རྒྱལ་སྤྱིའི་བོད་བརྒྱུད་ནང་བསྟན་ཞིབ་འཇུག་ཚོགས་པའི་ཚོགས་གཙོ་རྫ་ཚེ་རིང་བཀྲ་ཤིས་ལགས་སུ། ཞིབ་འཇུག་ཚོགས་པའི་ཕྱག་ལས་གནང་ཕྱོགས་དང་དཀའ་ངལ། དེ་ བཞིན་ཐའེ་ཝན་ནང་གི་བོད་མིའི་གནས་སྟངས་སོགས་ཀྱི་ཐད་གླེང་མོལ་བྱས་ཡོད།
རྫ་ཚེ་རིང་བཀྲ་ཤིས་ལགས་ཀྱིས་ཐོག་མར་ཁོ་རང་གི་སློབ་སྦྱོང་གི་བརྒྱུད་རིམ་ནས་མགོ་བཙུཊ་ཏེ་བརྗོད་དོན། ༢༠༠༦ ལོར་ང་རྒྱ་གར་དུ་འབྱོར་ཏེ་༧གོང་ས་མཆོག་ལ་མཇལ་ཁ་ཞུ་སྐབས། དེང་སང་བོད་པའི་མཁན་པོ་དང་དགེ་བཤེས་ཚོས་སོ་སོའི་ཆོས་དང་རིག་གཞུང་ཐོག་གང་འཚམ་སློབ་གཉེར་བྱས་ཏེ་གོ་རྟོགས་རྙེད་ཡོད་ཀྱང་། གཞན་ལ་འགྲེལ་བཤད་ཡག་པོ་རྒྱག་པར་སྐད་ཡིག་གི་དཀའ་ངལ་འཕྲད་བཞིན་ཡོད་པ་དང་། ལྷག་པར་དུ་དེང་སྐབས་རྒྱ་ནག་གཙོས་པའི་རྒྱ་མི་རིགས་ཀྱི་སྤྱི་ཚོགས་ནང་བོད་བརྒྱུད་ནང་བསྟན་གྱི་བྱམས་དང་སྙིང་རྗེ། རྟེན་འབྱུང་སོགས་ཀྱི་རྣམ་གཞག་དགོས་མཁོ་ཆེན་པོ་ཆགས་ཡོང་གི་ཡོད་པ་རེད་ཅེས་གསུངས་སོང་། ཡིན་ནའང་སྐབས་དེར་ངས་ཟ་སྐད་འཐུང་སྐད་ཙམ་ལས་ཤེས་ཀྱི་མེད་སྟབས། རྫོང་སར་བཤད་གྲྭར་ཞུགས་ཏེ་ཞོར་དུ་ལོ་གཅིག་ཙམ་རིང་རྒྱ་ཡིག་རང་སྦྱོང་བྱས་པ་ཡིན། དེའི་རྗེས་༧གོང་ས་མཆོག་གིས་ཡང་བསྐྱར་ང་ཐའེ་ཝན་ལ་རྒྱ་ཡིག་སྦྱོང་དུ་ཕྱིན་ན་བཟང་བ་དང་། སྐུ་སྒེར་ཡིག་ཚང་ནས་རོགས་རམ་གནང་རྒྱུ་ཡིན་ཞེས་གསུངས་ཏེ་ ༢༠༡༠ ཟླ་ ༩ པའི་ནང་ང་ཐའེ་ཝན་དུ་ཕྱིན་པ་ཡིན། ཐའེ་ཝན་སྐུ་ཚབ་དོན་གཅོད་ཁང་གི་གོ་སྒྲིག་འོག