ལྷ་མོ་རྩིས་གསུམ་དང་འཕྲིན་བཅོལ་ལ་བརྟེན་པའི་བོད་པའི་ཚོང་བ།

ཨ་རིའི་ཨེ་མོ་རེ་གཙུག་ལག་སློབ་གྲྭར་སྤྱི་ཚོགས་ཡར་རྒྱས་ལག་ལེན་ཐོག་གཙུག་ལག་རབ་འབྱམས་པའི་སློབ་སྦྱོང་བྱེད་བཞིན་པའི་ཚེ་དབང་རིག་འཛིན་ལགས་ཀྱིས་དབྱར་ཁའི་གུང་སེང་དང་བསྟུན་ཏེ། བཙན་བྱོལ་བོད་མིའི་སྤྱི་ཚོགས་ནང་གི་ཆེད་གཉེར་ཚོང་ལས་སྐོར་ལ་ཞིབ་འཇུག་བྱས་ཡོད་སྟབས། གསར་འགོད་པས་ཁོང་ལ་བོད་པའི་ཆེད་གཉེར་ཚོང་ལས་སྐོར་ལ་བཅར་འདྲི་ཞུས།

དྲི་བ། ཐོག་མར་ཁྱེད་རང་ངོ་སྤྲོད་ཐུང་ངུ་ཞིག་གནང་རོགས།

ལན། ང་ ༡༩༩༢ ལོར་བོད་ནས་རྒྱ་གར་དུ་བསླེབས་ཏེ་དྷ་སྟེང་བོད་ཁྱིམ་ནས་འཛིན་རིམ་ ༡༢ བར་སློབ་སྦྱོང་བྱས་པ་ཡིན། ༢༠༠༤ ལོར་རྒྱ་གར་ལྷོ་ཕྱོགས་མན་ལོར་ (Mangalore) གྲོང་ཁྱེར་ནང་སྤྱི་ཚོགས་ཡར་རྒྱས་གཏོང་ཐབས་ཀྱི་རིག་གནས་རབ་འབྱམས་དང་གཙུག་ལག་རབ་འབྱམས་ཐོག་སློབ་སྦྱོང་ཐོན་རྗེས། ལྡི་ལིར་ཡོད་པའི་རྒྱལ་སྤྱིའི་གཞུང་འབྲེལ་མིན་པའི་ཚོགས་སྡེ་ཞིག་ཏུ་སྤྱི་ཚོགས་ཡར་རྒྱས་གཏོང་ཐབས་ཐོག་ལས་ཀ་ལོ་ ༣ རིང་བྱས་པ་ཡིན། ༢༠༡༣ ལོར་བོད་མིའི་སྒྲིག་འཛུགས་ཤེས་རིག་ལས་ཁུངས་དང་ནེའུ་ཡོག་བོད་ཀྱི་ཐེབས་རྩ་བརྒྱུད་ནས་ཨ་རིའི་སློབ་ཡོན་རག་ཏེ་ད་ལྟ་ཨེ་མོ་རེ་གཙུག་ལག་སློབ་གྲྭའི་ནང་སྤྱི་ཚོགས་ཡར་རྒྱས་ལག་ལེན་སྐོར་ལ་སློབ་སྦྱོང་བྱེད་བཞིན་ཡོད།

དྲི་བ། རྒྱ་གར་ནང་གི་བོད་རིགས་ཚོང་ལས་ཆེད་གཉེར་བ་ཚོར་མ་རྩ་དང་ཁྲིམས་ཐོག་ནས་དཀའ་ངལ་གང་དག་འཕྲད་ཀྱི་འདུག

