རྒྱ་གཞུང་གིས་འབྲི་རུ་རྫོང་དུ་སྔར་ལྷག་དམ་དྲག་བྱེད་ཀྱི་ཡོད་འདུག

རྒྱ་གཞུང་གིས་སྔར་ལོ་ནས་བཟུང་འབྲི་རུ་རྫོང་དུ་དམག་མི་འགྲེམས་འཇོག་གིས་བོད་མི་ཚོ་གང་བྱུང་འཛིན་བཟུང་དང་དམ་དྲག་བྱེད་ཀྱིན་པར་མ་ཟད། ཉེ་ལམ་གཏན་འབེབས་ཁག་གཉིས་ཟེར་བའི་ཡིག་ཆ་དྲིལ་བསྒྲགས་དང་འབྲེལ་སྔར་ལྷག་དམ་དྲག་བྱེད་ཀྱི་ཡོད་འདུག

རྒྱ་གཞུང་གིས་སྔར་ལོ་ནས་བཟུང་ནགས་ཤོད་འབྲི་རུ་རྫོང་དུ་དམག་མི་འགྲེམས་འཇོག་གིས་དམ་དྲག་དང་བོད་མི་ཚོ་གང་བྱུང་འཛིན་བཟུང་བྱེད་ཀྱིན་པར་མ་ཟད། འདི་ལོའི་ཕྱི་ཟླ་ ༦ པའི་ནང་འབྲི་རུ་རྫོང་མི་དམངས་སྲིད་གཞུང་གིས་༼ འབྲི་རུ་རྫོང་མི་དམངས་སྲིད་གཞུང་གི་ “གཏན་འབེབས་ཁག་གཉིས་” ཀྱི་དྲིལ་བསྒྲགས་ལག་དེབ༽ ཅེས་པ་ཞིག་པར་བསྐྲུན་འགྲེམས་སྤེལ་བྱས་ཡོད་འདུག དོན་ཚན་ ༢༦ ཡོད་པའི་ཡིག་ཆའི་ལེའུ་དང་པོའི་ སྤྱིའི་རྩ་དོན་ཞེས་པའི་ནང་། རང་འཚམ་གྱིས་རྒྱལ་མཚམས་ལས་བརྒལ་ཏེ་ ” སྨོན་ལམ་ཆེན་མོའི་ “བྱེད་སྒོ་ཞུགས་པ་དང་། དཀྲོག་གཏམ་བཟོ་བ་དང་། དཀྲོག་གཏམ་བརྒྱུད་བསྒྲགས་བྱེད་པ། གནོད་སྐྱོན་ཅན་གྱི་ཆ་འཕྲིན་བརྒྱུད་སྤེལ་བྱེད་པ། རང་འཚམ་གྱིས་ལྗོངས་ཕྱི་ཕྱོགས་སུ་ཆོས་ལུགས་སློབ་སྦྱོང་བྱེད་པར་འགྲོ་བ་སོགས་ཀྱི་ཁྲིམས་འགལ་བྱ་སྤྱོད་ལ་ཁྲིམས་བཞིན་རྡུང་རྡེག་ཚ་ནན་གཏོང་རྒྱུ་དང་། འབྲི་རུའི་སྤྱི་ཚོགས་དུས་བབ་བརྟན་ལྷིང་ལ་སྲུང་སྐྱོབ་བྱ་རྒྱུ། དེ་བཞིན་ << ཀྲུང་ཧ་མི་དམངས་སྤྱི་མཐུན་རྒྱལ་ཁབ་ཀྱི་ཉེས་ཁྲིམས >> དང་ << ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་བདེ་འཇགས་བཅོས་སྐྱོང་དོ་དམ་ཆད་གཅོད་བཅའ་ཁྲིམས >>།

<< ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་སྤྱི་དམངས་ཀྱིས་རྒྱལ་མཚམས་ནས་འགྲོ་སྐྱོད་བྱེད་པར་དོ་དམ་བྱེད་པའི་བཅའ་ཁྲིམས >>། (ཆོས་ལུགས་ལས་དོན་སྲོལ་ཡིག) ལག་བསྟར་བྱ་རྒྱུའི་སྐོར་གྱི་བོད་རང་སྐྱོང་ལྗོངས་ཀྱི་གནས་སྐབས་ལག་བསྟར་བྱ་ཐབས)། <<སྤྱི་ཚོགས་དོ་དམ་སློབ་གསོ་དང་བཅོས་སྐྱོང་ལས་ཀའི་སྐོར་གྱི་བོད་རང་སྐྱོང་ལྗོངས་ཀྱི་བསམ་འཆར>>། <<བོད་བརྒྱུད་ནང་བསྟན་གྲྭ་བཙུན་གྱི་དགོངས་ཞུ་དགོངས་ཐིམ་གྱི་གནས་སྐབས་བྱ་ཐབས>>། <<གྲྭ་བཙུན་ལྗོངས་ཕྱི་ཕྱོགས་སུ་ཆོས་ལུགས་སློབ་སྦྱོང་བྱེད་པར་བསྐྱོར་པར་དོ་དམ་བྱ་རྒྱུར་ཤུགས་སྣོན་རྒྱག་རྒྱུའི་སྐོར་གྱི་འབྲི་རུ་རྫོང་མི་དམངས་སྲིད་གཞུང་གི་བརྡ་ཐོ>>། དེ་བཞིན་ཁྲིམས་སྒོ་ནས་རྒྱལ་མཚམས་ལས་བརྒལ་ཏེ་ “མི་ཆོག་པ་གཉིས “€། བོད་རང་སྐྱོང་ལྗོངས་མངའ་ཁོངས་ཀྱི་སྤྱི་དམངས་ཡིན་ཕྱིན་ཁྲིམས་འགལ་གྱིས་རྒྱལ་མཚམས་ནས་བརྒལ་ཏེ་ཕྱི་རྒྱལ་དུ་ཕྱིན་པ་ཚང་མ་ཕྱིར་ལོག་བྱས་མི་ཆོག་པ། སྐོར་གྱི་རང་སྐྱོང་ལྗོངས་ཀྱི་འབྲེལ་ཡོད་གཏན་འབེབས་གཞིང་བཟུང་འབྲི་རུའི་དོན་དངོས་གནས་ཚུལ་དང་བསྟུན་ནས་གཏན་འབེབས་འདི་བཟོས་ཡོད། ཅེས་འཁོད་འདུག