ཀྲུང་ཧྲན་སློབ་ཆེན་གྱི་རྒྱལ་སྤྱིའི་སྐད་ཡིག་སྡེ་ཚན་དུ་ཞུགས་པ་དང་། སློབ་ལོ་གཉིས་པ་ནས་བཟུང་ང་རང་སྒེར་ངོས་ནས་སློབ་ཡོན་བཙལ་ཏེ། ཐའེ་པའེ་དགེ་འོས་སློབ་གྲྭ་རུ་ལོ་གཉིས་རིང་སློབ་སྦྱོང་བྱེད་པའི་གོ་སྐབས་བྱུང་སོང་། སློབ་སྦྱོང་གི་ཞོར་དུ་རྒྱལ་སྤྱིའི་བོད་བརྒྱུད་ནང་བསྟན་ཞིབ་འཇུག་ཚོགས་པའི་ནང་ལས་ཀ་བྱས་པ་ཡིན། ༢༠༡༣ ལོར་ང་རང་སྒེར་ངོས་ནས་ཡེ་ཤེས་འཁོར་ལོ་ཟེར་བའི་ཆོས་ཚོགས་ཤིག་བཙུགས་ཏེ་བདུན་ཕྲག་རེ་རེའི་ནང་དཔེ་ཁྲིད་དང་འབུམ་ལྔ་གསོག་པ་སོགས་འཆར་ཅན་ལྟར་འགྲོ་བཞིན་ཡོད་ཅེས་སོགས་བརྗོད་སོང་།
རྒྱལ་སྤྱིའི་བོད་བརྒྱུད་ནང་བསྟན་ཞིབ་འཇུག་ཚོགས་པ་ཟེར་བ་དེ་གང་འདྲ་ཞིག་ཡོད་མེད་དྲིས་པར། ཁོང་གིས་ཚོགས་པ་དེ་ཀཿ་ཐོག་རིག་འཛིན་ཆེན་པོ་དང་སྤྲུལ་སྐུ་ཐུབ་བསྟན་ནོར་བུ། མཁན་པོ་ཆོས་ཉིད་དོན་རྟོཊ། མཁན་པོ་ཚུལ་རྣམ་བཅས་ཀྱིས་ ༢༠༠༩ ལོར་གསར་དུ་བཙུཊ་པ་ཞིག་རེད། ལོ་གཉིས་རེའི་ནང་རྒྱུན་ལས་གསར་འདེམས་བྱེད་ཀྱི་ཡོད་པ་ལྟར་འདས་ལོའི་ཕྱི་ཟླ་ ༩ པའི་ནང་རྒྱུན་ལས་ ༥ གསར་འདེམས་བྱས་པའི་ཐོག བོད་ཀྱི་ཆོས་བརྒྱུད་ཚང་མའི་སྐུ་ཚབ་འདུས་པའི་མཁན་པོ་སྤྲུལ་སྐུ་དང་དགེ་བཤེས་ ༥ ཙམ་ཁ་སྣོན་བྱས་ཏེ་འགན་འཛིན་ལྷན་ཚོཊ་ཤིག་ཀྱང་བཙུཊ་ཡོད། ང་ཚོའི་ལས་ཀ་གཙོ་བོ་བོད་བརྒྱུད་དང་རྒྱ་བརྒྱུད། ལྷོ་བརྒྱུད་བཅས་ནང་པའི་ཆོས་བརྒྱུད་ཚང་མ་མཐུན་ལམ་མཉམ་འབྲེལ་ཐོག་ནང་བསྟན་ཡར་རྒྱས་གཏོང་ཐབས་གནང་རྒྱུ་དང་། མཚམས་རེར་བགྲོ་གླེང་ཚོགས་འདུ་གོ་སྒྲིག་བྱེད་རྒྱུ་སོགས་རེད། ང་ཚོས་ཆེད་དུ་གཉེར་བཞིན་པའི་བོད་བརྒྱུད་ནང་བསྟན་དྲ་རྒྱའི་བརྙན་འཕྲིན་ཟེར་བ་དེ་ལས་ཀ་གཙོ་བོ་ཞིག་ཡིན། དང་ཐོག་ང་ཚོ་མཁན་སྤྲུལ་དགེ་བཤེས་ ༣༠ ཙམ་ཞིག་ཐའེ་ཝན་སྐུ་ཚབ་དོན་གཅོད་ཁང་དུ་འཛོམས་ཏེ་གྲོས་བསྡུར་བྱས་རྗེས། དེང་སང་དྲ་རྒྱའི་བརྒྱུད་ལམ་བེད་སྤྱོད་ཆེན་པོ་ཡོད་པ་ལྟར་བོད་བརྒྱུད་ནང་བསྟན་དྲ་རྒྱའི་བརྙན་འཕྲིན་ཞེས་པ་འདི་གཉེར་རྒྱུ་ཐག་གཅོད་བྱས་པ་ཡིན། ཚོགས་མི་ཡོངས་ནས་དྲ་རྒྱའི་བརྙན་འཕྲིན་གྱི་འགན་ཞིབ་འཇུག་ཚོགས་པས་འཁུར་ན་ལེགས་པའི་ལམ་སྟོན་གནང་བ་ལྟར་དྲ་བརྙན་དེའི་འགན་ཆ་ཚང་ང་ཚོས་འཁུར་གྱི་ཡོད་པ་རེད། ཐའེ་ཝན་སྐུ་ཚབ་དོན་གཅོད་ཀྱི་ཆོས་དགེ་མཆོག་གིས་ཀྱང་ང་ཚོའི་དྲ་རྒྱའི་བརྙན་འཕྲིན་གྱི་ཚོགས་མི་གནང་བཞིན་ཡོད་པ་རེད་ཅེས་བརྗོད་བྱུང་།
ཡང་ཁོང་གིས་ཐའེ་ཝན་གྱི་ཚོགས་པ་ཞིག་གིས་བོད་བརྒྱུད་ནང་བསྟན་ལ་སྐྱོན་བརྗོད་བྱེད་བཞིན་ཡོད་པའི་སྐོར་ལ། ཉེ་བའི་ལོ་ཤས་ནས་བཟུང་ཐའེ་ཝན་ནང་༧གོང་ས་མཆོག་གི་གཙོས་བོད་བརྒྱུད་ནང་བསྟན་ལ་ཁ་གཏོང་མཁན་ཚོགས་པ་ཞིག་བྱུང་བ་རེད། ཚོགས་པ་དེའི་མགོ་ཁྲིད་མི་སྐྱ་ཞིག་ཡིན་ས་རེད། ཁོ་རང་གིས་ཁོ་ཐེག་པ་ཆེན་པོ་ཞིག་ཡིན་པ་དང་རྟོག་པ་མཐོ་བོ་ཡོད་ཟེར་གྱི་ཡོད་པ་རེད། ཚོགས་པ་དེས་གསར་འགྱུར་བརྒྱུད་ལམ་དང་ཚོང་རིགས་ཀྱི་བརྒྱུད་ལམ་བེད་སྤྱད་དེ་བོད་བརྒྱུད་ནང་བསྟན་ལ་སྐྱོན་བརྗོད་དང་། ས་འོག་མེ་འཁོར་འབབ་ཚིགས་སོགས་སུ་ཁྱབ་བསྒྲགས་ཡིག་ཆ་འབུམ་མང་པོ་བཀྲམས་པ་རེད། དེ་བཞིན། སྦྲག་ཐོག་ནས་ཁྱིམ་ཚང་སོ་སོར་ཡིག་ཆ་སྣ་ཚོགས་བསྐུར་ཏེ་རྙོག་དྲ་མང་པོ་བཟོས་པ་རེད། ང་ཚོས་ཐད་ཀར་ཁོ་རང་ལ་རྒོལ་ལན་སློག་ན་དོ་སྣང་མེད་སྟབས། ང་ཚོས་དངོས་ཡོད་གནས་ཚུལ་གྱི་ཐོག་ལ་ང་ཚོ་ག་རེ་ཡིན་དང་མིན་ངོ་འཕྲོད་ཆེད་བོད་བརྒྱུད་ནང་བསྟན་ཞིབ་འཇུག་ཚོགས་པ་འདི་བཙུགས་པ་རེད། ༧སྐྱབས་མགོན་རིན་པོ་ཆེ་དབུར་བཞུགས་པའི་བོད་ཀྱི་ཆོས་བརྒྱུད་ཁག་གི་བླ་སྤྲུལ་ཚོས་སྐྱོན་འཛུགས་འདི་རིགས་ལ་དུས་ཐོག་གསལ་བཤད་མ་གནང་བ་ཡིན་ན། མུ་མཐུད་མང་པོ་བཤད་བསྡད་ན་རིམ་གྱིས་རྫུན་མ་བདེན་པ་འདྲ་ཞིག་ཆཊ་འགྲོ་རྒྱུའི་ཉེན་ཁ་འདུག ཁྲིམས་ཐོག་ནས་ཀྱང་དུས་ཚོད་ངེས་ཅན་འགོར་ན་བདེན་པ་ཆཊ་འགྲོ་བཞིན་ཡོད་ས་རེད། ཅེས་བརྗོད་བྱུང་།
ཐའེ་ཝན་གཞུང་མང་གི་ངོས་ནས་བོད་པའི་བླ་མ་གྲྭ་པ་ཚོར་ལྟ་སྟངས་ག་འདྲ་ཡོད་མེད་དྲིས་པར། སྤྱིར་བཏང་ཐའེ་ཝན་གྱི་མི་ཚོ་གསར་འགྱུར་དང་ཁྱབ་བསྒྲཊ་རིཊ་ལ་དོ་སྣང་དང་ཡིད་ཆེས་ཞེ་དྲག་བྱེད་མཁན་གྱི་འུར་མགོ་མཐོན་པོ་ཡོད་པ་དེ་འདྲ་རེད། སྔོན་ཆད་གསར་འགྱུར་བརྒྱུད་ལམ་སོཊ་སུ་བོད་ཀྱི་བླ་མ་གྲྭ་པས་ཞབས་འདྲེན་བྱས་པའི་གནས་ཚུལ་ཐོན་ཡོད་ས་རེད། ད་ལྟའི་ཆར་རྒྱ་ནག་སོཊ་རྒྱལ་ཁབ་གཞན་དག་དང་བསྡུར་ན་ཐའེ་ཝན་ནང་ཡོད་པའི་བོད་པའི་བླ་མ་གྲྭ་པའི་སྤུས་ཚད་དེ་ཡག་པོ་མཐོང་གི་འདུག ཐའེ་ཝན་སྤྱི་ཚོཊ་ཆུང་ཆུང་ཞིག་ལས་མེད་ཀྱང་དེ་སྔོན་༸གོང་ས་མཆོག་ཐེངས་གསུམ་ཕེབས་ཡོད་པ་དང་། དུས་རྒྱུན་བོད་ནང་དང་བཙན་བྱོལ་ནང་དུ་ཡོད་པའི་བླ་ཆེན་མང་པོ་ཐའེ་ཝན་ནང་ཕེབས་ཀྱི་ཡོད་སྟབས། མི་མང་ཆེ་བར་ནང་ཆོས་ཀྱི་གོ་རྟོགས་གང་འཚམ་ཡོད་པ་རེད། ང་རང་གི་ངོ་ཤེས་མཁན་བླ་མ་གྲྭ་པ་ཚོར་བལྟས་ཡོང་ན་ཕྱག་ལས་ཡག་པོ་གནང་མཁན་རྐྱང་རྐྱང་རེད། འོན་ཀྱང་། བོད་བརྒྱུད་ནང་བསྟན་གྱི་མིང་འཁུར་ནས་བོད་པ་མ་ཡིན་པའི་བླ་མ་གྲྭ་པ་རེ་ཟུང་གིས་ཆོས་ཀྱི་མིང་ཐོག་ནས་ཚོང་ལས་གཉེར་མཁན་དེ་འདྲ་འདུག དེ་ཚོའི་བློ་ཁོག་དང་ནུས་པ་ང་ཚོ་ལས་རྦད་དེ་ཆེ་བ་འདུག ཅེས་བརྗོད་བྱུང་།
