རྒྱ་དཀར་ནག་གཉིས་ཀྱི་གནའ་དེང་གི་ལོ་རྒྱུས་ཤེས་རྒྱུ་ཧ་ཅང་གལ་ཆེན་པོ་རེད།

ཁ་སང་བོད་ཀྱི་གཞོན་ནུ་ལྷན་ཚོགས་ཀྱི་འགན་འཛིན་ལྷན་ཚོགས་ཐེངས་ ༤༥ བའི་དབུ་འབྱེད་མཛད་སྒོའི་ཐོག་བཀའ་ཟུར་རྒྱལ་ལོ་དོན་འགྲུབ་མཆོག་གིས། བོད་མི་ཚོས་རང་གི་ལོ་རྒྱུས་ཤེས་དགོས་པར་མ་ཟད། རྒྱ་དཀར་ནག་གཉིས་ཀྱི་གནའ་དེང་གི་ལོ་རྒྱུས་དང་། འཛམ་གླིང་གི་འགྱུར་བ་ཤེས་པའི་ཐོག་འཐབ་རྩོད་བྱ་དགོས་སྐོར་གསུངས་འདུག

ཁ་སང་ཕྱི་ཚེས་ ༡༡ ཉིན་གྱི་སྔ་དྲོའི་ཆུ་ཚོད་ ༩།༠༠ ཐོག བོད་ཀྱི་གཞོན་ནུ་ལྷན་ཚོགས་ཀྱི་འགན་འཛིན་ལྷན་ཚོགས་ཐེངས་ ༤༥ པ་འབྲས་ལྗོངས་རྒྱལ་ས་སྒང་ཏོག་ཆོལ་གསུམ་ཚོགས་ཁང་དུ་ཚོགས་ཡོད་པ་དང་། དབུ་འབྱེད་མཛད་སྒོའི་སྐུ་མགྲོན་གཙོ་བོར་འབྲས་ལྗོངས་མངའ་སྡེའི་ཤེས་རིག་བློན་ཆེན་སྐུ་ཞབས་ཨར་བྷེ་སུབ་པཱ་ (RB Subba) མཆོག་དང་། སྐུའི་གཅེན་པོ་བཀའ་ཟུར་རྒྱལ་ལོ་དོན་འགྲུབ་མཆོག འབྲས་ལྗོངས་མངའ་སྡེ་གྲོས་ཚོགས་ཀྱི་ཚོགས་ཚོགས་གཞོན་བསོད་ནམས་རྒྱ་མཚོ་ལེགས་བཤད་ལགས། ཉེན་རྟོག་སྤྱི་ཁྱབ། མངའ་སྡེའི་ནགས་ཚལ་བཀའ་བློན་ཆེན་ཟུར་པ། དེ་བཞིན། བོད་ཀྱི་གཞོན་ནུ་ལྷན་ཚོགས་ཀྱི་ཚོགས་གཙོ་བསྟན་འཛིན་འཇིགས་མེད་ལགས་ཀྱི་གཙོས་པའི་དབུས་རྒྱུན་ལས་རྣམ་པ་དང་། ས་གནས་ཀྱི་གཞུང་འབྲེལ་དང་གཞུང་འབྲེལ་མིན་པའི་ཚོགས་པ་ཁག་གི་སྐུ་ཚབ། ཕྱོགས་མཐའི་གཞོན་ནུའི་ས་གནས་ཁག་ ༣༢ ནས་ཕེབས་པའི་སྐུ་ཚབ་ ༡༢༠ ། ས་གནས་མི་མང་བཅས་འཛོམས་ཡོད་འདུག

