དཔལ་འབྱོར་ཡག་པོ་མེད་ན་ཁྱེད་ཅག་གི་འབོད་སྒྲ་གྲངས་ཉུང་མི་རིགས་ཀྱི་འབོད་སྒྲ་ཆཊ་འགྲོ།

ཁ་སང་བོད་མིའི་ཚོང་ལས་བདེ་ཚོགས་ཀྱིས་དྷ་སར་ཚོང་དོན་སྐོར་གྱི་ཟབ་སྦྱོང་ཞིག་དབུ་འཛུགས་གནང་ཡོད་ཅིང་། དབུ་འབྱེད་མཛད་སྒོའི་ཐོག་ཧི་མ་ཅལ་སྤྲོ་འཆམ་བློན་ཆེན་གྱིས་བོད་པ་སྐྱབས་བཅོལ་བ་ཚོས་རྒྱ་ནག་ལ་ཁ་གཏད་གཅོག་དགོས་ན་ཐོག་མར་སོ་སོའི་དཔལ་འབྱོར་སྲ་བརྟན་བཟོ་དགོས་པ་དང་། མ་འོངས་པར་དྷ་ས་ཁུལ་གྱི་ལམ་ཁ་སོགས་ཡར་རྒྱས་གཏོང་རྒྱུ་ཡིན་སྐོར་སོགས་བརྗོད་སོང་།

ཁ་སང་ཕྱི་དྲོའི་ཆུ་ཚོད་ ༣།༣༠ ཐོག་དྷ་ས་མེག་གྷན་ཧི་མ་ཅལ་སྤྲོ་འཆམ་ཚོགས་ཁང་(Himachal Tourism Club House)དུ། བོད་མིའི་ཚོང་ལས་བདེ་ཚོགས་ཀྱི་གོ་སྒྲིག་འོག དྷ་ས་ཁུལ་གྱི་ཚོང་པ་དང་སློབ་ཕྲུག་ཚོར། ཚོང་ལས་དོན་གཉེར་སྐོར་༼Entrepreneurship༽ཅེས་པའི་བརྗོད་གཞིའི་ཐོག་ཟབ་སྦྱོང་ཞིག་དབུ་འཛུགས་གནང་ཡོད་ཅིང་། སྐུ་མགྲོན་གཙོ་བོར་ཧི་མ་ཅལ་སྤྲོ་འཆམ་བློན་ཆེན་ཝུ་ཇའེ་སིན་མོང་གྷོ་ཌེ་ལགས་དང་། བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཙོ་སྤེན་པ་ཚེ་རིང་མཆོག ཟབ་སྦྱོང་སྤྲོད་མཁན་ཡུ་རོབ་མཐུན་ཚོགས་ཀྱི་དཔལ་འབྱོར་དང་སྤྱི་ཚོགས་ལྷན་ཚོགས་ཀྱི་ཚོགས་མི་ལྕམ་མཱ་ཌི་ཤར་མ་ ( Mrs.Madi Sharma)ལགས་དང་སཱེ་ཁཱོ་ལན་ཌི་དངུལ་ཁང་ལྷན་ཚོགས་ཀྱི་ཚོགས་མི་ཨཱ་ནཱ་རུ་ཛལ་( Mrs.Anna Ruzel) ལགས། ཧི་མ་ཅལ་ཚོང་དོན་ཁེ་ལས་ཀྱི་འགན་འཛིན་དང་ཧིན་བོད་མཛའ་འབྲེལ་ཚོགས་པའི་ཚོགས་གཙོ། གཞན་ཚོགས་ཞུགས་པ་དྷ་ས་ཁུལ་གྱི་བོད་རིགས་ཚོང་པ་དང་རྒྱ་གར་གྱི་ཚོང་པ། དེ་བཞིན། དངུལ་ཁང་ཁག་གི་འགན་འཛིན་བཅས་ཁྱོན་མི་ ༣༠ ཡས་མས་ཤིག་འཛོམས་སོང་།

