ཁ་སང་ཏ་ལི་བྷན་དྲག་སྤྱོད་ཤོག་ཁག་གིས་ཨབ་གྷན་རྒྱལ་སྤྱིའི་གནམ་ཐང་ལ་མེ་ཤུགས་འཕུར་མདེལ་འཕངས་ཏེ་ཨབ་གྷན་གྱི་ཐད་འཕུར་གནམ་གྲུ་གསུམ་གཏོར་རྒོལ་བཏང་ཡོད་འདུག
ཁ་སང་ཏ་ལི་བྷན་འཇིགས་སྐུལ་རིང་ལུགས་པས་ཨབ་གྷན་རྒྱལ་ས་ཀཱ་བྷུལ་གྱི་རྒྱལ་སྤྱིའི་གནམ་ཐང་གི་དམག་སྒར་དུ་མེ་ཤུགས་འཕུར་མདེལ་གཉིས་འཕངས་ཏེ། སྲིད་འཛིན་ཨ་མེ་ཌི་ཁར་ཛེ་འགྲུལ་བཞུད་བྱེད་སའི་ཐད་འཕུར་གནམ་གྲུ་གཏོར་བཤིག་དང་གནམ་གྲུ་གཞན་གསུམ་ལ་གནོད་སྐྱོན་ཆེན་པོ་བཟོས་ཡོད་འདུག དེ་ནི་ཏ་ལི་བྷན་དྲག་སྤྱོད་ཤོག་ཁག་གིས་ཨབ་གྷན་དམག་མའི་ས་ཚིགས་ལ་གཏོར་རྒོལ་བཏང་བ་ཐེངས་གཉིས་པ་དེ་ཆགས་ཡོད་འདུག
འདིའི་ཐད་ཨབ་གྷན་དམག་སྤྱི་ཨཱ་མན་ (Afzal Aman) ལགས་ཀྱིས་ཐེངས་འདིའི་བྱ་སྤྱོད་དེར་ང་ཚོས་རྒྱལ་ཕམ་ཐག་གཅོད་ཀྱི་དམག་འཐབ་ཅིག་བྱ་རྒྱུ་ཡིན་ཞེས་བརྗོད་འདུག ཏ་ལི་བྷན་ཤོག་ཁག་གིས། “ ང་ཚོས་ཨབ་གྷན་རྒྱལ་སྤྱིའི་གནམ་ཐང་དུ་གཏོར་རྒོལ་གཏོང་དགོས་དོན་ནི། རྒྱལ་སྤྱིའི་སྤྱི་ཚོགས་ལ་ང་ཚོའི་སྟོབས་ཤུགས་ཉམ་དམས་སུ་ཕྱིན་མེད་པ་ཤེས་རྟོགས་བྱེད་དུ་འཇུག་ཆེད་ཡིན” ཞེས་བརྗོད་འདུག
ཟླ་སྔོན་མའི་ནང་ཏ་ལི་བྷན་དྲག་སྤྱོད་ཤོག་ཁག་གིས་ཨ་རིའི་དམག་མི་ཨབ་གྷན་ནས་ཕྱིར་ལེན་མ་བྱས་གོང་། ཨབ་གྷན་དང་ཨ་རིའི་དམག་སྒར་ཁག་ཏུ་གཏོར་རྒོལ་གཏོང་རྒྱུ་ཡིན་སྐོར་བསྒྲགས་ཡོད་ཅིང་། ཨབ་གྷན་རྒྱལ་ཡོངས་སྲིད་འཛིན་འོས་བསྡུའི་སྐབས་ཉེས་མེད་མི་སེར་མང་པོ་བཙན་ཁྲིད་དང་ཨབ་གྷན་ལྷོ་ཤར་ས་ཁུལ་གྱི་འོས་བསྡུའི་ས་ཚིགས་མང་པོ་ཞིག་བཀག་སྡོམ་བྱས་ཤིང་། གང་བྱུང་མེ་མདའ་བརྒྱབ་སྟེ་མི་སེར་ ༨༠ ལྷག་དམར་གསོད་བཏང་ཡོད།