ཐེངས་འདིའི་འགན་འཛིན་ལྷན་ཚོགས་ཀྱི་ཚོགས་འདུ་ཕྱི་ཚེས་ ༡༡ ནས་ ༡༦ བར་གྱི་ཉིན་གསུམ་རིང་ཚོགས་འཆར་ཡོད་པ་དང་། ཚོགས་འདུའི་ཉིན་དང་པོ་དང་གཉིས་པར་དབུས་དང་ས་གནས་ཀྱི་ལས་བསྡོམས་དང་རྩིས་ཁྲ་སྙན་སྒྲོན་དང་། འགན་འཛིན་ལྷན་ཚོགས་ཐེངས་ ༤༣ པའི་གྲོས་ཆོད་ལ་ཞིབ་བཤེར་བཅས་གནང་འཆར་ཡོད་པར་མ་ཟད། ༧གོང་ས་མཆོག་གི་སྐུ་ཕྱྭའི་ཉེན་སྲུང་དང་། དོལ་རྒྱལ་རྗེས་འབྲང་པ་ཉུང་ཤས་ཀྱིས་༧གོང་ས་མཆོག་ལ་གཞི་མེད་སྒྲོ་འདོགས་དང་ཉེ་འཛུགས་བྱེད་པར་གདོང་ལེན་ཞུ་ཕྱོགས། གཞོན་ནུའི་སྒྲིག་འཛུགས་སྲ་བརྟན་གནས་ཐབས་དང་མ་འོངས་ལས་འགུལ་སྤེལ་ཕྱོགས་བཅས་གྲོས་གཞི་དོན་ཚན་བདུན་གྱི་ཐོག་གྲོས་བསྡུར་གནང་རྒྱུ་ཡིན་འདུག

ཁ་སང་གི་ཚོགས་འདུའི་དབུ་འབྱེད་མཛད་སྒོའི་ཐོག་སྐུའི་གཅེན་པོ་བཀའ་ཟུར་རྒྱལ་ལོ་དོན་འགྲུབ་མཆོག་གིས་བཀའ་སློབ་གསུང་བཤད་གནང་སྐབས། བོད་མི་ཚོས་ཐོག་མར་སོ་སོའི་མི་རིགས་ཀྱི་ལོ་རྒྱུས་ཤེས་དགོས་པ་དང་། ལྷག་པར་དུ་བོད་དེ་རྒྱ་དཀར་ནག་གཉིས་ཀྱི་བར་གནས་ཡུལ་ལུང་ཞིག་ཆགས་ཡོད་སྟབས། རྒྱ་ནག་མི་དམངས་སྤྱི་མཐུན་རྒྱལ་ཁབ་དང་རྒྱ་གར་གཉིས་ཀྱི་དེ་སྔོན་དང་དེང་སང་གི་ལོ་རྒྱུས་ཀྱང་མཁྱེན་རྟོགས་བྱེད་རྒྱུ་ཧ་ཅང་གལ་ཆེན་པོ་ཡིན་པ། སྤྱི་ཚོགས་ནང་ཁག་ཅིག་གིས་རང་སྐྱོང་དང་ཁག་ཅིག་གིས་རང་བཙན་དགོས་ཞེས་གསུང་གི་ཡོད་པ་དེར་མ་འགྲིག་པ་མེད་པ་དང་། བསམ་ཚུལ་འདྲ་མིན་ཡོད་ན་ཡག་པོ་ཡོད་ཀྱང་། དེང་སྐབས་འཛམ་གླིང་ཐོག་རྒྱ་ནག་གི་ཕྱོགས་གཏོགས་དང་། ཨུ་རུ་སུའི་ཕྱོགས་གཏོགས། ཨ་རིའི་ཕྱོགས་གཏོགས་ཞེས་དུམ་བུ་གསུམ་ཆགས་བཞིན་པའི་འགྱུར་བའི་རང་བཞིན་དང་། རྒྱ་ནག་གི་མི་སེར་ནང་རྒྱ་ནག་དམར་ཤོག་དབང་འཛིན་པར་ཡིད་ཆེས་བརླག་མཁན་ཇེ་མང་དུ་འགྲོ་བཞིན་པ་སོགས་ཤེས་པར་བྱས་ཏེ། འགྱུར་བ་ཅེས་པ་དེ་རང་བཞིན་གྱིས་འགྲོ་ངེས་པ་ཞིག་ཡིན་སྟབས། གཞོན་སྐྱེས་ཚོས་སེམས་ཤུགས་དང་རེ་བ་མི་བརླག་པར། རང་ནུས་གང་ཡོད་ཀྱིས་རྩ་དོན་ཐོག་གསར་གཏོད་དང་། གང་ཐུབ་ཀྱིས་ནུས་པ་འདོན་དགོས་སྐོར་གསུངས་ཡོད་པར་མ་ཟད། གཞོན་ནུ་ལྷན་ཚོགས་ཀྱི་ངོས་ནས་ད་བར་འགན་འཛིན་ལྷན་ཚོགས་ཐེངས་ ༤༥ ཚོགས་གནང་བ་དེ་གཟི་བརྗིད་ཆེན་པོ་དང་རྩ་ཆེན་པོ་ཡིན་སྟབས། མ་འོངས་པར་བོད་མི་མི་རེ་ངོ་རེས་རྩ་དོན་འཐབ་རྩོད་ཐད་ནུས་པ་འདོན་རྒྱུ་དང་། གཙོ་ཆེ་ཤོས་གྲ་སྒྲིག་དང་སློབ་སྦྱོང་། བོད་མི་ནང་ཁུལ་རྡོག་རྩ་ཆིག་སྒྲིལ་བཅས་བྱས་ཏེ་༧གོང་ས་མཆོག་དང་འཛིན་སྐྱོང་བཀའ་ཤག་ལ་རྒྱབ་སྐྱོར་གནང་རྒྱུ་དང་། དམིགས་བསལ་ཉེ་བའི་ལོ་འགའི་སྔོན་ནས་༧གོང་ས་མཆོག་གིས་སྐུ་དབང་མི་མང་གི་འདེམས་པའི་འཐུས་མིར་རྩིས་སྦྲོད་གནང་ཡོད་པ་ལྟར། བཀའ་ཤག་གི་ལས་དོན་ལ་རྒྱབ་སྐྱོར་གནང་རྒྱུ་ཧ་ཅང་གལ་ཆེན་ཡིན་སྐོར་སོགས་གསུངས་ཡོད་འདུག

