ཁ་སང་བལ་ཡུལ་གཞུང་གིས་ཞྭ་དམར་རིན་པོ་ཆེ་མཆོག་གི་སྐུ་ཕུང་བལ་ཡུལ་ནང་གདན་འདྲེན་ཞུ་ཆོག་པའི་ཆོག་མཆན་ཕྱིར་བསྡུ་བྱས་ཡོད་འདུག
ཉེ་ལམ་རྒྱ་གར་རྒྱལ་ས་ལྡི་ལིའི་བལ་ཡུལ་གཞུང་ཚབ་ཁང་གིས་རྒྱལ་བ་ཞྭ་དམར་སྐུ་ཕྲེང་ ༡༤ མི་ཕམ་ཆོས་ཀྱི་བློ་གྲོས་རིན་པོ་ཆེ་མཆོག་གི་སྐུ་ཕུང་རྒྱ་གར་ཀ་ལོན་སྤུག་ཌིཝཱཀར་ (Shri Diwakar) དགོན་པ་ནས་ཕྱིར་བལ་ཡུལ་གྱི་མ་དགོན་ཤར་མི་ནུབ་དགོན་ཆེན་དུ་སྐུ་ཕུང་ཞུགས་འབུལ་ཆེད་གདན་ཞུའི་ཆོག་མཆན་སྤྲད་ཡོད་ཀྱང་། ཁ་སང་བལ་ཡུལ་གཞུང་གིས་རིན་པོ་ཆེ་མཆོག་གི་སྐུ་ཕུང་རྒྱ་གར་ནས་བལ་ཡུལ་ནང་གདན་འདྲེན་ཞུ་ཆོག་པའི་ཆོག་མཆན་ཕྱིར་བསྡུ་བྱས་ཡོད་འདུག གནས་ཚུལ་དེའི་ཐད་གསར་འགྱུར་བརྒྱུད་ལམ་ཁག་ཏུ་བལ་གཞུང་གིས་ཞྭ་དམར་པའི་སྐུ་ཕུང་བལ་ནང་ནང་གདན་ཞུའི་ཆོག་མཆན་ཕྱིར་འཐེན་བྱས་པ་དེ་ནི་རྒྱ་ནག་གཞུང་གི་གནོན་ཤུགས་ཡིན་སྐོར་བརྗོད་འདུག
འདིའི་ཐད་བལ་གཞུང་ནང་སྲིད་ལྷན་ཁང་གི་མགྲིན་ཚབ་པ་དྷ་ཁཱལ་ (Laxmi Prasad Dhakal) ལགས་ཀྱིས། ཉེ་ལམ་བལ་ཡུལ་གཞུང་གིས་ཞྭ་དམར་རིན་པོ་ཆེ་མཆོག་གི་སྐུ་ཕུང་རྒྱ་གར་ནས་བལ་ཡུལ་གྱི་མ་དགོན་ནང་གདན་འདྲེན་ཞུས་ཏེ་ཞུགས་འབུལ་ཆོག་མཆན་སྤྲད་ཡོད་ཀྱང་། ང་ཚོས་ཞིབ་འཇུག་བྱས་པ་བརྒྱུད་རིན་པོ་ཆེ་མཆོག་འབྲུག་རྒྱལ་ཁབ་ཀྱི་མི་སེར་ཡིན་པ་ཤེས་རྟོགས་བྱུང་འཕྲལ་ཆོག་མཆན་དེ་ཕྱིར་བསྡུ་བྱེད་དགོས་བྱུང་སོང་། ཞེས་དང་། བལ་གཞུང་ནང་སྲིད་དྲུང་ཆེ་སུར་ཡཱ་ (Surya Silwal) ལགས་ཀྱིས། བལ་ཡུལ་གྱི་ཁྲིམས་ལུགས་ནང་ཕྱི་རྒྱལ་གྱི་མིའི་ཕུང་བོ་བལ་ཡུལ་ནང་འཁྱེར་ཡོང་ནས་མེར་བསྲེགས་སོགས་ཀྱི་བྱེད་སྒོ་སྤེལ་བའི་ཆ་རྐྱེན་མེད་སྟབས། ཐེངས་འདིར་ང་ཚོས་ཆོག་མཆན་དེ་ཕྱིར་འཐེན་བྱེད་དགོས་བྱུང་བ་རེད། ཅེས་སོགས་བརྗོད་འདུག