ལན། འཛམ་གླིང་དངུལ་ཁང་གིས་ ༢༠༠༩ དང་ ༢༠༡༢ ལོར་ཆེད་གཉེར་ཚོང་ལས་ཆུང་ཙག་སྐོར་ལ་ཞིབ་འཇུག་བྱས་ཡོད་པ་དང་། ཁོང་ཚོས་འཛམ་གླིང་ཡོངས་ཀྱི་ཆེད་གཉེར་ཚོང་ལས་པའི་དཀའ་ངལ་ཆེ་ཤོས་མ་རྩ་འཛུགས་མཁན་མེད་པ་དང་། དངུལ་ཁང་ཁག་གིས་དངུལ་གཡར་གཏོང་མི་བྱེད་པ་སོགས་ཡིན་ཚུལ་བསྒྲགས་ཡོད་པ་རེད། སྦྱིར་ཚོང་ལས་ཆུང་ཙག་རིགས་ལ་མ་རྩ་ཆེན་པོ་མི་དགོས་པར་ཁེ་སང་ཆེན་པོ་ཡོད། དེ་བཞིན། ངས་བཙན་བྱོལ་ནང་གི་བོད་རིགས་ཆེད་གཉེར་ཚོང་ལས་སྐོར་ལ་བལྟས་ཡོང་སྐབས། ཆེད་གཉེར་ཚོང་ལས་བྱེད་མཁན་རིགས་ལ་དངུལ་གཡར་བ་དང་ཁྲིམས་མཐུན་ཚོང་ལས་དེབ་སྐྱེལ་བྱེད་པར་དཀའ་ངལ་ཆེ་ཤོས་ཆགས་འདུག ངས་སྔོན་ཆད། བོད་པའི་ཚོང་པ་ཚོས་གཞུང་ལ་དེབ་སྐྱེལ་མི་བྱེད་པའི་རྒྱུ་མཚན་ཁྲལ་དང་ཁྲིམས་དོན་གྱི་འགན་སོགས་ལ་གཡོལ་ཆེད་ཡིན་རྒྱུ་རེད་བསམ་སོང་། འོན་ཀྱང་བསམ་ཚུལ་དེ་ཏག་ཏག་བསྡད་མི་འདུག མང་པོ་ཞིག་གིས་སོ་སོའི་ཚོང་ལས་གཞུང་ལ་དེབ་སྐྱེལ་བྱེད་སྟངས་ཤེས་ཀྱི་མེད་པ་དང་། དེའི་ཁེ་ཕན་སོགས་ཧ་གོ་མེད་པ་ཁག་ཡོད་པ་མ་རེད། དེབ་སྐྱེལ་ལ་རིགས་བདུན་བརྒྱད་ཡོད་དུས་ལས་ཁུངས་མང་པོ་བརྒྱུད་དགོས་པ་དང་། ལྷག་པར་དུ་རྒྱ་གར་གྱི་ལས་བྱེད་ཚོས་སང་ཉིན་དང་གནངས་ཉིན་ཤོག་ཟེར་ནས་འགྱངས་འགྲོ་བ་སོགས་ཀྱི་དཀའ་ངལ་འོག་ལྷག་འདུག

རྒྱ་གར་གྱི་ཆེད་གཉེར་ཚོང་ལས་ཆུང་ཙག་རིགས་ཀྱི་ཁྲིམས་གཞི་ (MSMED)ཞེས་པ་ལྟར་ན། དེའི་ཁོངས་སུ་མ་རྩ་ཧིན་སྒོར་འབུམ་ ༡༠༠ ཡི་འོག་ཏུ་མི་བཅུ་ཙམ་གྱིས་མ་རྩ་བཙུགས་ཡོད་པའི་ཚོང་ལས་ཞིག་ཡིན་དགོས་པ་དང་། བོད་པ་མང་ཆེ་བ་ཚོང་ལས་ཙག་ཙིག་རིགས་ཀྱི་ཁོངས་སུ་གཏོགས་ཀྱི་ཡོད། གཞུང་ལ་དེབ་སྐྱེལ་བྱས་ན་གཞུང་གི་ཁེ་ཕན་མང་པོ་ཞིག་ལེན་ཐུབ་ཀྱི་ཡོད། དཔེར་ན། དེ་སྔོན་རྒྱ་གར་ཀོང་རེ་སི་གཞུང་གིས་གསལ་བསྒྲགས་ཤིག་སྤེལ་བའི་ནང་། རྒྱ་གར་ནང་ཡོད་པའི་བོད་རིགས་སྐྱབས་བཅོལ་པ་ཚོར་རྒྱ་གར་དབུས་གཞུང་གི་མི་མང་ལ་རོགས་སྐྱོར་ལས་གཞི་གང་གནང་གི་ཡོད་པ་ཚང་མ་ཐོབ་ཀྱི་ཡོད་པ་དང་། དངུལ་ཁང་སོགས་ནས་བུ་ལོན་ལེན་ཆོག་པའི་བཀའ་ཁྱབ་ཅིག་བཏང་འདུག སོ་སོའི་ཚོང་ལས་གཞུང་ལ་དེབ་སྐྱེལ་བྱས་ཡོད་ན་ཐོབ་ཐང་དེ་དག་ལེན་པར་ཁྱད་པར་ཆེན་པོ་ཡོད་པ་རེད།

