ཁ་སང་ཕྱི་དྲོར་རྒྱ་གར་གྱི་སྲིད་བློན་ནཱ་རེན་ཌ་མུ་དྷེ་དང་ཨུ་རུ་སུའི་སྲིད་འཛིན་པུ་ཌིན་རྣམ་གཉིས་ཐུག་འཕྲད་བྱས་ཏེ་རྒྱལ་ཁབ་གཉིས་བར་གྱི་ཚོང་དོན་དང་དམག་དོན་སོགས་ལ་གྲོས་མོལ་བྱས་འདུག
ཟླ་འདིའི་ཚེས་ ༡༥ ཉིན་ནས་བཟུང་ཉིན་གསུམ་རིང་བྷར་ཛལ་གྲོང་ཁྱེར་ཧྥོར་ཌ་ལེ་ཛ་ (Fortaleza) ནང་དཔལ་འབྱོར་ཡར་རྒྱས་འགྲོ་བཞིན་པའི་རྒྱལ་ཁབ་ལྔ་སྟེ་བྷར་ཛལ་དང་རྒྱ་གར། ཨུ་རུ་སུ། རྒྱ་ནག ལྷོ་ཨ་ཧྥི་རི་ཀ་བཅས་ཀྱི་དབུ་ཁྲིད་བར་ཚོགས་འདུ་ (6th BRICS summit)ཞེས་པ་ཐེངས་ ༦ པ་དེ་འཚོགས་བཞིན་ཡོད་ཅིང་། ཁ་སང་ཕྱི་དྲོར་རྒྱ་གར་གྱི་སྲིད་བློན་ནཱ་རེན་ཌ་མུ་དྷེ་དང་ཨུ་རུ་སུའི་སྲིད་འཛིན་པུ་ཌིན་ (Vladimir Putin)རྣམ་གཉིས་དུས་ཡུན་སྐར་མ་ ༤༠ ཙམ་རིང་ཐུག་འཕྲད་བྱས་ཏེ། རྒྱལ་ཁབ་གཉིས་བར་གྱི་དམག་དོན་དང་ཚོང་དོན། མི་སྣ་འགྲོ་འོང་། རྡུལ་ཕྲན་གློག་ཤུགས་འཕེལ་རྒྱས་དང་མཁའ་སྐྱོད་ཚན་རྩལ་ (space Science ) འཕེལ་རྒྱས་གཏོང་ཕྱོགས་བཅས་ཀྱི་ཐོག་གྲོས་མོལ་བྱས་ཡོད་འདུག
ཟླ་འདིའི་ཚེས་ ༡༤ ཉིན་ནཱ་རེན་ཌ་མུ་དྷེ་རྒྱ་ནག་གི་སྲིད་འཛིན་ཞི་ཅིན་ཕིན་ཐུག་སྟེ། རྒྱ་དཀར་ནག་བར་གྱི་ས་མཚམས་སྐོར་དང་ཚོང་དོན། དམག་དོན་སོགས་ལ་གྲོས་མོལ་བྱས་ཡོད་འདུག
རྒྱ་གར་གྱི་སྲིད་བློན་ནཱ་རེན་ཌ་མུ་དྷེ་ཡིས་རྒྱ་གར་སྐད་ཐོག་གསུངས་དོན། གལ་ཏེ་ངས་རྒྱ་གར་གྱི་ཕྲུ་གུ་ཞིག་ལ་རྒྱ་གར་གྱི་གྲོགས་པོ་ཡག་ཤོས་སུ་ཡིན་མིན་སྐད་ཆ་དྲིས་ན། རྒྱ་གར་གྱི་གྲོགས་པོ་ཡག་ཤོས་ཨུ་རུ་སུ་རེད་ཅེས་རྗོད་རྒྱུ་རེད། ཨུ་རུ་སུས་རྒྱ་གར་དཀའ་ངལ་ནང་ཡོད་པའི་སྐབས་ནས་བཟུང་ད་བར་རྒྱ་གར་དང་མཉམ་ལས་བྱས་ནས་ཏེ་ཡོང་བ་རེད། ཅེས་དང་། ད་དུང་ཁོང་གིས་མ་འོངས་པར་རྒྱ་གར་དང་ཨུ་རུ་སུ་གཉིས་བར་བདེ་སྲུང་དང་རྡུལ་ཕྲན་གློག་ཤུགས་བཀོལ་གཏོང་སོགས་ལ་མཉམ་ལས་བྱ་རྒྱུ་ཡིན་སྐོར་དང་། སྲིད་འཛིན་པུ་ཌིན་གྱིས་རྒྱལ་ཁབ་ལྔའི་ཚོགས་འདུའི་སྐབས་མཉམ་འབྲེལ་རྒྱལ་ཚོགས་ཀྱི་བདེ་འཇགས་ལྷན་ཚོགས་དང་རྒྱལ་སྤྱིའི་དངུལ་རྩའི་ཚོགས་པ་ཁག་ལ་བཅོས་བསྒྱུར་གཏོང་དགོས་སྐོར་གླེང་སློང་བྱས་བར་བསྔགས་བརྗོད་སོགས་བྱས་འདུག
ཨུ་རུ་སུའི་སྲིད་འཛིན་པུ་ཌིན་གྱིས། ཨུ་རུ་སུས་རྒྱ་གར་དང་མཉམ་དུ་མཉམ་ལས་བྱེད་རྒྱུ་ནི་གལ་འགངས་ཆེ་ཤོས་ཤིག་ལ་ངོས་འཛིན་བྱེད་བཞིན་ཡོད་པ་དང་། མ་འོངས་པར་རྒྱལ་ཁབ་གཉིས་བར་སྔར་ལྷག་མཉམ་ལས་ཤུགས་ཆེ་རུ་བཏང་སྟེ་དཔལ་འབྱོར་འཕེལ་རྒྱས་དང་རིག་གཞུང་བརྗེ་ལེན་གྱི་མཉམ་ལས་གང་ཐུབ་བྱ་རྒྱུ་ཡིན། ཞེས་སོགས་བརྗོད་འདུག
འབྱུང་འགྱུར་ཕྱི་ཟླ་ ༡༢ པའི་ནང་ཨུ་རུ་སུའི་སྲིད་འཛིན་པུ་ཌིན་རྒྱ་གར་ནང་འཚམས་གཟིགས་མགྲོན་འབོད་དང་འབྲེལ་ཏེ། ཏ་མིལ་ཎ་ཌོ་ཌེ་རུ་ནཱལ་ཝེ་ལི་ (Tirunelveli) རྗོང་ཁོངས་ཀཱོ་ཌན་ཀུ་ལམ་ (Koodankulam) ནང་ཡོད་པའི་རྒྱ་གར་གྱི་རྡུལ་ཕྲན་གློག་ཤུགས་བརྒྱུད་གཏོང་ས་ཚིགས་ (Kudankulam Nuclear Power Plant) ཞེས་པར་གཟིགས་སྐོར་བྱེད་འཆར་ཡོད་འདུག
ཏ་མིལ་ཎ་ཌོ་ཌེ་རུ་ནཱལ་ཝེ་ལི་ (Tirunelveli) རྗོང་ཁོངས་ཀཱོ་ཌན་ཀུ་ལམ་ (Koodankulam) ནང་ཡོད་པའི་རྒྱ་གར་གྱི་རྡུལ་ཕྲན་གློག་ཤུགས་རྒྱུད་གཏོང་ས་ཚིགས་ (Kudankulam Nuclear Power Plant) ཞེས་པའི་ཚན་ཁག་དང་པོ་དང་གཉིས་པ་ ( unit 1 and 