ཞྭ་དམར་རིན་པོ་ཆེ་མཆོག་གི་དྲ་ཚིགས་སྟེང་། རྒྱུ་རྐྱེན་མང་པོ་ཞིག་གི་དབང་གིས་ང་ཚོས་ཟླ་འདིའི་ཚེས་ ༡༣ ཉིན་རིན་པོ་ཆེ་མཆོག་གི་སྐུ་ཕུང་བལ་ཡུལ་ནང་གདན་འདྲེན་བྱེད་ཐུབ་མ་སོང་། ཞེས་འཁོད་འདུག
བལ་ཡུལ་གྱི་ཉིན་རེའི་དབྱིན་ཡིག་གསར་འགྱུར་ (English daily) ཞེས་པའི་དྲ་ཚིགས་སྟེང་། བལ་ཡུལ་རྒྱ་ནག་གཞུང་ཚབ་ཀྱི་གནོན་ཤུགས་འོག་བལ་གཞུང་གིས་ཞྭ་དམར་རིན་པོ་ཆེའི་སྐུ་ཕུང་བལ་ཡུལ་ནང་གདན་འདྲེན་ཞུ་རྒྱུ་བཀག་འགོག་བྱས་པ་ཞིག་ཡིན་པ་དང་། བལ་གཞུང་གིས་རྒྱ་ནག་གཅིག་གི་སྲིད་ཇུས་རྒྱུན་འཁྱོངས་བྱས་ཏེ་བལ་ཡུལ་ནང་རྒྱ་ནག་ལ་ངོ་རྒོལ་ལས་འགུལ་སྤེལ་མི་ཆོག་པ་བཟོས་པ་མ་ཟད། བལ་ཡུལ་ནང་གཏན་སྡོད་བྱེད་མཁན་སྐྱབས་བཅོལ་བོད་མི་ཚོར་དམ་དྲག་རྡུང་རྡེག་གཏོང་གི་ཡོད། ཅེས་སོགས་འཁོད་འདུག
ཀ་ཐ་མན་གྲུའི་ཆ་འཕྲིན་ (Kathmandu Post) ཞེས་པའི་སྟེང་། རྒྱ་གར་རྒྱལ་ས་ལྡི་ལིའི་བལ་ཡུལ་གཞུང་ཚབ་ཀྱིས་ཞྭ་དམར་རིན་པོ་མཆོག་གི་སྐུ་ཕུང་བལ་ཡུལ་ནང་གདན་འདྲེན་གྱིས་ཞུགས་འབུལ་བྱེད་ཆོག་པའི་ཆོག་མཆན་སྤྲད་ཡོད་ཀྱང་། ཁ་སང་སླར་ཡང་ཆོག་མཆན་དེ་ཕྱིར་བསྡུ་བྱས་པ་ནི་རྒྱ་གཞུང་གི་གནོན་ཤུགས་ལ་མགོ་སྒུར་བ་ཡིན་སྐོར་འཁོད་འདུག
འབྲུག་གི་སྲིད་བློན་ཚེ་རིང་སྟོབས་རྒྱལ་མཆོག་གིས་ཁ་སང་བལ་ཡུལ་གཞུང་ལ་རིན་པོ་ཆེ་མཆོག་གི་སྐུ་ཕུང་རྒྱ་གར་ནས་བལ་ཡུལ་ནང་གདན་འདྲེན་ཞུ་ཆོག་པའི་ཆོག་མཆན་སྤྲོད་དགོས་སྐོར་འབོད་སྐུལ་ཞུས་ཡོད་ཀྱང་བལ་ཡུལ་གཞུང་གིས་ངོས་ལེན་བྱས་མི་འདུག