དྲི་བ། ཚོང་ལས་རིགས་རྒྱ་གར་གཞུང་ལ་དེབ་སྐྱེལ་བྱེད་པར་རིགས་བདུན་བརྒྱད་ཅིག་ཡོད་ཟེར་བ་དེ་གང་དག་ཡིན་པ་དང་། དེ་དག་གི་གཞི་རྩའི་ཆ་རྐྱེན་དང་། ཐོག་མའི་འགྲོ་ལུགས་སོགས་གང་འདྲ་ཡོད་དམ།

ལན། དེའི་སྐོར་ངས་ཇི་མ་ཇི་བཞིན་བཤད་ཐུབ་ཀྱི་མེད། དཔེར་ན། ཚོང་ཁང་དེབ་སྐྱེལ་དང་ཚོང་ཁང་གི་དཔྱ་ཁྲལ་དེབ་སྐྱེལ། བཟོ་ལས་ཐོན་སྐྱེད་རིགས་ཀྱི་གླ་མི་དེབ་སྐྱེལ། ཚོང་ལས་ཆུང་ཙག་རིགས་ནང་གི་བཟོ་ལས་ཐོན་སྐྱེད་ཡིན་ན། ཁང་པའི་ཆེ་ཚད་དང་ཁང་པའི་ནང་གི་གློག་དང་གསང་སྤྱོད་སོགས་ཀྱི་ཆ་རྐྱེན་ཚང་དགོས་པ་རེད།

དྲི་བ། བོད་རིགས་ཆེད་གཉེར་ཚོང་ལས་ཆུང་ཙག་བྱེད་མཁན་ཚོས་རྒྱ་གར་གྱི་མི་སེར་ཡིན་མིན་ཐོག་ནས་ཚོང་ལས་དེབ་སྐྱེལ་བྱེད་པར་ཁྱད་པར་ཡོད་དམ།

ལན། སྦྱིར་བཏང་བོད་པ་ཚོས་རྒྱ་གར་ནང་ག་རེ་བྱེད་ཆོག་པ་དང་ག་རེ་བྱེད་མི་ཆོག་པའི་སྐོར་གསལ་བོ་ཞིག་ཁྱོན་ནས་ཡོད་པ་མ་རེད། ཁ་ཤས་ཀྱིས་བོད་པ་ཚོས་རྒྱ་གར་ནང་འོས་བསྡུའི་ཐོབ་ཐང་དང་འོས་མིར་ལངས་པའི་ཐོབ་ཐང་མེད་པ་མ་གཏོགས་ཚང་མ་བྱེད་ཆོག་པ་རེད་ཟེར་གྱི་ཡོད་པ་རེད། ད་ལྟའི་བོད་མིའི་སྒྲིག་འཛུགས་བཀའ་ཤག་གིས་དོན་དངོས་ཐོག་བོད་པ་ཚོས་རྒྱ་གར་ནང་ག་རེ་བྱེད་ཆོག་མིན་མིན་སྐོར་ལ་་གསལ་བོ་བཟོ་བའི་ཕྱག་ལས་གནང་དང་གནང་བཞིན་ཡོད་པ་རེད། ཚོང་ལས་དེབ་སྐྱེལ་བྱེད་པར་རྒྱ་གར་མི་སེར་དང་བོད་པ་སུ་ཡིན་ལ་ཁྱད་པར་ཡོད་པ་མ་རེད། ལྡི་ལི་དང་བྷིང་ལོར་སོགས་སུ་ཚོང་ལས་ཆེན་པོ་གཉེར་མཁན་བོད་པ་མང་ཆེ་བས་དེབ་སྐྱེལ་བྱས་འདུག ཁོང་ཚོར་མཚོན་ན་དེབ་སྐྱེལ་མ་བྱས་པར་ཧ་ལམ་ཚོང་ལས་བྱེད་ཐབས་མེད་པ་འདྲ་བོ་འདུག

