འགྲུལ་བ་ ༢༩༨ རྐྱེན་འདས།

ཁ་སང་མཱ་ལེ་ཞི་ཡའི་གནམ་གྲུ་ཞིག་ཨུ་རུ་སུའི་ས་མཚམས་ཡུག་ཁུ་རེན་གྱི་ཤར་ཕྱོགས་གྲོང་གསེབ་ཅིག་ཏུ་ཟེགས་ཏེ། གནམ་གྲུའི་ནང་འགྲུལ་བ་ ༢༩༨ ཡོད་པ་ཚང་མ་རྐྱེན་འདས་སུ་གྱུར་ཡོད་འདུག

བྷི་བྷི་སི་གསར་ཁང་གིས་གནས་ཚུལ་སྤེལ་བ་ལྟར་ན། ཁ་སང་ཕྱི་ཚེས་ ༡༧ ཉིན་མཱ་ལེ་ཞི་ཡའི་གནམ་གྲུ་ཨང་རྟགས་ ༡༧ (MH17 ) པ་ནི་ཌིར་ལན་ཌིའི་རྒྱལ་ས་ཨེམ་སུ་ཊིར་ཌམ་(Amsterdam)ཞེས་པ་ནས་ཡུག་ཁུ་རེན་གྱི་གྲོང་ཁྱེར་ཌོ་ནི་སི་ཁི་ (Donetsk)སྐྱོད་པའི་ལམ་བར་དུ། ཡུག་ཁུ་རེན་ཤར་ཕྱོགས་སུ་ཡོད་པའི་གྷ་རོ་བྷོ་ཝོ་(Grobovo)ཟེར་བའི་གྲོང་གསེབ་ཅིག་ཏུ་ཟེགས་ཏེ་འབར་གས་བྱུང་ཡོད་པ་དང་། གནམ་གྲུ་དེའི་ནང་ནི་ཌིར་ལན་ཌི་ནས་འགྲུལ་བ་ ༡༥༤ དང་མཱ་ལེ་ཞི་ཡ་ནས་ ༤༣། ཨོ་སི་ཊོ་ལི་ཡ་ནས་ ༢༧། ཧིན་རྡུ་ནི་ཞེ་ཡ་ནས་ ༡༢ ། དེ་བཞིན་གནམ་གྲུའི་ཁ་ལོ་བ་དང་ལས་བྱེད་བཅས་ཁྱོན་མི་གྲངས་ ༢༩༨ ཡོད་པ་ཚང་མ་རྐྱེན་འདས་སུ་གྱུར་ཡོད་འདུག

མཱ་ལེ་ཞི་ཡའི་སྲིད་བློན་ནཱ་ཅེབ་ལགས་ཀྱིས་གསར་འགོད་པར། ད་ལྟའི་ཆར་མཱ་ལེ་ཞི་ཡ་ཕྱོགས་ནས་གནད་དོན་གྱི་རྒྱུ་རྐྱེན་གང་ཡིན་ཤེས་རྟོགས་ཐུབ་ཀྱི་མེད་ཀྱང་། གང་མགྱོགས་ཀྱིས་གནམ་གྲུ་དེར་གནད་དོན་ག་རེ་བྱུང་མིན་ཞིབ་འཇུག་བྱ་རྒྱུ་ཡིན་ལུགས་དང་། དོན་རྐྱེན་གྱི་འབྱུང་རྐྱེན་གསལ་བོ་ཆགས་རྗེས། འབྲེལ་ཡོད་ཉེས་ཅན་འཕྲལ་དུ་ཁྲིམས་ཁང་ལ་སྐྱེལ་རྒྱུ་ཡིན་སྐོར་བརྗོད་འདུག

དོན་རྐྱེན་བྱུང་རྗེས། ཨ་རིའི་སྲིད་འཛིན་ཨོ་བྷ་མ་དང་ནི་ཌིར་ལན་ཌིའི་སྲིད་བློན་མཱར་ཁི་རུ་ཊི་སོགས་ཀྱིས་ཀྱང་ཁ་པར་བརྒྱུད་དེ། མཱ་ལེ་ཞི་ཡའི་གནམ་གྲུ་འབར་གས་བྱུང་སར་འཕྲལ་དུ་རྒྱལ་སྤྱིའི་རྟོག་ཞིབ་ཚོགས་ཆུང་ཆེད་གཏོང་གིས་རྟོག་ཞིབ་བྱེད་པར་མོས་མཐུན་གནང་ཡོད་འདུག

འདི་ནི་ད་ལོར་མཱ་ལེ་ཞི་ཡའི་གནམ་གྲུར་དོན་རྐྱེན་ཚབས་ཆེན་བྱུང་བ་ཐེངས་གཉིས་པ་དེ་ཆགས་ཡོད་པ་དང་། འདི་ལོའི་ཕྱི་ཟླ་ ༣ ཚེས་ ༩ ཉིན་མཱ་ལེ་ཞི་ཡ་ནས་པེ་ཅིན་དུ་འཕུར་བའི་གནམ་གྲུ་ཨང་རྟགས་ ༣༧༠ པ་གློ་བུར་གར་སོང་ཆ་མེད་དུ་གྱུར་ཏེ་ཟླ་ ༤ ལྷག་འགྲོ་བཞིན་ཡོད་པ་དང་། གནམ་གྲུ་དེའི་ནང་ཁྱོན་འགྲུལ་བ་ ༢༣༩ ཡོད་པ་རེད།

གསར་འགོད་པ། པདྨ་མཚོ།