གཞོན་ནུའི་ཚོགས་གཙོ་བསྟན་འཛིན་འཇིགས་མེད་ལགས་ཀྱིས་ད་རེབ་བོད་ཀྱི་གཞོན་ནུ་ལྷན་ཚོགས་ཀྱི་འགན་འཛིན་ལྷན་ཚོགས་ཐེངས་ ༤༥ པ་འབྲས་ལྗོངས་སུ་ཚོགས་པ་དེ་གནད་འགག་ཅིག་ཆགས་ཡོད་སྐོར་གསུངས་ཡོད་པར་མ་ཟད། ཉིན་གྲངས་གསུམ་རིང་གི་ཚོགས་འདུར་གཞོན་ནུའི་ས་གནས་ ༣༡ ནས་ཚོགས་བཅར་བ་ ༡༡༠ འཛོམས་ཡོད་པ་དང་། ཉིན་གྲངས་གསུམ་རིང་གྲོས་གཞི་ཁག་བདུན་གྱི་ཐོག་གོ་བསྡུར་སྦྱང་བཤད་གནང་རྒྱུ་ཡིན་སྐོར་སོགས་ངོ་སྤྲོད་དང་འབྲེལ། འདས་པའི་ལོ་ ༤༥ རིང་བོད་ཀྱི་གཞོན་ནུ་ལྷན་ཚོགས་ཀྱིས་བོད་རྒྱལ་ཁབ་དང་མི་རིགས་ཆེད་ལས་འགུལ་སྤེལ་ཡོད་པ་དང་། ད་ཆར་ཡང་དབུས་ས་གཉིས་མཉམ་རུབ་ཐོག་ས་གནས་ཁག་ཏུ་སྤྱི་ཚོགས་ཞབས་ཞུ་དང་། བོད་ཀྱི་ཐུན་མོང་མ་ཡིན་པའི་རིག་གཞུང་མི་ཉམས་རྒྱུན་འཛིན་གནང་གི་ཡོད་སྐོར་དང་། ད་བར་བོད་ཀྱི་གཞོན་ནུ་ལྷན་ཚོགས་ཀྱི་སྡིངས་ཆ་བརྒྱུད་ནས་སྤྱི་ཚོགས་ནང་ཚད་ལྡན་གྱི་མགོ་ཁྲིད་མང་པོ་སྐྱེད་སྲིང་བྱས་ཡོད་པ་དང་། ད་ཆར་རྒྱལ་བལ་འབྲུག་གསུམ་ཕུད་པའི་བྱང་ཨ་རི་དང་ཡུ་རོབ། ཨོ་སི་ཊོ་ལི་ཡ། ཐའེ་ཝན་བཅས་ཀྱི་གཞོན་སྐྱེས་མང་པོ་མཉམ་ཞུགས་གནང་གི་ཡོད་སྐོར་སོགས་བརྗོད་འདུག