དབུ་འཛུགས་མཛད་སྒོའི་ཐོག་མར་སྐུ་མགྲོན་གཙོ་བོ་ཧི་མ་ཅལ་སྤྲོ་འཆམ་བློན་ཆེན་གྱིས་སྣང་གསལ་སྒྲོན་མེ་ཞལ་འབྱེད་གནང་རྗེས། བོད་མིའི་ཚོང་ལས་བདེ་ཚོགས་ཀྱི་ཚོགས་གཙོ་བློ་བཟང་བླ་མ་ལགས་ཀྱིས་ཟབ་སྦྱོང་གི་དགོས་དམིགས་ངོ་སྤྲོད་གནང་དོན། ༢༠༠༥ ལོར་བོད་མིའི་ཚོང་ལས་བདེ་ཚོགས་འདི་གསར་འཛུགས་དང་འབྲེལ་ཚོགས་གཙོ་རིམ་པས་འབད་བརྩོན་བྱས་པར་བརྟེན། ད་ལྟ་སྒྲིག་འཛུགས་འདི་རྨང་གཞི་བརྟན་པོ་ཞིག་ཆགས་ཡོད་སྟབས། ང་ཚོས་གོམ་གང་མདུན་སྤོས་བྱས་ཏེ་རྒྱལ་སྤྱིའི་ཐོག་བོད་མིའི་ཚོང་ལས་བདེ་ཚོགས་ཀྱི་ངོ་བོ་མཚོན་ཐབས་དང་། དོན་གཉེར་ཅན་ཚོར་སློབ་སྦྱོང་སྤྲད་དེ་ཆེད་ལས་མི་སྣ་གསོ་སྐྱོང་བྱེད་ཐུབ་ཐབས་ལ་འབད་བརྩོན་བྱེད་དགོས་པ་མ་ཟད། རྒྱལ་སྤྱི་དང་རྒྱ་གར་གྱི་ཚོང་པ་ཚོ་དང་འབྲེལ་ལམ་བཟང་དུ་གཏོང་ཐབས་བྱ་དགོས། དེ་བཞིན། ཚོགས་པ་འདིས་བཟང་སྤྱོད་ལྡན་པའི་ཚོང་ལས་ཤིག་ཡོང་ཐབས་དང་ཚོང་ལས་ནང་བཟང་སྤྱོད་གོང་འཕེལ་གཏོང་ཐབས་བྱེད་བཞིན་ཡོད། བོད་པའི་སྤྱི་ཚོགས་འདི་ཚོང་ལས་དོན་གཉེར་བྱེད་མཁན་གྱི་སྤྱི་ཚོགས་ཆགས་ཏེ་ལོ་ངོ་ ༥༥ ལྷག་ཕྱིན་ཡོད་ཀྱང་ང་ཚོར་ཚོང་ལས་ཐོག་ཁ་ཕྱོགས་གསལ་པོ་མེད་པར་བརྟེན་ད་ལྟ་རྗེས་ལུས་ཐེབས་ཡོད་སྟབས། ང་ཚོས་རྒྱལ་སྤྱིའི་ཐོག་ཡིད་ཆེས་འཕེར་ངེས་ཀྱི་ཚོང་རོགས་བཙལ་རྒྱུ་དང་ཁེ་ལས་གང་མང་གསར་འཛུགས་བྱ་རྒྱུ་ཙམ་མིན་པར་ཕྱི་ཕྱོགས་ཀྱི་རྒྱབ་སྐྱོར་དང་ལམ་སྟོན་ དགོས་རྒྱུ་གལ་ཆེན་པོ་ཆགས་ཡོད། ཅེས་སོགས་བརྗོད་སོང་།

