བོད་ཀྱི་དུས་བབ་གསར་ཤོག་སྤྱིའི་འདོན་ཐེངས་ ༦༣༦ སྟེང་གི་རྩོམ་སྒྲིག་པའི་གཏམ།
བོད་ནང་གི་མི་ཞིག་དང་དྲ་ཐོག་ནས་ཁ་བརྡ་བྱས། ཁོ་རང་སྐད་ཆ་གཞན་བཤད་པར་སྤྲོ་བ་མི་འདུག ངེད་གཉིས་ཀྱི་ཁ་བརྡའི་གོ་རིམ་ནང་ཁོས་དཔལ་འབྱོར་སྐོར་ཡང་དང་བསྐྱར་དུ་གླེང་ཡོང་གི་འདུག དེང་སྐབས་བོད་ནང་གི་གཞོན་སྐྱེས་ཚོས་ལྭ་དང་ཅ་དངོས་སོགས་རྒྱལ་ཁབ་རིམ་པ་དང་རྒྱལ་སྤྱི་རིམ་པའི་ཚོང་རྟགས་སྐད་གྲགས་ཅན་བཀོལ་སྤྱོད་བྱེད་བཞིན་འདུག་ཟེར། གྲོགས་པོ་གྲོགས་མོ་འདུ་འཛོམ་དང་གཉེན་སྒྲིག་གི་ཆོ་ག་སོགས་ཀྱང་སྐར་མ་རིམ་པའི་གསོལ་མགྲོན་ཁང་དུ་བཤམ་པ་དང་། སྟོན་ཐོག་གི་སྡེར་ཁ་ཡང་ཅི་ཙམ་ཟ་ཐུབ་མིན་ལས་ཅི་ཙམ་ལྷག་ཡོད་མེད་ཀྱིས་སྟོན་མོ་ཚད་མཐོ་དམན་གཞལ་གྱིན་འདུག་ཟེར།
གྲལ་རིམ་མཐོ་བའི་སྤྱི་ཚོགས་ནང་གནས་སྟངས་སྣ་ཚོགས་ཡོད་སྲིད་ཀྱང་། སྤྱི་དམངས་ངལ་རྩོལ་བའི་ཁྲོད་དུ་རྒྱ་གར་བ་ཚོས་ལྕགས་སྒོར་ཨ་ནཱ་གཅིག་གི་དོན་དུ་མི་ལ་གདོང་དཀར་པོ་དམར་པོ་སྟོན་ནུས་བ་དང་། ནུབ་ཕྱོགས་མགོ་སེར་ཚོ་ཨ་སྒོར་ཐེར་འབུམ་གྱི་ཕྱུག་བདག་ཡིན་ཡང་། དངུལ་ལ་ཐུག་དུས་ལག་པ་དམ་པོ་དང་སེར་ན་ཆེན་པོ། ཟ་ཁང་སོགས་སུ་ཟས་ལྷག་བག་ལེབ་ཕྱེད་ཀ་ཡིན་ཡང་བསྡུ་གསོག་ཁྱབ་ནས་ནང་ལ་འཁྱེར་བའི་གོམས་སྲོལ་རང་ཆས་སུ་ཡོད། རྒྱ་མི་སྔོན་པོ་དག་ཀྱང་ལས་ཀར་ཧུར་བརྩོན་ཆེ་བ་དང་དངུལ་གསོག་པར་འཇོན་པ་འཛམ་གླིང་ཡོངས་གྲགས་ཡིན། འོན་ཀྱང་བོད་ཕྱི་ནང་གཉིས་ཀའི་བོད་མི་ཚོ་འདི་ལྟར་རྒྱས་སྤྲོས་ལ་དུང་བ་ཅི་ཡིན།
ཡང་སྙིང་བོད་ནང་གི་བོད་མི་ཚོ་ཕྱུག་པོ་ཆགས་པ་རེད་དམ། ད་ལྟ་ད་དུང་ས་ཆ་ལ་ལར་ཆུ་དང་གློག ལམ་ཁ་སོགས་ཀྱི་མཐུན་རྐྱེན་མེད་ས་དང་། མང་ཚོགས་ཀྱིས་ལ་བ་ལྷན་པ་ཅན་དང་ཟ་མ་ངན་ངོན་ལ་བརྟེན་ཏེ་འཚོ་བ་སྐྱེལ་མཁན་མང་པོ་ཡོད། ཚོང་རྟགས་གྲགས་ཆེན་གྱི་ཅ་དངོས་བཀོལ་མཁན་དང་། སྐར་མ་རིམ་པའི་ཟ་ཁང་དུ་གསོལ་སྟོན་བཤམ་མཁན་ཚོ་ཡང་། རྒྱབ་ན་དངུལ་ཁང་ནང་དངུལ་འབོར་ཆེན་མནན་ཡོད་པ་དང་། དཔལ་འབྱོར་ཡོང་ཁུངས་བརྟན་པོ་ཡོད་པ་དེ་འདྲ་གང་ཡང་མིན། ཐ་ན་མིས་མི་མཐོང་སའི་ཁྱིམ་ནང་བཟའ་ཆས་གཙང་མ་ཞིག་དང་ཉལ་ཆས་སྤུས་དག་ཅིག་ཀྱང་ཡོད་མཁན་ལས་མེད་མཁན་མང་།
