དབྱིན་ཇིའི་དཔལ་འབྱོར་བློན་ཆེན་རྒྱ་གར་ནང་སྐོར་སྐྱོད།

དེ་རིང་དབྱིན་ཡུལ་གྱི་དཔལ་འབྱོར་བློན་ཆེན་རྒྱ་གར་ནང་སྐོར་སྐྱོད་བྱས་ཏེ་ཚོང་དོན་དང་དམག་དོན་སོགས་ཀྱི་སྐོར་ལ་གྲོས་མཐུན་བཞག་ཡོད་འདུག

དེ་རིང་ནས་བཟུང་ཉིན་གཉིས་རིང་དབྱིན་ཡུལ་གྱི་དཔལ་འབྱོར་བློན་ཆེན་ཨོ་སེ་བྷོར་ནཱེ་ (George Osborne) མཆོག་དང་ཕྱི་སྲིད་དྲུང་ཆེ་ཧེ་གྷོ་ (William Hague) ལགས་རྣམ་གཉིས་ཀྱིས་སྣེ་འཁྲིད་པའི་ཚོང་དོན་སྐུ་ཚབ་ཚོགས་ཆུང་ཞིག་རྒྱ་གར་ནང་སྐོར་སྐྱོད་མགོ་འཛུགས་བྱས་ཡོད་ཅིང་། རྒྱ་གར་གྱི་དཔལ་འབྱོར་དང་བདེ་སྲུང་བློན་ཆེན་གཅིག་ལྕོགས་སྐུ་ཞབས་ཨཱ་རོན་ཇིད་ཌི་ལི་ (Arun Jaitley )ལ་ཐུག་འཕྲད་གནང་སྟེ། དབྱིན་ཡུལ་ནང་རྒྱ་གར་གྱི་རླངས་འཁོར་བཟོ་གྲྭ་མཱ་ཧེན་དྷ་ར་ ( Mahindra) དང་སྨན་རྫས་བཟོ་གྲྭ་སེབ་ལཱ་ ( Cipla) གསར་འཛུགས་བཅས་ཀྱི་ཚོང་འབྲེལ་དང་། དབྱིན་ཡུལ་གྱིས་རོགས་རམ་འོག་རྒྱ་གར་མཱ་ཧ་ར་ཤི་ཌ་མངའ་སྡེའི་གྲོང་ཁྱེར་བྷོམ་བྷེ་ནས་བྷེང་ལོར་བར་གྱི་ཀི་ལི་མི་ཌར་ ༡༠༠༠ ཙམ་ནང་གྲོང་ཁྱེར་དང་གྲོང་གསེབ་གསར་པ་འཛུགས་སྐྲུན་བྱ་ཕྱོགས། རྒྱ་གར་གྱི་སློབ་ཕྲུག་ལ་སློབ་ཡོན་མང་དུ་གཏོང་ཐབས། དེ་བཞིན་རྒྱ་གར་གཞུང་གིས་དབྱིན་ཡུལ་གྱི་མཁའ་དམག་གནམ་གྲུ་( Eurofighter Jet 126) ཞེས་པ་ཉོ་ཕྱོགས་དང་། དབྱིན་ཡུལ་གྱི་བརྡ་འཕྲིན་ཚན་རྩལ་ཁེ་ལས་ཝོ་ཌ་ཧྥོན་ ( Vodafone) དང་རྒྱ་གར་གཞུང་བར་གྱི་དཔྱ་ཁྲལ་གནད་དོན། ཁོར་ཡུག་སྲུང་སྐྱོབ་སོགས་ཚོང་དོན་དང་དམག་དོན་སྐོར་ལ་གྲོས་མཐུན་བཞག་ཡོད་འདུག

