ཁ་སང་འཇར་མན་གཞུང་གིས་འཇར་མན་ནང་གི་ཨ་རིའི་གཞུང་ཚབ་ཀྱི་གསང་བའི་ལས་བྱེད་ཅིག་ཨ་རིར་ཕྱིར་སློག་བཏང་ཡོད་འདུག
ཁ་སང་འཇར་མན་གཞུང་གིས་དེ་སྔོན་ཨ་རིའི་གསང་བའི་ལས་ཁུངས་ཀྱིས་འཇར་མན་སྲིད་བློན་ལྕམ་ཨན་གྷེ་ལ་མེར་གྷལ་མཆོག་གི་ཁ་པར་ལྐོག་ཉན་བརྒྱབ་པ་དང་། ཉེ་ལམ་ཡང་བསྐྱར་འཇར་མན་གྱི་གསང་བ་རྐུ་འཁྱེར་བྱེད་བཞིན་ཡོད་པའི་གནས་ཚུལ་གཉིས་རིམ་བསྟུད་དུ་ཐོན་པ་བཅས་ཀྱི་ཉེས་མིང་འོག འཇར་མན་གཞུང་གིས་རྒྱལ་ས་སྦར་ལིན་ནང་ཡོད་པའི་ཨ་རིའི་གཞུང་ཚབ་ཁང་གི་མཐོ་རིམ་གསང་བའི་ལས་བྱེད་ཅིག་ཨ་རིར་ཕྱིར་སློག་བྱས་ཡོད་འདུག
འདིའི་ཐད་འཇར་མན་སྲིད་བློན་ལྕམ་ཨན་གྷེ་ལ་མེར་གྷལ་གྱིས། ”ཨ་རི་དང་འཇར་མན་གྱི་གསང་བའི་ལས་ཁུངས་ཀྱི་ལས་དོན་བྱེད་ཕྱོགས་དང་ཐབས་ལམ་ཁ་ཁ་ཡིན་ཡང་། ཨ་རིས་སོ་སོའི་མཐུན་གྲོགས་རྒྱལ་ཁབ་ཀྱི་གསང་བ་རྐུ་འཁྱེར་བྱེད་བཞིན་ཡོད་པ་དེ་ནི་ནོར་འཁྲུལ་ཆེན་པོ་ཞིག་རེད།” ཅེས་དང་། འཇར་མན་གཞུང་གི་མགྲིན་ཚབ་པ་སེ་ཌི་ཧྥན་ (Steffen Seibert) ལགས་ཀྱིས། ” ང་ཚོས་ཉེ་ལམ་འཇར་མན་ནང་ཡོད་པའི་ཨ་རིའི་གསང་བའི་ལས་ཁུངས་ཀྱིས་བྱ་སྤྱོད་མང་དག་ཅིག་སྤེལ་བཞིན་ཡོད་པ་ཁ་གསལ་བྱུང་ཡོད་སྟབས། ཨ་རིའི་གཞུང་ཚབ་ཀྱི་གསང་བའི་ལས་བྱེད་ཅིག་ཨ་རིར་ཕྱིར་སློག་བྱས་པ་ཡིན།”ཞེས་བརྗོད་འདུག
ཨ་རིའི་ཕོ་བྲང་དཀར་པོའི་མགྲིན་ཚབ་པ་ལྕམ་ཧེ་ཌན་ (Caitlin Hayden) ལགས་ཀྱིས། ”ཨ་རིའི་གསང་བའི་ལས་ཁུངས་ཀྱིས་འཇར་མན་གྱི་གསང་བ་རྐུ་འཁྱེར་བྱས་ཡོད་མེད་སྐོར་ལ་གསལ་བསྒྲགས་གང་ཡང་ཞུ་རྒྱུ་མེད། ཨ་རིར་མཚོན་ན་ཨ་རི་དང་འཇར་མན་བར་འབྲེལ་ལམ་ཡག་པོ་དགོས་རྒྱུ་ནི་གལ་འགངས་ཆེ་ཤོས་ཤིག་ཆགས་ཡོད་སྟབས། འཇར་མན་གཞུང་དང་གྲོས་མོལ་བྱས་ཏེ་དཀའ་རྙོག་སེལ་ཐབས་བྱ་རྒྱུ་ཡིན།” ཞེས་བརྗོད་འདུག
