རྩོམ་རིག་གིས་སྤྱི་ཚོཊ་ལ་ཤུགས་རྐྱེན་སྤྲོད་མི་ཐུབ་དོན་ཅི་ཡིན།

དེ་རིང་སྔ་དྲོར་གངས་སྐྱིད་དཔེ་མཛོད་ཚོགས་ཁང་དུ་རྒན་བེ་རི་འཇིགས་མེད་དབང་རྒྱལ་ལགས་ཀྱི་རྩོམ་རིག་ལ་འཇུག་ཚུལ་སྐོར་གྱི་དཔེ་དེབ་གཉིས་དབུ་འབྱེད་གནང་སོང་།

དེ་རིང་སྔ་དྲོ་ཆུ་ཚོད་ ༡༠ ཐོག གངས་སྐྱིད་དཔེ་མཛོད་ཚོགས་ཁང་དུ་སྤྱི་ཟུར་རྩོམ་པ་པོ་བེ་རི་འཇིགས་མེད་དབང་རྒྱལ་ལགས་ ཀྱི་རྩོམ་རིག་དེབ་གསར་༼བོད་ཀྱི་རྩོམ་ཡིག་འཇུག་སྒོ༽དང་༼བོད་ཀྱི་རྩོམ་རིག་སྤྱི་བཤད༽ཅེས་པ་གཉིས་དབུ་འབྱེད་གནང་སོང་། དབུ་འབྱེད་མཛད་སྒོའི་ཐོག་བོད་མི་མང་སྤྱི་འཐུས་ཚོགས་གཞོན་མཁན་པོ་བསོད་ནམས་བསྟན་འཕེལ་མཆོག་གི་གཙོས་སྤྱི་འཐུས་ཁག་ཅིག་དང་། དེ་བཞིན་ཨ་མྱེ་རྨ་ཆེན་རིག་གཞུང་ཞིབ་འཇུག་ཁང་གི་འགན་འཛིན་བཀྲ་ཤིས་ཚེ་རིང་ལགས་སོགས་མཁས་པ་དང་རྩོམ་པ་པོ་སོགས་མི་ ༢༠ ཙམ་འདུ་འཛོམས་བྱུང་འདུག