དབྱིན་ཡུལ་གྱི་དཔལ་འབྱོར་བློན་ཆེན་ཨོ་སེ་བྷོར་ནཱེ་མཆོག་གིས་ “ དབྱིན་ཡུལ་དང་རྒྱ་གར་བར་འབྲེལ་ལམ་ཡག་པོ་བྱུང་ན་རྒྱལ་ཁབ་གཉིས་ཀྱི་དཔལ་འབྱོར་འཕེལ་རྒྱས་ཡོང་རྒྱུར་ཕན་ཐོགས་ཆེན་པོ་ཡོད་སྟབས། མ་འོངས་པར་སྔར་ལྷག་གོམ་གང་མདུན་སྤོས་ཀྱི་འབྲེལ་ལམ་འཛུགས་ཐུབ་པ་བྱས་ཏེ། རྒྱལ་ཁབ་ཀྱི་དཔལ་འབྱོར་འཕེལ་རྒྱས་གཏོང་ཐབས་བྱ་དགོས།” ཞེས་བརྗོད་འདུག རྒྱ་གར་གྱི་དཔལ་འབྱོར་བློན་ཆེན་ཨཱ་རོན་ཇིད་ཌི་ལི་མཆོག་གིས། “སྐུ་ཞབས་ནཱ་རེན་ཌ་མུ་དྷེ་མཆོག་གིས་རྒྱ་གར་ནང་རྒྱལ་ཁབ་གཞན་གྱི་མ་འཇོག་བྱེད་མཁན་གང་མང་ཡོང་ཐབས་བྱེད་བཞིན་ཡོད་པ་ལྟར། ངས་ཀྱང་དབྱིན་ཡུལ་གཞུང་གིས་དབྱིན་ཡུལ་གྱི་ཁེ་ལས་ཚོར་རྒྱབ་སྐྱོར་བྱས་ཏེ། རྒྱ་གར་ནང་མ་འཇོག་བྱེད་ཤུགས་ཆེ་རུ་གཏོང་རྒྱུར་རེ་བ་རྒྱག་གི་ཡོད།” ཅེས་སོགས་བརྗོད་འདུག

དབྱིན་ཡུལ་རྒྱལ་སྤྱིའི་ཐོག་དཔལ་འབྱོར་ཆེ་ཤོས་ཀྱི་རྒྱལ་ཁབ་ཨང་ ༦ དང་། དེ་བཞིན་ནུབ་ཕྱོགས་རྒྱལ་ཁབ་གཞན་དང་བསྡུར་ན་དཔལ་འབྱོར་འཕེལ་ཚད་མགྱོགས་ཤོས་གྲས་ཀྱི་རྒྱལ་ཁབ་ཅིག་ཆགས་ཡོད་ཀྱང་། ཉེ་ལམ་རྒྱལ་ཁབ་ཀྱི་དཔལ་འབྱོར་ཉམས་རྒུད་ཕྱིན་ཏེ། མང་ཚོགས་ཀྱིས་གཞུང་ལ་བུ་ལོན་སྤྲོད་འཇལ་མ་ཐུབ་པའི་གནས་སྟངས་འབྱུང་བཞིན་ཡོད་སྟབས། དབྱིན་ཡུལ་གྱི་སྲིད་བློན་ཌ་ཝུ་ཌི་ཁེམ་རོན་མཆོག་གིས་རྒྱ་གར་གཙོས་ཡར་རྒྱས་འགྲོ་བཞིན་པའི་རྒྱལ་ཁབ་ཁག་དང་ཚོང་དོན་འབྲེལ་ལམ་བཙུགས་ཏེ། རྒྱལ་ཁབ་འཕེལ་རྒྱས་གཏོང་ཐབས་བྱ་དགོས་སྐོར་བརྗོད་ཡོད་འདུག

༢༠༠༤ ལོར་རྒྱ་གར་དང་དབྱིན་ཡུལ་བར་ཐབས་ཇུས་རང་བཞིན་གྱི་འབྲེལ་ལམ་གསར་འཛུགས་ཀྱིས་ལོ་རེར་རྒྱལ་ཁབ་གཉིས་ཀྱི་སྲིད་བློན་དང་ཕྱི་འབྲེལ་བློན་ཆེན་བར་གྲོས་མོལ་བྱ་རྒྱུ་གཏན་འབེབས་དང་། ༢༠༡༠ དང་ ༢༠༡༣ ལོར་དབྱིན་ཡུལ་གྱི་སྲིད་བློན་ཌ་ཝུ་ཌི་ཁེམ་རོན་མཆོག་རྒྱ་གར་དང་། རྒྱ་གར་གྱི་སྲིད་བློན་མན་མོ་ཧན་སིང་མཆོག་དབྱིན་ཡུལ་ནང་སྐོར་སྐྱོད་བྱས་ཏེ། ཕྱོགས་གཉིས་བར་བརྡ་འཕྲིན་ཚན་རྩལ་དང་ཚོང་དོན། དམག་དོན། རྒྱལ་སྤྱིའི་གནད་དོན་ཁག་ལ་མཉམ་ལས་བྱ་རྒྱུ་གྲོས་མོལ་བྱུང་བ་ལྟར། རྒྱལ་ཁབ་གཉིས་བར་ ༢༠༡༠ ནས་ ༢༠༡༡ ལོ་བར་ཨ་སྒོར་ཐེར་འབུམ་ ༡༢།༥ དང་། ༢༠༡༡ ནས་ ༢༠༡༢ ལོ་བར་ཨ་སྒོར་ཐེར་འབུམ་ ༡༥།༧༢༤། ༢༠༡༢ ནས་ ༢༠༡༣ བར་ཨ་སྒོར་ཐེར་འབུམ་ ༢༨།༧། ༢༠༡༣ ནས་ ༢༠༡༤ ལོའི་ཟླ་ ༢ བར་ཨ་སྒོར་ཐེར་འབུམ་ ༢༠།༧༥༩ བཅས་བྱས་ཡོད་འདུག