༢༠༡༣ ལོའི་ཟླ་ ༦ ཚེས་ ༥ ཉིན་ཨ་རིའི་གསང་བའི་ལས་ཁུངས་ཀྱི་གློག་ཀླད་ཆེད་མཁས་པ་དང་ཨ་རིའི་བདེ་སྲུང་ལས་ཁུངས་ཀྱི་ཆོད་གན་ལས་བྱེད་སི་ནོལ་ཌིན་ ( Edward Snowden ) གྱིས་ཨ་རིའི་བདེ་སྲུང་ལས་ཁུངས་ཀྱི་འཇའ་ཤེལ་ ( Prism) ཞེས་པའི་ལས་འཆར་འོག རྒྱལ་སྤྱིའི་གནད་ཡོད་མི་སྣ་ཨན་གྷེ་ལ་མེར་གྷལ་གཙོས་མགོ་ཁྲིད་ཁག་དང་། མི་མང་གི་ཁ་པར་དང་དྲ་རྒྱའི་ཡིག་ཚགས་སོགས་ལ་ལྐོག་ཉན་ལྐོག་ལྟ་བྱེད་ཀྱི་ཡོད་པ་ཕྱིར་བསྒྲགས་དང་། ད་ལོ་འཇར་མན་གསང་བའི་ལས་ཁུངས་ཀྱིས་ཨ་རིའི་གཞུང་གིས་ལྕམ་ཨན་གྷེ་ལ་མེར་གྷལ་མཆོག་གི་ཁ་པར་ལྐོག་ཉན་རྒྱག་གི་ཡོད་པ་ཤེས་རྟོགས་བྱུང་ཡོད་འདུག
དེ་བཞིན་ཟླ་འདིའི་བདུན་ཕྲག་སྔོན་མའི་ནང་འཇར་མན་ཉེན་རྟོག་གིས་ཨ་རིའི་གསང་བའི་ལས་ཁུངས་འོག་ལས་ཀ་བྱེད་བཞིན་ཡོད་པའི་འཇར་མན་གྱི་གསང་བའི་ལས་བྱེད་ཟུར་བ་ཞིག་དང་། ཚེས་ ༩ ཉིན་འཇར་མན་བདེ་སྲུང་ལྷན་ཁང་གི་རྒྱལ་སྤྱིའི་རྒྱལ་སྲུང་སྲིད་ཇུས་ཚན་ཁག་ནང་ལས་ཀ་བྱེད་མཁན་ཞིག་གིས་ཨ་རིའི་སོ་ཉུལ་བྱས་ཏེ། འཇར་མན་གྱི་གསང་བ་མང་པོ་ཞིག་ཨ་རིར་ཕྱིར་ཚོང་བྱས་པ་བཅས་ཀྱི་གནས་ཚུལ་ཐོན་ཡོད་སྟབས། རྒྱལ་ཁབ་གཉིས་ཀྱི་འབྲེལ་ལམ་ཇེ་སྡུག་ཏུ་ཕྱིན་ཡོད་འདུག
འཇར་མན་ཕྱི་སྲིད་བློན་ཆེན་ (Frank-Walter Steinmeier ) ལགས་ཀྱིས། ”ང་ཚོས་ཨ་རི་དང་མཉམ་དུ་སྦ་གསང་མེད་པའི་ཐོག་རྒྱལ་སྤྱིའི་རྒྱལ་ནང་གི་གནས་ཚུལ་གང་ཡིན་ཡང་གྲོས་མོལ་བྱེད་བཞིན་ཡོད་སྟབས། ཨ་རིས་སོ་ལྟ་བྱེད་དགོས་དོན་མེད།” ཅེས་དང་། ནང་སྲིད་བློན་ཆེན་ཐཱོ་མཱ་སེ་ (Thomas de Maiziere) ལགས་ཀྱིས། ཨ་རིས་རྒྱལ་སྤྱིའི་ཐོག་དྲ་རྒྱའི་བདེ་འཇགས་དགོས་སྐོར་མང་པོ་ཞིག་རྗོད་ཀྱི་ཡོད་ཀྱང་། དོན་དངོས་ཐོག་དྲ་རྒྱའི་ནང་ལྐོག་འཛུལ་བྱེད་མཁན་ནི་ཨ་རི་ཆགས་འདུག་ཅེས་བརྗོད་འདུག
