ལ་དྭགས་བོད་མིའི་དཀའ་ངལ་ཆེ་ཤོས་ས་ཐོ་ལག་འཛིན་དང་གཞོན་སྐྱེས་ལས་མེད་ཆགས་ཡོད།

དྲི་བ། ཐོག་མར་གཞིས་སྤྱི་ལགས་ནས་ལ་དྭགས་ནང་བོད་མིའི་གཞིས་ཆགས་ཁག་ག་ཚོད་ཅིག་ཡོད་མེད་དང་མིའི་གྲངས་འབོར། བོད་མི་ཚོའི་འཚོ་བའི་རྟེན་གཞི་བཅས་ཀྱི་སྐོར་ངོ་སྤྲོད་ཅིག་གནོངས་དང་།

ལན། ལ་དྭགས་བསོད་ནམས་གླིང་བོད་མིའི་གཞིས་ཆགས་ལ། སླེ་ལྕོག་ལམ་ས་བསོད་ནམས་གླིང་དང་བསོད་ནམས་གླིང་བྱང་ཐང་བཅས་ཁག་གཉིས་ཡོད།  བསོད་ནམས་གླིང་སླེ་ཁུལ་དུ་གཞིས་གྲོང་ ༡༢ དང་།བསོད་ནམས་གླིང་བྱང་ཐང་འབྲོག་སྡེར་ཁ་འཐོར་གཞིས་ཆགས་ཁག་ ༨ ཡོད། མི་འབོར་གྱི་ཆ་ནས་སླེ་ཁུལ་དུ་བོད་མི་ ༥༠༠༠ ཙམ་དང་། བྱང་ཐང་དུ་བོད་མི་ ༢༣༠༠ བཅས་ཁྱོན་བོད་མི་ ༧༣༠༠ ཡོད། ཁོང་ཚོའི་འཚོ་རྟེན་སླེ་ཁུལ་གྱི་བརྒྱ་ཆའི་ ༣༠% ཞིང་ས་ཡོད་ཀྱང་། ཆུ་དང་གནམ་གཤིས་དབང་གིས་བ་གླང་ལ་སྤྲོད་རྒྱུའི་རྩྭ་མ་གཏོགས་སྐྱེས་ཀྱི་ཡོད་མ་རེད། བོད་མི་མང་ཆེ་བ་ཁང་པ་དང་ལམ་ཁ། སྡོད་ཁང་། ཟ་ཁང་སོགས་ཡུལ་མིའི་གཡོག་པོར་རྒྱུགས་ཏེ་ཉིན་གླའི་ལས་ཀ་བྱེད་ཀྱི་ཡོད་པ་རེད། ཁག་ཅིག་གིས་ཡུལ་མིའི་རླངས་འཁོར་གཏོང་གི་ཡོད་པ་རེད། ཁག་ཅིག་གིས་ཟ་ཁང་དང་ཚོང་ཁང་བཟུང་སྟེ་འཚོ་བ་སྐྱེལ་གྱི་ཡོད་པ་རེད། སློབ་སྦྱོང་གང་འཚམ་ཐོན་པའི་ན་གཞོན་ལས་མེད་ཁག་ཅིག་གིས་ཡུལ་མིའི་ལས་ཁུངས་དང་སློབ་གྲྭའི་ནང་ལས་ཀ་བྱེད་ཀྱི་ཡོད་པ་རེད། སིལ་ཚོང་དང་རྒྱན་ཆ་སོགས་ཀྱི་ཚོང་རྒྱག་མཁན། རྟ་འཁྲིད་དེ་ཡུལ་སྐོར་བ་ཡར་སྐྱེལ་མར་ལེན་བྱེད་མཁན་བཅས་རེད། བྱང་ཐང་ཁུལ་གྱི་བོད་མི་ཚོས་ར་ལུག་དང་། ཤ་དང་པགས་པ། མར། ཆུར་བ་སོགས་བཙོང་སྟེ་འཚོ་བ་སྐྱེལ་བསྡད་ཡོད་པ་རེད།

དྲི་བ། ལ་དྭགས་ནང་བོད་མིའི་སློབ་གྲྭ་ཁག་ག་ཚོད་ཅིག་ཡོད་དམ། སློབ་སྦྱོང་གི་གནས་སྟངས་དང་སློབ་མའི་གྲངས་འབོར་གང་འདྲ་ཡིན་ནམ།

ལན། ༸གོང་ས་མཆོག་དང་། ཨ་མ་ལྷ་ལྕམ་མཆོག་གི་བཀའ་དྲིན་ལ་བརྟེན་ནས་ལ་དྭགས་ནང་བོད་ཕྲུག་ཁྱིམ་སྡེའི་སློབ་གྲྭ་གསར་འཛུགས་གནང་སྟེ། འཛིན་རིམ་བཅུ་བ་བར་རིན་མེད་ཐོག་སློབ་སྦྱོང་གནང་ཐུབ་ཀྱི་ཡོད་པ་རེད། ཕྲུ་གུ་རེ་ཟུང་ཕ་མས་གཏོང་གི་མེད་པ་མ་གཏོགས། ཚང་མར་གོ་སྐབས་སྤྲད་དེ་སློབ་སྦྱོང་མི་རག་པའི་དཀའ་ངལ་ཡོད་པ་མ་རེད། ད་ཆར་འདིར་བོད་ཕྲུག་ཁྱིམ་སྡེའི་སློབ་གྲྭ་ཆེ་བ་གཅིག་དང་། ལྕོག་ལམ་སར་བོད་ཁྱིམ་སློབ་གྲྭའི་ཡན་ལག་ཁག་ ༣ ། བྱང་ཐང་དུ་བོད་ཁྱིམ་སློབ་གྲྭའི་ཡན་ལག་ཁག་ ༣ བཅས་སློབ་གྲྭ་ཁག་ ༧ ཡོད། ཚང་མའི་འཛིན་སྐྱོང་བོད་ཁྱིམ་རང་གིས་གནང་གི་ཡོད་པ་རེད། སློབ་མའི་གྲངས་འབོར་བོད་ཁྱིམ་སློབ་གྲྭ་ཆེ་བའི་ནང་སློབ་མ་ ༡༥༠༠ ཡས་མས་ཤིག་དང་ཡན་ལག་ཁག་བཅས་ཁྱོན་བསྡོམས་སློབ་ཕྲུག་ ༢༣༠༠ ཡས་མས་ཡོད་པ་རེད།

དྲི་བ། ལ་དྭགས་ནང་བོད་པའི་དགོན་སྡེ་ཁག་དང་ཆོས་རྒྱུད་ག་ཚོད་ཅིག་ཡོད་དམ། སློབ་གཉེར་གྱི་གནས་སྟངས་དང་གྲྭ་བའི་གྲངས་འབོར་གང་འདྲ་ཡིན་ནམ།

ལན། ང་ཚོ་གཞིས་སྤྱི་ལས་ཁུངས་ཁྱབ་ཁོངས་སུ་བཀའ་རྒྱུད་དགོན་པ་དང་རི་ཐོག་དགོན་པ། བོན་པོ་དགོན་པ་བཅས་གསུམ་ཡོད། རི་ཐོག་དགོན་པར་བླ་གྲྭ་ ༣༠ ཙམ་ཡོད་པ་རེད། བཀའ་རྒྱུད་དགོན་པར་བོད་རིགས་གྲྭ་བ་བཅུ་གྲངས་ཤིག་ལས་ཡོད་པ་མ་རེད། དེ་མིན་ཧི་མ་ལ་ཡའི་རི་རྒྱུད་ཀྱི་གྲྭ་བ་རེད། བོན་དགོན་པར་བོད་པའི་དགེ་བཤེས་གཅིག་མ་གཏོགས་ཡོད་པ་མ་རེད། དགོན་སྡེ་དེ་དག་ནང་བླ་གྲྭ་ཧ་ཅང་ཉུང་ཉུང་རེད། ཆོས་རྒྱུད་ས་དགེ་བཀའ་རྙིང་།བོན་དང་བཅས་པ་ཡོད་པ་རེད། མི་མང་ནང་ཤུགས་ཆེ་ཤོས་དགེ་ལུགས་དང་བཀའ་རྒྱུད་རེད། དགོན་སྡེ་ཁག་གི་སློབ་སྦྱོང་གི་གནས་སྟངས་ངས་གསལ་བོ་ཞུ་ཐུབ་ཀྱི་མེད།

