མདོ་ཁམས་བྲག་གཡབ་བརྟན་བཞུགས།

༄༅། འཛམ་གླིང་ཤར་ནུབ་ཀྱི་ཡུལ་གྲུ་གང་སར་བཞུགས་པའི་མདོ་ཁམས་བྲག་གཡབ་ཀྱིི་ཁྱབ་ཁོངས་སེར་སྐྱ་ཐུན་མོང་ལ་ཆེད་ཞུ།།

ལམ་ཙམ་དགོངས་མངའ་ལྟར། ༢༠༡༣/༡༢/༢༤ཉིན་སེ་ར་ཐེག་ཆེན་གླིང་དུ་སྤྱི་ནོར་༸གོང་ས་༸སྐྱབས་མགོན་༸རྒྱལ་བའི་དབང་པོ་མཆོག་གི་ཞལ་སྔ་ནས་ལམ་རིམ་བཀའ་ཁྲིད་བསྩལ་གནང་མཛད་པའི་སྐབས་དེར། བྲག་ལྗོངས་བསྟན་འགྲོའི་དཔལ་མགོན་མཚུངས་མེད་༸སྐྱབས་མགོན་དགུ་པ་ཆེན་པོ་མཆོག་གིས་དཀྱེལ་ཡངས་དགོངས་བཞེས་གཏིང་ཟབ་ཀྱིས། རང་ཁོངས་བགྲེས་གཞོན་དུ་མས་མ་བགྲོས་བསམ་པ་གཅིག་མཐུན་གྱི་རེ་བ་གཞིར་བཟུང་། ༸གོང་ས་༸སྐྱབས་མགོན་ཆེན་པོ་མཆོག་གི་བླ་ན་མེད་པའི་མཛད་རྗེས་རྣམས་ལ་བཀའ་དྲིན་རྗེས་དྲན་ཞུ་བ་དང་། བསྟན་འགྲོ་སྤྱི་བྱེའི་བདེ་ཐབས་༸རྒྱལ་བའི་སྐུ་ཚེ་ཉིད་ལ་རག་ལས་པས་ན། རང་རེ་བྲག་གཡབ་མི་མང་ཡོངས་ནས་ལྷག་བསམ་དམ་ལར་གཅིག་མཐུན་ཐོག་ནས་བརྟན་བཞུགས་བསྟར་འབུལ་ཞུ་རྒྱུའི་སྙིང་སྟོབས་བསྐྱེད་ཐབས་བྱུང་ན། དེ་ལས་ལྷག་པའི་རླབས་ཆེན་རྣམ་དཀར་གྱི་བྱ་བ་བཟང་པོ་མ་མཆིས་པས། དེའི་ཐད་འཕྲལ་དུ་གྲོས་བསྡུར་བྱ་གལ་ཆེ་སྐོར་བཀའ་སློབ་ཕེབས་པ་གཞིར་བཟུང་། བྲག་གཡབ་༸སྐྱབས་མགོན་རིན་པོ་ཆེ་དབུ་བཞུགས་ཐོག །ཕྱོགས་འདུས་ཀྱི་མི་འཐུས་བསྡུ་སྐོང་ཐོག་བཀའ་བསྡུར་ལྷུག་པོ་མཛད་པའི་ཐོག་ནས་ཐག་གཅོད་གནང་བའི་གྲུབ་དོན་རྣམས། རང་མགོན་བྲག་གཡབ་༸སྐྱབས་མགོན་རིན་པོ་ཆེ་མཆོག་གིས། སྤྱི་ནོར་༸གོང་ས་༸སྐྱབས་མགོན་༸རྒྱལ་བའི་དབང་པོ་མཆོག་གི་མཛད་བརྒྱའི་བར་གསེང་ཞིག་ཏུ་མགོན་པོ་ཐུགས་རྗེའི་གཏེར་ཆེན་གང་ཉིད་ལ་སྙིང་ནས་མི་ཕྱེད་པའི་དད་དམ་ཅན་གུས་འབངས་མདོ་ཁམས་བྲག་གཡབ་སེར་སྐྱ་ཐུན་མོང་གིས། བརྟན་བཞུགས་བསྟར་འབུལ་ཞུ་འཐུས་ཆོག་པའི་༸སྙན་གསན་ཕུལ་བར་མགོན་པོ་གང་ཉིིད་ནས་བརྟན་བཞུགས་བསྟར་འབུལ་ཞུ་འཐུས་ཆོག་པའི་དོན་གྱི་བཀའ་བཟང་གསེར་གྱི་མེ་ཏོག་སྤྱི་བོའི་མཛེས་རྒྱན་དམ་པར་སྩོལ་གནང་མཛད་པར་གཞིར་བཟུང་། དགའ་ལྡན་ཕོ་བྲང་གི་ཡིག་ཚང་དུ་བརྟན་བཞུགས་གོ་སྒྲིག་ཚོགས་ཆུང་འཛུགས་ཆོག་པའི་སྙན་ཞུ་ཕུལ་བར་ཡིག་ཐོག་གི་བཀའ་ཁྲོལ་ཟབ་མོ་ལེགས་པར་ཐོབ་པ་མ་ཟད། དེ་རྗེས་འབུལ་དུས་ཀྱང་ཕྱི་ལོ ༢༠༡༤ཟླ་བ་༡༢ པའི་ནང་ལྷོ་ཕྱོགས་མོན་གྷོ་ལམ་རིམ་བཀའ་ཁྲིད་སྩོལ་གནང་མཛད་སྐབས་འབུལ་གཏན་འཁེལ་བའི་བཀའ་ཡིག་དམ་པ་བསྩལ་ཐོབ་བྱུང་དོན་བཞིན། བརྟན་བཞུགས་གོ་སྒྲིག་ཚོགས་ཆུང་དངོས་སུ་ཚུགས་ཏེ། རང་ཅག་རྣམས་ནས་བསྟན་པ་འདི་ཡི་སྟོན་པ་གཉིས་པ་འཛམ་གླིང་ཞི་བདེའི་དེད་དཔོན་ཆེན་པོ་ས་སྟེང་རྒྱལ་བསྟན་ཡོངས་རྫོགས་ཀྱི་མངའ་བདག་རང་ཅག་བོད་གངས་ཅན་པ་རྣམས་ཀྱི་མེ་ཏོག་གང་ལ་ཕོག་པའི་ལྷ་སྐལ་སྤྱི་ནོར་༸གོང་ས༸སྐྱབས་མགོན་༸རྒྱལ་དབང་ཐམས་ཅད་མཁྱེན་ཅིང་གཟིགས་པ་ཆེན་པོ་མཆོག་གིས་འཛམ་གླིང་སྤྱི་དང་། བྱེ་བྲག་རང་ཅག་བོད་གངས་ཅན་པའི་ཆོས་སྲིད་ཀྱི་མཛད་འཕྲིན་རྒྱ་ཆེར་བསྐྱངས་དང་སྐྱོང་གནང་མཛད་པ་རྣམས་ལ་བཀའ་དྲིན་རྗེས་དྲན་མཚོན་སླད་དང་། བདག་སོགས་འགྲོ་བའི་མགོན་དུ་སྐུ་ཚེ་ཞབས་པད་དྲང་སྲོང་ཚེ་མཐའ་ཡས་པའི་ངོ་བོ་བརྟན་པའི་ཆེད་དུ་དམིགས་ཏེ། བཀའ་འབྲེལ་གཞིར་བཟུང་ཕྱི་ལོ། ༢༠༡༤ ཟླ་བ། ༡༢ པའི་ཚེས། ༢༣་ནས་༢༩་བར་ལྷོ་ཕྱོགས་མོན་གྷོ་ལམ་རིམ་བཀའ་ཁྲིད་སྩོལ་གནང་མཛད་སྐབས་སུ་འབུལ་གཏན་འཁེལ་བ་ལགས་ན། དེ་དོན་བཞིན་འཛམ་གླིང་ཡུལ་གྲུ་གང་སར་བཞུགས་པའི་མདོ་ཁམས་བྲག་གཡབ་ཀྱིི་ཁྱབ་ཁོངས་སེར་སྐྱ་ཐུན་མོང་ལ་རླབས་ཆེན་རྣམ་དཀར་གྱི་མཛད་སྒོ་འདིའི་གནས་ཚུལ་རྣམས་མ་གོ་མ་ཐོས་མེད་པ་འབྱུང་ཆེད་ཡོངས་ཁྱབ་གསལ་བསྒྲགས་སུ།

མདོ་ཁམས་བྲག་གཡབ་བརྟན་བཞུགས་གོ་སྒྲིག་ཚོགས་ཆུང་ནས་ཕྱི་ལོ་ ༢༠༡༤ཟླ་བ ༧ ཚེས་ ༣༠ ཕུལ།

འབྲེལ་བ་གནང་ཡུལ། དགའ་ལྡན།༠༩༨༨༠༠༠༦༦༠༡། འབྲས།༠༩༩༧༢༨༡༧༧༧༣། རྣམ་གྲོལ་གླིང། ༠༩༥༣༥༤༡༧༣༨༤། དྷ་ས། ༠༩༤༡༨༩༩༡༧༧༣། བལ་ཡུལ།༠༠༩༧༧༩༨༠༣༩༠༨༩༨༨། གློག་འཕྲིན། dagyab10@gmail.com