བེ་རི་འཇིགས་མེད་དབང་རྒྱལ་ལགས་ཀྱིས་རྩོམ་རིག་དེབ་གསར་གཉིས་ཀྱི་དགོས་དམིགས་སོགས་གསུང་སྐབས། ལོ་རྒྱུས་ཁྲོད་སྒྱུ་རྩལ་རྩོམ་རིག་གི་ཐོག་ནས་མིའི་སེམས་ཁམས་ཁ་ལོ་བསྒྱུར་ཐུབ་པ་དང་། རྒྱལ་ཁབ་ཁ་ལོ་བསྒྱུར་ཐུབ་པ། སྤྱི་ཚོགས་ཁ་ལོ་བསྒྱུར་ཐུབ་པའི་ནུས་པ་མང་པོ་བྱུང་གི་ཡོད་པ་དང་། ནུས་པ་དེའི་རྒྱུན་མུ་མཐུད་ནས་ཡོང་དང་ཡོང་བཞིན་པ་རེད། སྤྱི་ཚོགས་ལ་ཞབས་ཞུའི་ནུས་པ་ཆེན་པོ་འདོན་ཐུབ་པའི་ཆ་རྐྱེན་ཡག་ཤོས་དེ་རྩོམ་རིག་ལ་ཡོད་པ་འགྲེལ་བཤད་རྒྱག་ཐུབ་པ་ཞིག་རེད། ཡིན་ནའང་། བོད་པའི་སྤྱི་ཚོགས་དང་ལྷག་པར་དུ་བཙན་བྱོལ་ནང་རྩོམ་རིག་གི་ཐོག་ནས་དེབ་འབྲི་མཁན་ཡོད་པ་ཙམ་མ་གཏོགས། དེབ་དེ་བཀླགས་ནས་སྤྱི་ཚོགས་ནང་ཤུགས་རྐྱེན་ཐེབས་ཏེ་ཡར་རྒྱས་དང་བསམ་བློའི་ཁ་ཕྱོགས་བསྒྱུར་བ་ཞེ་དྲག་མེད་པའི་ཟོལ་འདྲ་ཞིག་ཚོར་གྱི་ཡོད། གལ་སྲིད་དེ་འདྲ་ཞིག་ཡོད་པར་ཆ་བཞག་ནའང་། ཚིག་ཁ་ཤས་ཤིག་གི་རྒྱབ་ལོགས་སུ་དོགས་འདྲོག་ཆེན་པོ་བྱས་ཏེ་ཟིང་ཆ་བསླངས་སོང་བ་ཞིག་མ་གཏོགས། རྩོམ་རིག་གི་ཡང་དག་པའི་ལམ་ལ་ཐོན་འགྲོ་བའི་ལོ་རྒྱུས་དང་བརྒྱུད་རིམ་མ་རག་པ་འདྲ་བོ་ཞིག་ཚོར་གྱི་ཡོད། རྩོམ་རིག་གི་ཐོག་ནས་མིའི་བསམ་བློའི་ཁ་ཕྱོགས་བསྒྱུར་ཐུབ་པ་དང་སྤྱི་ཚོགས་ཀྱི་ཁ་ལོ་བསྒྱུར་ཐུབ་པ། རྩོམ་རིག་གི་ནུས་པར་བརྟེན་ནས་སྤྱི་ཚོགས་འཕེལ་ཕྱོགས་ཐོག་ཕན་ནུས་ཐོན་དགོས་ཀྱི་ཡོད་ན། ཐོག་མར་རྩོམ་རིག་གི་ཐོག་ལ་བག་ཆགས་ངེས་ཅན་ཞིག་དགོས་ཀྱི་འདུག བག་ཆགས་དེ་སོ་སོར་མེད་པ་ཡིན་ནའང་རྩོམ་རིག་ཐོག་བག་ཆགས་ཡོད་མཁན་ཚོའི་རྩོམ་རིག་ལ་ནུས་པ་དང་ཕན་ཐོགས། དགེ་མཚན་ཞིག་ཡོད་པ་རེད་བསམ་པའི་ཚོར་སྣང་བསླེབ་ཐུབ་པ་ཞིག་གཏན་གཏན་དགོས་ཀྱི་འདུག དེ་འདྲ་ཞིག་དགོས་ན་རྩོམ་བྲིས་པ་ཙམ་གྱིས་མི་ཕན་པར་རྩོམ་རིག་གི་རྒྱབ་ལྗོངས་ དང་ལོ་རྒྱུས། ཕན་ཡོན། ནུས་པ་སོགས་ངོ་སྤྲོད་བྱེད་དགོས་པ་གལ་ཆེན་པོ་ཞེ་དྲག་རེད། ཅེས་དང་། ཁོང་གིས་ད་ལྟའི་བར་དེབ་ ༢༢ བྲིས་ཡོད་ཀྱང་། སྒེར་ངོས་ནས་དེབ་དབུ་འབྱེད་བྱས་པ་ཐོག་མ་ཡིན་ལ།  དེབ་དབུ་འབྱེད་ཀྱི་མཛད་སྒོ་བསྡུས་པ་ཡིན་ན། མི་མང་པོ་ཞིག་གི་དོ་སྣང་བསླེབ་པར་ཕན་ཐོགས་དང་ཁྱད་པར་ཞིག་ཡོང་གི་རེད་བསམ་པ་མ་གཏོགས། དེབ་གཉིས་བྲིས་པ་དེས་སྤྱི་ཚོགས་ཁ་ལོ་བསྒྱུར་ཐུབ་པ་དང་རྒྱལ་ཁབ་བསྐྱར་གསོ་བྱེད་ཐུབ་པ་ལྟ་བུའི་བསམ་བློ་དང་རེ་བ་ཆེན་པོ་གང་ཡང་མེད་སྐོར་སོགས་གསུངས་སོང་།

ཡང་མ་འོངས་པར་རྩོམ་རིག་གི་ཕྱོགས་ལ་གོམ་པ་གཉིས་པ་དང་གསུམ་པ་སྤོ་འཆར་ཡོད་པའི་སྐོར་ལ་ཁོང་གིས། €œདེབ་འདི་གཉིས་ཀྱི་ནང་དེ་སྔོན་བགྲོ་གླེང་དང་ཟབ་སྦྱོང་སོགས་སུ་སོང་སྟེ་བྲིས་བའི་རྩོམ་ཡིག་རྣམས་ཕྱོགས་བསྡུས་བྱས་ནས་དཔར་བསྐྲུན་བྱས་པ་མ་གཏོགས། རྩོམ་རིག་གི་དེབ་ཅིག་འདོན་པའི་ཆེད་དུ་གསར་དུ་བརྩམས་པ་གང་ཡང་མ་རེད། མ་འོངས་པར་གོམ་པ་གཉིས་པ་གསུམ་པ་སྤོས་ཏེ་རྩོམ་རིག་གི་བྱུང་རིམ་ལོ་རྒྱུས་དང་ལྟ་གྲུབ། ཕན་ནུས། དེ་བཞིན་ལག་ལེན་སོགས་ཀྱི་ཐོག་ལ་མུ་མཐུད་དེབ་བཟོ་ཐུབ་པའི་རེ་བ་བྱེད་བཞིན་ཡོད་ལ། དེའང་གོ་སྐབས་དང་ཆ་རྐྱེན་ཡག་པོ་ཞིག་གི་ཐོག་ནས་རེ་བ་བྱེད་ཀྱི་ཡོད། €ཅེས་གསུངས་སོང་།