ཐའེ་ཝན་གྱི་བོད་མི་ཚོའི་འཚོ་ཐབས་དང་དཀའ་ངལ་སྐོར་ལ་ཁོང་གིས། ཐའེ་ཝན་ནང་བོད་པ་ཧ་ཅང་ཉུང་ཉུང་རེད། ཉུང་ཤས་ཤིག་ཡོད་པ་དེ་དག་གིས་ཀྱང་ཕན་ཚུན་ངོ་ཤེས་ཀྱི་མི་འདུག བླ་མ་གྲྭ་པ་ལོ་ ༢༠ ཡར་མར་ནས་ཐའེ་ཝན་དུ་བསླེབས་ཏེ་མི་སེར་ཆཊ་ཚར་བ་ཁག་ཅིག་འདུག ཁོང་ཚོར་ཆོས་ཚོཊ་ཡོད་པ་བརྟན་པོ་ཞེ་དྲག་ཆཊ་འདུག ཐའེ་ཝན་ལྟ་བུར་མཚོན་ན། བླ་མ་གྲྭ་པ་ལ་བརྩི་བཀུར་ཆེན་པོ་དང་སྤྱིའི་ཆ་ནས་ཆོས་ལུཊ་ཀྱི་གོ་རྟོཊ་ཡག་པོ་འདུག དེ་ནས་ཆང་ས་བརྒྱབ་སྟེ་སོང་བ་སོགས་མི་སྐྱ་ཁག་ཅིག་ཡོད་པ་ཚོས་བཟོ་གྲྭ་སོཊ་སུ་ལས་ཀ་བྱེད་ཀྱི་འདུག སྐྱ་སེར་སུ་ཡིན་ནའང་ཐའེ་ཝན་ནང་གི་དཀའ་ངལ་ཆེ་ཤོས་གཏན་སྡོད་ཡིག་ཆ་རག་ཁག་པོ་ཡོད་པ་དེ་རེད། དེ་སྔོན་བོད་པ་ཁག་ཅིག་ལ་ཆང་ས་བརྒྱབ་ནས་བྱིས་པ་ཡོད་ཀྱང་། ཟླ་ཤས་མ་གཏོགས་འདུག་མི་ཆོག་པའི་དཀའ་ངལ་འཕྲད་སྟབས། ཐའེ་ཝན་གྲོས་ཚོགས་ནང་ཞུ་གཏུག་ཐེངས་མང་བྱས་པ་བརྒྱུད་ད་ལྟ་ཆང་ས་རྒྱག་མཁན་ཚོར་གནས་སྡོད་ཆོག་པའི་ཡིག་ཆ་ཞིག་རག་གི་ཡོད་པ་རེད། ཡིན་ནའང་། གྲོས་ཆོད་དེར་དུས་ཡུན་གྱི་ངེས་གཏན་ཡོད་སྟབས། མ་འོངས་པར་ག་འདྲ་ཆགས་མིན་ཧ་གོ་ཡི་མ་རེད། ང་ལྟ་བུར་མཚོན་ན་སློབ་མའི་མིང་ཐོག་ཏུ་ཡོད་སྐབས་ཟླ་བ་ ༦ གི་ཆོག་མཆན་མ་གཏོཊ་རག་མ་སོང་། སྤྱིར་བཏང་ཕྱི་རྒྱལ་གྱི་སློབ་མ་ཚང་མར་ལོ་ ༢ ཀྱི་ཆོག་མཆན་རག་གི་ཡོད་པ་རེད་ཅེས་ཟེར།
