རྒྱ་ནག་ནང་ས་ཡོམ་བརྒྱབ་འདུག

ཁ་སང་གཟའ་ཉི་མར་རྒྱ་ནག་ཡུན་ནན་ཞིང་ཆེན་དུ་ས་ཡོམ་བརྒྱབ་ཏེ་མི་ ༣༨༡ འདས་གྲོངས་དང་། མི་ ༡༨༠༡ ལ་རྨས་སྐྱོན་ཕོག་ཡོད་པ་དང་། ད་དུང་མི་ཤི་རྨས་ཀྱི་གྲངས་འབོར་འཕར་བཞིན་ཡོད་འདུག

ཟླ་འདིའི་ཚེས་ ༣ ཉིན་གྱི་ཕྱི་དྲོའི་ཆུ་ཚོད་ ༤།༣༠ ཐོག རྒྱ་ནག་ཡུན་ནན་ཞིང་ཆེན་དུ་ས་ཡོམ་བརྒྱབ་ཏེ་མི་ ༣༨༡ འདས་གྲོངས་དང་། མི་ ༡༨༠༡ ལོ་རྨས་སྐྱོན། ས་གནས་མི་མང་གི་སྡོད་ཁང་ཁིྲ་ ༡།༢ དང་རྡིབ་ཡོད་པ་དང་། སྡོད་ཁང་ཁྲི་ ༣ ལ་གཏོར་སྐྱོན་བཅས་ཐེབས་ཏེ། མི་མང་ཁྲི་ཕྲག་མང་པོ་འགྲོ་ཡུལ་མེད་པར་ལྷག་ཡོད་པ་དང་། ས་གནས་ཀྱི་གཞུང་ལམ་སོགས་ལ་གཏོར་སྐྱོན་ཚབས་ཆེན་བཟོས་ཡོད་པར་མ་ཟད། ཉེ་བའི་ཆར་མི་ཤི་རྨས་ཀྱི་གྲངས་འབོར་འཕར་བཞིན་ཡོད་འདུག རྒྱ་ནག་གཞུང་འབྲེལ་ས་ཡོམ་བརྟག་དཔྱད་ཚན་པས་ཐེངས་འདིའི་ས་ཡོམ་གྱི་ཚད་རིམ་ ༦།༥ ཡིན་ཚུལ་བརྗོད་ཡོད་པ་དང་། ཨ་རིའི་ས་ཡོན་བརྟག་དཔྱད་ཚན་པས་ས་ཡོམ་གྱི་ཚད་རིམ་ ༦།༡ ཡིན་ཚུལ་བརྗོད་འདུག

ཐེངས་འདིའི་གཏིང་ཟབ་ཚད་སྤྱི་ལེ་ ༡༢ ཡིན་པའི་རང་བྱུང་ས་ཡོམ་གྱི་གནོད་འཚེ་དེས་ཡུན་ནན་ཞིང་ཆེན་གྱི་རི་གྲོང་ས་ཁུལ་ཁག་ཡོངས་ལ་གནོད་སྐྱོན་ཚབས་ཆེན་བཟོས་འདུག་ལ། ཀོས་ཀྲིག་ཞིང་ཆེན་དང་སི་ཁྲོན་ཞིང་ཆེན་སོགས་ལའང་གཡོ་འགུལ་ཐེབས་ཡོད་འདུག ཉེ་བའི་ཆར་གནོད་ཐེབས་ས་ཁུལ་གྱི་གློག་དང་ལམ་ཁ་ཚང་མར་གཏོར་སྐྱོན་ཚབས་ཆེན་ཐེབས་ཏེ། གནོད་ཐེབས་མང་ཚོགས་ལ་བཟའ་ཆས་དང་། ས་གནས་སུ་མྱུར་སྐྱོབ་མི་སྣ་སོགས་འབྱོར་མ་ཐུབ་པའི་དཀའ་ངལ་འཕྲད་ཀྱི་ཡོད་འདུག

