ད་ལོ་ཞབས་ཞུ་བསྒྲུབ་ཐབས་མེད་པར་དགོངས་སེལ་ཞུ།

ཁ་སང་བོད་ཀྱི་གཞོན་ནུ་ལྷན་ཚོགས་ཀྱི་དབུས་སྤྱི་ཁྱབ་རྒྱུན་ལས་ཁང་ནས་གསལ་བསྒྲགས་ཤིག་སྤེལ་བའི་ནང་། ད་ལོའི་ལ་དྭགས་དུས་འཁོར་དབང་ཆེན་ཐད་བོད་ཀྱི་གཞོན་ནུ་ལྷན་ཚོགས་ཀྱིས་སྔ་ཕྱི་ཐེངས་འགར་འབྲེལ་ཡོད་སོ་སོར་འབྲེལ་བ་བྱས་ཏེ། དུས་དབང་སྐབས་སྤྱི་ཚོགས་ཞབས་ཞུའི་ལས་དོན་ཁག་བསྒྲུབ་འཆར་ཡོད་པའི་སྙན་གསེང་ཞུས་མཐར། དུས་དབང་སྐབས་ཀྱི་སྤྱི་ཚོགས་ཞབས་ཞུའི་ཞུ་སྒོ་མཐའ་དག་ལ་དྭགས་ས་གནས་ཀྱི་ཚོགས་སྡེ་ཁག་གིས་ཞུ་རྒྱུའི་ཐག་གཅོད་བྱུང་ཡོད་པའི་བརྡ་ལན་འབྱོར་ཡོད་སྟབས། ད་རེབ་དུས་དབང་སྐབས་དབུས་བོད་ཀྱི་གཞོན་ནུ་ལྷན་ཚོགས་ཀྱིས་ལས་དོན་དེ་དག་གནང་ཐབས་མ་བྱུང་སྐོར་འཁོད་འདུག

གཞོན་ལྷན་ཀྱི་གསལ་བསྒྲགས་ནང་འཁོད་དོན། སྤྱི་ལོ་ ༡༩༧༠ ལོར་བོད་ཀྱི་གཞོན་ནུ་ལྷན་ཚོགས་དབུ་བརྙེས་པ་ནས་བཟུང་སྤྱི་ནོར་ ༧གོང་ས་སྐྱབས་མགོན་ཆེན་པོ་མཆོག་ནས་དཔལ་དུས་ཀྱི་འཁོར་ལོའི་དབང་ཆེན་སྩོལ་སྐབས་བོད་ཀྱི་གཞོན་ནུ་ལྷན་ཚོགས་ཀྱིས་སྤྱི་ཚོགས་ཞབས་ཞུའི་ཞུ་སྒོ་ཁག་འགན་འཁུར་འཐུས་གཙང་ཞུ་བཞིན་ཡོད་པ་ལྟར། འདི་ལོའི་སྤྱི་ཟླ་ ༧ ནང་བསྩལ་རྒྱུའི་དཔལ་དུས་ཀྱི་འཁོར་ལོའི་དབང་ཆེན་སྐབས་སྔར་རྒྱུན་བཞིན་ལྷག་བསམ་ཆེར་སྐྱེད་ཀྱིས་ ༡༽ ༧གོང་ས་མཆོག་གི་སྐུ་ཕྱའི་སྲུང་སྐྱོབ་དང་། ༢ ༽ ལུས་བཤེར། ༣ ༽ གསུང་རའི་ནང་གཙང་བཟོ། ༤༽ གསལ་བསྒྲགས་ཁང་། ༥ ༽ འབབ་ཚུགས་ཁག་ཏུ་སྣེ་ལེན། ༦ ༽ ནད་པར་རོགས་རམ། ༧ ཚེ་འདས་རིགས་བྱུང་ཚེ་སྐུ་ཕུང་མེར་སྲེག་བཅས་ཀྱི་སྤྱི་ཚོགས་ཞབས་ཞུའི་ལས་དོན་ཁག་འཐུས་སྒྲུབ་རྒྱུར་འདི་ག་གཞོན་ལྷན་དབུས་རྒྱུན་ནས་ཐག་གཅོད་བྱུང་བ་ལྟར་སྤྱི་ཚོགས་ཞབས་ཞུའི་ལས་དོན་ཁག་ཚགས་ཚུད་ཡོང་སླད་འབྲེལ་ཡོད་༧དཔལ་ལྡན་དགའ་ལྡན་ཕོ་བྲང་ཡིག་ཚང་དབུས། དབུས་བོད་མིའི་སྒྲིག་འཛུགས་ཀྱི་ཆོས་རིག་ལྷན་ཁང་དང་། བདེ་སྲུང་ལྷན་ཁང་། དེ་བཞིན་དུས་དབང་སྦྱིན་བདག་གམ་གོ་སྒྲིག་པ་ལ་དྭགས་ནང་པའི་ཚོགས་པ་དང་། དགོན་པའི་ཚོགས་པ། ཀོང་པོ་གཞིས་བྱེས་དུས་དབང་གོ་སྒྲིག་ཚོགས་པ། ཇོ་ནང་དུས་དབང་གོ་སྒྲིག་ཚོགས་པ་ཁག་སོ་སོར་སྤྱི་ཚོགས་ཞབས་ཞུའི་ལས་དོན་ཞུ་སྒོ་ཁག་དང་འབྲེལ་བའི་སྙན་ཞུ་ཞིག་འབུལ་ལམ་ཞུས་པ་དང་།