དེའི་རྗེས་སྐུ་མགྲོན་གཙོ་བོ་ཧི་མ་ཅལ་སྤྲོ་འཆམ་བློན་ཆེན་གྱིས། ངས་༧གོང་ས་མཆོག་ལ་དད་གུས་བརྒྱ་ཆ་བརྒྱ་བྱེད་ཀྱི་ཡོད་པ་ཙམ་མ་ཟད། བོད་མི་ཚོས་དཀའ་སྡུག་གང་མྱངས་པ་དང་ཁོང་ཚོས་༧གོང་ས་མཆོག་ལ་དད་གུས་ག་ཚོད་ཡོད་ མེད་ཤེས་ཀྱི་ཡོད། ༡༩༥༩ ལོར་རྒྱ་གཞུང་གིས་བོད་བཙན་བཟུང་བྱས་ཏེ་བོད་མི་ཚོར་དམག་ཆེན་གཉིས་པའི་སྐབས་ཀྱི་ཇེའུ་མི་རིགས་ལྟར་སྡུག་སྦྱོང་མནར་གཅོད་བཏང་སྟེ་དཀའ་སྡུག་མང་པོ་ཞིག་མྱངས་དགོས་བྱུང་ཡོད་པ་ནི་ཐབས་སྡུག་གི་རང་བཞིན་ཞིག་ཡིན་ཡང་། བོད་མི་ཚོས་ཚོང་ལས་བྱེད་རྒྱུ་ནི་གལ་འགངས་ཆེན་པོ་ཞིག་ཆགས་ཡོད་སྟབས། ངེས་པར་དུ་ཚོང་ལས་ཐོག་ཤུགས་སྣོན་བརྒྱབ་སྟེ་རྒྱལ་སྤྱིའི་སྤྱི་ཚོགས་ཀྱི་གདེང་སྤོབས་ཐོབ་པ་བྱ་དགོས། རྒྱ་གཞུང་གིས་དཔལ་འབྱོར་དང་ཚོང་ལས་བེད་སྤྱོད་བྱས་ཏེ་རྒྱལ་སྤྱིའི་ཐོག་ཤུགས་རྐྱེན་བཟོ་བཞིན་ཡོད་སྟབས། གལ་ཏེ་དཔལ་འབྱོར་ཡག་པོ་མེད་ཚེ་ཁྱེད་ཚོའི་འབོད་སྒྲ་དེ་གྲངས་ཉུང་མི་རིགས་ཀྱི་འབོད་སྒྲ་ཞིག་ཏུ་འགྱུར་རྒྱུ་ཉག་ཅིག་ཡིན་སྟབས། ཚོང་ལས་དང་དཔལ་འབྱོར་ཐོག་ཤུགས་སྣོན་རྒྱག་ཐུབ་པ་བྱ་དགོས། ཁྱེད་ཚོས་ལས་འགུལ་གང་ཞིག་སྤེལ་ཡང་ངས་རྒྱབ་སྐྱོར་མཐའ་གཅིག་ཏུ་བྱ་རྒྱུ་ཡིན། དེ་བཞིན་ཁོང་གིས་མེག་གྷན་གྱི་ལམ་ཀ་དང་། ཆུ་འགྲོ་སའི་ཡུར་པོ། གད་སྙིགས་བླུག་སྣོད། རླངས་འཁོར་འཇོག་ས། གཙང་སྦྲ་འཕྲོད་བསྟེན་སོགས་ཀྱི་དཀའ་ངལ་དག་མངའ་སྡེའི་གཞུང་གིས་འགྲོ་སོང་བཏང་སྟེ་མགྱོགས་མྱུར་སེལ་ཐུབ་པ་བྱ་རྒྱུ་ཡིན། ཞེས་སོགས་བརྗོད་སོང་།

སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་གིས། “ངས་ཁ་སང་ལྷོ་ཕྱོགས་ནས་ཕེབས་པའི་ངའི་གྲོགས་པོ་ཞིག་དང་སྐད་ཆ་བཤད་པ་ཡིན། ཁོང་གིས་བྷེང་ལོར་ནས་རྒྱ་གར་གྲོགས་པོ་ཞིག་༧གོང་ས་མཆོག་མཇལ་བར་མགྲོན་འབོད་བྱས་འདུག མི་དེས་ཁོ་རྒྱ་གར་ཞིག་ཡིན་པར་ངོ་ཚ་སྐྱེ་དགོས་པ་ཞིག་ཆགས་འདུག དྷ་རམ་ས་ལར་༧གོང་ས་མཆོག་བཞུགས་ཡོད་ཀྱང་། ལམ་ཁ་སྐྱོ་པོ་འདི་འདྲ་ཞིག་ཡོད་པ་ནི་དངོས་གནས་ངོ་ཚ་སྐྱེ་དགོས་པ་ཞིག་རེད་ཅེས་བརྗོད་པ་ལྟར། ཁོང་དང་ཁོང་འདྲ་བའི་རྒྱ་གར་དང་ཕྱི་རྒྱལ་མི་མང་པོ་ཞིག་གིས་དེ་རང་ཚོར་བཞིན་ཡོད་སྟབས། ཧི་མ་ཅལ་སྤྲོ་འཆམ་བློན་ཆེན་མཆོག་གིས་བཞུགས་སྒར་ཁུལ་གྱི་དཀའ་ངལ་དག་སེལ་རྒྱུ་ཡིན་སྐོར་ཁས་ལེན་གནང་བ་ལྟར། ང་ཚོས་ཁ་བཤད་དོན་འཁྱོལ་ཐུབ་པར་སྐུལ་འདེད་གཏོང་ཐུབ་པ་བྱ་དགོས།”ཞེས་དང་།