དྲི་བ། ལ་དྭགས་ནང་བོད་པའི་རྒན་གསོ་ཁང་ག་ཚོད་ཅིག་ཡོད་དམ། རྒན་པའི་གྲངས་འབོར་དང་ཁོང་ཚོའི་འཚོ་བའི་མཐུན་རྐྱེན་གང་འདྲ་ཡིན་ནམ།

ལན། ང་ཚོ་འདིར་སླེ་ཁུལ་དང་བྱང་ཐང་བཅས་རྒན་གསོ་ཁང་ཁག་གཉིས་ཡོད། རྒན་གསོ་ཁང་གི་ཐད་ཀར་སྟངས་འཛིན་བོད་ཁྱིམ་གྱིས་གནང་གི་ཡོད་པ་རེད། སླེ་རྒན་གསོ་ཁང་ནང་རྒན་རྒོན་ ༣༡ ལྷག་དང་། བྱང་ཐང་རྒན་གསོ་ཁང་དུ་རྒན་རྒོན་ ༡༨ ཡོད་པ་རེད། ཁོང་ཚོའི་ཟ་འཐུང་དང་སྡོད་གནས། དམིགས་བསལ་འཕྲོད་བསྟེན་ལྟ་སྐྱོང་དང་ཞབས་ཞུ་གནང་མཁན་བཅས་ཀྱི་མཐུན་རྐྱེན་ཧ་ཅང་ཡག་པོ་ཡོད་པ་རེད། གཞིས་ཆགས་ཁག་ཁྱོན་ཡོངས་སུ་རྒན་རྒོན་ ༡༠༠༠ ལྷག་ཡོད་ཀྱང་། བོད་མིའི་ཐུན་མོང་མ་ཡིན་པའི་རིག་གཞུང་དང་བཟང་སྤྱོད། སོ་སོའི་ཕ་མ་སོ་སོས་བལྟ་རྒྱུའི་ཡ་རབས་ཀྱི་གོམས་གཤིས་འདིར་ཤུགས་ཆེན་པོ་ཡོད་སྟབས། ད་ལྟའི་བར་ང་ཚོ་གཞིས་སྤྱི་ལས་ཁུངས་ཀྱིས་ཕྲུ་གུ་དང་གཉེན་ཉེ་སོགས་ལྟ་རྟོག་བྱེད་མཁན་ཡོད་པའི་རྒན་རྒོན་རིགས་རྒན་གསོ་ཁང་ནང་འཇུག་རྒྱུའི་རྒྱབ་གཉེར་སྤྲོད་ཀྱི་མེད།

ལན། དེར་གཞུང་དང་སྒེར་བཅས་ལྟ་ཕྱོགས་གཉིས་ཡོད་པ་རེད། ང་རང་ལ་མཚོན་ན་འདིར་འཚར་ལོངས་བྱས་ཏེ་མི་ཚེ་བསྐྱལ་བ་རེད། ད་ལྟ་ང་རང་འོས་འདེམས་བྱས་ནས་ས་གནས་མགོ་འཛིན་དུ་བསླེབ་ཏེ་སྐབས་གཉིས་པའི་ལོ་ལྔ་བ་དེ་ཡིན། སྒེར་གྱི་ཕྱོགས་ནས་འཆམ་པོ་མཐུན་པོ་ཡོང་གི་ཡོད། ༸གོང་ས་མཆོག་གི་བཀའ་དྲིན་ལ་བརྟེན་ནས་སོ་སོའི་སྤྱི་ཚོགས་ནང་ལས་ཀ་བྱེད་བསྡད་སྟབས། ང་ཚོས་ཕྱི་ཕྱོགས་སུ་དམིགས་བསལ་འབྲེལ་བ་བྱེད་སྡོད་དགོས་པ་ཡོད་མ་རེད། གང་ཡོད་པ་དེ་སོ་སོའི་ངོ་ཤེས་དང་ཁྱིམ་འཚེས། གཉེན་ཉེ་གྲོགས་པོ་ཚོ་རེད། ལས་ཁུངས་ནང་སྒྲིག་འཛུགས་དང་མི་མང་གི་ངོ་ཚབ་བྱས་ནས་ལས་ཀ་བྱེད་སྐབས། ཕྱི་ཕྱོགས་སུ་འབྲེལ་བ་མང་དག་ཅིག་བྱེད་དགོས་ཀྱི་འདུག བཙན་བྱོལ་བོད་མིའི་ཆབ་སྲིད་གནས་བབ་ཀྱི་ཆ་ནས་ང་ཚོ་ཡུལ་མི་མིན་སྟབས། གང་ལ་གང་འཚམ་ཞིག་ང་ཚོར་ཡིག་ཆ་མེད་པ་ཡིན་ན་བྱེད་རྒྱུ་ཡོད་མ་རེད། དེ་འདྲའི་ཐོག་ནས་འགོག་རྐྱེན་ཏོག་ཙམ་ཡོང་བསྡད་ཀྱི་འདུག ཡུལ་མི་མིན་ཚེ་ཐོབ་ཐང་རྩོད་རྒྱུ་ཡོད་མ་རེད། ཡིན་ནའང་། དཔོན་རིགས་དང་མཉམ་དུ་མི་དང་མིར་འབྲེལ་བ་བྱས་པའི་ཐོག་ནས་ཡར་ཞུ་མར་གནང་སྐབས་རྒྱབ་གཉེར་ཡག་པོ་ཡོད། སྤྱི་ཡོངས་ཀྱི་ཆ་ནས་ང་ཚོ་ཆུང་དུས་ནས་མཉམ་དུ་གཤིབ་དེ་སྐད་གོ་བརྡ་མ་འཕྲོད་པ་མེད་སྟབས། ཧ་ཅང་འཆམ་པོ་ཡོད། གང་ཟག་གི་སྒང་ལ་མར་ཕབ་ཡོང་སྐབས། བྱེད་སྟངས་དང་བཤད་སྟངས་སོགས་ཀྱི་ཐོག་ནས་འགྲིག་མ་འགྲིག་ཡོང་བསྡད་ཀྱི་འདུག ང་ཚོ་བོད་པའི་གཞིས་ཆགས་གཞན་དང་མི་འདྲ་བར་བརྒྱ་ཤོག་མང་ཆེ་བ་ཡུལ་མིར་འདྲེས་བསྡད་ཡོད་པ་རེད། བྱང་ཐང་གི་འབྲོག་སྡེ་ཁག་གིས་ཀྱང་ནོར་ལུག་མཉམ་དུ་འཚོ་བཞིན་ཡོད་པ་རེད། ང་རང་གི་ངོས་ནས་འཆམ་པོ་མཐུན་པོ་ཡོད་བསམ་གྱི་ཡོད།

