ཁ་སང་བྱང་ཀོ་རི་ཡས་ལྷོ་ཀོ་རི་ཡས་ཨ་རི་དང་མཉམ་དུ་དམག་སྦྱོང་བྱ་རྒྱུའི་གྲོས་མཐུན་མཚམས་འཇོག་བྱས་ཏེ། ཁྱིམ་མཚེས་རྒྱལ་ཁབ་གཉིས་ཀྱི་བརྟན་བརླིང་སྲུང་སྐྱོབ་དང་། འབྲེལ་ལམ་གོང་འཕེལ་གཏོང་ཐབས་ལ་ནུས་པ་འདོན་དགོས་སྐོར་བསྒྲགས་པར་ལྷོ་ཀོ་རི་ཡས་ཁས་ལེན་བྱས་མེད་སྟབས། དེ་རིང་བྱང་ཀོ་རི་ཡས་ལྷོ་བྱང་ཀོ་རི་ཡའི་རྒྱ་མཚོའི་སྤྱི་གཡར་མཚོ་ཁུལ་དུ་ཤུགས་ཚད་ཆུང་བའི་མེ་ཤུགས་འཕུར་མདེལ་གཉིས་འཕངས་ཏེ་ལྷོ་ཀོ་རི་ཡར་འཇིགས་སྐུལ་བྱས་ཡོད་འདུག
འདིའི་ཐད་ལྷོ་ཀོ་རི་ཡའི་བདེ་སྲུང་ལྷན་ཁང་གིས། “ བྱང་ལྷོ་རི་ཡས་ལྷོ་བྱང་ཀོ་རི་ཡའི་རྒྱ་མཚོའི་སྟེང་མེ་ཤུགས་འཕུར་མདེལ་གཉིས་འཕངས་ཏེ། ལྷོ་ཀོ་རི་ཡ་དང་ཨེ་ཤ་ཡའི་མངའ་ཁུལ་བདེ་འཇགས་ལ་འཇིགས་སྐུལ་བྱས་ཡོད་སྟབས། རྒྱལ་སྤྱིའི་སྒྲིག་འཛུགས་ཁག་གིས་བྱང་ཀོ་རི་ཡའི་བྱ་སྤྱོད་ལ་ཚོད་འཛིན་བྱ་དགོས།” ཞེས་བརྗོད་འདུག
ཉེ་ལམ་མཉམ་འབྲེལ་རྒྱལ་ཚོགས་གཙོས་རྒྱལ་སྤྱིའི་སྒྲིག་འཛུགས་ཁག་གིས་བྱང་ཀོ་རི་ཡར་ཉེན་བརྡ་གཏོང་མིན་ལ་མ་ལྟོས་པར། བྱང་ཀོ་རི་ཡས་ཟླ་འདིའི་ཚེས་ ༢༦ ཉིན་མེ་ཤུགས་འཕུར་མདེལ་ ༣ དང་། ཚེས་ ༢༩ ཉིན་མེ་ཤུགས་འཕུར་མདེལ་ ༢ བཅས་འཕངས་ཏེ་ལྷོ་ཀོ་རི་ཡར་ཞེད་སྣང་སློང་ཡོད་པ་མ་ཟད། ཟླ་འདིའི་ཟླ་མཇུག་ཏུ་རྡུལ་ཕྲན་མཚོན་ཆའི་ཚོད་ལྟ་ཨང་བཞི་པ་བྱ་འཆར་ཡོད་པའི་གསལ་བསྒྲགས་བྱས་ཡོད་འདུག
སང་ཉིན་རྒྱ་ནག་གི་སྲིད་འཛིན་ཞི་ཅིན་ཕིན་ལྷོ་ཀོ་རི་ཡར་སྐོར་སྐྱོད་བྱས་ཏེ་དཔལ་འབྱོར་དང་དམག་དོན་སྐོར་ལ་གྲོས་མོལ་བྱ་འཆར་ཡོད་འདུག
གསར་འགོད་པ། དོན་གྲུབ།