དྲི་བ། བཙན་བྱོལ་བོད་མིའི་སྤྱི་ཚོགས་ནང་མ་རྩ་ཆེན་པོ་མེད་པར་ཆེད་གཉེར་ཚོང་ལས་ཀྱི་ལམ་ཁ་ཡོད་དམ།

ལན། ཁྱེད་རང་ལ་ཚོང་ལས་བྱེད་པར་འདོད་པ་དང་འཆར་གཞི་ཡག་པོ་ཡོད་ན་ལམ་ཁ་ཡོད་པ་རེད། བོད་མིའི་སྤྱི་མཐུན་མཉམ་འབྲེལ་ནས་ཀྱང་དངུལ་གཡར་བའི་ལས་འཆར་སྒྲིག་གི་ཡོད་པ་དང་། ད་ལོའི་ལོ་མཇུག་ཏུ་ཁོང་ཚོས་ཚོང་ལས་ཆུང་རིགས་བྱེད་མཁན་ཚོར་བུ་ལོན་གཏོང་འཆར་ཡོད་ས་རེད། ཚོང་ལས་འཆར་གཞི་ཡག་པོ་དང་དེའི་དམིགས་ཡུལ་གཙོ་བོ་སོ་སོའི་ཁེ་སང་མིན་པར་སྤྱི་ཚོགས་བདེ་དོན་སོགས་ཡིན་ན། གཞུང་དང་གཞུང་འབྲེལ་མིན་པའི་སྤྱི་ཚོགས་བདེ་དོན་ཚོགས་པ་དེ་ཚོས་ཁྱེད་ཀྱི་འཆར་གཞི་ལ་ཞིབ་འཇུག་བྱས་ཏེ། མ་རྩ་སྐྱི་གཡར་དང་རོགས་རམ་བྱེད་མཁན་མང་པོ་ཡོད། དེང་སང་འཛམ་གླིང་ནང་ཚོང་ལས་བྱེད་མཁན་ཆུང་རིགས་ལ་བུ་ལོན་གཏོང་བའི་དངུལ་ཁང་ལྟ་བུའི་ཚོགས་པའང་དར་ཁྱབ་འགྲོ་བཞིན་ཡོད། ད་ལྟ་བོད་མིའི་སྒྲིག་འཛུགས་དཔལ་འབྱོར་ལས་ཁུངས་ནས་ཀྱང་ (TED) ཞེས་པའི་ལས་གཞི་གསར་པ་ཞིག་བཏོན་འདུག དེ་ཚོང་ལས་བསམ་བློ་ཡོད་མཁན་ཚོར་ཟབ་སྦྱོང་དང་མ་རྩ་གཡར་བ་སོགས་ཀྱི་འཆར་གཞི་ཡོད་འདུག

དྲི་བ། ད་ལྟའི་ཆར་རྒྱ་གར་ནང་བོད་རིགས་ཆེད་གཉེར་ཚོང་ལས་ཆུང་ཙག་རིགས་བྱེད་མཁན་གྱི་གནས་སྟངས་ག་འདྲ་ཡིན།