དྲི་བ། ལ་དྭགས་ནང་བོད་མི་དང་ཡུལ་མིའི་བར་གཉེན་གྱི་འབྲེལ་བ་མེད་པའི་གནས་ཚུལ་འདུག དེའི་རྒྱུ་མཚན་གང་ཡིན་ནམ།

ལན། ཡུལ་མིའི་མཉམ་དུ་གཉེན་སྒྲིག་བྱས་ནས་མི་རིགས་འདྲེས་པར་གནད་འགག་དེ་འདྲ་ཡོད་མ་རེད། ཕྱི་རྒྱལ་དང་ཚང་མར་སོ་སོའི་རང་དབང་རེད།ཡིན་ནའང་། འདིར་ཧ་ཅང་ཉུང་ཉུང་རེད། རྒྱུ་མཚན། གཅིག་ཡུལ་ཡོད་མཁན་དང་གཅིག་ཡུལ་མེད་མཁན་གྱི་གནས་སྟངས་ཆགས་ཡོད་སྟབས། བུ་ཕྲུག་འཚར་ལོངས་ཐོག་དཀའ་ལས་མང་དག་ཅིག་འཕྲད་ཀྱི་ཡོད་པ་རེད་ལ། ཡིག་ཆའི་ཐོག་ནས་བུ་ཕྲུག་ལ་དཀའ་ངལ་མང་པོ་འཕྲད་ཀྱི་ཡོད་པ་རེད། སྐྱབས་བཅོལ་ལ་དེའི་གནས་སྟངས་ཀྱི་ཐོག་ནས་ཐོབ་ཐང་མང་པོ་ཞིག་ཡོད་པ་རེད། དེ་ཚོ་རག་མིན་རེད། ཡུལ་མིའི་སྐད་ཆ་བཤད་ཡོང་སྐབས། ཡུལ་མིན་ཡིན་མིན་གྱི་ཐོག་ནས་བུ་ཕྲུག་ལ་དཀའ་ངལ་མང་པོ་འཕྲད་ཀྱི་ཡོད་པ་རེད། དེ་འདྲའི་ཐོག་ནས་སེམས་དང་སེམས། བློ་དང་བློ་མཐུན་ཡང་། གཉེན་སྒྲིག་དང་བུ་ཕྲུག་ཐོག་བསམ་བློ་གཏོང་སྐབས་ཁྱད་མཚར་ཆགས་འགྲོ་གི་ཡོད་པ་རེད། དེ་ང་རང་སྒེར་གྱི་བསམ་ཚུལ་ཡིན།

དྲི་བ། ལ་དྭགས་ས་གནས་བོད་མིའི་གཞིས་ཆགས་ཁག་ཏུ་ཁྱོན་གཞིས་མགོ་ག་ཚོད་ཅིག་ཡོད་དམ། གཞིས་མགོ་འདེམས་སྟངས་གང་འདྲ་ཡིན་ནམ།

ལན། ལ་དྭགས་བསོད་ནམས་གླིང་བོད་མིའི་གཞིས་ཆགས་དེ་གཞིས་ཆགས་གཅིག་ཏུ་བརྩི་གི་རེད། ལས་ཀའི་ཁྱབ་ཆེ་ཆུང་ཐོག་ནས་སི་རེ་ན་གྷར་ནས་བོད་ཀྱི་ས་མཚམས་བར་རྙོབ་དགོས་ཀྱི་ཡོད་པ་རེད། སླེ་ཁུལ་ཡིན་ན་ཉེ་བོ་རེད། ཉིན་ཕྱེད་ཀའི་ནང་བསྐོར་བ་རྒྱག་ཐུབ་པ་ཞིག་རེད། བྱང་ཐང་འབྲོག་སའི་ས་ཁུལ་ཀེ་ལོ་མུ་ཊར་ ༢༠༠ དང་ ༣༠༠ བྱས་ཏེ་ལོག་གར་བསྡད་ཡོད་པ་རེད། དེ་དག་ལ་མི་ཉུང་ཉུང་ཡིན་ཡང་། བར་ཐག་ལ་བལྟ་སྐབས་གཞིས་ཆགས་ལོག་གའི་རྣམ་པ་ཡོད་པ་རེད། བྱང་ཐང་སླེ་ཁུལ་གྱི་གཞིས་ཆགས་དགུ་བོ་རེད། དེ་སྔ་བྱང་ཐང་འབྲོག་སྡེ་ཁག་ལ་ས་གནས་མགོ་འཛིན་གཅིག་དང་། སླེ་ཁུལ་དུ་ས་གནས་མགོ་འཛིན་གཅིག་བྱུང་འདུག རྗེས་སུ་ཁུ་བསྡུ་བྱས་ཏེ་ལས་ཁུངས་འདིར་ལ་སྤྱི་ཞེས་བཏགས། གནས་རིམ་ཡང་ཟུང་དྲུང་ཞིག་བཏང་། དེ་ལྟར་ཚང་མར་ས་གནས་མགོ་འཛིན་གཅིག་གིས་ཁྱབ་དགོས་ཀྱི་ཡོད་པ་རེད། འདིར་ལས་ཁུངས་ཡོད་པ་རེད། ཕར་ཕྱོགས་སུ་ལས་ཁུངས་ཡོད་མ་རེད། སྐོར་སྐྱོད་གནང་སྐབས་ཉིན་གཅིག་ཆས་པ་ཡིན་ན། ས་ཁག་རེར་ཉིན་རེར། ཉིན་གཉིས་ལམ་ཁ་བཅས་ཉིན་བཅུའི་རྗེས་སུ་མ་གཏོགས་ལོག་ཐུབ་ཀྱི་ཡོད་མ་རེད། ལོ་གཅིག་ནང་ཉིན་དྲུག་ཕྱིན་ཚེ་ཉིན་ ༦༠ དང་། ཟླ་རེར་ཉིན་རེར་ཕྱིན་ཚེས་ཉིན་ ༡༢༠ དེ་ལྟར་ལྟ་དགོས་པའི་ལས་འགན་ཆགས་ཀྱི་ཡོད་པ་རེད། འཛིན་སྐྱོང་གི་བྱེད་སྟངས་དེ་འདྲ་རེད། གཞིས་སྤྱིའི་ཆ་ནས་ད་ལྟའི་བར་གཞིས་མགོ་ ༡༧ བྱུང་བ་ཚང་མ་དབུས་བོད་མིའི་སྒྲིག་འཛུགས་ཀྱིས་ཚུར་བཏང་བ་རེད། ༢༠༠༩ ལོར་མི་མང་གིས་སྙན་ཞུ་ཕུལ་ཏེ། ༸གོང་ས་མཆོག་གིས་དམངས་གཙོ་གསོལ་རས་གནང་བ་ལྟར་གཞིས་མགོ་མི་མང་གི་འོས་འདེམས་ཀྱི་ལམ་ནས་ས་གནས་རང་གི་མི་བསྐོས་པ་ཡིན་ན། ས་རྒྱུས་མི་རྒྱུས་ཡོད་པའི་ཆ་ནས་མི་མང་ལ་ཕན་ཐོགས་ཐུབ་ཀྱི་རེད་ཅེས་བཤད་དེ། ༢༠༡༠ ལོར་འོས་བསྡུ་ལས་ཁང་ལ་བཀའ་འབྲེལ་གྱི་འོས་ཤོག་ཞུས་ཏེ། སླེ་གྲོང་སྡེ་ ༡༢ དང་བྱང་ཐང་ས་ཁུལ་ ༨ བཅས་ནས་འོས་ཤོག་བླུགས་ཏེ་ངར་བརྒྱ་ཆའི་ ༧༨ ཐོབ་པ་རེད། ལོ་གསུམ་རིང་ང་ལ་འཛིན་སྐྱོང་སོགས་ཀྱི་ཐད་ཉམས་མྱོང་མེད་ཀྱང་། ༸གོང་ས་མཆོག་གི་ཐུགས་དགོངས་དང་། བོད་མིའི་སྒྲིག་འཛུགས་ཀྱི་བཀའ་དྲིན། རྒྱ་གར་གཞུང་། སོ་སོའི་རོགས་ཚོགས་ཀྱི་བཀའ་དྲིིན་བཅས་ལ་བརྟེན་ནས་འཐུས་མ་ཤོར་བ་བྱུང་བ་རེད། ༢༠༡༢ ལོའི་ལོ་མཇུག་ཡང་བསྐྱར་བརྒྱ་ཆའི་ ༩༥ འོས་ཤོག་ཐོབ་ཏེ་མུ་མཐུད་ལས་ཀ་བྱེད་བསྡད་ཡོད།