ཡིག་ཆའི་ནང་། རྒྱལ་ཁབ་དང་མི་རིགས་ཁ་བྲལ་གཏོང་བ་སོགས་ཀྱི་གཏམ་བརྗོད་དང་ཆ་འཕྲིན་བརྒྱུད་སྤེལ་བྱེད་པའི་རིགས་དང་། ངོ་ལོག་དྲིལ་བསྒྲགས་དང་དངོས་པོ་བཟོ་སྒྲིག ཕྱིར་འཚོང་དང་དབོར་འདྲེན་བྱེད་པ། སྦྲགས་ཐོག་ནས་བསྐུར་བ། བརྒྱུད་སྤེལ་བྱེད་པ། ཁྲིམས་འགལ་གྱི་ཉར་ཚགས་བྱེད་པའི་རིགས། སྤྱི་ཚོགས་དང་དྲ་ཐོག་ཏུ་ཀུན་གྱིས་དོ་སྣང་བྱེད་པའི་གླེང་ཕྱོགས་ལ་དམིགས་ནས་དཀྲོག་གཏམ་བཟོ་བ། དཀྲོག་གཏམ་བརྒྱུད་བསྒྲགས་བྱེད་པ། ངན་སྐུལ་བསླུ་བྲིད་བྱེད་པ། གནོད་སྐྱོན་ཅན་གྱི་ཆ་འཕྲིན་བརྒྱུད་སྤེལ་བྱེད་པའི་རིགས། ཏྰ་ལ་སྐུ་ཕྲེང་བཅུ་བཞི་བ་དང་དེའི་ཁ་བྲལ་རིང་ལུགས་ཀྱི་རུ་ཚོགས་ལ་བསྟོད་གླུ་ལེན་པའི་གནོད་སྐྱོན་ཅན་གྱི་གཏམ་བརྗོད་དང་ཆ་འཕྲིན་བརྒྱུད་སྤེལ་བྱེད་པའི་རིགས། ཏྰ་ལ་སྐུ་ཕྲེང་བཅུ་བཞི་བ་དང་དེའི་ཁ་བྲལ་རིང་ལུགས་ཀྱི་རུང་ཚོགས་པས་སྤེལ་བའི་འབྲེལ་ཡོད་བྱེད་སྒོའི་གནོད་སྐྱོན་ཅན་གྱི་གཏམ་བརྗོད་དང་ཆ་འཕྲིན་རིགས་བརྒྱུད་སྤེལ་དང་ཁྱབ་སྤེལ་བྱེད་པའི་རིགས། དོན་དངོས་དང་མི་མཐུན་པའི་གཏམ་བརྗོད་དང་གནོད་སྐྱོན་ཅན་གྱི་ཆ་འཕྲིན་རྫུན་བཟོ་དང་ཁྱབ་སྤེལ། བརྒྱུད་བཅས་བྱས་ཏེ་མ་རུངས་ཁོག་བཅངས་ཀྱིས་ཏང་གི་བོད་སྐྱོང་སྲིད་ཇུས་ལ་དམའ་འབེབས་བྱེད་པའི་རིགས་བཅས་ཁྲིམས་ལུགས་འགན་འཁྲི་རྩད་གཅོད་བྱ་རྒྱུ་མ་ཟད། དུས་ཡུན་ལོ་གཉིས་རིང་གི་དབྱར་རྩ་དགུན་འབུ་སྔོག་འཐུ་ཆོག་པའི་ཐོབ་ཐང་དང་དམངས་ཕན་སྲིད་ཇུས་ཁག་ལོངས་སྤྱོད་བྱ་རྒྱུའི་ཐོབ་ཐང་མེད་པ་བཟོ་དགོས། ཉེས་དོན་ཆད་གཅོད་མ་ཕོག་པའི་མི་སྣར་བཙན་སྐུལ་སྒོ་ནས་དུས་ཡུན་ཟླ་ ༦ རིང་ཁྲིམས་ལུགས་གསོ་སྦྱོང་སློབ་གསོ་སྤེལ་རྒྱུ་ཡིན། ཞེས་འཁོད་འདུག

ད་དུང་ཡིག་ཆ་དེའི་ནང་། རྒྱལ་མཚམས་ལས་བརྒལ་ཏེ་སྨོན་ལམ་ཆེན་མོའི་བྱེད་སྒོར་ཞུགས་མིས་གཤམ་གསལ་བྱ་སྤྱོད་རིགས་སྤེལ་ཚེ་འབྲེལ་ཡོད་ཁྲིམས་ལུགས་ཀྱི་འགན་འཁྲི་རྩད་གཅོད་བྱ་རྒྱུ་མ་ཟད། རྒྱལ་མཚམས་ལས་བརྒལ་བའི་མི་དང་དེའི་ཕ་མ། བཟའ་ཟླ། བུ་ཕྲུག་བཅས་ལ་དུས་ཡུན་ལོ་ ༣ ནས་ ༥ བར་གྱི་དབྱར་རྩྭ་དགུན་འབུ་སྔོག་འཐུ་མི་ཆོག་པའི་ཐོབ་ཐང་དང་དམངས་ཕན་སྲིད་ཇུས་ལོངས་སྤྱོད་བྱེད་པའི་ཐོབ་ཐང་མེད་པ་བཟོ་རྒྱུ་ཡིན། ཉེས་དོན་ཁྲིམས་ཆད་མ་ཕོག་པའི་མི་སྣར་དུས་ཡུན་ཟལ་ ༦ རིང་གི་ཁྲིམས་ལུགས་གསོ་སྦྱོང་སློབ་གསོ་སྤེལ་དགོས། ཞེས་སོགས་འཁོད་འདུག

