དེ་རིང་ཡུག་རེན་གྱེན་ལོག་ཤོག་ཁག་གིས་མཱ་ལེ་ཞི་ཡའི་སྐུ་ཚབ་ཚོགས་པར་ཉེ་ལམ་གས་ཐོར་ཕྱིན་པའི་གནམ་གྲུའི་སྒམ་ཆུང་ནག་པོ་གཉིས་སྤྲད་ཡོད་འདུག
ཁ་སང་མཱ་ལེ་ཞི་ཡ་གཞུང་གི་སྐུ་ཚབ་ཚོགས་ཆུང་དང་ཡུག་རེན་གྱེན་ལོག་ཤོག་ཁག་གི་ཤར་ཕྱོགས་རྒྱལ་ཁབ་ (Donetsk People’s Republic) ཞེས་པའི་གཞུང་བར། ཟླ་འདིའི་ཚེས་ ༡༧ ཉིན་ནེ་ཌར་ལན་ཌི་ནས་མཱ་ལེ་ཞི་ཡར་སྐྱོད་བཞིན་པའི་གནམ་གྲུ་ཞིག་ཡུག་རེན་ཤར་ཕྱོགས་གྷོར་བྷོ་ཝ་ (Grobovo)ཞེས་པར་ལྷུང་བའི་གནད་དོན་ཐོག་གྲོས་མོལ་བྱས་ཏེ། དེ་རིང་གྱེན་ལོག་ཤོག་ཁག་གིས་གནམ་གྲུ་ཆག་རོའི་ནང་གི་སྒམ་ཆུང་ནག་པོ་ ( Two Black box)གཉིས་ཕྱིར་སྤྲོད་བྱས་ཡོད་པ་དང་། གནམ་གྲུའི་གོད་ཆག་ཁྲོད་རྐྱེན་འདས་ཕྱིན་པའི་ཕུང་པོ་དག་ནེ་ཌར་ལན་ཌིའི་ནང་སྐྱེལ་འདྲེན། རྒྱལ་སྤྱིའི་རྟོག་ཞིབ་མི་སྣ་གནམ་གྲུ་གས་གཏོར་གྱི་གནད་དོན་ལ་རྟོག་ཞིབ་ཏུ་གཏོང་རྒྱུ་སོགས་ཀྱི་ཐག་གཅོད་བྱས་ཡོད་འདུག
འདིའི་ཐད་མཱ་ལེ་ཞི་ཡའི་སྲིད་བློན་ཌོན་ར་ཛག་ (Mohd Najib Tun Razak)གིས། ང་ཚོ་ཕྱོགས་གཉིས་ཀས་གྲོས་མོལ་བྱས་ཏེ་རྒྱལ་སྤྱིའི་རྟོག་ཞིབ་མི་སྣ་གནམ་གྲུ་གཏོར་རྒོལ་གཏོང་སར་ཆེད་གཏོང་དང་། རྐྱེན་འདས་སོང་བའི་ཕུང་པོ་དག་ནེ་ཌར་ལན་ཌིའི་གཞུང་ལ་རྩིས་སྤྲོད་བྱ་རྒྱུའི་ཐག་གཅོད་བྱས་ཡོད་ཀྱང་། ད་དུང་ལས་དོན་དེ་དག་ལམ་ལྷོང་ཡོང་བར་ལམ་ཁ་མང་པོ་ཞིག་བརྒྱུད་དགོས་ཀྱི་ཡོད། ཅེས་དང་། མཱ་ལེ་ཞི་ཡའི་སྐུ་ཚབ་ཚོགས་ཆུང་གིས། ང་ཚོར་ཡུག་རེན་ཤར་ཕྱོགས་རྒྱལ་ཁབ་ (Donetsk People’s Republic) ཀྱིས་རྒྱབ་སྐྱོར་བྱས་ཏེ། ཉེ་ལམ་གཏོར་རྒོལ་བྱུང་བའི་གནམ་གྲུའི་སྒམ་ཆུང་ནག་པོ་ཕྱིར་སྤྲོད་དང་། རྒྱལ་སྤྱིའི་རྟོག་ཞིབ་མི་སྣ་གཏོང་རྒྱུར་མོས་མཐུན་བྱས་པར་ཐུགས་རྗེ་ཆེ་ཞུ་བཞིན་ཡོད། ཅེས་སོགས་བརྗོད་འདུག
ཟླ་འདིའི་ཚེས་ ༡༧ ཉིན་ནེ་ཌར་ལན་ཌིའི་རྒྱལ་ས་ཨེམ་སི་ཌམ་(Amsterdam) ནས་མཱ་ལེ་ཞུ་ཡའི་རྒྱལ་སར་འཕུར་སྐྱོད་བྱེད་བཞིན་པའི་མཱ་ལེ་ཞི་ཡའི་འགྲུལ་སྐྱེལ་གནམ་གྲུ་ (MH17 ) རྟགས་ཅན་དེ་ཡུག་རེན་ཤར་ཕྱོགས་ས་ཁུལ་གྷོར་བྷོ་ཝ་ཞེས་པར་འབྱོར་སྐབས་གློ་བུར་གས་ཐོར་གྱིས་སར་ལྷུང་སྟེ། དེའི་ནང་ཡོད་པའི་ནེ་ཌར་ལན་ཌའི་མི་ ༡༥༤ དང་མཱ་ལེ་ཞི་ཡ་ནས་ ༤༣། ཨོ་སི་ཊོ་ལི་ཡ་ནས་ ༢༧། ཧིན་རྡུ་ནི་ཞེ་ཡ་ནས་ ༡༢ ། དེ་མིན་རྒྱལ་ཁབ་གཞན་གྱི་འགྲུལ་བ་ཁག་ཅིག གནམ་གྲུའི་ནང་གི་ལས་བྱེད་དང་ཁ་ལོ་བ་བཅས་ཁྱོན་མི་ ༢༩༨ འདས་གྲོངས་ཕྱིན་ཡོད་འདུག
ཡུག་རེན་གཞུང་གིས་དོན་རྐྱེན་དེ་ཨུ་རུ་སུར་དགའ་ཞེན་བྱེད་མཁན་ཡུག་རེན་གྱེན་ལོག་ཤོག་ཁག་གིས་བཟོས་པ་ཡིན་ཚུལ་བརྗོད་ཡོད་པ་དང་། ཡུག་རེན་གྱེན་ལོག་ཤོག་ཁག་གིས་གནམ་གྲུ་གཏོར་རྒོལ་གཏོང་མཁན་ནི་ཡུག་རེན་གཞུང་གི་དམག་དཔུང་ཡིན་སྐོར་བརྗོད་དེ་ཕྱོགས་གཉིས་ཀས་ངོས་ལེན་བྱས་མེད་ཀྱང་། ཨ་རི་དང་དབྱིན་ཡུལ། འཇར་མན། ཡུ་རོབ་མཐུན་ཚོགས། ཨོ་སི་ཌོ་ལི་ཡ་སོགས་ཀྱིས་ཡུག་རེན་གྱེན་ལོག་ཤོག་ཁག་གི་བྱ་སྤྱོད་ཡིན་པ་དང་། ཁོ་ཚོས་ཨུ་རུ་སུས་མཁོ་སྤྲོད་བྱས་པའི་གློག་རྡུལ་རྒྱུད་གཏོང་གི་མེ་ཤུགས་འཕུར་མདེལ་འཕངས་ཏེ་གཏོར་རྒོལ་བཏང་ཚུལ། ཨུ་རུ་སུའི་སྲིད་འཛིན་པུ་ཌིན་གྱིས་རྒྱལ་སྤྱིའི་སྤྱི་ཚོགས་ལ་ཁ་གསལ་འགྲེལ་བརྗོད་བྱ་དགོས་སྐོར་སོགས་བརྗོད་ཡོད།
ཉེ་ལམ་གནས་ཚུལ་དེ་བྱུང་རྗེས་ཨ་རིའི་སྲིད་འཛིན་དང་ཡུག་རེན་སྲིད་འཛིན་རྣམ་གཉིས་ཀྱིས་དོན་རྐྱེན་དེ་ཨུ་རུ་སུར་འབྲེལ་བ་ཡོད་སྐོར་བརྗོད་ཡོད་ཀྱང་ཨུ་རུ་སུས་ཁས་ལེན་བྱས་མེད་སྟབས། ཁ་སང་ཚེས་ ༢༡ ཉིན་མཉམ་འབྲེལ་རྒྱལ་ཚོགས་བདེ་འཇགས་ལྷན་ཚོགས་ཀྱི་ཚོགས་མའི་རྒྱལ་ཁབ་ ༡༥ ཡི་གནད་དོན་དེའི་སྐོར་ལ་གྲོས་ཆོད་ཅིག་བཞག་ཡོད་པ་དང་། དེ་རིང་ཨུ་རོབ་མཐུན་ཚོགས་ཀྱི་རྒྱལ་ཁབ་ཁག་གི་ཕྱི་སྲིད་བློན་ཆེན་དག་བྷེལ་ཇེམ་རྒྱལ་ས་བྷར་སལ་ནང་ཚོགས་ཏེ་ཨུ་རུ་སུར་དཔལ་འབྱོར་ཉེས་ཆད་གཏོང་རྒྱུའི་སྐོར་ལ་གྲོས་མོལ་བྱས་ཡོད་འདུག
ཨ་རིའི་མཉམ་འབྲེལ་རྒྱལ་ཚོགས་ཀྱི་སྐུ་ཚབ་སཱ་མན་ཐཱ་ (Samantha Power) ལགས་ཀྱིས། དཀའ་རྙོག་དེ་སེལ་འདོད་ཡོད་མེད་ཨུ་རུ་སུར་འབྲེལ་བ་ཡོད་ཅིང་། ཨུ་རུ་སུའི་ཕྱོགས་ནས་བསམ་བློ་མ་བཏང་ཚེ་དཀའ་རྙོག་དེ་མུ་མཐུད་ལྷག་ངེས་རེད། ཅེས་དང་། དབྱིན་ཡུལ་གྱི་ཕྱི་སྲིད་དྲུང་ཆེ་ཧེར་མན་གྱིས། གནམ་གྲུ་དེར་ཡུག་རེན་གྱེན་ལོག་པ་ཚོ་སྡོད་ས་ནས་མེ་ཤུགས་འཕུར་མདའ་འཕངས་ཡོད་པ་དང་། མེ་ཤུགས་འཕུར་མདའ་དེ་ཨུ་རུ་སུས་མཁོ་སྤྲོད་བྱས་པ་ཞིག་ཡིན་སྟབས། དེ་ནི་ཨུ་རུ་སུ་དང་ཐད་ཀར་འབྲེལ་བ་ཡོད་པར་མཐའ་བསྡོམས་བརྒྱབ་ན་འགྲིག་གི་རེད། ཅེས་བརྗོད་འདུག
ཨུ་རུ་སུའི་སྲིད་འཛིན་པུ་ཌིན་གྱིས་གནད་དོན་དེ་ཨུ་རུ་སུར་འབྲེལ་བ་གང་ཡང་མེད་སྐོར་བརྗོད་ཡོད་པ་མ་ཟད། ང་ཚོས་རྒྱལ་སྤྱིའི་རྟོག་ཞིབ་ཚོགས་ཆུང་གི་བདེ་འཇགས་ལ་འགན་སྲུང་དང་འབྲེལ་ཁོ་ཚོའི་ལས་ཀ་ཚགས་ཚུད་ཡོང་བར་རྒྱབ་སྐྱོར་བྱ་རྒྱུ་ཡིན། ཞེས་བརྗོད་འདུག
གནམ་གྲུ་གཏོར་རྒོལ་བྱུང་སྟེ་རྐྱེན་འདས་ཕྱིན་པ་དག་ད་ལྟ་མེ་འཁོར་བརྒྱུད་ནེ་ཌར་ལན་ཌི་ནང་སྐྱེལ་འདྲེན་བྱེད་བཞིན་ཡོད་པ་དང་། རྐྱེན་འདས་ཕྱིན་པའི་ནང་མི་ཚོར་མཱ་ལེ་ཞི་ཡ་གཞུང་གིས་ཨ་སྒོར་ ༥༠༠༠ རེ་ཡི་གུན་གསབ་སྤྲད་ཡོད་འདུག
ཆབ་སྲིད་དབྱེ་ཞིབ་པ་ཚོས། གལ་ཏེ་ཨུ་རུ་སུས་ངན་རོགས་བྱས་ཏེ་མཱ་ལེ་ཞི་ཡའི་གནམ་གྲུ་དེ་གཏོར་རྒོལ་བཏང་ཡོད་ཚེ་ཨུ་རུ་སུར་རྒྱལ་སྤྱིའི་ཚོགས་པ་སྒྲིག་འཛུགས་ཁག་གིས་ཉེས་ཆད་ལྕི་མོ་གཏོང་སྲིད་སྐོར་བརྗོད།
གསར་འགོད་པ། དོན་གྲུབ།