ལན། ང་རང་གིས་ལོ་ལྔ་རིང་རིང་ལས་ཀ་བྱས་པ་རེད། ༸གོང་ས་མཆོག་གི་བྱིན་རླབས་དང་ལམ་འགྲོ། ལས་བྱེད་ལས་རོགས་ཚོས་མཉམ་རུབ་བཅས་ཀྱི་ཐོག་ལས་ཀ་འཐུས་མ་ཤོར་བར་ད་ལྟ་འགྲོ་བསྡད་ཀྱི་ཡོད། དུས་ཡུན་དེའི་རིང་དུས་ནས་དུས་སུ་ལམ་སྟོན་ཞུས་ཡོད་ལ། ག་དུས་ཡིན་ཡང་ང་ཚོར་དམིགས་བསལ་གྱི་ལམ་སྟོན་གནང་ཡོང་གི་ཡོད། བཀའ་ཤག་སྔོན་མ་དང་ད་ལྟའི་བཀའ་ཤག་གི་ཁྱད་པར་ཐད་ནས་བཤད་ན། བཀའ་ཤག་སྔོན་མའི་སྐབས་སུ་ང་གསར་བ་ཡིན་སྟབས། ལམ་སྟོན་མང་པོ་རག་གི་ཡོད། ད་ལྟའི་ཆར་བཀའ་ཤག་སྔོན་མ་ལས་ལམ་སྟོན་ཉུང་བ་ཡོང་གི་ཡོད།

ལན། མི་མང་དང་ང་ཚོའི་བར་གྱི་འབྲེལ་ལམ་ཧ་ཅང་ཡག་པོ་ཡོད། ང་ཚོའི་མི་མང་ལས་ཁུངས་ལ་ཡོང་རྒྱུ་ཧ་ཅང་དགའ་བོ་འདུག མང་པོ་ཞིག་གིས་ལས་ཁུངས་ལ་ཡོང་རྒྱུ་སྔོན་མ་ལས་སྟབས་བདེ་བོའི་ཚོར་བ་འདུག་ཅེས་བཤད་ཀྱིན་པའི་སྐད་ཆ་གོ་སོང་། ང་རང་གི་བལྟས་ན་གཙོ་ཆེ་ཤོས། ང་ཚོ་ལས་ཁུངས་མི་མང་གི་དཀའ་ངལ་སེལ་ཆེད་རེད། མཚམས་ལམ་རེར་མི་མང་ཁ་ཤས་ཀྱིས་རྒྱུ་ངོམས། དཔུང་པ་ངོམས། སློབ་སྦྱོང་ངོམས་ནས་ཡོང་གི་འདུག དེ་ཚོར་ཁོ་རང་ཚོ་དང་དཔག་པའི་སྐད་ཆ་བཤད་སྟངས་དང་འགྲོ་སྟངས་ཤིག་གི་ཐོག་འགྲོ་བསྡད་ཀྱི་ཡོད། མང་ཆེ་བ་མི་མང་ཉམས་ཆུང་མགོ་མ་ཚོས་མཁན་དེ་ཚོ་རེད། དེ་ཚོ་ལས་ཁུངས་ནང་ཡོང་དུས་སྣེ་ལེན་དང་ཁ་ཡ་བྱེད་རྒྱུ། བསླབ་བྱ་རྒྱག་རྒྱུ། མགོ་མ་ཚོས་པ་དེ་ཚོས་པར་བཟོ་རྒྱུ་ཧ་ཅང་གལ་ཆེན་པོར་བརྩི་བཞིན་ཡོད་ལ། ངས་ལས་བྱེད་ཚོར་ཡང་ལམ་སྟོན་དེ་ལྟར་ཞུས་ཡོད། དེ་ལྟར་ཡག་པོ་བྱས་སྐབས་ཁོ་ཚོར་ཕན་ཐོགས་དང་དགའ་བོ་བྱས་ནས་ལས་ཁུངས་ནང་ཡོང་བ་འཛེམ་ཟོམ་མེད་པར། རེ་བ་ཆེན་པོ་བརྒྱབ་ནས་ཡོང་གི་འདུག

དྲི་བ། གཞིས་སྤྱི་ལས་ཁུངས་དང་ཇམ་ཀ་ཤི་མུར་མངའ་སྡེ་གཞུང་། ལ་དྭགས་སླེ་རྫོང་བཅས་ཀྱི་འབྲེལ་ལམ་གང་འདྲ་ཡིན། ཁོང་ཚོའི་ངོས་ནས་བོད་མི་ཚོར་དམིགས་བསལ་གྱི་མཐུན་འགྱུར་གང་དག་གནང་གི་ཡོད།

ལན། ཇམ་མུ་ཀ་ཤི་མུར་མངའ་སྡེ་དང་ལ་དྭགས་སླེ་རྫོང་བཅས་དང་འབྲེལ་ལམ་ཡག་པོ་ཡོད། མཐུན་འགྱུར་གྱི་ཕྱོགས་ནས་གཞིས་ཆགས་ཐོག་མར་འཛུགས་སྐབས། མངའ་སྡེ་གཞུང་ནས་མི་མང་ལ་ཆུ་དང་ཟ་མ། གློག བསྡད་ས་བཅས་ང་ཚོ་དཔལ་འབྱོར་གནས་སྟངས་ཛ་དྲག་པོ་ཡིན་སྐབས། གུར་དང་ཟ་མ་རིན་སོགས་མེད་ཐོག་སྤྲད་པ་དེ་བཀའ་དྲིན་ཆེན་པོ་རེད། རིམ་པས་༸གོང་ས་མཆོག་གི་བཀའ་དྲིན་ལ་བརྟེན་ནས་རྐང་ཚུགས་སྐབས། ཟས་རིགས་སྣུམ་ཉོ་བྱེད་ར་ཤིན་རིན་མེད་མིན་ཡང་། ར་ཤིན་ཡིག་ཆ་ལོ་རེར་བསྒྱུར་བཅོས་ཀྱི་ལམ་ནས་སྤྲོད་ཀྱི་ཡོད་པ་རེད་ལ། གློག་ཡུལ་མི་དང་གཅིག་མཚུངས་སྤྲོད་ཀྱི་ཡོད་པ་རེད། ཆུ་སྟོན་ཐོག་གི་ཞིང་ཁ་མེད་ཀྱང་། རྩྭ་འདེབས་སའི་ཡུག་རྭ་ཀེ་ལོ་མུ་ཊར་ ༡༢ ཡོད་པའི་ས་ཆ་དང་། དེར་ཆུ་སྤྲད་ནས་གཏོང་ཆོག་ཆོག་ཡོད་པ་རེད། འདས་པའི་ལོ་དེ་དག་རིང་ཆུའི་ཐོག་ནས་བརྒྱ་ཤོག་དང་བརྒྱ་ཤོག ཞིང་པ་དང་ཞིང་པ། ཡུལ་མི་དང་ང་ཚོ་འཁྲུག་པ་ཆེན་པོ་ཤོར་གྱི་ཡོད་པ་རེད། རྗེས་སུ་གཞིས་སྤྱི་རིམ་པས་འབད་བརྩོན་གནང་སྟེ་ལོ་གསུམ་གོང་དངུལ་ཀ་རོ་ ༨ གྱི་ལས་འཆར་བསླེབ་ཏེ་ཆུ་ཡུར་ལེགས་འགྲུབ་བྱུང་བ་རེད། ད་ཆར་དཀའ་ལས་མེད་པ་ཆགས་ཡོད། དེ་དག་གི་ཐོག་ནས་བཀའ་དྲིན་ཆེན་པོ་རེད། དེ་མིན་ཐད་ཀར་ལམ་ཀ་དང་སློབ་གྲྭ་བརྒྱབ་སོང་བ་དེ་འདྲ་དང་། བརྒྱ་ཤོག་རེ་རེར་ལམ་བཟོས་བཞག་པ་དེ་འདྲ་ཡོད་མ་རེད། དགོན་པ་དང་ང་ཚོའི་ལས་ཁུངས། བོད་ཁྱིམ་ཉེ་འཁྲིས་དེ་དག་ལ་ལམ་ཁ་ཆུང་ཆུང་འཁྲིད་ཡོད་པ་རེད།