ད་དུང་ཁོང་གིས། བོད་མིའི་ཚོང་ལས་བདེ་ཚོགས་ཀྱི་གོ་སྐབས་འདི་བསྐྲུན་ཏེ། སྔོན་ལ་བཀའ་མོལ་ཞུས་པ་བཞིན་ཡུ་རོབ་མཐུན་ཚོགས་ཀྱི་དཔལ་འབྱོར་དང་སྤྱི་ཚོགས་ལྷན་ཚོགས་ཀྱི་ཚོགས་མི་མཱ་ཌེ་ཤར་མས་སྣེ་འཁྲིད་དེ་ལྡི་ལིར་ཉིན་མ་གཉིས་དང་དྷ་རམ་ས་ལར་ཉིན་མ་གཉིས་བཅས་ཀྱི་ཟབ་སྦྱོང་ཞིག་གོ་སྒྲིག་ཞུ་གི་ཡོད་རེད། ཟབ་སྦྱོང་འདི་ཚོགས་འདུ་དང་ཟབ་སྦྱོང་གང་ཡིན་མགོ་མ་འཚོས་པ་ལྟ་བུ་ཞིག་འདུག ཡིན་ཡང་། གོ་སྒྲིག་ཞུ་མཁན་ཚོས་སྔོན་འགྲོར་མཛད་སྒོ་ཞིག་གོ་སྒྲིག་ཞུས་ཏེ། བོད་པའི་ཚོང་པ་དང་རྒྱ་གར་གྱི་ཚོང་བའི་བར་ལ་འབྲེལ་བ་དམ་ཟབ་གཏོང་རྒྱུ་དང་། ཕྱོགས་གཞན་ཞིག་ནས་འགན་འཛིན་ལྷན་ཚོགས་ཚོས་རྒྱ་གར་ལ་འབྲེལ་བ་གང་མང་བཟོ་ཐབས་བྱེད་བཞིན་ཡོད་པ་ལྟར། མངའ་སྡེའི་སྤྲོ་འཆམ་བློན་ཆེན་མཆོག་ཕེབས་ཏེ་དྷ་རམ་ས་ལའི་དཀའ་ངལ་སེལ་རྒྱུར་ཁས་ལེན་མང་པོ་ཞིག་གནང་བར་ཐུགས་རྗེ་ཆེ་ཞུ་རྒྱུ་དང་། ཉེ་ལམ་ཨ་རིར་སྡོད་མཁན་བོད་མི་ཞིག་གིས་རྒྱ་གར་ཡུལ་མི་དང་བོད་མིའི་འབྲེལ་ལམ་མེད་པའི་སྐོར་བྲིས་ཡོད་པ་དེ་ད་ལྟ་རྒྱ་མིས་བེད་སྤྱོད་གཏོང་གི་ཡོད་པར་དགོངས་སེལ་ཞུ་རྒྱུ་ཡིན། ཞེས་སོགས་བརྗོད་སོང་།