2) གཉིས་ཨུ་རུ་སུའི་རྒྱབ་སྐྱོར་འོག་རྒྱ་གར་གཞུང་གིས་ཧིན་སྒོར་ཀཱ་རོ་ ༡༧།༢༠༠ (crore) ཡིས་འགྲོ་གྲོན་བཏང་སྟེ་བཙུགས་པ་ཞིག་ཡིན་པ་དང་། འདི་ལོའི་ཕྱི་ཟླ་ ༤ པའི་ནང་རྒྱལ་ཁབ་གཉིས་བར་རྒྱ་གར་གྱི་ཀཱོ་ཌན་ཀུ་ལམ་ནང་རྡུལ་ཕྲན་གློག་ཤུགས་བརྒྱུད་གཏོང་ས་ཚིགས་ཀྱི་ཚན་ཁག་ ༣ དང་ ༤ འཛུགས་ཕྱོགས་གྲོས་མཐུན་ (General Framework Agreement on unit 3 and 4) ཟེར་བ་ཞིག་བཞག་ཡོད་པའི་ཐོག་ད་ལྟ་མཉམ་ལས་བྱེད་བཞིན་ཡོད་འདུག
རྒྱ་གར་དང་ཨུ་རུ་སུའི་བར་དམག་དོན་དང་ཚོང་དོན་སོགས་ལ་གྲོས་མཐུན་དང་མཉམ་ལས་མང་པོ་བྱས་ཏེ་རྒྱལ་ཁབ་གཉིས་ཀྱི་འབྲེལ་ལམ་འཕེལ་རྒྱས་ཆེན་པོ་ཕྱིན་ཡོད།
༢༠༠༩ ལོར་རྒྱ་གར་དང་ཨུ་རུ་སུ་བར་ཨ་སྒོར་ཐེར་འབུམ་ ༧།༤༦ དང་།
༢༠༡༠ ལོར་ཨ་སྒོར་ཐེར་འབུམ་ ༨།༥༣།
༢༠༡༠ ལོར་ཨ་སྒོར་ཐེར་འབུམ་ ༨།༨༣།
༢༠༡༡ ལོར་ཨ་སྒོར་ཐེར་འབུམ་ ༨།༨༧།
༢༠༡༢ ལོར་ཨ་སྒོར་ཐེར་འབུམ་ ༡༡།༠༤།
༢༠༡༣ ལོར་ཨ་སྒོར་ཐེར་འབུམ་ ༡༥།༩༤ བཅས་བྱུང་ཡོད་འདུག
ཆབ་སྲིད་དབྱེ་ཞིབ་པ་ཚོས། རྒྱ་གར་ལ་རང་བཙན་ཐོབ་པ་ནས་བཟུང་ཨུ་རུ་སུ་རྒྱ་གར་གྱི་མཐུན་གྲོགས་རྒྱལ་ཁབ་ཡག་ཤོས་ཤིག་ཡིན་སྟབས། ད་རེབ་གྲོས་མོལ་འདི་བརྒྱུད་མ་འོངས་པར་རྒྱལ་ཁབ་གཉིས་བར་གྱི་འབྲེལ་ལམ་སྔར་ལས་ཡག་ཏུ་འགྲོ་རྒྱུ་ཡིན་སྐོར་བརྗོད་འདུག
ནཱ་རེན་ཌ་མུ་དྷེ་ ༢༠༠༡ ལོར་གྷུ་ཅུ་ར་ཌེ་མངའ་སྡེའི་སྤྱི་ཁྱབ་བློན་ཆེན་ཡིན་སྐབས་ཨུ་རུ་སུར་འཚམས་གཟིགས་དང་འབྲེལ་སྲིད་འཛིན་པུ་ཌིན་དང་ཐུག་འཕྲད་བྱས་ཡོད་པ་དང་། ད་རེབ་རྒྱ་གར་གྱི་སྲིད་བློན་མིང་ཐོག་ནས་ཁོང་མཇལ་བ་ཐོག་མ་དེ་ཆགས་ཡོད་འདུག
གསར་འགོད་པ། དོན་གྲུབ།