བལ་ཡུལ་ནང་བཞུགས་མཁན་སེ་ནམ་མཁའ་རྡོར་རྗེ་རིན་པོ་ཆེ་མཆོག་གིས། རྒྱ་ནག་གཞུང་གིས་ཞྭ་དམར་རིན་པོ་ཆེའི་སྐུ་ཕུང་བལ་ཡུལ་ནང་གདན་འདྲེན་ཞུ་མཁན་གྲས་སུ་༧གོང་ཏཱ་ལའི་བླ་མ་མཆོག་གི་སྐུ་ཚབ་ཡོད་ཚུལ་བརྗོད་དེ་སྐུ་ཕུང་བལ་ཡུལ་ནང་གདན་འདྲེན་ཞུ་བཅུག་མེད་པའི་ཡིད་ཆེས་བྱེད་ཀྱི་ཡོད། བལ་ཡུལ་གཞུང་གིས་འདས་གྲོངས་སུ་ཕྱིན་པའི་སྐྱེས་བུ་དམ་པ་ཞིག་གི་སྐུ་ཕུང་གདན་འདྲེན་ཞུ་བཅུག་མེད་པ་དེ་ནི་ཐབས་སྡུག་གི་གནས་ཚུལ་ཞིག་རེད། ཅེས་སྐྱོན་བརྗོད་བྱས་འདུག
ཞྭ་དམར་རིན་པོ་ཆེ་མཆོག་ནི་ ༡༩༥༢ ལོར་ཁམས་སྡེ་དགེ་རུ་འཁྲུངས་ཤིང་། རྒྱལ་བ་ཀརྨ་པ་སྐུ་ཕྲེང་སྔོན་མས་ཞྭ་དམར་རིན་པོ་ཆེའི་ཡང་སྲིད་དུ་ངོས་འཛིན་གནང་ཞིང་། ཞྭ་དམར་རིན་པོ་ཆེ་མཆོག་རྒྱ་གར་ནང་ཕེབས་རྗེས། རྒྱལ་བ་ཀརྨ་སྐུ་ཕྲེང་སྔོན་མ་དགོངས་པ་མ་རྫོགས་བར་ཁོང་གི་སྐུ་རྗེས་སུ་འབྲང་ནས་བསླབ་པ་སློབ་གཉེར་གནང་། ༡༩༨༡ ལོའི་ཟླ་ ༡༡ པར་རྒྱལ་བ་ཀརྨ་པ་མཆོག་ཨ་རིར་དགོངས་པ་རྫོགས་རྗེས་ཁོང་གི་མཛད་འཕྲིན་ཁག་འཕྲོ་སྐྱོང་གནང་སྟེ་འབྲས་ལྗོངས་ཀྱི་རྒྱལ་ས་སྒང་ཏོག་ཏུ་ཡོད་པའི་རུམ་བཏེགས་དགོན་པའི་འཛུགས་སྐྲུན་དང་བསྟན་པའི་གསུང་རབ་བསྟན་འགྱུར་རིན་པོ་ཆེ་དཔར་སྐྲུན་སོགས་གནང་ཡོད་འདུག ༢༠༡༤ ལོའི་ཟླ་ ༦ ཚེས་ ༡༡ ཉིན་གྱི་སྔ་དྲོར་ཞྭ་དམར་རིན་པོ་ཆེ་མཆོག་གློ་བུར་དུ་མགུལ་སྙིང་གི་ཁྲག་རྩ་འགག་པའི་སྙུང་གཞིའི་འོག་འཇར་མན་དུ་དགོངས་པ་རྫོགས་ཡོད་པ་དང་། ཚེས་ ༢༢ ཉིན་འཇར་མན་ནས་རྒྱ་གར་ནུབ་བྷང་གྷལ་ཀ་ལོན་སྤུག་ནང་ཡོད་པའི་ཁོང་གི་དགོན་པ་ཌིཝཱཀར་ཞེས་པར་སྐུ་ཕུང་གདན་འདྲེན་ཞུས་ཡོད་འདུག
