སྐྱབས་བཅོལ་ཡུལ་མེད་པའི་མི།

བོད་ཀྱི་དུས་བབ་གསར་ཤོག་སྤྱིའི་འདོན་ཐེངས་ ༦༣༢ སྟེང་གི་རྩོམ་སྒྲིག་པའི་གཏམ།

ཡུ་རོབ་ནང་གི་བོད་མི་ཚོར་སྐྱབས་བཅོལ་རག་གི་མེད་པའི་གནས་ཚུལ་ཞིག་རྒྱ་ཇེ་ཆེ་ནས་གཏིང་ཇེ་ནག་ཏུ་འགྲོ་བཞིན་འདུག གནས་ཚུལ་འདི་ཐོག་མ་ཡུ་རོབ་སྦེལ་ཇམ་ནས་བྱུང་ཞིང་། སྐབས་དེར་བོད་མི་སུམ་བརྒྱ་ལྷག་ཅིག་ལ་སྦེལ་ཇམ་གཞུང་ནས་སྐྱབས་བཅོལ་མ་སྤྲད་པར་འགག་ཡོད་པ་དང་། དེའི་ཁྲོད་ཀྱི་སྐོར་ཞིག་གི་ཡིག་ཆ་ནག་པོ་ཆཊ་པའི་གནས་ཚུལ་བྱུང་། ཉེ་ལམ་བོད་མི་མང་སྤྱི་འཐུས་གཉིས་ཀྱིས་གསལ་བསྒྲགས་སྤེལ་བའི་ནང་། ད་ལྟ་སུད་སི་དང་ཧྥ་རན་སི་སོགས་སུའང་དཀའ་ངལ་དེ་འཕྲད་མགོ་ཚུགས་ཡོད་པ་དང་། མ་འོངས་པར་དཀའ་ངལ་དེ་ལས་ཆེ་རུ་འགྲོ་སྲིད་པའི་ཉེན་བརྡ་ཡང་བཏང་འདུག

མང་ཚོགས་ཁྲོད་དཀའ་ངལ་འདིའི་འབྱུང་ཁུངས་སམ་རྒྱུ་རྐྱེན་གཉིས་ལ་དོགས་པ་ཟ་བཞིན་ཡོད་ཚོད་འདུག གཅིག་དེང་སྐབས་རྒྱ་ནག་གི་དཔལ་འབྱོར་ཡར་རྒྱས་ཕྱིན་པ་དང་མཉམ་དུ་ནུབ་ཕྱོགས་སུ་རྒྱ་ནག་གི་ཤུགས་རྐྱེན་ཐེབས་ཏེ། རྒྱལ་ཁབ་མང་པོ་ཞིག་གིས་དངོས་ཤུགས་བརྒྱུད་གསུམ་ནས་རྒྱ་ནག་གི་གནོན་ཤུགས་དང་རྣམ་འགྱུར་དང་ལེན་བྱེད་མགོ་ཚུགས་ཡོད་པ་འདི་རེད། གཉིས་པ་ལོ་འགའི་གོང་ནས་བོད་མི་གསར་འབྱོར་བ་མང་པོ་ཕྱིར་བོད་དུ་ལོག་པ་དང་། རྒྱ་གར་ནང་གཞིས་ཆགས་སྲ་བརྟན་ཡོང་གི་མེད་པར་སྐད་ངན་ཤོར་གྱི་ཡོད་པ་བཅས་ལ་བརྟེན་ཏེ། བོད་མིའི་སྒྲིག་འཛུཊ་ཀྱི་སྲིད་བྱུས་ཤིག་དང་འབྲེལ་བ་ཡོད་པར་དོགས་པ་དེ་རེད། 