ཡུ་རོབ་མཐུན་ཚོགས་ཀྱི་དཔལ་འབྱོར་དང་སྤྱི་ཚོགས་ལྷན་ཚོགས་ཀྱི་ཚོགས་མི་ལྕམ་མཱ་ཌི་ཤར་མ་ལགས་ཀྱིས། ༢༠༠༥ ལོར་བོད་མིའི་ཚོང་ལས་བདེ་ཚོགས་ཚོགས་མི་ཉུང་ཤས་ཤིག་གིས་མགོ་འཛུགས་བྱས་ཡོད་ཀྱང་། ༢༠༡༢ ལོར་བོད་མིའི་ཚོང་ལས་བདེ་ཚོགས་ཀྱི་སྐུ་ཚབ་ཧྥ་རན་སི། ཧོ་ལན་ཌི། སི་པན་དང་། ༢༠༡༣ ལོར་ཨ་རིར་སྐོར་སྐྱོད་དང་འབྲེལ་ཚོགས་མི་མང་དུ་འགྲོ་བཞིན་ཡོད། ད་ལྟ་བོད་མིའི་ཚོང་ལས་བདེ་ཚོགས་ཀྱིས་རྒྱ་གར་དང་བོད་མིའི་ཚོང་པ་བར་མཉམ་ལས་ བྱ་རྒྱུར་སྐུལ་འདེད་གཏོང་གི་ཡོད་པ་དེར་ངས་རྒྱབ་སྐྱོར་བྱེད་བཞིན་ཡོད། བོད་མིའི་ཚོང་ལས་བདེ་ཚོགས་འདི་བཟང་སྤྱོད་ལྡན་པའི་བདེ་ཚོགས་ཤིག་དང་བཟང་སྤྱོད་ལྡན་པའི་ཐོག་ཚོང་ལས་གོང་འཕེལ་གཏོང་མཁན་གྱི་ཚོགས་པ་ཞིག་ཆགས་ཡོད། ངས་༧གོང་ས་མཆོག་དང་ཐེངས་འགའ་མཇལ་སྐབས་ཁོང་གིས་ཚོང་ལས་ནི་དཔལ་འབྱོར་འཕེལ་རྒྱས་གཏོང་མཁན་གྱི་རྨང་གཞི་གཙོ་བོ་ཞིག་རེད་ཅེས་གསུངས་པ་ལྟར། དཔལ་འབྱོར་ཡར་རྒྱས་གཏོང་མཁན་གཙོ་བོ་ནི་ཚོང་ལས་ཙག་ཙིག་རྒྱག་མཁན་ཚོ་ཆགས་ཡོད་སྟབས། ང་ཚོས་ལས་རིགས་དེ་དག་གཉེར་མཁན་ཚོར་རྒྱབ་སྐྱོར་བྱ་རྒྱུ་གལ་ཆེན་པོ་ཆགས་ཡོད། ངའི་སེམས་དང་བླ་སྲོག་རྒྱ་གར་བ་ཞིག་ཆགས་ཡོད་ཀྱང་ངའི་མི་ཚེ་འདི་འཛམ་གླིང་ལ་ལེགས་སྐྱེས་འབུལ་རྒྱུ་དེ་ཡིན། བདག་ཉིད་ཆེན་པོ་གྷན་དྷི་མཆོག་གིས་ཁྱེད་རང་གིས་སོ་སོས་སོ་སོར་འགྱུར་བ་གཏོང་ཐུབ་པ་ཞིག་བྱ་དགོས་ཞེས་གསུངས་ཡོད་པ་ལྟར། ངས་ཁྱེད་ཚོར་སོ་སོས་སོ་སོར་ཁག་འདོགས་མ་བྱས་པར་རང་ཉིད་ཀྱིས་རང་ཉིད་ལ་བཅོས་བསྒྱུར་གཏོང་ཐུབ་པ་ཞིག་བྱ་དགོས་ཞུ་རྒྱུ་ཡིན། ཞེས་སོགས་བརྗོད་སོང་།