ལྷག་པར་དུ་དུས་དབང་སྐབས་སྤྱི་ཚོགས་ཞབས་ཞུའི་ལས་དོན་ཁག་འཐུས་ཚང་དང་ལེགས་གྲུབ་ཡོང་སླད་འདི་ག་གཞོན་ལྷན་སྤྱི་ཁྱབ་དྲུང་ཆེ་དང་ཟུང་དྲུང་། སྤྱི་ཚོགས་ཞབས་ཞུའི་འགན་འཛིན་བཅས་སྤྱི་ལོ་ ༢༠༡༣ ཟླ་བ་ ༡༠ ནང་དངོས་སུ་ལ་དྭགས་ལ་ཆེད་སྐྱོད་ཀྱིས་དུས་དབང་གོ་སྒྲིག་པ་གཙོ་བོ་ལ་དྭགས་ནང་པའི་ཚོགས་འདུ་དང་། ལ་དྭགས་དགོན་པའི་ཚོགས་འདུ་གཉིས་ཀྱི་ཚོགས་གཙོར་མཇལ་བཅར་གྱིས་གཞོན་ལྷན་ནས་ཞུ་འོས་པའི་སྤྱི་ཚོགས་ཞབས་ཞུའི་ལས་དོན་ཁག་འབྲེལ་བརྗོད་ལྷུག་པོར་ཞུས་པ་མ་ཟད། གཞོན་ལྷན་སྤྱི་ཁྱབ་ཚོགས་གཙོ་ནས་དུས་དབང་སྦྱིན་བདག་ལ་དྭགས་ནང་པའི་ཚོགས་འདུའི་ཚོགས་གཙོ་མཆོག་དང་ཐེངས་གཉིས་ལྡི་ལིར་མཇལ་བཅར་གྱིས་དེ་དོན་ལ་བཀའ་མོལ་ཞུས་ཡོད་ཀྱང་དུས་ཡུན་རིང་པོར་གོ་སྒྲིག་ཚོགས་ཆུང་ནས་ཁ་གསལ་གྱི་ཡིག་ལན་གཅིག་ཀྱང་གནང་སོན་མ་བྱུང་བ་ལགས་ན།

སྤྱི་ལོ་ ༢༠༡༤ ཟླ་བ་ ༥ ཚེས་ ༢ ཉིན་སླར་ཡང་དུས་དབང་གོ་སྒྲིག་པ་སྦྱིན་བདག་ཁག་སོ་སོར་དེ་དོན་གྱི་ཞུ་སྙན་ཞིག་འབུལ་ལམ་ཞུས་ནས་ཡིག་ལན་གནང་སྐྱོང་ཡོང་བའི་འབོད་སྐུལ་ཞུས་པ་དང་ཆབས་གཅིག གཞོན་ལྷན་སྤྱི་ཁྱབ་ཚོགས་གཙོ་དང་ཚོགས་གཞོན། ཟུང་དྲུང་བཅས་སླར་ཡང་ལ་དྭགས་ལ་ཆེད་སྐྱོད་ཀྱིས་དུས་དབང་གོ་སྒྲིག་ཚོགས་པ་དང་འབྲེལ་ཡོད་ཁག་ལ་མཇལ་འཕྲད་ཞུས་ཏེ་གཞོན་ལྷན་ནས་ཞུ་འཆར་གྱི་སྤྱི་ཚོགས་ཞབས་ཞུའི་ལས་དོན་ཁག་གི་ཐོག་གྲོས་མོལ་ཞུས་ནས་རྒྱབ་སྐྱོར་ཡོང་ཐབས་བྱས་ཀྱང་། དུས་དབང་སྐབས་སྤྱི་ཚོགས་ཞབས་ཞུའི་ལས་འགུལ་ཁག་ཡོངས་རྫོགས་ལ་དྭགས་ས་གནས་ཀྱི་ཚོགས་སྡེ་ཁག་ནས་གནང་རྒྱུའི་ཐག་གཅོད་གནང་ཟིན་པར་སོང་། འདི་ག་བོད་ཀྱི་གཞོན་ནུ་ལྷན་ཚོགས་ནས་སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་ནས་དཔལ་དུས་ཀྱི་འཁོར་ལོའི་དབང་ཆེན་ཐེངས་ ༣༣ པ་ལ་དྭགས་ལ་སྩོལ་སྐབས་སྤྱི་ཚོགས་ཞབས་ཞུའི་ལས་དོན་ཁག་སྒྲུབ་ཐབས་མེད་པར་དགོངས་སེལ་ཞུ་བ་དང་ཆབས་གཅིག འདི་ལོའི་༧དཔལ་དུས་ཀྱི་འཁོར་ལོའི་དབང་ཆེན་གྱི་ཞུ་སྒོ་ཐ་དག་ལེགས་གྲུབ་ཡོང་བའི་སྨོན་འདུན་ཞུ་རྒྱུ་དང་། མ་འོངས་པར་སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་ནས་དཔལ་དུས་ཀྱི་འཁོར་ལོའི་དབང་ཆེན་ནམ་བསྩལ་ལ་འདི་ག་བོད་ཀྱི་གཞོན་ནུ་ལྷན་ཚོགས་ནས་སྔར་རྒྱུན་བཞིན་ལྷག་བསམ་ཆེན་པོས་སྤྱི་ཚོགས་ཞབས་ཞུའི་ལས་དོན་ཁག་འཐུས་ཚང་སྒྲུབ་རྒྱུ་ལགས་ན་དེ་དོན་མཁྱེན་རྟོགས་ཡོང་བ་ཞུ། ཞེས་སོགས་འཁོད་འདུག