ལན། དབྱིན་ཡིག་གི་ཚིག་ (Entrepreneur )ཞེས་པའི་ཐ་སྙད་གཞིར་བཟུང་གིས་ཆེད་གཉེར་ཚོང་ལས་བོད་པའི་སྤྱི་ཚོགས་ནང་ཉུང་ཉུང་རེད། བོད་རིགས་ཚོང་ལས་བྱེད་མཁན་ཚོའི་ཁྲོད་ཚོང་ལས་ཤེས་ཚད་ཡོད་མཁན་ཞེ་དྲག་ཉུང་ཉུང་རེད། ངས་ཞིབ་འཇུག་བྱས་པ་ལྟར་ན། མི་ ༩༦ ནས་བརྒྱ་ཆ་ ༡༤ ཙམ་མ་གཏོགས་རིག་གནས་འབྱམས་པ་དང་གཙུག་ལག་རབ་འབྱམས་པ་ཐོན་མཁན་མི་འདུག དཔེར་ན། དང་པོ་ཁྲིམས་ཀྱི་འགྲོ་སྟངས་མ་ཤེས་པའི་དཀའ་ངལ་དང་། ཁྲོམ་རྭའི་ནང་འགྲན་བསྡུར་གྱི་དཀའ་ངལ་སོགས་ཡོད་པ་རེད། ད་ལྟ་བཙན་བྱོལ་བོད་མིའི་སྤྱི་ཚོགས་ནང་ཆེད་ལས་ཚོང་གཉེར་བ་གཞི་ནས་འཚར་ལོངས་འབྱུང་བཞིན་པའི་སྐབས་ལྟ་བུ་རེད།

དྲི་བ། རྒྱ་གར་ནང་བོད་རིགས་ཚོང་ལས་དོན་གཉེར་མཁན་ཚོར་གོ་སྐབས་ག་འདྲ་ཡོད་དམ།

ལན། རྒྱ་གར་ནང་ཚོང་ལས་ཆུང་ཙག་རིགས་གཉེར་མཁན་ཚོར་གོ་སྐབས་ཆེན་པོ་ཡོད་པ་རེད། ལས་ཀ་སྐྲུན་མཁན་མང་ཤོས་གཉིས་པ་ཚོང་ལས་ཆུང་ཙག་རིགས་ཆགས་ཡོད། ལྷག་པར་དུ་ཕྱིར་འདྲེན་ཚོང་ཟོག་གི་བརྒྱ་ཆ་ ༣༩ བཟོ་ལས་ཐོན་སྐྱེད་ཆགས་ཡོད། དེང་སང་རྒྱ་གར་འཛམ་གླིང་ནང་གི་ཁྲོམ་རྭ་ཆེ་ཤོས་གཉིས་པ་རེད། རྒྱ་གར་གྱི་མི་འབོར་འཕེལ་རྒྱས་ལ་བལྟས་ན་ ༢༠༣༠ ལོའི་ནང་རྒྱ་གར་འཛམ་གླིང་གི་ཁྲོམ་རྭ་དང་པོ་ཆགས་རྒྱུ་ཡིན་པ་གཏན་འཁེལ་ཚར་བ་རེད། རྒྱ་གར་གྱི་ཁྲོམ་རྭར་ཆ་བཞག་ན། ཉམ་ཐག་དང་མི་སེར་དཀྱུས་མ། ཕྱུག་བདག་བཅས་ཚོང་རྭ་ལ་རབ་འབྲིང་མཐའ་གསུམ། ཁྲོམ་རྭ་ཁག་ཧ་ཅང་ཆེན་པོ་ཡོད་སྟབས། ཁྲིམས་མཐུན་དེབ་སྐྱེལ་བྱེད་ཐུབ་ཚེ་ཆེད་གཉེར་ཚོང་པ་ལས་ཚོང་ཆུང་ཙག་རིགས་བྱེད་མཁན་ཚོར་གོ་སྐབས་དང་ཁེ་ཕན་ཆེན་པོ་རག་པའི་གོ་སྐབས་ཡོད་པ་རེད།

དྲི་བ། ཁྱེད་ཀྱིས་རྒྱ་གར་ནང་ཆེད་ལས་ཚོང་ལས་ཡར་རྒྱས་གཏོང་ཐབས་ཡག་ཤོས་གང་མཐོང་གི་ཡོད།

ལན། གོང་དུ་བཤད་པ་ལྟར་རེད། ཐོག་མ་ཚོང་ལས་དང་འབྲེལ་བའི་ཁྲིམས་དང་སྒྲིག་གཞིའི་སློབ་སྦྱོང་དང་རྒྱུས་ལོན་གང་འཚམ་དགོས་རྒྱུ་གལ་ཆེན་པོ་རེད། ང་ཚོས་ཕུགས་རྒྱང་རིང་པོའི་ཐོག་ནས་ག་རེ་བྱེད་དགོས་ཀྱི་འདུག་ཟེར་ན། སློབ་གྲྭ་རིམ་པའི་ཚོང་ལས་སྡེ་ཚན་གྱི་སློབ་མ་ཚོར་ཆེད་གཉེར་ཚོང་ལས་ཀྱི་སློབ་སྦྱོང་སྤྲོད་རྒྱུ་གལ་ཆེན་པོ་རེད། རྒྱ་གར་དབུས་དངུལ་ཁང་གི་ཁྲིམས་དང་སྒྲིག་གཞི་མང་པོ་རྩི་དགོས་སྟབས་བོད་པ་ཚོས་དངུལ་ཁང་འཛུགས་ཁག་པོ་ཡོད་ཀྱང་། ཚོང་ལས་ཆུང་ཆུང་རིགས་ལ་དཔལ་འབྱོར་རོགས་སྐྱོར་བྱེད་པའི་ཚོགས་སྡེ་བཙུགས་ནས་རོགས་པ་བྱེད་ཐུབ་ན་ཡག་པོ་འདུག དེ་བཞིན། ཚོང་པ་ཚོར་ཚོང་ལས་སྐོར་གྱི་ཤེས་བྱ་དང་ཟབ་སྦྱོང་སོགས་སྤྲོད་སྐབས། རྒྱ་གར་ནང་དང་བོད་པའི་སྤྱི་ཚོགས་ཁོར་ཡུག་དང་འཚམ་པའི་ཤེས་བྱ་དང་ཉམས་མྱོང་རིགས་བོད་སྐད་ཐོག་ནས་སྤྲོད་རྒྱུ་གལ་ཆེན་པོ་རེད།

དྲི་བ། བོད་པའི་ཚོང་ལས་ཐོག་ཆོས་དང་རིག་གཞུང་གིས་ཁྱད་པར་བཟོ་བཞིན་ཡོད་དམ།

ལན། ནང་ཆོས་ལ་ཆ་མཚོན་ན། འཚོ་བ་ཡང་དག་ཟེར་བ་གལ་ཆེ་ཤོས་ཤིག་རེད། མ་རྩ་རིང་ལུགས་ཀྱི་ཚོང་རྭའི་ཁྲོད་འཚོ་བ་ཡང་དག་ཟེར་བ་ཞིག་མེད་པར་སོ་སོའི་འདོད་སེམས་སྐོང་དགོས་པ་དེ་རེད། དེ་གཉིས་ཀྱི་རྩ་བའི་ལྟ་གྲུབ་འགལ་བ་ཆགས་ཡོད། ངས་བོད་པ་ཚོར་ཚོང་ལས་ཀྱི་ཐག་གཅོད་བྱེད་དུས་མོ་དང་འཕྲིན་བཅོལ་བྱེད་ཀྱི་ཡོད་མེད་དྲིས་པར། མང་ཤོས་ཀྱིས་འཕྲིན་བཅོལ་བྱེད་བཞིན་ཡོད་པ་དང་མོ་རྒྱག་མཁན་བརྒྱ་ཆ་ ༣༠ ལྷག་འདུག ངས་ཚོང་པ་ཚོར་དཔེར་ན་ཁྱེད་རང་གིས་བསམ་བློའི་ནང་ཚོང་ལས་བྷིང་ལོར་བྱེད་འདོད་ཡོད་ཀྱང་མོ་ཡི་ནང་ལྡི་ལིར་ཡག་པོ་འདུག་ཟེར་ན་ག་རེ་བྱེད་རྒྱུ་ཡིན་མིན་དྲིས་པར། ཁོང་ཚོ་མང་ཆེ་ཤོས་ཀྱིས་མོ་ལྟར་ཤར་སྐྱོད་བྱེད་རྒྱུ་ཡིན་ཟེར། སྦྱིར་བཏང་ངས་མོ་ཡག་པོ་མ་རེད་ཞུ་ཡི་མེད། ཡིན་ནའང་མོ་ལས་ལྷག་པ་འཆར་གཞི་ཡག་པོ་བསྒྲིག་ཐུབ་ན་དེས་ཕན་ཐོགས་ཆེ་བ་ཡོང་གི་རེད་བསམ་གྱི་འདུག