གཞོན་ནུའི་ཚོགས་གཙོ་མཆོག་གིས་རང་བཙན་དང་ལམ་དབུ་མའི་སྐོར་ལ་གསུང་དོན། ” ང་ཚོའི་སྤྱི་ཚོགས་ནང་རང་བཙན་དང་དབུ་མའི་ལམ་གྱི་ཐོག་གླེང་སློང་མང་དག་ཅིག་ཡོང་གི་ཡོད་པ་རེད། ཡིན་ནའང་། བོད་ཀྱི་གཞོན་ནུ་ལྷན་ཚོགས་ཀྱི་དམིགས་ཡུལ་བོད་རང་བཙན་རེད། དེ་ང་ཚོའི་ཐོབ་ཐང་རེད། དེ་ང་ཚོ་བོད་པ་ཡིན་པ་དང་རང་ཉིད་ལ་འགན་ཞིག་ཡོད་པའི་ཆ་ནས་ང་ཚོ་རང་ཉིད་ཀྱི་ཐོབ་ཐང་རྩོད་ཀྱི་ཡོད་པ་རེད། བོད་མིའི་སྒྲིག་འཛུགས་ཀྱི་སྲིད་ཇུས་ལངས་ཕྱོགས་ལམ་དབུ་མ་རེད། ལམ་དབུ་མ་དེ་སྲིད་ཇུས་ཤིག་རེད། སྲིད་ཇུས་དེ་ག་དུས་ཡིན་ཡང་འགྱུར་བ་འགྲོ་སྲིད་པ་ཞིག་རེད། ང་ཚོའི་ངོས་ནས་མུ་མཐུད་རང་ཉིད་ཀྱི་ཐོབ་ཐང་རྩོད་རྒྱུ་ཧ་ཅང་གལ་ཆེན་པོ་མཐོང་གི་ཡོད་ལ། བོད་མིའི་སྒྲིག་འཛུགས་ཀྱི་སྲིད་ཇུས་ལམ་དབུ་མར་མཐའ་གཅིག་ཏུ་གུས་བརྩི་ཞུ་བཞིན་ཡོད། ” ཅེས་གསུངས་འདུག

ཚོགས་འདུའི་གྲོས་གཞི་ཁག་ནི། ཀ༽བོད་དེ་རང་བཙན་གྱི་རྒྱལ་ཁབ་ཅིག་ཡིན་པའི་དངོས་ཡོད་ཀྱི་ལོ་རྒྱུས་དག་བོད་མི་དང་རྒྱལ་སྤྱིའི་མི་མང་། ལྷག་པར་དུ་རྒྱལ་སྤྱིའི་མཐོ་སློབ་ཁག་གི་སློབ་མར་མཁྱེན་རྟོགས་ཆེད་ལས་འགུལ་སྤེལ་ཕྱོགས་དང་། ཁ༽ད་ལྟའི་བོད་ནང་གི་ཛ་དྲག་གནས་སྟངས་དང་། བོད་ཀྱི་བདེན་དོན་འཐབ་རྩོད་ལ་མཉམ་འབྲེལ་རྒྱལ་ཚོགས་ཀྱི་གཙོས་པའི་རྒྱལ་སྤྱིའི་ཚོགས་པ་ཁག འཛམ་གླིང་རྒྱལ་ཁབ་ཁག་གི་གྲོས་ཚོགས་དང་མི་མང་བཅས་ནས་རྒྱབ་སྐྱོར་ཡོང་ཐབས་སུ་ལས་འགུལ་སྤེལ་ཕྱོགས། ག༽རྒྱ་ནག་གི་གདུག་རྩུབ་སྲིད་ཇུས་འོག་དངོས་ཤུགས་བརྒྱུད་གསུམ་ནས་གནོན་ཤུགས་དང་དཀའ་ངལ་མྱོང་བཞིན་པའི་རྒྱ་ཁབ་དང་མི་རིགས་ཁག་དང་ལྷན་མཐུན་ཕྱོགས་ཀྱི་ལས་འགུལ་སྤེལ་ཕྱོགས། ང༽རྒྱ་ནག་གཞུང་གིས་༧གོང་ས་མཆོག་ལ་གཞི་མེད་སྐྱོན་འཛུགས་དང་མི་སེར་སྤེལ་བའི་གདུག་རྩུབ་ཅན་གྱི་སྲིད་བྱུས་འོག་བོད་ཀྱི་སྣོད་བཅུད་གཉིས་ལ་ཚད་ལས་བརྒལ་བའི་གཏོར་བརླག་གཏོང་བཞིན་པར་གདོང་ལེན་བྱེད་ཕྱོགས། ཅ༽༧པཎ་ཆེན་དགེ་འདུན་ཆོས་ཀྱི་ཉི་མ་གཙོས་པའི་ཉེས་མེད་ཆབ་སྲིད་བཙོན་རྣམས་དང་། རྒྱ་གཞུང་གིས་འཛིན་བཟུང་འོག་གར་སོང་ཆ་མེད་གྱུར་བའི་བོད་མི་རྣམས་ཀློད་གྲོལ་ཡོང་ཐབས་སུ་ལས་འགུལ་སྤེལ་ཕྱོགས།

