ཕྱོཊ་འགལ་ཚོགས་པའི་མགོ་ཁྲིད་མེད་པའི་གྲོས་ཚོགས།

རྒྱ་གར་གྲོས་ཚོགས་འོག་མའི་ནང་བརྒྱ་ཆ་ལོན་མཁན་གྱི་ཚོགས་པ་བྱུང་མེད་སྟབས་ད་སྔ་ཕྱོགས་འགལ་ཚོགས་པའི་མགོ་ཁྲིད་བསྐོ་བཞག་བྱེད་ཐུབ་མེད་པ་གསལ་བསྒྲགས་སྤེལ་འདུག

 དེ་རིང་རྒྱ་གར་གྱི་སྐབས་ ༡༦ པའི་གྲོས་ཚོགས་འོག་མའི་ཚོགས་གཙོ་ལྕམ་སུ་མི་ཌེ་ར་མཱ་ཧཱ་ཇན་ (Sumitra Mahajan)ལགས་ཀྱིས་རྒྱ་གར་རྒྱལ་ཡོངས་འོས་བསྡུ་ཆེན་མོའི་ཁྲོད་བྷེ་ཇེ་པི་ཚོགས་པར་རྒྱལ་ཁ་ཐོབ་སྟེ་གཞུང་འཛིན་ཚོགས་པ་ཆགས་ཡོད་ཀྱང་། ཆབ་སྲིད་ཚོགས་པ་སུ་གང་ལའང་གྲོས་ཚོགས་ཀྱི་ཁ་གཏད་ཚོགས་པའི་མགོ་ཁྲིད་བྱ་རྒྱུའི་བརྒྱ་ཆ་ལོན་མེད་སྟབས། རྩ་ཁྲིམས་ནང་གསལ་ལྟར་ཐག་གཅོད་བྱ་རྒྱུ་ཡིན་སྐོར་བསྒྲགས་འདུག

རྩ་ཁྲིམས་ནང་གྲོས་ཚོགས་ཀྱི་ཕྱོགས་འགལ་ཚོགས་པའི་མགོ་ཁྲིད་བསྐོ་བཞག་བྱ་རྒྱུར། ཆབ་སྲིད་ཚོགས་པ་གང་རུང་ལ་གྲོས་ཚོགས་ནང་འཐུས་མི་ ༥༥ དང་བརྒྱ་ཆར་བཀུག་ན་བརྒྱ་ཆ་ ༡༠ ལོན་དགོས་ཀྱང་། རྒྱ་གར་གྱི་ཆབ་སྲིད་ཚོགས་པ་ཆེ་ཤོས་གྲས་ར་ཧུལ་གྷན་དྷི་ཡིས་སྣེ་འཁྲིད་པའི་ཀོང་རེ་སེ་ཚོགས་པར་འཐུས་མི་ ༤༤ དང་། ཇེ་ཇཱ་ཡ་ལ་ལི་དྷ་ (J Jayalalithaa) ཡིས་སྣེ་འཁྲིད་པའི་ཨལ་ཨ་ཡེ་ཌི་ཨེམ་ཁེ་ (AIADMK) ལ་འཐུས་མི་ ༣༧ བཅས་ལས་ཐོབ་མེད་སྟབས། ཕྱོགས་འགལ་ཚོགས་པའི་མགོ་ཁྲིད་བྱེད་ཐབས་མེད་པ་ཆགས་ཡོད་འདུག

འདིའི་ཐད་གྲོས་ཚོགས་ཀྱི་བློན་ཆེན་ཨེམ་ཝན་ཁཱེ་ནེ་དྷུ་ (M Venkaiah Naidu) ལགས་ཀྱིས། “ ད་རེབ་གཞུང་འབྲེལ་ཚོགས་པའི་གྲོས་ཚོགས་ཀྱི་ཁ་གཏད་ཚོགས་པ་ཀོང་རེ་སེ་ཆགས་ཡོད་ཀྱང་། ཁ་གཏད་ཚོགས་པའི་མགོ་ཁྲིད་བསྐོ་བཞག་བྱ་མིན་ནི་གྲོས་ཚོགས་ཀྱི་ཚོགས་གཙོས་ཐག་གཅོད་བྱ་དགོས་པ་ཞིག་ཆགས་ཡོད།” ཅེས་དང་། ད་དུང་ཁོང་གིས་ཇོ་ཧར་ལ་ནེ་རུ་དང་ཨིན་དྷར་གྷན་དྷི། ར་ཇིབ་གྷན་དྷི་བཅས་ཀྱིས་རྒྱ་གར་གཞུང་འཛིན་སྐབས་གྲོས་ཚོགས་འོག་མའི་ནང་ཁ་གཏད་ཚོགས་པའི་མགོ་ཁྲིད་བསྐོ་བཞག་ཐུབ་མེད་སྐོར་སོགས་བརྗོད་འདུག