མེག་གྷན་པན་ཇབ་དངུལ་ཁང་གི་འགན་འཛིན་གྱིས། ཚོང་ལས་ཐོག་བྱས་རྗེས་ཅན་གྱི་སྐྱེས་བུ་ཞིག་ཆགས་དགོས་ན། དང་པོ། མི་དེར་རང་འགུལ་གྱི་བསམ་པ་ཞིག་དགོས་པ་དང་། གཉིས་པ། གོ་སྐབས་དམ་འཛིན་བྱེད་ཐུབ་པ། གསུམ་པ། རྒྱུན་འཁྱོངས་ཐུབ་པ། བཞི་པ། གནས་ཚུལ་རྒྱུས་ལོན་བྱེད་དགོས་པ། ལྔ་པ། ལས་ཀའི་སྤུས་ཚད་ལེགས་པོ་དགོས་པ། དྲུག་པ། མི་དང་མཉམ་དུ་འབྲེལ་བ་ཉར་དགོས་པ། དྲུག་པ། ནུས་པ་དང་ལྡན་པ་ཆགས་དགོས་པ། བདུན་པ། དཀའ་ངལ་སེལ་རྒྱུའི་ནུས་པ་ཡོད་པ། བརྒྱད་པ། གདེང་ཚོད་དགོས་པ། དགུ་པ། བརྩོན་སེམས་དགོས་པ། བཅུ་པ། མིར་སྐུལ་འདེད་གཏོང་ཐུབ་པ་བྱ་དགོས། བཅུ་གཅིག་པ། མི་གཞན་གྱི་བདེ་དོན་ལ་འགན་འཁུར་ལེན་ཐུབ་པ་བྱ་དགོས། ཞེས་སོགས་བརྗོད་སོང་།

མཇུག་ཏུ་ཀུན་བཟང་དཔལ་སྒྲོན་ལགས་ཀྱིས། སྐུ་མགྲོན་གཙོ་བོ་མཆོག་དང་ཟབ་སྦྱོང་ལ་མཐུན་འགྱུར་རོགས་རམ་གནང་མཁན་ཚོར་ཐུགས་རྗེ་ཆེའི་གཏམ་བཤད་དང་འབྲེལ་ཁོ་མོས་ཟབ་སྦྱོང་ཞེས་པ་འདི་ཕན་ཚུན་ཤེས་བྱ་གོང་འཕེལ་དང་སློབ་སྦྱོང་བྱ་རྒྱུའི་གོ་སྐབས་ཤིག་ཆགས་ཡོད་སྟབས། ད་རེབ་ཟབ་སྦྱོང་འདིས་བོད་མི་མང་པོ་ཞིག་ལ་ཕན་ཐོགས་ཡོང་རྒྱུར་རེ་བ་རྒྱག་གི་ཡོད། ཅེས་སོགས་བརྗོད་བྱུང་།

ཚེས་ ༢༤ དང་ ༢༥ ཉིན་གཉིས་ཟབ་སྦྱོང་མགོ་འཛུགས་བྱ་རྒྱུ་ཡིན་པ་དང་། ཟབ་སྦྱོང་ནང་འཛུལ་བཞུགས་བྱེད་མཁན་དྷ་ས་བོད་ཕྲུག་ཁྱིམ་སྡེའི་ཚོང་རིགས་སྡེ་ཚན་གྱི་སློབ་ཕྲུག་དང་། དྷ་ས་ཁུལ་གྱི་ཚོང་པ་དག་ཡིན་འདུག ཟབ་སྦྱོང་སྤྲོད་མཁན་ནི་ཡུ་རོབ་མཐུན་ཚོགས་ཀྱི་དཔལ་འབྱོར་དང་སྤྱི་ཚོགས་ལྷན་ཚོགས་ཀྱི་ཚོགས་མི་ལྕམ་མཱ་ཌི་ཤར་མ་ ( Mrs.Madi Sharma) ལགས་ཀྱི་གཙོས་སཱེ་ཁཱོ་ལན་ཌི་དངུལ་ཁང་ལྷན་ཚོགས་ཀྱི་ཚོགས་མི་ལྕམ་ཨཱ་ནཱ་རུ་ཛལ་( Mrs.Anna Ruzel) ལགས་དང་། པོ་ལན་ཌིའི་སྲིད་འཛིན་གྱི་ཡུ་རོབ་གྲོས་ཚོགས་ཀྱི་ཕྱག་རོགས་ལྕམ་ཀཱར་མན་ ( Mrs. Carmen Godeanu) ལགས་བཅས་ཡིན་འདུག

གསར་འགོད་པ། དོན་གྲུབ།