ཨ་རིའི་འཇར་མན་གཞུང་ཚབ་ཆེན་མོ་བ་ཟུར་པ་ཇོན་ (John Kornblum) ལགས་ཀྱིས། ” འཇར་མན་གྱིས་ཨ་རིར་ང་ཚོས་ཁྱེད་ཚོ་དང་མཉམ་དུ་མཉམ་ལས་བྱེད་འདོད་ཡོད་ཀྱང་། ད་ཆ་ཁྱེད་ཚོས་འབྲེལ་ལམ་དེ་གཏོར་བཤིག་བཏང་སོང་ཞེས་རྗོད་ཀྱི་ཡོད་པར་ཡིད་ཆེས་བྱེད་བཞིན་ཡོད།” ཅེས་དང་། དེ་བཞིན་མིང་སྨྲོས་མེད་པའི་ཨ་རིའི་གཞུང་ཞབས་ཤིག་གིས། འཇར་མན་གཞུང་གིས་འཇར་མན་དང་མཐུན་གྲོགས་རྒྱལ་ཁབ་བར་གྱི་འབྲེལ་ལམ་སྡུག་ཏུ་ཕྱིན་ཚེ། འཇར་མན་ནང་ཡོད་པའི་རྒྱལ་ཁབ་དེའི་གསང་བའི་ལས་བྱེད་དང་འབྲེལ་ཡོད་ལས་བྱེད་ཁག་ཕྱིར་འཕུད་གཏོང་གི་ཡོད། དེ་ནི་ངས་འཛམ་གླིང་གྲང་དམག་མཇུག་རྫོགས་རྗེས་མཐོང་བ་ཐེངས་དང་པོ་ཡིན་ཞེས་སོགས་ཕན་ཚུན་ལབ་གླེང་བྱས་ཡོད་འདུག
ཆབ་སྲིད་དབྱེ་ཞིབ་པ་ཚོས། འཇར་མན་གཞུང་གིས་ཉེ་ལམ་ཨ་རིའི་གསང་བའི་ལས་ཁུངས་ཀྱིས་འཇར་མན་གྱི་གསང་བ་མང་པོ་རྐུ་འཁྱེར་བྱས་ཡོད་པ་ཤེས་རྟོགས་བྱུང་ཡོད་སྟབས། མ་འོངས་པར་རྒྱལ་ཁབ་གཉིས་བར་གྱི་འབྲེལ་ལམ་ཇེ་སྡུག་ཏུ་འགྲོ་རྒྱུ་ཡིན་པ་མ་ཟད། ཡུ་རོབ་མཐུན་ཚོགས་དང་ཨ་རི་བར་གྱི་ཚོང་དོན་གྲོས་མཐུན་ (Transatlantic Trade and Investment Partnership) ཞེས་པར་དོ་ཕོག་འགྲོ་རྒྱུ་ཡིན་སྐོར་བརྗོད་འདུག
༢༠༡༣ དང་ ༢༠༡༤ ལོ་གཉིས་ནང་འཇར་མན་གཞུང་གིས་རྒྱལ་ཁབ་ཀྱི་གསང་བ་རྐུ་འཁྱེར་བྱས་པའི་དོགས་གཞིའི་འོག་འཇར་མན་ནང་ཡོད་པའི་སི་རི་ཡ་དང་པ་ཀི་སི་ཐན་གྱི་ཕྱི་འབྲེལ་མི་སྣ་གཉིས་ཕྱིར་སློག་བྱས་ཡོད་འདུག
གསར་འགོད་པ། དོན་གྲུབ།
