གྲྭ་བ་ཞིག་གིས་རང་སྲོག་བཅད།

བླ་བྲང་དགོན་པའི་གྲྭ་ཐབས་མཁས་ལགས་ཀྱིས་རང་སྲོག་བཅད་དེ། རྒྱ་གཞུང་གིས་གྲྭ་བ་ཚོད་འཛིན་བྱེད་བཞིན་པའི་སྲིད་བྱུས་ལ་ངོ་རྒོལ་བྱས་ཡོད་འདུག

བློ་བཟང་དོན་ལྡན་ལགས་ཀྱིས་འདི་གར་གནས་ཚུལ་མཁོ་སྤྲོད་བྱས་པ་ལྟར་ན། ཟླ་འདིའི་ཚེས་ ༩ ཉིན་བླ་བྲང་དགོན་པའི་གྲྭ་ཐབས་མཁས་ལགས་ཀྱིས། རྒྱ་གཞུང་གིས་ད་བར་བླ་བྲང་དགོན་པའི་ནང་གྲྭ་ ༩༩༩ ཡན་ཞུགས་མི་ཆོག་པར་བཟོས་ཏེ། གྲྭ་བའི་གྲངས་འབོར་ཚོད་འཛིན་བྱེད་བཞིན་པ་དང་། དགོན་པར་ཆོས་ཕྱོགས་ཀྱི་བྱེད་སྒོ་དང་གྲྭ་བ་ཚོའི་སློབ་གཉེར་སོགས་ལ་སྟངས་འཛིན་ལྟ་རྟོག་བྱེད་པའི་སྲིད་བྱུས་ལ་ངོ་རྒོལ་བྱས་ཏེ་སྐུ་གྲོངས་ཡོད་འདུག

གནས་ཚུལ་མཁོ་སྤྲོད་པས་བརྗོད་པ་ལྟར་ན། གྲྭ་ཐབས་མཁས་ལགས་རང་ལོ་ ༥ སྟེང་བླ་བྲང་དགོན་པར་འཛུལ་ཞུགས་བྱས་ཏེ་ལོ་ ༢༤ བར་བསྡད་ཡོད་ཀྱང་། རྒྱ་གཞུང་གིས་དགོན་པར་གྲྭ་བའི་གྲངས་འབོར་ཚོད་འཛིན་དང་། ཆོས་དད་རང་དབང་མ་སྤྲད་པར་དམ་དྲག་ནན་མོ་བྱས་པ་སོགས་ལ་བརྟེན་ནས་གོ་སྐབས་མང་པོ་ཞིག་རག་མེད་པ་དང་། ཁོང་མ་ཡིན་པའི་བླ་བྲང་ས་ཁུལ་ནས་ཡོང་བའི་གྲྭ་བ་དང་། ས་གནས་གཞན་ནས་བསླབ་པ་སློབ་གཉེར་ཆེད་ཡོང་བའི་གྲྭ་བ་མང་པོ་དཀའ་ངལ་དེའི་འོག་གྲྭ་བ་ལོག་པ་དང་དོན་རྐྱེན་འདྲ་མིན་བྱུང་བཞིན་པའི་གནས་ཚུལ་བྱུང་གི་ཡོད་སྟབས། ཁོང་གིས་རང་སྲོག་བཅད་དེ་རྒྱ་གཞུང་དང་འབྲེལ་ཡོད་སྡེ་ཁག་ལ་ངོ་རྒོལ་བྱས་ཡོད་འདུག

གྲྭ་ཐབས་མཁས་ལགས་ཀྱིས་རང་སྲོག་མ་བཅད་སྔོན་ལ་ཁོང་གི་གྲོགས་པོར། ང་རང་ལོ་ལྔ་ནས་ལོ་ཉེར་བཞི་བར་དགོན་པ་འདིར་ཞུགས་ནས་རང་ནུས་གང་ལྕོགས་ཀྱིས་ཞབས་འདེགས་དང་གཉོམ་ཆུང་ཚུལ་མཐུན་བྱས་ཀྱང་། སྲིད་གཞུང་དང་འབྲེལ་ཡོད་སྡེ་ཁག་གིས་གྲྭ་གྲངས་ཚོད་འཛིན་སོགས་མང་པོ་ཞིག་ལ་ཁ་གཡར་ནས་གནོན་ཤུགས་རབ་དང་རིམ་པ་སྤྲད་སོང་། གནས་སྟངས་འདིས་གྲྭ་གཞོན་མང་པོ་ཞིག་གི་སེམས་ལ་ན་ཚ་བཟོ་གི་འདུག་སྟབས། ངས་རྒྱ་གཞུང་གི་གྲྭ་བའི་གྲངས་འབོར་ཚོད་འཛིན་དང་ཆོས་དད་རང་དབང་མེད་པའི་སྐོར་ལ་ངོ་རྒོལ་གྱི་ལས་འགུལ་ཞིག་སྤེལ་གྱི་ཡིན། ཞེས་བརྗོད་ཡོད་འདུག

ཁོང་ནི་བླ་བྲང་བསང་ཆུ་རྫོང་སྔགས་པ་སྡེ་བ་ནས་ཡིན་པ་དང་། ཕ་མིང་ལ་འཇིགས་བྱེད་སྐྱབས་དང་མ་མིང་བདེ་སྐྱིད་སྒྲོལ་མ་ཞུ་བཞིན་ཡོད་འདུག

གསར་འགོད་པ། དོན་གོ