རྒྱ་ནག་གཞུང་འབྲེལ་བརྒྱུད་ལམ་དུ་ཁ་སང་གནོད་ཐེབས་ཀྱི་གནས་ཚུལ་ཐོས་རྗེས། རྒྱ་ནག་གི་སྲིད་བློན་ལི་ཁེ་ཆང་གི་སྣེ་འཁྲིད་པའི་ཚོགས་པ་ཞིག་པེ་ཅིན་ནས་ཡུན་ནན་དུ་འབྱོར་ཏེ་གནོད་ཐེབས་ས་ཁུལ་དུ་བཀོད་འདོམས་ཀྱི་ལས་དོན་བསྒྲུབ་བཞིན་ཡོད་ཚུལ་དང་། ཀྲོ་ཡང་ས་ཁུལ་ནས་དམག་མི་དང་མྱུར་སྐྱོབ་མི་སྣ་ ༦༠༠ དང་། སྦྱོང་བརྡར་ཡོད་པའི་ཁྱི་ ༡༢ བཅས་མངགས་གཏོང་གིས་འཚོལ་ཞིབ་བྱེད་ཀྱི་ཡོད་སྐོར་བརྗོད་འདུག

དེ་རིང་ཕྱི་ཚེས་ ༤ ཉིན་གྱི་ཞོགས་པར་ཡུན་ནན་ཞིང་ཆེན་དམངས་སྲིད་ལས་ཁུངས་ཀྱིས་གནས་ཚུལ་ཞིག་སྤེལ་ཏེ། ཉེ་བའི་ཆར་འདས་གྲོངས་སུ་ཕྱིན་པའི་རིགས་ཚང་མ་ལོའུ་ཏིན་རྫོང་དུ་བསྐྱལ་གྱི་ཡོད་པ་དང་། དེ་མིན་གྱི་རྨས་སྐྱོན་ཐེབས་པའི་རིགས་ཆོ་ཅྰ་རྫོང་དང་ཀྲོ་ཡང་ས་ཁུལ། ལི་ཅིན་ས་ཁུལ་ཧེ་ཙིག་རྫོང་བཅས་སུ་བསྐྱལ་བཞིན་ཡོད་སྐོར་བཀོད་འདུག

རྒྱ་ནག་གི་གཞུང་འབྲེལ་བརྒྱུད་ལམ་ཁག་ཏུ་ཐེངས་འདིའི་ས་ཡོམ་ཤུགས་ཆེ་བ་དང་གཏིང་ཚད་ཟབ་པ། གནོད་ཐེབས་ས་ཁུལ་གྱི་སྡོད་ཁང་འཚང་ཁ་ཆེ་བ། ས་གནས་ཀྱི་ཕྱོགས་གང་སར་གཏོར་སྐྱོན་ཚབས་ཆེན་བྱུང་ཡོད་སྟབས། རྒྱུ་དངོས་ཀྱི་འགྲོ་སོང་ཕོན་ཆེན་འགྲོ་རྒྱུ་ཡིན་སྐོར་བརྗོད་འདུག

ཐེངས་འདིའི་ས་ཡོམ་གྱི་གནོད་ཐེབས་ས་ཁུལ་ལོའུ་ཏིན་རྫོང་ནི། ཡུན་ནན་ཞིང་ཆེན་གྱི་རི་གྲོང་ཞིག་ཡིན་འདུག དེར་མེའོ་རིགས་དང་ཀྲོང་རིགས། པེ་རིགས་བཅས་གཙོས་པའི་མི་མང་ཁྲི་ ༤༣ གནས་སྡོད་བྱས་ཡོད་པ་དང་། རྒྱ་ནག་ནང་ཁུལ་དབུལ་སྐྱོར་ས་ཁུལ་ཆེ་ཤོས་ཤིག་ཡིན་འདུག ༢༠༡༢ ལོའི་ཟླ་ ༩ བར་ས་ཁུལ་དེར་ཚད་རིམ་ ༥།༦ ཅན་གྱི་ས་ཡོམ་བྱུང་སྟེ། མི་ ༨༡ འདས་གྲོངས་དང་། མི་ ༨༢༡ ལ་རྨས་སྐྱོན་ཚབས་ཆེན་བཟོས་ཡོད་འདུག

གསར་འགོད་པ། དོན་གོ