གལ་སྲིད་བོད་མིའི་སྒྲིག་འཛུགས་ཀྱི་སྲིད་བྱུས་ལ་འབྲེལ་བ་ཡོད་ན། འདི་ལ་མནོ་བསམ་ཞིབ་ཏུ་གཏོང་དགོས་པ་རེད་སྙམ། སྔར་བཀའ་ཁྲི་ཟམ་གདོང་རིན་པོ་ཆེའི་སྐབས་སུའང་ཕྱི་རྒྱལ་ཁག་ཏུ་འགྲོ་རྒྱུ་བཀག་འགོག་གི་སྲིད་བྱུས་ཤིག་བཟུང་རབས་ཀྱི་གླེང་རྙོག་མང་པོ་བྱུང་ཡོད། གཞིས་ཆགས་སྲ་བརྟན་ཡོང་གི་མེད་པ་དེ་བོད་པ་ཕྱི་རྒྱལ་ཁག་ཏུ་ཕྱིན་པར་འབྲེལ་བ་ཆེན་པོ་མེད་ཟེར་ཆོག དེང་སྐབས་ཕྱི་རྒྱལ་ཁག་ཏུ་འགྲོ་མཁན་མང་ཆེ་བ་བོད་ནས་ཡོང་བའི་གསར་འབྱོར་བ་རེད། གཞིས་ཆགས་རྩ་སྟོང་དུ་འགྲོ་བཞིན་པ་དེའང་གཞོན་སྐྱེས་ཚོ་གཞིས་ཆགས་ནང་མ་བསྡད་པར་རྒྱ་གར་གྲོང་ཁྱེར་ཁག་ཏུ་ཕྱིན་པ་དང་། ཤུལ་དུ་ལྷག་པ་དག་ཀྱང་ལས་མེད་ཆགས་ཏེ་རང་འཚོ་ཐུབ་ཀྱི་མེད་པའི་ཉེར་འབྲས་ཤིག་རེད། 

གནད་དོན་གསུམ་པ་ཞིག་ལ་བསམ་བློ་གཏོང་ས་དེ་ཡུ་རོབ་ཁུལ་གྱི་གཞུང་སོ་སོའི་སྐྱབས་བཅོལ་གྱི་ཁྲིམས་གཞིར་འགྱུར་བ་ཕྱིན་པ་དེ་རེད། སྔོན་མའང་འགྱུར་བ་རབ་དང་རིམ་པ་ཕྱིན་ཡོད། ད་རེས་ཡུ་རོབ་སྤྱི་འཐུས་ཀྱི་གསལ་བསྒྲགས་ནང་། བོད་ནས་ཡོང་བའི་ཁུངས་སྐྱེལ་གསལ་བོ་དགོས་པ་མ་ཟད། བོད་ནང་ཆབ་སྲིད་ཀྱི་དཀའ་ངལ་འཕྲད་ཡོད་པའི་བདེན་དཔང་ཡང་དགོས་རབས་ཟེར། ད་ལོའི་ལོ་མགོར་སྦེལ་ཇམ་གཞུང་གི་མི་སྣས་རྒྱ་གར་དང་བལ་ཡུལ་ནང་རྟོག་ཞིབ་བྱས་ཤིང་། དེའི་རྗེས་སྦེལ་ཇམ་གཞུང་ནས་ཐད་ཀར་དྷ་སའི་སྣེ་ལེན་ཁང་ལ་ཁ་པར་ཡོང་སྟེ་བོད་མི་རེ་ཟུང་གི་རྒྱབ་ལྗོངས་རྩད་ཞིབ་བྱེད་ཀྱི་ཡོད་རབས་གོ་ལ། འབྲེལ་ཡོད་ལས་བྱེད་ཚོས་ཀྱང་བོད་མིའི་སྒྲིག་འཛུགས་ཀྱི་རྩ་དོན་བདེན་པ་དང་འཚེ་བ་མེད་པ་གཞི་ལ་བཞག་ནས་དྲང་མོར་བཤད་ཡོད་ཚོད་འདུག

གང་ལྟར་ད་ལྟ་ཁ་ཚ་དགོས་གཏུགས་ཆགས་ཡོད་པ་དེ། དཀའ་ངལ་དངོས་སུ་འཕྲད་བསྡད་པའི་བོད་མི་དེ་དག་གི་མི་ཚེ་འཕྲོ་བརླག་ཏུ་མ་སོང་བ་ཞིག་ཇི་ལྟར་བྱེད་རྒྱུ་དེ་རེད། འདི་ལ་རྒྱ་ནག་གཞུང་གི་ལྷགས་པ་གྲང་མོ་ཐེབས་པ་ཡིན་ན་གནས་ཚུལ་གཞན་རེད། དེ་མིན་དྷ་སའི་གཞུང་དང་ཡུ་རོབ་གཞུང་གང་གི་ཁྲིམས་སྒྲིག་དང་སྲིད་བྱུས་ཡིན་ཡང་། དཀའ་ངལ་འདི་སེལ་རྒྱུའི་ལས་འགན་དང་ནུས་པ་ཕྱོགས་གཉིས་ཀར་ཡོད་ལ། རྒྱ་བལ་འབྲུག་གསུམ་ནང་བོད་མིར་སྐྱབས་བཅོལ་དངོས་གནས་ཤིག་རག་གི་མེད་པའི་གནས་སྟངས་འོག རྒྱལ་སྤྱིའི་ཐོག་ནས་ཀྱང་གནས་ཚུལ་འདིར་བདག་པོ་འཚོལ་དགོས།