དྲི་བ། ད་ལྟའི་ཆར་ལ་དྭགས་ས་གནས་བོད་མི་ཚོའི་དཀའ་ངལ་ཆེ་ཤོས་གང་ཡིན་ནམ།

ལན། དཀའ་ངལ་ཆེ་ཤོས་ན་གཞོན་ལས་མེད་རེད། དེ་སྤྱི་ཚོགས་གང་སར་ཡོད་ཀྱང་། འདིར་དཀའ་ངལ་ཤུགས་ཆེན་པོ་ཡོད། དེ་སྔ་ཞུས་པའི་ཚོང་ལས་བྱེད་མཁན་གྱི་རིགས་དེ་དག་ཟླ་བ་ ༡༢ ནང་གི་ཟླ་བ་ ༤ མ་གཏོགས་ལས་ཀ་ཡོད་མ་རེད། ཟླ་བ་ ༨ རིང་མི་མང་པོར་ལས་ཀ་ཡོད་མ་རེད། ལོ་གཅིག་གི་ཟླ་བ་བཞིའི་ནང་དཀའ་ལས་གང་བརྒྱབ་པ་དེས་ལོ་གཅིག་ལ་འདང་དགོས་ཀྱི་ཡོད་པ་རེད། དེ་ལྟར་དཔལ་འབྱོར་གནས་སྟངས་ཧ་ཅང་ཁག་པོ་རེད། ལས་ཀ་ཡོད་མཁན་ལ་དེ་འདྲ་ཁག་པོ་རེད། ལས་ཀ་མེད་མཁན་ལ་ཞུ་མ་དགོས་པ་རེད། ལས་ཀ་ཡོད་པ་ཡིན་ན། བོད་མི་ཚོས་དཀའ་ལས་རྒྱག་ཐུབ་ཀྱི་འདུག ལས་ཀའི་སྡིངས་ཆ་མེད་པ་ཡིན་ན། ཐབས་ཤེས་མེད་པ་དེ་འདྲ་རེད། ལས་ཀ་མེད་པའི་རྒྱུ་མཚན་ལ་བརྟེན་ནས་ན་གཞོན་མང་པོ་འཕྲོ་བརླག་ཏུ་འགྲོ་བཞིན་འདུག དེ་ཚོ་ངས་དཀའ་ངལ་ཆེན་པོ་དང་ཛ་དྲག་པོར་མཐོང་གི་འདུག ཐབས་ལམ་བཙལ་འགྲོ་དུས་ཐབས་ལམ་རྙེད་ཀྱི་མི་འདུག བློ་འཚབ་ཆེ་ཤོས་དེ་རེད། གཞན་གཅིག་ང་ཚོ་ཕྱི་གསལ་ནང་གསལ་རེད། ༸གོང་ས་མཆོག་ལའང་སྙན་སེང་ཞུས་པ་ཡིན། འདིར་གཞིས་ཆགས་ཀྱི་ས་ཆའི་ཐོག་ས་ཐོ་ལག་འཛིན་ཏག་ཏག་མེད་པའི་རྙོག་གྲ་རེད། ཞིང་སར་ས་ཐོ་ལག་འཛིན་ཡོད་པ་རེད། ཡིན་ནའང་། སོ་སོའི་ལག་པར་སྤྲད་མི་འདུག དེ་དཀའ་ངལ་ཆེན་པོ་རེད། ཁང་སའི་ས་ཐོ་ལག་འཛིན་གྲོང་པ་སོ་སོར་མི་འདུག དེའི་ཐོག་ནས་སླེ་རྫོང་གི་ང་ཚོར་རྙོག་གྲ་མང་པོ་ལབ་ཡོང་གི་འདུག ཡང་ཁག་ཅིག་གིས་༸གོང་ས་མཆོག་གི་བཀའ་དྲིན་འོག་རྒྱ་གར་གཞུང་གཡར་བཞག་པའི་ས་ཆ་བོད་པ་ཡུལ་མི་བར་དང་། བོད་པ་བོད་པར་བཙོང་གི་ཡོད་པ་རེད། དེའི་ཐོག་ཁ་མཆུ་དང་། བོད་པ་དང་ཡུལ་མི་བར་རྙོག་གྲ་མང་པོ་ཡོང་བསྡད་ཀྱི་ཡོད། དེ་དག་དཀའ་ངལ་ཆེན་པོ་ཡིན། དེ་ལའང་ཐབས་ལམ་འདི་ཞེས་བཤད་ཐུབ་ཀྱི་མི་འདུག