འདི་ལོའི་དབྱར་རྩྭ་དགུན་འབུ་བརྐོ་བཞིན་པའི་སྐབས་སུ་རྒྱ་གཞུང་གིས་ས་གནས་བོད་མི་ ༡༠༠ ཡས་མས་ཤིག་ཉེས་མིང་སྣ་ཚོགས་བཀལ་ནས་བཙོན་འཇུག་དང་ཁྲིམས་ཐག་བཅད་ཡོད་པ་དང་། བོད་མི་ཁག་ཅིག་འཛིན་བཟུང་བྱས་ཏེ་ཟླ་བརྒྱད་དགུ་འགོར་ཡོད་ཀྱང་། ད་ཆར་ཡང་གར་ཡོད་ཅི་བྱུང་གི་གནས་ཚུལ་ཅི་ཡང་མ་ཤེས་པར་ལྷག་ཡོད་འདུག་ལ། ཉེ་ལམ་ས་གནས་བོད་མི་མང་པོ་ཞིག་དུས་ཐུང་བཀག་ཉར་དང་། ཟླ་ཤས་རིང་བཙན་དབང་ཐོག་ཁྲིམས་ལུགས་སློབ་གསོ་སྤེལ་བ། གང་བྱུང་དངུལ་གྱི་ཆད་པ་གཅོད་པ། ཐོབ་ཐང་ལག་ཁྱེར་བཙན་འཕྲོག་བྱས་པ། ས་གནས་ཀྱི་ཁ་པར་དང་བརྒྱུད་ལམ་སོགས་ལ་སྟངས་འཛིན་ལྟ་རྟོག་དང་དམ་དྲག་ནན་མོ་བྱེད་ཀྱི་ཡོད་འདུག

སྔར་ལོའི་ཕྱི་ཟླ་ ༡ པོའི་ནང་རྒྱ་གཞུང་གིས་འབྲི་རུ་རྫོང་ཚྭ་ཆུ་ཤང་ལྟར་མོས་དགོན་པའི་གྲྭ་སྐལ་བཟང་ཕྱོགས་གླང་ལ་ཁྲིམས་འགལ་ཐོག་འདུ་འཛོམས་སུ་ཞུགས་པའི་ཉེས་མིང་འོག་ལོ ༡༠ ཁྲིམས་ཆད་དང་། ཟླ་ཐང་ཤང་གི་རྡོ་རྗེ་དྲག་རྩལ་ལ་ནགས་ལྷ་འཛམ་བྷའི་གཏེར་སྔོག་ངོ་རྒོལ་ནང་ཞུགས་པ་དང་སྒོར་མོ་ཁྲིམས་འགལ་གྱི་ཕྱོགས་ལ་བཏང་བའི་ཉེས་མིང་འོག་ལོ་ ༡༡ ཁྲིམས་ཆད། ཟླ ༩ པའི་ནང་འབྲི་རུ་རྫོང་ཚྭ་ཆུ་ཤང་གི་རྒན་པོ་ཟླ་གཡང་ལ་རྒྱ་གཞུང་གི་གཤམ་སྐྱོད་ཆབ་སྲིད་འཁྲབ་སྟོན་རུ་ཁག་ལ་ངོ་རྒོལ་བྱས་པའི་ཉེས་མིང་འོག་ལོ་ ༢ དང་ཕྱེད་ཀའི་ཁྲིམས་ཆད། ཟླ་ ༡༠ ཚེས་ ༡༡ ཉིན་རྒྱ་གཞུང་གིས་འབྲི་རུ་རྫོང་གཤམ་ཆུ་ཤང་སྟེང་མཁར་གྲོང་ཚོ་ནས་ཡིན་པའི་གཞོན་སྐྱེས་རྩོམ་པ་པོ་ཚུལ་ཁྲིམས་རྒྱལ་མཚན་ནམ་ཞོགས་དྲིལ་དང་། ཁོང་གི་གྲོགས་པོ་གཡུལ་རྒྱལ་གཉིས་རང་སྐྱོང་ལྗོངས་མགོ་ཁྲིད་ལ་རྒོལ་གཏམ་དང་ཁ་བྲལ་བར་རྒྱབ་སྐྱོར་བྱས་པའི་ཉེས་མིང་འོག་འཛིན་བཟུང་བྱས་པར་མ་ཟད། ཞོགས་དྲིལ་ལ་ལོ་ ༡༣ དང་། གཡུལ་རྒྱལ་ལ་ལོ་ ༡༠ ཁྲིམས་ཐག་བཅས་བཅད་ཡོད།