ཉེ་བའི་ལོ་ཤས་ནས་བཟུང་ཐའེ་རྒྱ་བར་གྱི་འབྲེལ་བ་ཡར་རྒྱས་འགྲོ་བཞིན་ཡོད་སྐོར་བརྗོད་ཀྱིན་པ་དེས། མ་འོངས་པར་བོད་དོན་ཐད་ཕན་གནོད་ག་རེ་ཡོང་མིན་དྲིས་པར། ཐའེ་ཝན་དང་རྒྱ་ནག་མི་མང་བར་སྔ་མོ་ཡིན་ན་འབྲེལ་བ་ཡག་པོ་ཡོད་ཀྱང་། རྒྱ་ནག་ནས་ཡོང་བའི་རྒན་རབས་པ་ཚོ་རིམ་གྱིས་རྫོགས་འགྲོ་བཞིན་ཡོད་པ་དང་། གཞོན་སྐྱེས་ཚོ་རྒྱ་ནག་ལ་དུངས་པ་མེད་པའི་ཐོག ཞེད་སྣང་ཞིག་གིས་རྒྱ་གཞུང་ལ་ཡིད་ཆེས་མེད་མཁན་གྱི་བརྒྱ་ཆ་མཐོ་བོར་སླེབ་ཡོང་གི་ཡོད་པ་རེད། འོན་ཀྱང་ཐའེ་ཝན་གྱི་འགྱུར་བ་དེས་བོད་དོན་ཐོག་ཕན་ཐོགས་མིན་བཤད་ཁག་པོ་རེད། ཐའེ་ཝན་གྱི་དཔལ་འབྱོར་རྒྱ་ནག་ལ་འབྲེལ་བ་ཆེན་པོ་ཡོད་སྟབས། ཐའེ་ཝན་གྱི་གསར་འགྱུར་བརྒྱུད་ལམ་དང་མི་སྣ་སྐད་གྲགས་ཅན་ཚོས། བོད་དོན་བརྒྱུད་འགོད་དང་གླེང་སློང་བྱེད་པར་གཡོལ་ཐབས་བྱེད་ཀྱི་ཡོད་པ་དངོས་ཡོད་རེད། དཔེ་ཞིག་བཞག་ན། ལོ་གཉིས་སྔོན་དུ་༼དུས་རབས༽ཞེས་པའི་ཐའེ་ཝན་གྱི་བརྙན་འཕྲིན་ཆེ་གྲས་ཤིག་གིས་ང་ལ་སྐད་ཆ་བཤད་དུ་ཡོང་རོགས་ཟེར་ནས་དུས་ཚོད་གཏན་འཁེལ་ཡོད་ཀྱང་། མཐའ་མར་བརྙན་འཕྲིན་ཁང་དེའི་མགོ་ཁྲིད་ཀྱིས་ང་སྔོན་ཆད་བཙོན་ཁང་དུ་བཅུག་པ་སོགས་ཆབ་སྲིད་དང་འབྲེལ་བ་ཡོད་ལུགས་ལབ་ནས་ལས་རིམ་དེ་ཕྱིར་འཐེན་བྱས་འདུག མགོ་ཁྲིད་དེ་རྒྱ་ནག་གཞུང་ལ་འབྲེལ་བ་ཆེན་པོ་ཡོད་མཁན་ཞིག་རེད་ལ། ཁོ་ཚོའི་ཁྲོམ་རྭའང་རྒྱ་ནག་ནང་ཡོད་པ་རེད། ཐ་ན་ཐའེ་ཝན་ནང་གཞས་གཏོང་མཁན་ཞིག་གིས་འོད་སྡེར་འདོན་དགོས་ནའང་ཁྲོམ་རྭ་དེ་རྒྱ་ནག་ཆགས་ཡོད་སྟབས། སྤྱི་ཚོགས་ཐོག་གོ་གནས་ཡོད་མཁན་དང་ཚོང་ལས་པ་ཚོས་སྐད་རྒྱག་ཕོད་ཀྱི་ཡོད་པ་མ་རེད། རྒྱ་གཞུང་ལ་མངོན་གསལ་གྱིས་ངོ་རྒོལ་བྱེད་མཁན་མང་ཆེ་བ་སློབ་མ་ཚོ་ཡིན་སྟབས་ད་ལྟའི་ཆར་ཐའེ་ཝན་ནང་འགལ་བ་གཉིས་མཉམ་དུ་འགྲོ་བཞིན་ཡོད་པ་རེད། ཅེས་བརྗོད་བྱུང་།