ལན། སྤྱིར་བཏང་ཁག་པོ་ཡོད་པ་ངས་ཤེས་ཀྱི་ཡོད། གནས་སྟངས་ཞུ་བ་ཡིན་ན། བྱང་ཐང་ས་ཁུལ་གྱི་འབྲོག་སྡེ་ཁག་གི་གཞིས་ཆགས་སྲ་བརྟན་སྐོར་ལ་ཞིབ་འཇུག་རིམ་པ་དང་འཆར་གཞི་མང་དག་ཅིག་གནང་བ་རེད། གང་འཚམ་ཞིག་བསྒྲུབས་ཡོད་ཀྱང་། གང་འཚམ་ཞིག་སྒྲུབ་ཐུབ་ཡོད་མ་རེད། བྱང་ཐང་ལ་མཚོན་ན་གཞིས་ཆགས་སྲ་བརྟན་ནང་ནས་འབྲོག་པ་སྲ་བརྟན་ཐོག་ད་ལྟའི་བཀའ་ཤག་གིས་ཤུགས་རྒྱག་གི་ཡོད་པ་རེད། རྒྱ་གར་གྱི་ཡུལ་མི་དང་ང་ཚོའི་འབྲོག་པ་གཉིས་ཀ་ཡོད་པ་རེད། ཡུལ་མིའི་འབྲོག་པར་རྒྱ་གར་གཞུང་དང་། ང་ཚོའི་འབྲོག་པར་ང་ཚོ་རང་གིས་ཤུགས་རྒྱག་གི་ཡོད་པ་རེད། ཁོ་ཚོ་དང་གཅིག་མཚུངས་ང་ཚོས་བྱེད་ཐུབ་ཀྱི་མ་རེད། བོད་མིའི་སྒྲིག་འཛུགས་ཀྱི་ངོས་ནས་འབྲོག་སྡེ་ཁག་ནང་ར་ལུག་གི་ཚང་དེ་འདྲ་དང་གློག་བཅས་ཀྱི་མཐུན་རྐྱེན་གནང་ཡོད་པ་རེད། ད་ལྟའི་ཆར་མི་མང་འདུ་འཛོམས་མང་པོ་ཡོང་བསྡད་ཀྱི་ཡོད་སྟབས། མང་པོ་ཞིག་ལ་སྤྱི་ཁང་ཡོད་མ་རེད། དེ་དག་ང་རང་གིས་གལ་ཆེན་པོར་མཐོང་གི་འདུག དེ་དག་བརྒྱབ་པ་ཡིན་མགོར་དཔག་པའི་སྔས་ཞིག་དགོས་ཞེས་པ་ལྟར། རེ་བ་རྒྱག་ས་ཡོད་བསྡད་པ་ཞིག་རེད། ཁོང་ཚོར་མངོན་འདོད་གང་ཡོད་པ་དེ་དག་ཡར་ཞུས་སྐབས། གང་ཡོང་ཅི་ཡོང་གནང་བ་ཡིན་ན། གཞིས་ཆགས་སྲ་བརྟན་དེ་སྲོལ་རྒྱུན་དང་མཐུན་པའི་འབྲོག་པ་སྐྱོང་རྒྱུ་དང་། བཀའ་དྲིན་ཆེན་པོ་ཡོང་གི་རེད་བསམ་གྱི་འདུག སླེ་ཁུལ་ལ་མཚོན་ན་ལས་མེད་རེད། ང་ཚོའི་དམིགས་བསལ་ཤེས་ཀྱི་མི་འདུག མཁས་དབང་གོ་བསྡུར་གྱི་ཐོག་ནས་གང་དགའ་ཇི་ལེགས་ཤིག་གནང་རྒྱུ་དང་རིག་པ་སྒྲིམ་རྒྱུ་ཧ་ཅང་གལ་ཆེན་པོ་འདུག

དྲི་བ། ལ་དྭགས་ནང་ཡོད་པའི་བོད་པའི་གཞོན་སྐྱེས་ཚོས་བོད་པའི་སྐད་ཡིག་གཙོས། ཆོས་དང་རིག་གཞུང་ལ་དོ་སྣང་གང་འདྲ་འདུག་གམ།

ལན། ང་རང་གཞིས་ཆགས་གང་སར་གཞུང་སྒེར་གྱི་དོན་དུ་འགྲོ་བསྡད་ཀྱི་ཡོད། དེ་དག་དང་བསྡུར་ན་ཡག་པོ་འདུག་བསམ་བསྡད་ཡོད། གཙོ་བོ་དྲིན་ཆེན་ཕ་མའི་བསླབ་བྱ་དང་གཤིས་ཀ ལམ་སྟོན་བཅས་ཁག་ཅིག་གིས་བསླབ་ནས་སྦྱོང་བ་དང་ཁག་ཅིག་བལྟས་ནས་སྦྱོང་རྒྱུ་རེད། འདི་གའི་མི་མང་རེ་ཟུང་མ་གཏོགས་ཧ་ཅང་ཉམས་ཆུང་རེད། དེ་ནས་བོད་དང་ཉེ་བོ་ཡོད་པ་དང་། སྔོན་མའི་གོམས་གཤིས་སོགས་འདི་གའི་མི་ཚང་མའི་སྐད་དང་བཅས་བ་འབྲོག་པ་འདྲ་བོ་ཡོད་པ་རེད། སྐྱབས་བླ་མ་དཀོན་མཆོག་ལ་བཅོལ། གྲོ་དྲིན་ཆེན་ཕ་མར་དྲིས་ཟེར་བ་ལྟར་བཟང་སྤྱོད་ཀྱི་འགྲོ་སྟངས་ཕ་མས་རྒྱུན་ཆགས་ཡག་པོ་གཞོན་སྐྱེས་ཚོར་འཇགས་ཡོད་པ་རེད། དེའི་ཐོག་༸གོང་ས་མཆོག་གི་བཀའ་དྲིན་ལ་བརྟེན་ནས་ག་ས་གང་དུ་སློབ་སྦྱོང་བྱས་ཏེ། འདིར་སྤྱི་བའི་ལས་ཀ་བྱས་འགན་འཁུར་བའི་རིགས་མང་པོ་ཡོད། སྐད་ཡིག་ཐོག་ནས་བོད་ནང་དང་གཞན་པར་བསྡུར་ཐབས་མེད་ཀྱང་། གཞིས་ཆགས་ཀྱི་མི་མང་དཀྱུས་མའི་ངོས་ནས་བོད་སྐད་ནང་བསྲེས་ལྷད་སོགས་ཀྱི་རིགས་མེད་པར། སྤོབས་པ་ཆེན་པོས་རང་གི་སྐད་དང་ཡི་གེར་དོ་སྣང་ཤུགས་ཆེན་པོ་ཡོད།

དྲི་བ། ལ་དྭགས་ནང་ལ་དྭགས་ཡོངས་ཀྱི་ནང་པའི་ཚོགས་པ་དབང་ཆ་ཆེ་ཤོས་སུ་བགྲང་གི་འདུག ཁོང་ཚོའི་ངོས་ནས་བོད་མི་ཚོར་དམིགས་བསལ་མཐུན་འགྱུར་དང་རོགས་རམ་ག་རེ་གནང་གི་འདུག་གམ།

ལན། དེར་ལྟ་ཚུལ་གཉིས་ཡོད་པ་རེད། ལྟ་ཚུལ་གཅིག་ཚོགས་པ་དེ་གཞུང་འབྲེལ་མ་ཡིན་པའི་ཚོགས་པ་རེད། ཇམ་མུ་ཀ་ཤི་མུར་མངའ་སྡེའི་ནང་བརྒྱ་ཆ་ ༧༠ ནང་པ་རེད། བོད་པ་ནང་པ་རེད། ང་ཚོའི་གཞིས་ཆགས་ཐོག་མར་མགོ་འཛུགས་གནང་སྟེ་ས་ཆ་ཁག་སོ་སོར་བཀྲམས་འགྲོ་སྐབས། ནང་པའི་བླ་སྦྲུལ་ཁང་གིས་ང་ཚོ་ཆོས་དང་རིག་གཞུང་གཅིག་པ་ཡིན་སྟབས། འདིར་བཞུགས་ན་ཡག་པོ་ཡོད་པ་རེད་ཅེས་ཞུས་ཏེ་ཚུགས་ཡོད་སྐོར་མི་རྒན་པ་ཚོས་གསུང་གི་འདུག ཆོས་དང་སྐད་ཡིག་གཅིག་པ་ཡིན་པའི་ཆ་ནས་ང་ཚོ་༸གོང་ས་མཆོག་གི་སྐུའི་འཁྲུངས་སྐར་སྲུང་གཙི་ནས་བཟུང་སྟེ་ལས་ཀ་མང་ཆེ་བ་མཉམ་རུབ་ཀྱིས་བྱེད་ཀྱིན་པ་རེད། ཁོང་ཚོའི་ལས་གཞི་གང་ཡོད་པ་དེར་ང་ཚོ་མཉམ་རུབ་བྱེད་ཐུབ་པའི་གནས་བབ་ཆགས་ཀྱི་ཡོད་མ་རེད། གང་ཡིན་ཞེ་ན། ད་ལྟ་ང་ཚོ་ཆབ་སྲིད་གནས་བབ་ཀྱི་ཆ་ནས་བཙན་བྱོལ་བ་རེད། ཁོང་ཚོ་ཡུལ་ཡོད་མཁན་རེད། ཆབ་སྲིད་དང་འབྲེལ་བའི་གནས་ཚུལ་ཐོག་ལ་ང་ཚོ་མཉམ་རུབ་བྱེད་ཐུབ་ཀྱི་མ་རེད་ལ། བྱེད་ཀྱི་མ་རེད། ཆོས་ཕྱོགས་ནས་དགོན་ཚོགས་དང་ནང་ཚོགས་གཉིས་ཀྱི་ཆོས་ཕྱོགས་ཀྱི་ལས་གཞི་ཁག་ནང་མཉམ་ཞུགས་བྱེད་ཀྱི་ཡོད། གཅིག་ཕན་གཅིག་གྲོགས་ཞེས་ཡིག་ཆ་སོགས་དཀའ་ངལ་དང་རྙོག་གྲ་གང་ཡིན་ཡང་། གཞུང་འབྲེལ་མིན་པའི་རིགས་ཞུས་ན་རྒྱབ་སྐྱོར་གནང་གི་རེད། ཡིན་ནའང་། གང་ཟག་སྒེར་བ་སོ་སོས་འབྲེལ་བ་བྱེད་ཕྱོགས་ཀྱི་ཐོག་ནས་འགྲིག་མ་འགྲིག་གི་གནས་ཚུལ་ཡོང་སྲིད་པ་རེད། ལས་ཁུངས་དང་ལས་འགན་འཁུར་མཁན་གྱི་གནས་བབ་ཐོག་ནས་འབྲེལ་ལམ་བྱས། ལས་ཀ་ཞིག་གི་ཐོག་རྒྱབ་སྐྱོར་བྱེད་དགོས་པའི་གནས་བབ་བྱུང་ན། དང་པོར་ཐོན་ནས་ཕྱག་ལས་གནང་གི་རེད།

