རྒྱ་ནག་གཞུང་གིས་ཕོ་བྲང་པོ་ཏ་ལའི་གནས་སྤོར་ཆོག་པའི་གནའ་བོའི་རིག་དངོས་ལ་ཞིབ་བཤེར་གཏིང་ཟབ་བྱས་ཏེ་ཐོ་འགོད་བྱེད་བཞིན་ཡོད་འདུག
རྒྱ་ནག་ཞིན་ཧྭ་གསར་ཁང་གིས་གནས་ཚུལ་སྤེལ་བ་ལྟར་ན། རྒྱ་གཞུང་གིས་ཕོ་བྲང་པོ་ཏ་ལའི་ནང་གི་ཁྲི་ ༡༠ ཙམ་ལ་ཉེ་བའི་གནས་སྤོར་ཆོག་པའི་གནའ་བོའི་ཤུལ་བཞག་རིག་དངོས་ཡོད་ཚད་ལ་ཞིབ་བཤེར་དང་ཐོ་འགོད་བྱེད་པའི་ལས་གཞི་ཞིག་མགོ་བརྩམས་ཡོད་པ་དང་། ཕྱི་ལོ་ ༢༠༡༦ ལོར་ལས་གཞི་དེ་འགྲུབ་ཐབས་བྱེད་དགོས་ཀྱི་ཡོད་འདུག
ཟླ་འདིའི་ཕྱི་ཚེས་ ༢༥ ཉིན། ཕོ་བྲང་པོ་ཏ་ལ་དོ་དམ་ཁང་གི་འགན་འཛིན་ཏིན་ཁྲང་ཀྲིན་ཟེར་བ་ཞིག་གིས་གསར་འགོད་པར། ཕོ་བྲང་པོ་ཏ་ལའི་ནང་རིག་དངོས་གསོག་ཉར་གྱི་གྲངས་འབོར་ཕུན་སུམ་ཚོགས་པས། རྒྱ་ནག་དབུས་གཞུང་གིས་རྒྱལ་ཁབ་རིག་དངོས་སྲུང་སྐྱོབ་ཁང་གི་རིག་དངོས་ཐོ་འགོད་ཀྱི་རེའུ་མིག་ལྟར། པོ་ཏ་ལའི་ནང་གི་གནས་སྤོར་ཆོག་པའི་རིག་དངོས་ཡོངས་རྫོགས་ཀྱི་མིང་དང་ཆེ་ཆུང་། ཡོང་ཁུངས། ཆ་ཚང་མིན་སོགས་ཞིབ་ཕྲའི་གནས་ཚུལ་ལ་ཞིབ་བཤེར་དང་ཐོ་འགོད། ཡིག་ཚགས་གསར་བཟོ་བཅས་བྱེད་དགོས་པའི་ལས་འགན་སྤྲད་ཡོད་ཅིང་། དེ་ནི་རྒྱ་གཞུང་གིས་པོ་ཏ་ལའི་རིག་དངོས་སྲུང་སྐྱོབ་བྱ་བར་མཐོང་ཆེན་བྱས་པ་ཞིག་ཡིན་པ་མ་ཟད། རིག་དངོས་སྲུང་སྐྱོབ་ཀྱི་བྱ་གཞག་ཐད་ཕན་པ་ཆེན་པོ་ཡོད་སྐོར་བརྗོད་འདུག
ཡང་ཏིན་ཁྲང་ཀྲིན་ཟེར་བ་དེས། པོ་ཏ་ལ་སྲུང་སྐྱོབ་བྱ་བ་ཐེངས་གཅིག་བྱས་པ་ཙམ་གྱིས་མི་འགྲིག་པར་ངེས་པར་དུ་ལོ་ལྟར་རྒྱུན་འཁྱོངས་བྱས་ན་ད་གཟོད་གྲུབ་འབྲས་ཡོད་སྟབས། ང་ཚོས་ཆེད་དམིགས་ཀྱིས་པོ་ཏ་ལ་སྲུང་སྐྱོབ་ཁང་བཙུགས་ཏེ། ཤིང་བཟོ་དང་རྡོ་བཟོ་སོགས་ལས་མི་ཁྱོན་ ༥༠ ལྷག་གིས་སྲོལ་རྒྱུན་གྱི་བཟོ་ལས་ལག་རྩལ་ལ་བརྟེན་ནས་པོ་ཏ་ལ་ཉམས་གསོ་དང་སྲུང་སྐྱོབ་བྱེད་བཞིན་ཡོད་ལ། ལས་གཞི་དེར་ལོ་རེར་རྒྱ་སྒོར་ཁྲི་ ༡༠༠ ཙམ་གྱི་འགྲོ་སོང་གཏོང་བཞིན་ཡོད་པ་དང་། མ་འོངས་པར་པོ་ཏ་ལའི་འཛུགས་སྐྲུན་ཡོངས་ལ་ཚན་རིག་གིས་དཔྱད་ཞིབ་བྱ་རྒྱུ་ཡིན་ལུགས་སོགས་བརྗོད་འདུག
གསར་འགོད་པ། པདྨ་མཚོ།