གྲོས་གཞི་དོན་ཚན་བཞི་བ། བོད་ཀྱི་བདེན་དོན་འཐབ་རྩོད་ཆེད་བོད་ཕྱི་ནང་གཉིས་སུ་རང་ལུས་མེར་བསྲེཊ་སོགས་རླབས་ཆེ་བའི་བློས་གཏོང་གི་ལས་འགུལ་བསྟུར་མར་སྤེལ་བཞིན་པའི་དགེ་འདུན་ཁག་སྒྲུབ་ཐབས་སུ་ལས་འགུལ་སྤེལ་ཕྱོགས།

གྲོས་གཞི་དོན་ཚན་ལྔ་བ། མི་རབས་གསར་བ་རྣམས་ལ་བོད་ཀྱི་ཐུན་མིན་ཆོས་དང་རིག་གཞུང་། སྐད་ཡིག བོད་མིའི་གཤིས་སྤྱོད་བཟང་པོ་རྒྱུན་གནས་ཐུབ་ཐབས་སུ་གཞོན་ལྷན་ནས་འགན་འཁུར་ཞུ་ཕྱོགས།

གྲོས་གཞི་དོན་ཚན་དྲུག་པ། ༧རྒྱལ་བའི་སྐུ་ཕྱྭའི་ཐོག་འགན་འཁུར་ཞུ་ཕྱོགས། ཀ༽༧གོང་ས་མཆོག་གི་སྐུ་ཕྱྭའི་ཉེན་སྲུང་ཐད་གཞོན་ལྷན་ནས་དམིགས་བསལ་འགན་འཁུར་ཞུ་ཕྱོགས། ཁ༽དོལ་རྒྱལ་རྗེས་འབྲང་པ་ཉུང་ཤས་ནས་༧གོང་ས་མཆོག་ལ་གཞི་མེད་སྒྲོ་འདོགས་ཀྱི་ཉེས་འཛུགས་བྱེད་བཞིན་པར་གཞོན་ལྷན་ནས་གདོང་ལེན་ཞུ་ཕྱོགས།

གྲོས་གཞི་དོན་ཚན་བདུན་པ། བོད་ཀྱི་གཞོན་ནུ་ལྷན་ཚོགས་དབུས་ས་གཉིས་ཀྱི་སྒྲིག་འཛུགས་སྲ་བརྟན་དང་། ལས་དོན་བྱེད་ཕྱོགས། འབྲེལ་ལམ་ཡར་རྒྱས་ཚགས་ཚུད་དང་གོང་འཕེལ་གཏོང་ཕྱོགས་བཅས་ཡིན་འདུག

གསར་འགོད་པ། དོན་གོ