ལན། རྒྱལ་ས་སླེ་རུ་བོད་མའི་ཁྲོམ་ས་ཁག་གཉིས་ཡོད་པ་རེད། ད་དུང་ཁ་འཐོར་གྱི་རིགས་དེ་འདྲ་ཡང་ཡོད་པ་རེད། ལྕོག་ལམ་སར་བོད་མིར་དམིགས་བསལ་གྱི་ཁྲོམ་ས་དེ་འདྲ་ཡོད་མ་རེད། བོད་པའི་ཚོང་ཁང་ཆུང་ཆུང་གི་རིགས་རྒྱ་ཤོག་ཁག་ཡོད་ས་ཚང་མར་ཡོད་རེད། དེ་མིན་གྱི་ས་གནས་ཁག་ནང་དམིགས་བསལ་གྱི་ཁྲོམ་ས་དེ་འདྲ་ཡོད་མ་རེད།

ལན། གནས་ཚུལ་དེ་བདེན་པ་རེད། མི་གཉིས་ཡོད་པ་ཡིན་ན། གཉིས་ཀས་ཚོང་དང་ལས་ཀ རླངས་འཁོར་གཏོང་བ་སོགས་ཡོང་སྒོ་གཅིག་མཚུངས་ཡིན་ཡང་། མི་ཀ་བ་དེ་ཚང་མ་ཕྱིར་བཏོན་ཡོང་མཁན་ཞིག མི་ཁ་བ་དངུལ་ཁང་སོགས་སུ་གསོག་སྒྲུབ་བྱེད་མཁན་ཞིག གཉིས་ཀ་གཅིག་པ་ཡིན་ཡང་། ཕར་ཕྱོགས་དེས་མིག་ལ་མི་མཛེས་པ་མང་པོ་ཞིག་བྱེད་ཡོང་སྐབས། མ་བདེ་བ་ཡོང་གི་ཡོད་རེད། ཡུལ་མི་ཚོར་དངུལ་མེད་པ་དེ་འདྲ་མ་རེད། ས་ཆ་དང་ཞིང་། ཁང་པ་བཅས་ཀྱི་བདག་པོ་ཁོང་ཚོ་རེད། ང་ཚོ་འགྲོ་སྲོལ་དོད་པོ་དེ་འདྲ་ཡོད་མ་རེད། ང་ཚོ་གང་ཡོད་པ་དེ་ཕྱིར་བཏོན་དེ་ཟིང་ཟིང་མང་པོ་བྱེད་ཡོང་སྐབས། ཡུལ་མི་ཁོ་ནར་མིན་པར་བློ་གཟུར་དུ་གནས་མཁན་ཞིག་གིས་བལྟས་ཀྱང་། འདྲ་མ་ཆགས་པ་མང་པོ་ཞིག་ཡོང་གི་ཡོད་པ་རེད། དེ་འདྲའི་གནས་ཚུལ་ཡོང་བསྡད་ཀྱི་ཡོད་པ་རེད། དཔེ་མཚོན་ཙམ་ཞུས་ན། ང་ཚོ་དང་ཡུལ་མི་གཉིས་ཀར་རླངས་འཁོར་གཅིག་མཚུངས་ཡོད་ཀྱང་། ང་ཚོའི་གཏོང་སྟངས་དེ་བྲེལ་བ་མེད་ཀྱང་བྲེལ་བ་ཡོད་མདོག སྐད་ཆེན་པོ་རྒྱག་མི་དགོས་ཀྱང་རླངས་འཁོར་གྱི་བརྡ་ཆེན་པོ་བརྒྱབ། སྦག་སྦག་ཡིན་ནའང་། བཟོ་གྲྭས་བཟོས་པ་དེར་བཟོ་བཅོས་བརྒྱབ་ཏེ་སྐད་ཆེན་པོ་བཟོས་པ་དེ་འདྲའི་ཐོག་ནས་མིག་ལ་མ་མཛེས་ཆགས་འགྲོ་གི་འདུག དེ་འདྲའི་ཐོག་ཕར་ཕྱོགས་ནས་བཀྱག་བཀྱག་བྱེད་ཀྱི་འདུག་བསམ་པ་དང་། ངོམས་ཀྱི་འདུག་བསམ་པའི་གནས་ཚུལ་ཐོག་ནས་རྙོག་གྲ་དེ་འདྲ་མང་པོ་ཡོང་བསྡད་ཀྱི་འདུག དེ་འདྲའི་ཐོག་ང་ཉེན་རྟོག་ལས་ཁུངས་ལ་ཐེངས་མང་པོར་འགྲོ་དགོས་ཐུག་སོང་ལ། མངའ་སྡེ་དང་རྫོང་གི་དཔོན་རིགས་མཉམ་དེ་འདྲའི་སྐོར་མང་པོ་བཤད་དགོས་ཐུག་སོང་། ང་ཚོའི་ངོས་ནས་ཚོགས་འདུ་ནམ་ཚོགས་ལ་༸གོང་ས་མཆོག་གིས་ཡུལ་མི་དང་མཐུན་ལམ་གནང་དགོས་པའི་སྐོར་གྱི་ བཀའ་སློབ་དྲན་སྐུལ་དང་འབྲེལ་ཏེ་རེ་སྐུལ་ཡང་ཡང་གནང་གི་ཡོད།

དྲི་བ། ལ་དྭགས་ཡུལ་མི་ཚོས་༸གོང་ས་མཆོག་མ་གཏོགས། བོད་མིའི་སྒྲིག་འཛུགས་ཀྱི་གནད་ཡོད་མི་སྣ་དང་མི་མང་ལ་ལྟ་ཚུལ་ཡག་པོ་མེད་པའི་སྐད་ཆ་བཤད་མཁན་འདུག ཁྱེད་རང་ལ་དེ་འདྲའི་ཚོར་སྣང་བྱུང་མྱོང་ངམ།