ལོ་རེའི་སྟོན་ཟླ་བརྒྱད་པ་དགུ་བ་ནི་འབྲོག་པའི་ཕྱུག་ཟོག་ལ་ཤ་ཤེད་རྒྱས་དུས་དང་། རོང་བའི་ཞང་ས་ལ་ལོ་ཡག་སྙེ་མ་སྨིན་དུས་རེད། ལྷག་པར་དུ་ལོ་འགའི་གོང་ནས་དབྱར་རྩྭ་དགུན་འབུའི་རིན་གོང་འཕར་ཏེ། རོང་བ་འབྲོག་པ་མེད་པར་སྒོར་མོ་འབལ་བའི་དུས་ཡིན། དབྱར་རྩྭ་རྐོ་མཁན་ཚོར་ཟླ་གཅིག་གཉིས་ནང་ཉུང་མཐར་རྒྱ་སྒོར་ཉིས་ཁྲི་སུམ་ཁྲིའི་ཡོང་སྒོ་ཡོད་ལ། འབུ་མང་སར་འཁེལ་ན་རྒྱ་སྒོར་བཞི་ཁྲི་ལྔ་ཁྲི་དང་། ཁྱིམ་གཅིག་ལ་འབུ་རྐོ་མཁན་གཉིས་དང་གསུམ་ཡོད་ན་རྒྱ་སྒར་འབུམ་གྱི་སྐད་ཆ་རེད། འབུ་རྐོའི་ལས་ཀ་དེའང་དུས་ཡུན་རིང་པོ་དང་དཀའ་ལས་ཁག་པོ་གང་ཡང་མིན་པར་ལོ་རེ་ལ་ཟླ་གཅིག་གཉིས་ཀྱི་ངལ་རྩོལ་ཙམ་ཡིན།
དངུལ་འཚོལ་རྒྱུ་སླ་དྲགས་པ་རེད་དམ། སྒོར་མོར་རིན་ཐང་འདུ་ཤེས་ཆུང་དྲགས་པ་རེད། ཡང་ན་བདག་འཛིན་སྤོང་བ་དང་འདུས་བྱས་ཐམས་ཅད་མི་རྟག་པ་རྟོགས་སོང་བ་རེད། བོད་ནང་གི་བོད་མི་ཚོས་ལོ་རེའི་དབྱར་རྩྭ་བརྐོས་རྗེས་གྲོང་ཁྱེར་ཆེ་ཁག་དང་། རྒྱ་ནག་པེ་ཅིན་སོགས་སུ་སྤྲོ་འཆམ་ལ་སོང་སྟེ་བདུན་གཅིག་གཉིས་ནང་དངུལ་ཡོངས་རྫོགས་གཏོར་ནས་ལོག་པ་དང་། ལུང་པ་འགའ་རེས་ལོ་ཧྲིལ་བོར་དཀའ་ལས་བརྒྱབ་སྟེ་སེན་མགོ་ཁྲག་དང་སེན་གཏིང་སྣག་གིས་གསོག་པའི་དངུལ་ཡོངས་རྫོགས་ལོ་གསར་དང་དབྱར་སྐྱིད་ཀྱི་ཉིན་གཅིག་གཉིས་ནང་གཏོར་བ། ཁྱིམ་མི་ཡོངས་རྫོགས་གྲོང་ཁྱེར་ནང་སྤྲོ་འཆམ་དུ་ཕྱིན་ཏེ། མགྲོན་ཁང་རྫིག་པོ་དང་ཟ་མ་གོང་ཆེན། ལ་བ་རྟགས་ཆེན་སོགས་ཉོས་ཏེ་དངུལ་ཡོངས་རྫོགས་རྡུལ་སྤྲུག་བརྒྱབ་ནས་ཕྱིར་ལོག་པའི་ལམ་གླ་ཡང་གཞན་ལ་གཡར་ནས་ལོག་གི་ཡོད་པའི་གཏམ་རྒྱུད་དགོད་བྲོ་བོ་རེ་ཡང་འདུག་གོ།
