བོད་ཀྱི་རྩོམ་པ་པོའི་མཐུན་ཚོགས་ཀྱི་ཚོགས་རྒྱུན་ལས་ཁག་ཅིག་སི་པེན་ནང་ཚོགས་བཞིན་པའི་རྒྱལ་སྤྱིའི་པེན་རྩོམ་པ་པོའི་མཐུན་ཚོགས་ཚོགས་འདུར་མཉམ་ཞུགས་གནང་ཡོད་འདུག
ཀ་ཏ་ལན་པེན་རྩོམ་པ་པོའི་མཐུན་ཚོགས་(Catalan PEN)ཀྱིས་གོ་སྒྲིག་འོག རྒྱལ་སྤྱིའི་པེན་རྩོམ་པ་པོའི་མཐུན་ཚོགས་ཀྱི་ལོ་ཙཱ་དང་སྐད་ཡིག་རང་དབང་སྡེ་ཚན་གྱི་ཚོགས་འདུ་དེ་ཟླ་འདིའི་ཚེས་ ༢༥ ནས་ ༢༧ བར་ཉིན་གསུམ་རིང་སི་པེན་ (Spain) རྒྱལ་ཁབ་ཀྱི་ཀ་ཏ་ལོ་ན་ཡ་རང་སྐྱོང་མངའ་སྡེའི་གྲོང་ཁྱེར་ལྗེ་རོ་ན་(Girona) རུ་ཚོགས་ཡོད་པ་དང་། བོད་ཀྱི་རྩོམ་པ་པོའི་མཐུན་ཚོགས་ཀྱི་ཚོགས་གཞོན་སྤྲོ་ཚིགས་ཆོས་གྲགས་དང་། རྒྱུན་ལས་ཨ་རིག་དགེ་མཐོང་དང་རྡོ་རྗེ་ཚེ་རིང་བཅས་ཚོགས་ཞུགས་བྱས་ཤིང་། བོད་ཀྱི་སྐད་ཡིག་གི་གནས་སྟངས་དང་བརྡ་འཕྲིན་བརྒྱུད་ལམ་ནང་རྩོམ་འབྲིའི་སྐོར་ལ་གཏམ་བཤད་བྱས་ཡོད་འདུག
བོད་ཀྱི་རྩོམ་པ་པོའི་མཐུན་ཚོགས་ཀྱིས་གནས་ཚུལ་བཏང་འབྱོར་བྱུང་བ་ལྟར་ན། ཐེངས་འདིའི་ཚོགས་འདུར་ཉི་ཧོང་དང་། ཧྥ་རན་སི། ལྷོ་ཨ་ཧྥེ་རི་ཀ ཧང་གྷ་རི་སོགས་ཀྱི་རྩོམ་པ་པོའི་མཐུན་ཚོགས་ཁག་ ༢༠ ཙམ་གྱི་འཐུས་ཚབ་རྩོམ་པ་པོ་དང་ལོ་ཙཱ་བ་སོགས་མཉམ་ཞུགས་བྱས་ཡོད་པ་དང་། ཚོགས་འདུའི་ཐོག་གྲོང་ཁྱེར་ལྗེ་རོའི་སྤྱི་ཁྱབ་སྐུ་ཞབས་ཀཱར་ལེས་པཱོས་ཆི་ཌེ་མོན ( Carles Puigdemont)མཆོག་གིས་ཚོགས་འདུའི་དབུ་འབྱེད་གསུང་བཤད་གནང་པ་དང་། ཉིན་གསུམ་རིང་ཡིག་སྒྱུར་གྱི་གལ་གནད་དང་བྱ་ཐབས་སྐོར་ཉམས་མྱོང་བརྗེ་རེས་དང་། རྩོམ་རིག་གི་ཕན་ནུས་འདོན་སྤེལ་བྱེད་ཐབས་སྐོར། དེ་བཞིན་དེང་རབས་བརྡ་འཕྲིན་བརྒྱུད་ལམ་ནང་རྩོམ་ཡིག་འབྲི་སྤེལ་གྱི་དགེ་སྐྱོན་བཅས་ཀྱི་སྐོར་ལ་བགྲོ་གླེང་གོ་བསྡུར་དང་། རྒྱལ་སྤྱིའི་པེན་གྱི་ཡན་ལག་ལོ་ཙཱ་དང་སྐད་ཡིག་སྡེ་ཚན་གྱི་ལས་དོན་བསྐྱར་ཞིབ། དེ་བཞིན་ ༢༠༡༡ ལོར་རྒྱལ་སྤྱིའི་པེན་རྩོམ་པ་པོའི་ཚོགས་ཆེན་ཐོག་སྤེལ་པའི་སྐད་ཡིག་རང་དབང་སྐོར་གྱི་བསྒྲགས་གཏམ་དོན་ཚན་ཁག་བཅུ་བསྐྱར་བསྒྲགས་སོགས་བྱས་ཡོད་འདུག
གནས་ཚུལ་ནང་མུ་མཐུད་དུ་བཀོད་དོན། ཚོགས་འདུ་ཉིན་གསུམ་པའི་སྔ་དྲོར། བོད་ཀྱི་རྩོམ་པ་པོའི་མཐུན་ཚོགས་ཀྱི་ཚོགས་གཞོན་སྤྲོ་ཚིགས་ཆོས་གྲགས་ལགས་ཀྱིས། བོད་ཀྱི་སྐད་ཡིག་དང་བརྡ་འཕྲིན་བརྒྱུད་ལམ་ནང་རྩོམ་འབྲིའི་གནས་བབ་སྐོར་ལ་གཏམ་བཤད་གནང་ཡོད། གཏམ་བཤད་རྩོམ་ཤོག་ནང་བོད་ཀྱི་སྐད་ཡིག་གི་གལ་གནད་དང་ད་ལྟའི་གནས་སྟངས་སྐོར། ༸གོང་ས་མཆོག་གི་དབུ་ཁྲིད་འོག་བཙན་བྱོལ་བོད་མིའི་སྤྱི་ཚོགས་ནང་བོད་སྐད་ཡིག་དང་རིག་གནས་རྒྱུན་འཛིན་དང་དར་སྤེལ་བྱེད་ཚུལ། དེ་བཞིན་བོད་སྐད་ཡིག་དང་འབྲེལ་བའི་བོད་ཕྱི་ནང་གི་བརྡ་འཕྲིན་ལག་རྩལ་གྱི་གནས་བབ། བོད་མིའི་རང་ལུས་མེར་བསྲེགས་གནང་མཁན་མང་པོའི་ཞལ་ཆེམས་ནང་སྐད་ཡིག་སྦྱོང་སྤྱོད་ཀྱི་རང་དབང་དགོས་ཚུལ་གསལ་ཡོད་པ་ངོ་སྤྲོད། དེ་བཞིན་བོད་ཕྱི་ནང་དུ་བོད་སྐད་ཡིག་སློབ་སྦྱོང་དང་འབྲེལ་བའི་སྒེར་གྱི་ཉམས་མྱོང་བཅས་བཀོད་ཡོད་པ་དང་། མཇུག་ཏུ་གནད་དོན་དེ་དག་ཐད་དྲི་བ་དྲིས་ལན་བྱས་ཡོད། ཅེས་སོགས་འཁོད་འདུག
བྲོས་བྱོལ་བོད་མིའི་ཚོགས་པ་འདི་དག་གི་མིང་རྫིག་པོ་རེད།
ང་ནི་བློ་ཕམ་ཞིག་བྱུང་སོང་། འདི་འདྲ་ཞིག་མིན་ན་བསམ་ནས་་་