ད་ལྟ་དབྱིན་ཡུལ་ནི་སིང་གྷ་པུར་དང་མོ་རི་ཤི་ཡ་རྒྱལ་ཁབ་ཕུད་དེ་རྒྱ་གར་ནང་མ་འཇོག་བྱེད་མཁན་ཆེ་ཤོས་ཀྱི་རྒྱལ་ཁབ་ཨང་གསུམ་པ་ཆགས་ཡོད་པ་མ་ཟད། ད་བར་རྒྱ་གར་ནང་དབྱིན་ཡུལ་གྱི་ཁེ་ལས་ ༡༠༠༠ ལྷག་གསར་འཛུགས་བྱས་ཏེ། རྒྱ་གར་གྱི་ཡུལ་མི་ ༥༠༠༠༠ ལྷག་ལ་ལས་ཀ་སྤྲོད་བཞིན་ཡོད་པ་དང་། དབྱིན་ཡུལ་ནང་རྒྱ་གར་གྱི་ཁེ་ལས་ ༧༠༠ ཙམ་བཙུགས་བཙུགས་ཏེ་དབྱིན་ཡུལ་གྱི་མི་ ༡༢༠༠༠ ལྷག་ལ་ལས་ཀ་སྤྲོད་བཞིན་ཡོད་འདུག

ཆབ་སྲིད་དབྱེ་ཞིབ་པ་ཚོས། དབྱིན་ཡུལ་དང་རྒྱ་གར་ནི་འཛམ་གླིང་ཐོག་དམངས་གཙོའི་རྒྱལ་ཁབ་ཆེ་ཤོས་གཉིས་ཆགས་ ཡོད་པར་བརྟེན། དཔལ་འབྱོར་དང་ཆབ་སྲིད་ཐོག་འབྲེལ་ལམ་གོང་མཐོར་གཏོང་རྒྱུ་ནི་གལ་འགངས་ཆེ་ཤོས་ཤིག་ཆགས་ཡོད་སྟབས། ད་རེབ་འབྲེལ་ལམ་འདི་བརྒྱུད་རྒྱལ་ཁབ་གཉིས་ཀྱི་སྔར་བྱས་རྒྱབ་བསྐྱུར་དང་ཕྱིན་ཆད་རྩོད་ལེན་གྱི་སྲིད་ཇུས་ཤིག་བཟུང་ཐུབ་པ་བྱ་དགོས་ཞེས་བརྗོད་འདུག

སྐུ་ཞབས་ནཱ་རེན་ཌ་མུ་དྷེ་མཆོག་གིས་རྒྱ་གར་གཞུང་བཟུང་བ་ནས་བཟུང་། རྒྱ་གར་ནང་ཧྥ་རན་སིའི་ཕྱི་སྲིད་བློན་ཆེན་ལཱོ་རན་ཌི་ (Laurent Fabius) དང་། ཨུ་རུ་སུའི་སྲིད་བློན་གཞོན་པ་རོ་གྷོ་ཛིན་ (Dmitry Rogozin)། རྒྱ་ནག་གི་ཕྱི་སྲིད་ཝང་ཡི་སོགས་སྐོར་སྐྱོད་ཀྱིས་ཚོང་དོན་དང་དམག་དོན་གྲོས་མཐུན་བཞག་ཡོད་འདུག

གསར་འགོད་པ། དོན་གྲུབ།