ལན། དེར་ལྟ་ཚུལ་གཉིས་ཡོད་པ་རེད། ང་འདིར་བསྡད་ཀྱི་ཡོད་པ་རེད། སྒེར་གྱི་གྲོད་ཁོག་ཆེད་ལས་ཀ་བྱས་ནས་བསྡད་པ་ཡིན། ས་གནས་མགོ་འཛིན་གྱི་ལས་ཀ་བྱས་ནས་ལོ་གང་འཚམ་བསྡད་པ་རེད། དཔེར་ན། ངེད་གཉིས་དེ་རིང་ཐུག་པ་རེད། ཁྱེད་རང་གིས་ང་གང་འདྲ་མཐོང་གི་ཡོད་མེད་དང་། ངས་ཁྱེད་རང་གང་འདྲ་མཐོང་གི་ཡོད་མེད་ཤེས་ཀྱི་ཡོད་མ་རེད། དང་པོ་ངོ་ཤེས་དང་མ་ཤེས་ཀྱི་གནས་སྟངས་ཐོག་ནས་གཅིག་རེད། དྲང་པོར་ཞུས་ན། དང་པོ་མི་འདྲིས་ཁག་པོ་ཡོད་པ་རེད། འདྲིས་པ་ཡིན་ན་ཡག་པོ་ཡོད་པ་རེད། གཅིག་ནས་འབྲེལ་བ་བྱེད་མ་བྱེད་རེད། འབྲེལ་བ་ཡོད་ན་ཕན་ཚུན་ཧ་གོ་ནས་ངོ་ཤེས་ཡོང་མིན་གྱི་གནས་སྟངས་རེད་བསམ་གྱི་འདུག ང་རང་གི་ངོས་ནས་འདྲིས་པ་ཡིན་ན་ཡག་པོར་མཐོང་གི་ཡོད། མ་འདྲིས་ན་བོད་པ་ཡིན་ཡང་མི་གཞན་གྱིས་དེ་འདྲ་མཐོང་གི་ཡོད་པ་རེད། བོད་པ་དང་ལ་དྭགས་བྱེད་སྟངས་ཀྱི་ཆ་ནས་མིའི་གཤིས་ཀ་འདྲ་བོ་ཡོད་རེད། ཆོས་དང་རིག་གཞུང་གི་གནད་དོན་གཅིག་རེད། མི་རིགས་གནད་དོན་ཡང་ས་མཚམས་ཤིག་ལས་འདྲ་བོ་རེད། ང་ཚོས་ཕར་དེ་འདྲ་མཐོང་བ་ནང་བཞིན། ཚུར་དེ་འདྲ་མཐོང་གི་ཡོད་པ་རེད། གཤིས་ཀ་འདྲ་བོ་ཡོད་རེད། འདྲིས་པ་ཡིན་ན་ཕན་ཚུན་ཧ་གོ་བའི་གནས་ཚུལ་དེ་འདྲ་ཡོང་བསྡད་ཀྱི་ཡོད་པ་རེད་ཞུ་རྒྱུ་ཡིན། ༸གོང་ས་མཆོག་མ་གཏོགས་བརྩི་གི་མི་འདུག་ཅེས་པ་དེ་ཁ་ཤས་ཀྱི་ཚོར་སྣང་ལ་ཡོང་ཡོད་སྲིད་པ་རེད། བཤད་མཁན་ཡང་ཡོང་བསྡད་ཀྱི་རེད། ངས་བལྟས་པ་ཡིན་ན། ང་ཚོའི་ལས་ཁུངས་བཙན་བྱོལ་བོད་མིའི་སྒྲིག་འཛུགས་ཀྱི་ལས་ཁུངས་རེད། ད་ལྟའི་བར་ང་ཚོའི་ལས་ཁུངས་ལ་མཐོང་ཆུང་དང་ཁྱད་གསོད་བཏང་བའི་ཚོར་སྣང་བྱུང་མ་སོང་། ཁོང་ཚོའི་ངོས་ནས་ང་ཚོའི་ལས་ཁུངས་ལ་བརྩི་བཀུར་གནང་གི་རེད། སྒེར་བའི་གནས་སྟངས་ཐོག་མར་ཕབ་ཡོང་སྐབས། སྤྱི་ཡོངས་ཀྱི་བོད་མི་རེད་ཅེས་འཁུར་དགོས་པ་ཡོད་མ་རེད། མཐོང་ཆུང་གཏོང་དགོས་པ་ཡང་ཡོད་མ་རེད། དེ་མང་པོ་ཞིག་མི་དང་མིའི་འབྲེལ་བ་དང་། ལྟ་ཕྱོགས་མཐོང་ཕྱོགས་ཀྱི་ཐོག་ནས་རེད། འདིར་བོད་པ་ཚོ་ཡང་སྤྱོད་པ་རྩུབ་པོ་ཡོད་པ་རེད། རྩུབ་པོ་དང་རྩུབ་པོ་ཐུག་ན་འཁོན་འཛིན་མང་པོ་ཞིག་ཡོང་བསྡད་ཀྱི་ཡོད་པ་རེད། ང་རང་གི་བལྟས་པ་ཡིན་ན་བོད་པ་ལ་མཐོང་ཆུང་གི་གནས་ཚུལ་དེ་འདྲ་ཡོད་མ་རེད། གཅིག་གིས་གཅིག་ལ་བསམ་ཤེས་དང་མི་དང་མིའི་འབྲེལ་ལམ་བྱེད་པ་ཡིན་ན། འདི་གཅིག་པུ་མ་རེད། ས་ཆ་གང་ཡིན་ཡང་། འབྲེལ་ལམ་ཧ་ཅང་གལ་ཆེན་པོ་རེད། སྐད་ཆར་བཤད་སྟངས་ཡོད་རེད། ཁྱེད་ཀྱི་བཤད་པ་ལྟར་ཡུལ་མིས་བོད་མི་ཚོར་ཤོར་པོ་ལབ་ན། ང་ཚོ་ཤོར་ནས་བསླེབ་པ་རེད། ང་རང་གིས་བལྟས་ན་དེར་མ་འགྲིག་པ་མི་འདུག་བསམ་གྱི་འདུག ཕར་ཕྱོགས་ལའང་གཅིག་ལབ་ཀྱི་ཡོད་པ་རེད། ཕར་ཡག་པོ་མེད་ན་ཚུར་ཡག་པོ་ཡོང་གི་མ་རེད། ང་ལ་དེ་འདྲའི་གནས་ཚུལ་མང་དག་ཅིག་ཡོང་གི་ཡོད། ངས་ཁ་ཐུག་ཐག་གཅོད་དང་། ཚོགས་འདུ་སོགས་ཀྱི་ལམ་ནས་ཐག་གཅོད་གནང་གི་ཡོད། ང་ཚོའི་བོད་པ་ཚོ་ཞེ་སྣང་ཚ་བོ་འདུག མི་ཁ་ཤས་ལས་ཁུངས་ནང་ཡོང་སྟེ་སྐད་ཆ་བཤད་སྐབས་ཞེ་སྣང་ཚ་བོ་དེ་འདྲ་འདུག དེ་དག་མང་ཆེ་བ་དཔལ་འབྱོར་དང་དཔུང་། སློབ་སྦྱོང་ཡོད་ཟེར་མཁན་དེ་འདྲ་རེད། མི་མང་དཀྱུས་མ་དེ་འདྲ་རྩ་བ་ཉིད་ནས་མ་རེད།

 གསར་འགོད་པ་དོན་གོས་ལ་དྭགས་རྒྱལ་ས་སླེ་ནས།