སྟག་ཚ་དགོན་ལ་མེ་ཤོར།

རེས་གཟའ་ཟླ་བ་ཉིན་སི་ཁྲོན་ཞིང་ཆེན་མཛོད་དགེ་རྫོང་སྟག་ཚ་དགོན་པའི་རྗེའི་ལྷ་ཁང་ལ་མེ་སྐྱོན་ཚབས་ཆེན་བྱུང་ཡོད་འདུག

འདི་ལོའི་ཕྱི་ཟླ་ ༦ ཚེས་ ༣༠ ཉིན་སི་ཁྲོན་ཞིང་ཆེན་མཛོད་དགེ་རྫོང་སྟག་ཚ་དགོན་དགེ་ལྡན་བཀྲ་ཤིས་ཆོས་བཟང་གླིང་གི་རྗེའི་ལྷ་ཁང་ལ་མེ་སྐྱོན་ཆེན་པོ་ཤོར་ཡོད་པ་དང་། ད་ལྟའི་ཆར་རྒྱུ་དངོས་ཅི་ཙམ་ལ་ཚིག་སྐྱོན་བྱུང་ཡོད་མེད་དང་མེ་སྐྱོན་གྱི་བྱུང་རྐྱེན་སོགས་གསལ་བོ་མི་འདུག

སྟག་ཚ་དགོན་དགེ་ལྡན་བཀྲ་ཤིས་ཆོས་བཟང་གླིང་ནི་སྟག་ཚ་སྐུ་ཕྲེང་དང་པོ་བྱ་བཏང་ཆོས་རྗེ་སྨོན་ལམ་ལྷུན་འགྲུབ་དཔལ་བཟང་བོ་མཆོག་གིས་ཐོག་མར་ཕྱག་བཏབ་པའི་དགེ་ལུགས་པའི་དགོན་པ་ཞིག་ཡིན་ཞིང་། རིག་གནས་གསར་བརྗེ་སྐབས་དགོན་པ་དེར་གཏོར་སྐྱོན་ཆེན་པོ་ཐེབས་ཡོད་ཀྱང་། རིག་གསར་ཅུང་ཙམ་ཞི་འཇགས་སུ་ཕྱིན་རྗེས། སྟག་ཚ་སྐུ་ཕྲེང་དྲུག་པ་མཆོག་གིས་སླར་གསོ་མཛད་པའི་འགོ་བརྩམས་ཏེ། སྔར་ཡོད་པའི་ཐོས་བསམ་གླིང་དང༌། གསང་སྔགས་སྟོད་རྒྱུད་གྲྭ་ཚང་གི་ལྕགས་མཁར་སོགས་རིམ་གྱིས་སླར་གསོ་མཛད་ཁར་གསོ་རིག་གཞན་ཕན་གླིང་དང༌། དུས་འཁོར་ཨེ་ཝཾ་ཆོས་འཁོར་གླིང་སོགས་རིམ་པས་གསར་འཛུགས་མཛད་ཅིང༌། གྲྭ་ཚང་སོ་སོར་གཙུག་ལག་ཁང་རྟེན་དང་བརྟེན་པ་བཅས་ལེགས་པར་བཞེངས། དགེ་འདུན་པ་མང་པོར་དམར་ཟས་བཞེས་སྲོལ་མེད་པས་ཚོགས་ཐུག་ལ་དཀར་ཐུག་ལས་ཤ་ཐུག་གཏན་སྤངས་གནང་ཞིང་། ད་ལྟ་དགེ་འདུན་པ་ ༡༨༠ ལྷག་ཡོད་པ་དང་། སྟག་ཚ་བླ་མ་སྐུ་ཕྲེང་ ༣ གྱི་བཞུགས་གནས་ཡིན་ལ། ད་ལྟའི་བར་ལོ་ངོ་ ༣༤༩ ཙམ་ཕྱིན་པའི་ལོ་རྒྱུས་ཡོད་འདུག

གསར་འགོད་པ། པདྨ་མཚོ།