ཟླ་ ༡༡ ནང་འབྲི་རུ་རྫོང་ཤག་ཆུ་གྲོང་རྡལ་གྱི་བསྟན་འཛིན་རང་གྲོལ་དང་སྟོབས་ལྡན། གྲྭ་དཀོན་མཆོག་ཆོས་འཕེལ་བཅས་ལ་ཏཱ་ལའི་བླ་མ་དང་འབྲེལ་བ་བྱས་པ་དང་། ཁ་བྲལ་བའི་ཉེས་མིང་འོག་གྲྭ་དཀོན་མཆོག་ཆོས་འཕེལ་ལ་ལོ་ ༥ དང་། བསྟན་འཛིན་རང་གྲོལ་དང་སྟོབས་ལྡན་གཉིས་ལ་ལོ་ ༦ རེའི་ཁྲིམས་ཆད། ཟླ་ ༡༡ པའི་ཚེས་ ༢༣ ཉིན་འབྲི་རུ་རྫོང་ཚྭ་ཆུ་ཤང་ལྟར་མོས་དགོན་པའི་དགེ་བཤེས་ངག་དབང་འཇམ་དབྱངས་བཙན་འཁྲིད་བྱས་ཡོད་པར་མ་ཟད། ཟླ་ ༡༢ ཚེས་ ༡༧ ཉིན་གསལ་བཤད་ཚིག་གཅིག་མེད་པར་ཁོང་གི་སྐུ་ཕུང་ནང་མིར་རྩིས་སྤྲོད་བྱས་ཡོད།

ཟླ་ ༡༢ ནང་འབྲོང་སྣ་དགོན་པའི་རྒན་ཐར་འདོད་རྒྱལ་མཚན་མི་ལོ་ ༡༨ ཀྱི་བཙོན་འཇུག་ཁྲིམས་ཐག་དང་། འབྲི་རུ་གྲོང་རྡལ་གྱི་ཆོས་ཁྱབ་གཏེར་ཁ་སྔོག་འདོན་ངོ་རྒོལ་བྱེད་མཁན་གྱི་གཏེ་བོ་ཡིན་པའི་ཉེས་མིང་འོག ལོ ༡༣ ཁྲིམས་ཆད། འཕྲིན་ལས་ཚེ་དཀར་ལ་ཁྲིམས་འགལ་གླུ་གཞས་བཀྲམས་པའི་ཉེས་མིང་འོག་ལོ ༩ ། ཚེ་ལྷར་ཁ་བྲལ་གྱི་ལས་འགུལ་སྤེལ་བའི་ཉེས་མིང་འོག་ལོ་ ༣ བཅས་ཀྱི་ཁྲིམས་ཆད་བྱས་ཡོད།

འདི་ལོའི་ཕྱི་ཟླ་ ༡ ཚེས་ ༡༤ ཉིན་འབྲི་རུ་རྫོང་འབྲི་རུ་ཤང་སྨོན་ཁྱིམ་གྲོང་གི་རིག་གསར་དང་ངག་གྲགས་གཉིས་ལ་ལོ་༡༠ རེའི་ཁྲིམས་ཐག་དང་། རྒྱལ་དར་འཛུགས་རྒྱུར་དགག་པ་བྱས་པའི་ཉེས་མིང་འོག་སྨོན་ཁྱིམ་གྲོང་དཔོན་ཁྲི་རྒྱལ་ལ་ལོ ༡༣ ཁྲིམས་ཐག་བཅས་ཡོད་འདུག བོད་མི་དེ་དག་ལ་ཁྲིམས་ཆད་གཅོད་སྐབས་ནང་མི་ཉེ་འབྲེལ་སུ་གང་ལའང་ནག་ཉེས་འགྲེལ་བརྗོད་སོགས་བྱས་མེད་པར་མ་ཟད། ནང་མི་ཉེ་འབྲེལ་དང་ཁྲིམས་རྩོད་པ་སོགས་གང་ཡང་མེད་པའི་ཐོག་ཐག་གཅོད་བྱས་ཡོད་འདུག

གསར་འགོད་པ། དོན་གོ