རྒྱ་གར་གྲོས་ཚོགས་འོག་མའི་ཕྱོགས་འགལ་ཚོགས་པའི་མགོ་ཁྲིད་ནི། རྒྱ་གར་དབུས་གཞུང་གི་ལྐོག་ཟ་རུལ་སུངས་རྟོག་ཞིབ་ཚོགས་ཆུང་དང་སྨྲ་བརྗོད་རང་དབང་བཀོལ་སྤྱོད་ཚོགས་ཆུང་གི་འགན་འཛིན་སོགས་བསྐོ་བཞག་བྱེད་མཁན་ཡིན་སྟབས། གལ་ཏེ་གྲོས་ཚོགས་འོག་མའི་ནང་ཕྱོགས་འགལ་ཚོགས་པའི་མགོ་ཁྲིད་བསྐོ་བཞག་མ་ཐུབ་པ་ཡིན་ན། ཚོགས་པ་འདི་གཉིས་ཀྱི་འགན་འཛིན་བསྐོ་བཞག་བྱ་རྒྱུར་དཀའ་ངལ་འཕྲད་རྒྱུ་ཡིན་སྟབས། གཞུང་འཛིན་ཚོགས་པའི་ནང་ཁུལ་དུ་ཕྱོགས་འགལ་ཚོགས་པའི་གྲོས་ཚོགས་ཀྱི་མགོ་ཁྲིད་བསྐོ་མིན་ཐད་བསམ་ཚུལ་མི་མཐུན་པ་འཐོན་བཞིན་ཡོད་འདུག གཞུང་འཛིན་ཚོགས་པའི་མགོ་ཁྲིད་འགས་ཕྱོགས་འགལ་ཚོགས་པའི་གྲོས་ཚོགས་ཀྱི་མགོ་ཁྲིད་བསྐོ་བཞག་མ་ཐུབ་ཚེ། ཚོགས་ཆུང་གཉིས་ཀྱི་འགན་འཛིན་གྱི་ས་མིག་ཁ་སྐོང་བྱ་དགོས་དོན་མེད་སྐོར་དང་། གཞན་ཁག་ཅིག་གིས་གྲོས་ཚོགས་གོང་མའི་ཀོང་རེ་སེའི་མགོ་ཁྲིད་གྷོ་ལམ་ (Ghulam Nabi Azad) ལགས་ལས་བྱེད་བཀོད་སྒྲིག་ཚོགས་ཆུང་གི་ཚོགས་མིར་བསྐོ་བཞག་བྱ་རྒྱུའི་ཁྲིམས་སྒྲིག་གསར་བཟོ་བརྒྱུད་ཐག་གཅོད་ཐུབ་ཐབས་བྱ་དགོས་སྐོར་སོགས་རྗོད་བཞིན་ཡོད་འདུག

༡༩༦༩ ལོར་གྲོས་ཚོགས་ཀྱི་ཁྲིམས་སྒྲིག་གཞིར་བཟུང་རམ་སིན་ (Ram Subhag Singh) ལགས་གྲོས་ཚོགས་འོག་མའི་ཕྱོགས་འགལ་ཚོགས་པའི་མགོ་ཁྲིད་ལ་བསྐོ་བཞག་བྱས་པ་ནས་བཟུང་། དེ་རྗེས་རིམ་པས་ཅཱ་ཝན་ (YB Chavan)། ཇག་ཇི་ཝན་རམ་(Jagjivan Ram)། ར་ཇིབ་གྷན་དྷི་ (Rajiv Gandhi)། ཨད་ཌི་བཱ་ནེ་(L K Advani)། བཱ་ཇི་བྷ་ཡེ་ (Atal Bihari Vajpayee)། པི་ལྦེ་ན་ར་སེམ་མ་རོའོ་ (PV Narasimha Rao)། སོ་ནེ་གྷན་དྷི་ (Sonia Gandhi)། སོ་ཞི་མཱ་སོ་ཝ་ར་ཇི་ (Sushma Swaraj) བཅས་བསྐོ་བཞག་བྱས་ཡོད་ཀྱང་། ༡༩༧༩ ནས་ ༡༩༨༩ བར་གྱི་གྲོས་ཚོགས་སྐབས་ ༧ དང་ ༨ པར་ཕྱོགས་འགལ་ཚོགས་པའི་མགོ་ཁྲིད་བསྐོ་བཞག་ཐུབ་མེད་པ་ལྟར་ཐེངས་འདིར་ཡང་གནས་ཚུལ་དེ་ལྷག་ཡོད་འདུག

ཆབ་སྲིད་དབྱེ་ཞིབ་པ་ཚོས། རྒྱ་གར་གྲོས་ཚོགས་འོག་མའི་ནང་ཕྱོགས་འགལ་ཚོགས་པའི་མགོ་ཁྲིད་བསྐོ་བཞག་མ་ཐུབ་ཚེ། མ་འོངས་པར་གཞུང་འཛིན་ཚོགས་པ་དང་ཕྱོགས་འགལ་ཚོགས་པའི་བར་ལྗིད་སྙོམས་སྟངས་འཛིན་ ( Check and balance) ཡོང་རྒྱུ་ཁག་པོ་ཡིན་སྐོར་བརྗོད་འདུག

གསར་འགོད་པ། དོན་གྲུབ།