ཟླ་འདིའི་ཚེས་ ༢ ཉིན་ཨབ་གྷན་རྒྱལ་ས་ཀཱ་བྷུལ་ནང་སྐོར་སྐྱོད་བྱེད་མཁན་གྱི་དམག་མིའི་སྤྱི་སྤྱོད་རླངས་འཁོར་ཞིག་ལ་གས་གཏོར་བྱས་ཏེ། རླངས་འཁོར་ནང་ཡོད་པའི་དམག་མི་བརྒྱད་བསད་ཡོད་འདུག ད་བར་འབར་གས་དོན་རྐྱེན་ ༤༥ ཙམ་བཟོས་ཡོད་འདུག
༢༠༠༡ ལོར་ཨ་རི་དང་ནེ་ཌོ་ ( NATO) དམག་མིས་ཨབ་གྷན་ནང་ཏ་ལི་བྷན་དྲག་སྤྱོད་ཤོག་ཁག་དང་དམག་འཐབ་བྱས་ཏེ་ཏ་ལི་བྷན་དྲག་སྤྱོད་ཤོག་ཁག་ཕམ་ཉེས་བཏང་ཡོད་ཅིང་། ཨབ་གྷན་ནང་གཞུང་གསར་པ་བཙུགས་ཏེ་རྒྱལ་ཡོངས་འོས་བསྡུ་བརྒྱུད་སྲིད་འཛིན་འོས་འདེམས་བྱ་རྒྱུའི་ལམ་ལུགས་བཟོས་ཏེ་ཨ་མེ་ཌི་ཁར་ཛེ་སྲིད་འཛིན་དུ་བསྐོ་བཞག་བྱས་ཡོད་ཀྱང་། ༢༠༡༣ ལོའི་ལོ་མཇུག་ཏུ་ཨ་རིའི་སྲིད་འཛིན་ཨོ་བྷ་མས་ཨ་རིའི་དམག་མི་ཨབ་གྷན་ནང་མི་མཐུད་སྡོད་ཆོག་པའི་དུས་ཡུན་ཕར་འགྱངས་ལ་མིང་རྟགས་འགོད་རྒྱུར་འབོད་སྐུལ་ཐེངས་མང་བྱས་ཀྱང་། ཨབ་གྷན་གྱི་སྲིད་འཛིན་ཨ་མེ་ཌི་ཁར་ཛེ་ཡིས་ཁས་ལེན་བྱས་མེད་སྟབས་རྒྱལ་ཁབ་གཉིས་ཀྱི་འབྲེལ་ལམ་ཇེ་སྡུག་ཏུ་ཕྱིན་ཡོད།
ཨབ་གྷན་གྱི་སྲིད་འཛིན་གྱིས་ཨ་རི་དང་ཨབ་གྷན་བར་གྱི་དམག་དོན་གྲོས་མཐུན་ལ་མིང་རྟགས་མ་བཀོད་ཚེ། ལོ་འདིའི་ལོ་མཇུག་ཏུ་ནེ་ཌོ་དམག་དཔུང་ཨབ་གྷན་ནས་ཕྱིར་འཐེན་བྱ་དགོས་པ་དང་། འཆར་ལོར་ཨ་རིའི་དམག་མི་ཡོངས་རྫོགས་ཨ་རིར་ཕྱིར་ལོག་བྱ་དགོས་ཐུག་གི་ཡོད་འདུག ཆབ་སྲིད་དབྱེ་ཞིབ་པ་ཚོས། ཨ་རིའི་དམག་མི་ཨབ་གྷན་ནས་ཕྱིར་འཐེན་བྱས་ཚེ། མ་འོངས་པར་ཌ་ལི་བྷན་ཤོག་ཁག་གི་སྟོབས་ཤུགས་ཆེ་རུ་ཕྱིན་ཏེ་ཨབ་གྷན་གཞུང་མགོ་རྟིང་སློག་རྒྱུའི་ཉེན་ཁ་ཡོད་པའི་དཔག་བྱེད་བཞིན་ཡོད་འདུག
གསར་འགོད་པ། དོན་གྲུབ།