དྲི་བ། ཁྱེད་རང་གིས་གུང་གསེང་སྐབས་བོད་མི་ཆེད་གཉེར་ཚོང་ལས་སྐོར་ལ་ཞིབ་འཇུག་བྱེད་དགོས་དོན་གང་ཡིན།

ལན། ང་ཚོའི་འཐབ་རྩོད་ཀྱི་སྙིང་པོ་ཆོས་དང་རིག་གཞུང་སྲུང་སྐྱོབ་བྱེད་དགོས་པ་དེ་རེད། དེ་སྲུང་སྐྱོབ་བྱེད་པར་གཙོ་བོ་སྤྱི་ཚོགས་ཡར་རྒྱས་གཏོང་དགོས་ཀྱི་ཡོད། སྤྱི་ཚོགས་ཡར་རྒྱས་གཏོང་བར་ཕྱིའི་རྒྱབ་སྐྱོར་ལ་གཏན་ནས་ཡར་རྒྱས་གཏོང་ཐབས་ཤིག་དང་། སྤྱི་ཚོགས་ནང་ལོགས་ཀྱི་ནུས་པ་གོང་འཕེལ་དུ་གཏོང་རྒྱུ་བཅས་རིགས་གཉིས་ཡོད། དེང་སང་འཛམ་གླིང་གི་མཁས་པ་མང་པོ་ཞིག་གིས་ཕྱིའི་རྒྱབ་སྐྱོར་ལ་བརྟེན་ནས་སྤྱི་ཚོགས་ཡར་རྒྱས་གཏོང་རྒྱུ་དེ་ཡག་པོ་མེད་པའི་རྩོམ་ཡིག་དང་ཞིབ་འཇུག་སྙན་ཐོ་མང་པོ་ཡོང་གི་ཡོད། དཔེར་ན། ཨ་ཧྥི་རི་ཁར་ལོ་ ༥༠ རིང་རྒྱལ་སྤྱིའི་ཐོག་ནས་ཨ་སྒོར་ཐེར་འབུམ་ ༢༥༠༠ ལྷག་གི་མ་རྩ་བཙུགས་ཏེ་རོགས་སྐྱོར་བྱས་ཡོད་ཀྱང་མི་མང་གི་འཚོ་བ་ཡར་རྒྱས་ལས་ལྡོག་ནས་ཇེ་སྡུག་ཏུ་འགྲོ་ཡོད་སྟབས། ད་ལྟ་སྤྱི་ཚོགས་ནང་ལོགས་ཀྱི་ནུས་པ་གོང་འཕེལ་གཏོང་ཐུབ་ལ་ཤུགས་རྒྱག་གི་ཡོད་པ་རེད། བོད་པར་མཚོན་ན་ཡང་། གཞིས་ཆགས་སྲ་བརྟན་ཡོང་དགོས་ན། གཞིས་ཆགས་ནང་གི་མིའི་ནུས་པ་གོང་འཕེལ་གཏོང་དགོས་པ་རེད།

གསར་འགོད་པ། ལྷ་སྐྱབས་རྒྱལ།