གསར་འགོད་པ། པདྨ་མཚོ།
ཐེ་ཝན་ན་་ཡོད་པའི་བོད་ཀྱི་བླ་གྲྭ་རྣམས་ཀྱིས་བོད་རྒྱུད་ནང་བསྟན་གྱི་ཞབས་འདྲེན་བྱས་པ་དང་། བོད་རིགས་ལ་མཐོང་ཆུང་བྱེད་འོས་པའི་གཡོ་ཁྲམ་བྱས་པས་ཚག་པར་དང་སྐད་ཆ་གང་མང་གོ་མ་གཏོགས། རྒྱ་ནག་ལ་ངོ་རྒོལ་བྱས་པས་ཚིག་ཟུར་ཙམ་ཡང་ཐོས་མ་མྱོང་།
དེང་སྐབས་ཐེ་ཝན་གྱི་བོད་པའི་བླ་མ་གྲྭ་བ་ཚོས་སྤྱོད་ལམ་ཡར་རྒྱས་ཕྱིན་ཏེ་ཚུལ་ལྡན་ཆགས་ཡོད་ན་བཀྲ་ཤིས་བདེ་ལེགས་ཡོད། སྔོན་མ་ཞབས་འདྲེན་མང་པོ་བཞག་པ་ས་གྲགས་གནམ་གྲགས་ཆགས་ཡོད་པ་རེད། དེ་ནས་བོད་དོན་དེ་བོད་པ་མི་རེ་ངོ་རེ་ལ་འགན་ཡོད་པ་སོང་། ཐེ་ཝན་ནང་གི་བོད་པའི་བླ་མ་གྲྭ་བ་ཚོས་རྒྱ་ནག་སྐམ་ས་ནས་ཡོང་བའི་རྒྱ་རིགས་ཚོར་འབྲེལ་བ་བྱས་ཏེ་བོད་དོན་ཁྱབ་བསྒྲགས་དང་བོད་དོན་ལ་རྒྱབ་སྐྱོར་ཡོང་ཐབས་་བྱེད་ཐུབ་ན་ཡག་པོ་འདུག དེ་མ་གཏོགས་རྒྱ་བལ་འབྲུག་གསུམ་ནང་ནས་རྒྱ་རིགས་ཚོར་འབྲེལ་བ་བྱེད་རྒྱུ་ཧ་ཅང་དཀའ་ལས་ཁག་པོ་རེད་ལ་ཕྱི་རྒྱལ་ལུང་པ་ཁག་ནས་ཀྱང་ཁག་པོ་ཡོད་རེད། ཐེ་ཝན་དང་ཧོང་ཀོང་། མ་ལེ་ཤི་ཡ། ཇར་པན་སོགས་རྒྱ་རིགས་ཚོར་འབྲེལ་བ་བྱེད་ཡུལ་བདེ་ཤོས་ཀྱི་རྒྱལ་ཁབ་ཁག་རེད། ཁྱེད་ཅག་གིས་གོ་སྐབས་འདི་ཤོར་དུ་མ་འཇུག་རོགས་གནང་།
ངོ་དེབ་སྟེང་ཁྱེད་རང་མང་པོ་མཇལ་སོང་། ལོ་རྒྱུས་ཞིབ་ཕྲ་དེ་རིང་བར་མཇལ་མྱོང་མེད། ཁྱེད་ཅག་གིས་བོད་ཕྱི་ལོགས་ནས་འབད་བརྩོན་ལྷོད་མེད་གནང་རོགས་གནང་།