གནད་དོན་དབྱེ་ཞིབ་པ་ཚོས། ཞྭ་དམར་རིན་པོ་ཆེ་མཆོག་གིས་ཆོས་ཕྱོགས་ཀྱི་མཛད་འཕྲིན་བསྐྱངས་པ་ལས་བོད་ཀྱི་ཆབ་སྲིད་དང་འབྲེལ་བའི་གནད་དོན་ལ་ཐེ་ཇུས་གནང་མྱོང་མེད་ཀྱང་། བལ་ཡུལ་གཞུང་གིས་ཆབ་སྲིད་ཀྱི་ངོ་བོར་བསྒྱུར་ཏེ་ཁོང་གི་སྐུ་ཕུང་གདན་འདྲེན་ཞུ་བཅུག་མེད་པ་དེ་ནི། འགྲོ་བ་མི་རིགས་དང་དམངས་གཙོའི་རྒྱལ་ཁབ་ཀྱི་མཚན་ཤས་ཤིག་ཡིན་སྐོར་སོགས་ཀྱི་སྐྱོན་བརྗོད་བྱས་འདུག
གསར་འགོད་པ། དོན་གྲུབ།
ངས་ཁོང་ལ་གུས་འདུད་ཞུ། ཡིན་ཡང་རྒྱ་དམར་དང་ འབྲུག་ རྒྱ་གར་སོགས་ཀྱིས་ཆབ་སྲིད་ལག་ཆར་བེད་སྤྱོད་གནང་ནས་ཁོང་གི་མཛད་འཕྲིན་བོད་རིགས་མང་ཚོགས་ནང་སྤེལ་ཐུབ་མེད། དེར་བརྟེན་ཆབ་སྲིད་ལ་ཐབས་མཁས་དང་ བསྟུན་མཁས་གནང་ཡང་མདོ་དོན་ནི་ཁོང་ཚོས་འདི་འདྲ་བྱེད་པ་ལས་རིག། བྱ་བ་འདིས་རྒྱ་དམར་ལ་ཧམ་པ་དང་ གཡོ་རྒྱུ་མི་རབས་ནས་མི་རབས་ཡོད་པ་མཁྱེན་དགོས། གསར་བསྒྱུར་འདི་ཡང་ལམ་གཞན་དུ་དོན་ནས་བདུན་གཅིག་སོང་ཟིན་པ་རེད།།།།།
བོད་མིའི་བོད་པའི་སྐྱིད་སྡུག་གླེང་ན་ཆབ་སྲིད་ཡིན་འདུག་
༈ཞྭ་དམར་རིན་པོ་ཆེ་ཡི་བོད་པའི་སྐྱིད་སྡུག་ལ་སེམས་འཁུར་དང་གླིང་སློངས་བྱེད་མ་མྱོང་ཀྱང་སྐུ་ཕུང་ཁོ་རང་གི་དགོན་པའི་ནང་ཁྱེར་མ་བཅུག་ན་
རིན་པོ་ཆེ་མཆོག་གི་སྐུ་ཕུང་མ་དགོན་དུ་གདན་ཞུ་གནང་མ་ཐུབ་པར་སེམས་ཕམ་ཡོད། འདིའི་རྒྱུ་རྐྱེན་གཙོ་བོ་ནི་གོང་དུ་ Laxmi Prasad Dhakal དང་ Surya Silwal གཉིས་ནས་བཤད་པ་ལྟར་རེད་དྲན། དེ་མིན་རྒྱ་ནག་གི་ངན་ཇུས་ཡིན་པ་ཞིག་མི་དྲན། རྒྱུ་མཚན་ནི། རིན་པོ་ཆེ་མཆོག་སྐུ་འཚོ་བཞུགས་སྐབས་ཆོས་ཕྱོགས་ཀྱི་ཕྱག་ལས་མ་གཏོགས་སྲིད་ལ་ཕྱག་འཆང་བ་ཞིག་རྩ་བ་གཉིས་ནས་མཐོང་ཐོས་མ་བྱུང་། བསམ་ཚུལ་ཡིན།