དེའི་རྗེས་སྐུ་མགྲོན་གཙོ་བོ་སྤྱི་འཐུས་ཚོགས་གཞོན་མཆོག་གིས། བེ་རི་འཇིགས་མེད་དབང་རྒྱལ་ལགས་ལྟ་བུ་ཡིན་ན། གཞུང་ལུགས་འཆད་ཁྲིད་གནང་སྟེ་སློབ་མ་སྐྱེད་སྲིང་བྱེད་ཐུབ་ཀྱི་ཡོད་ཅིང་། ཁོང་ལྟ་བུ་ང་ཚོའི་སྤྱི་ཚོགས་ནང་གྲངས་ཀ་བརྩི་དགོས་ན་ཉུང་ཉུང་ཆགས་ཡོད་པ་དང་། གཞུང་ལུགས་ཆ་ཚང་བ་ཞིག་འཆད་ཁྲིད་བྱེད་ཐུབ་པའི་རྒྱུན་དེ་གལ་ཆེན་ཏུ་རྩིས་ནས་སློབ་མ་སྐྱེད་སྲིང་བྱེད་རྒྱུ་ཧ་ཅང་གལ་ཆེན་ཆགས་ཡོད། བོད་པའི་སྤྱི་ཡོངས་ཀྱི་གཞུང་ལུགས་སྣང་མེད་དུ་བཞག་པ་ཡིན་ན། ནམ་ཞིག་གཞུང་ལུགས་ཆ་ཚང་ཞིག་འཆད་ཁྲིད་བྱེད་ཐུབ་མཁན་གྱི་གང་ཟག་ཅིག་འཚོལ་དགོས་ ནའང་མི་རྙེད་པའི་ཉེན་ཁ་ཡོད་སྟབས། དེ་རིགས་ལ་ཚང་མས་དོ་སྣང་བྱེད་གལ་ཆེ་བ་དང་། ལྷག་པར་དུ་བེ་རི་འཇིགས་མེད་དབང་རྒྱལ་ལགས་ཀྱིས་ཝཱ་ཎཱ་མཐོ་སློབ་དང་འབྲས་སྤུངས་སོགས་སུ་རིག་གཞུང་འཆད་ཁྲིད་གནང་དང་གནང་བཞིན་པ་དེ་བོད་བསྟན་པ་ཆབ་སྲིད་དང་། བྱེ་བྲག་བོད་ཀྱི་རིག་གཞུང་ཉམས་པ་སླར་གསོ་ཡོང་བར་ནུས་པ་ཆེན་པོ་ཐོན་ངེས་པས། མུ་མཐུད་སེམས་ཤུགས་མ་ཆག་པའི་ཐོག་ནས་བོད་པའི་རིག་གཞུང་ལ་ཞབས་འདེགས་ཆེན་པོ་ཞུ་ཐུབ་པའི་རེ་བ་དང་སྨོན་ལམ་རྒྱག་གིན་ཡོད་སྐོར་སོགས་གསུངས་སོང་།

རྩོམ་རིག་དེབ་གསར་གཉིས་ཀྱི་སྔོན་གླེང་གི་མཇུག་ཏུ། རང་གི་རིགས་ལ་ཞེན་པ་དཀར་ཞིང་། རང་གི་སྐད་ཡིག་ལ་དམ་འཛིན་གནང་མཁན་དང་། ལྷག་དོན་བོད་ཀྱི་རྩོམ་རིག་ལ་དོ་སྣང་གནང་མཁན་ཞིག་ཡིན་ཕྱིན་དེབ་ཆུང་འདི་ཚོ་ལ་ངེས་པར་དུ་ཞིབ་གཟིགས་གནང་རོགས། འཛམ་གླིང་ཤར་ནུབ་ཀྱི་རྩོམ་རིག་རིགས་པའི་གཞུང་ལུགས་ནི། ཧ་ཅང་གཞི་རྒྱ་ཆེ་ལ་གཏིང་ཟབ་ལྡན་པའི་རང་བཞིན་ཅན་ཞིག་ཡིན་པ་ལྟར། རང་རེ་བོད་ཀྱི་རྩོམ་རིག་ཀྱང་ལོ་རྒྱུས་ཀྱི་རང་བཞིན་ལྡན་ལ། སྒྱུ་རྩལ་གྱི་ཁྱད་ཆོས་འབུར་བ། རྣམ་གྲངས་ཀྱི་སྤུ་རིས་བཀྲ་བ། མཛེས་རྟོག་གི་ཚོར་འདུ་སླ་བའི་ཁྱད་པར་དུ་མའི་རང་བཞིན་ལྡན་པས། ཞིབ་ཚའི་བཤད་པ་ནི་མི་རིགས་འདིར་བཀའ་དྲིན་བླ་ལྷག་ཏུ་ཆེ་བའི་རྒྱ་གར་དབུས་གཞུང་གིས་མཐུན་འགྱུར་ཆ་ཚང་གནང་བའི་འོག ད་ལྟ་འབྲི་བཞིན་པའི་༼བོད་ཀྱི་རྩོམ་ཡིག་ལོ་རྒྱུས༽ཞེས་པར་གང་ཤེས་ཀྱིས་གསལ་བར་འགོད་འཆར་ལགས་ཤིང་། འདི་ནི་དེ་དག་གི་ཁ་ཕྱོགས་མཛུབ་མོ་རི་སྟོན་ཙམ་ཡིན་པ་ཡང་མཁྱེན་དགོས། ཞེས་བྲིས་འདུག

གསར་འགོད་པ། པདྨ་མཚོ།