དེ་རིང་ཨ་རིའི་ཕོ་བྲང་དཀར་པོས་གསར་འགོད་གསལ་བསྒྲགས་སྤེལ་ཏེ། ཟླ་འདིའི་ཚེས་ ༩ དང་ ༡༠ བཅས་ཉིན་གཉིས་རིང་ཨ་རིའི་རྒྱལ་དོན་དྲུང་ཆེ་ཇོན་ཀེ་རེ་ (John Kerry)དང་ནོར་སྲིད་དྲུང་ཆེ་ཇེག་ལེ་ (Jack Lew)གཉིས་ཀྱིས་སྣེ་འཁྲིད་པའི་གཞུང་འབྲེལ་སྐུ་ཚབ་ཚོགས་པ་ཞིག་རྒྱ་ནག་ནང་སྐོར་སྐྱོད་དང་འབྲེལ། རྒྱ་ནག་གི་སྲིད་བློན་གཞོན་པ་ཝང་ཡང་ (Wang Yang) དང་ཡང་ཇཱི་ཆི་ (Yang Jiechi) སོགས་ལ་ཐུག་འཕྲད་བྱས་ཏེ། ཨ་རྒྱའི་བར་གྱི་ཐབས་ཇུས་དང་དཔལ་འབྱོར་འབྲེལ་ལམ་གོང་མཐོར་གཏོང་ཕྱོགས། རྒྱ་སྒོར་གྱི་ཛ་ཐང་ཇེ་མཐོར་གཏོང་ཐབས། དྲ་རྒྱའི་བདེ་འཇགས་དང་ཞི་བདེ་རྒྱ་མཚོ་དང་ལྷོ་རྒྱ་ནག་རྒྱ་མཚོའི་བདག་དབང་གནད་དོན་སོགས་ལ་གྲོས་མོལ་བྱ་རྒྱུ་ཡིན་འདུག
འདིའི་ཐད་ཨ་རིའི་ཕྱི་སྲིད་ལྷན་ཁང་གི་མགྲིན་ཚབ་པ་ལྕམ་ཇན་ (Jen Psak) ལགས་ཀྱིས། “ ཐེངས་འདིའི་འབྲེལ་མོལ་སྐབས་རྒྱལ་ཁབ་གཉིས་ཀྱི་དཀའ་རྙོག་སེལ་ཐབས་བྱ་རྒྱུ་ཙམ་མ་ཟད། རྒྱལ་སྤྱིའི་ཐོག་འཕྲད་བཞིན་པའི་དཀའ་ངལ་མང་པོ་ཞིག་ལ་ཇི་ལྟར་གདོང་ལེན་བྱ་དགོས་མིན་སོགས་ལའང་གོ་བསྡུར་བྱ་རྒྱུ་ཡིན།” ཞེས་བརྗོད་འདུག རྒྱ་ནག་ཕྱི་སྲིད་ལྷན་ཁང་གི་མགྲིན་ཚབ་པས། “ ཉེ་ལམ་ཨ་རི་དང་རྒྱ་ནག་གི་འབྲེལ་ལམ་ཇེ་སྡུག་ཏུ་ཕྱིན་ཡོད་ཀྱང་། དེ་ནི་གཏན་འཇགས་ཞིག་མིན་སྟབས། མ་འོངས་པར་འབྲེལ་ལམ་སླར་ཇེ་བཟང་དུ་འགྲོ་ངེས་ཡིན” ཞེས་བརྗོད་འདུག
སྔ་ལོར་རྒྱ་ནག་གིས་ཞི་བདེ་རྒྱ་མཚོའི་ཐོག་མཁའ་དབྱིངས་ཐིག་ཚད་བཟོས་པ་དང་། དེའི་རྗེས་ལྷོ་རྒྱ་ནག་རྒྱ་མཚོའི་བདག་དབང་ཐོག་རྩོད་རྙོག་བྱུང་བ། ཉེ་ལམ་རྒྱ་ནག་བཅིངས་གྲོལ་དམག་མིའི་རུ་ཁག་ཅིག་གིས་དྲ་ཐོག་བརྒྱུད་ཨ་རིའི་ཚོང་དོན་གསང་བ་རྐུ་འཁྱེར་བྱས་པ་བཅས་ཀྱི་ཐད་ཨ་རིས་རྒྱ་ནག་གཞུང་ལ་སྐྱོན་བརྗོད་བྱས་སྟབས། རྒྱ་ནག་གིས་པེ་ཅིན་གྱི་ཨ་རིའི་གཞུང་ཚབ་ཆེན་མོ་འབོད་འགུག་གིས་སྐྱོན་བརྗོད་བྱས་པ། ཉེ་ཆར་སྐོང་ཚོགས་བྱས་པའི་རྒྱལ་སྤྱིའི་དྲ་ཐོག་སྲུང་སྐྱོབ་ཚོགས་འདུར་རྒྱ་ནག་མཉམ་ཞུགས་མ་བྱས་པ་དང་། ཨ་རིའི་བདེ་སྲུང་དྲུང་ཆེས་ད་ལོའི་ཨེ་ཤ་ཡའི་རྒྱལ་སྲུང་བདེ་འཇགས་ཚོགས་འདུའི་སྐབས་ཨ་རིའི་བདེ་སྲུང་དྲུང་ཆེས་རྒྱ་ནག་གི་རྒྱ་སྐྱེད་རིང་ལུགས་ལ་སྐྱོན་བརྗོད་བྱས་པ་སོགས་ལ་བརྟེན་ཏེ་རྒྱལ་ཁབ་གཉིས་བར་གྱི་འབྲེལ་ལམ་ཇེ་སྡུག་ཏུ་ཕྱིན་ཡོད།
ཆབ་སྲིད་དབྱེ་ཞིབ་པ་ཚོས་ཨ་རི་དང་རྒྱ་ནག་གཉིས་ནི་གཅིག་ལ་གཅིག་བརྟེན་དང་གཉིས་ཕན་མཉམ་རྒྱལ་གྱི་འབྲེལ་ལམ་ཞིག་ཆགས་ཡོད་སྟབས་མ་འོངས་པར་རིམ་པས་རྒྱལ་ཁབ་གཉིས་ཀྱི་འབྲེལ་ལམ་རྒྱ་ཇེ་ཆེར་མི་འགྲོ་ཐབས་མེད་ཡིན་སྐོར་ཚོད་དཔག་བྱེད་བཞིན་ཡོད་འདུག
གསར་འགོད་པ། དོན་གྲུབ།
