་གོ་དང་ལྷ་སྐྱབས་རྒྱལ་གཉིས་ཀྱིས་ལ་དྭགས་རྒྱལ་ས་སླེ་ནས།