རྒྱ་ནག་གི་ནང་པ་ས་ཡ་སུམ་བརྒྱ་ལྷག་ལ་ཞབས་འདེཊ་བསྒྲུབ་ཐུབ་ན་དྲན་བཞིན་ཡོད།

༧གོང་ས་མཆོག་གིས་ཐུན་མོང་གི་གཞི་རྟེན་འཚོལ་བ་ཅེས་པའི་ཚོགས་འདུའི་ཐོག་བཀའ་སློབ་གནང་སྟེ། རྒྱ་ནག་རིག་གཞུང་དང་མི་འབོར་ཆེ་ཤོས་ཀྱི་རྒྱལ་ཁབ་ཅིག་ཡིན་སྟབས། དྲག་པོའི་གོ་ལག་ཐོགས་ནས་ནུས་པ་འདོན་རྒྱུ་མིན་པར། རང་ཉིད་ལ་ནུས་པ་གང་ཡོད་པ་དེའི་ཐོག་ཡག་པོ་ཞིག་བསྐྱོད་ཐུབ་ན། འཛམ་གླིང་སྤྱི་ལ་ཕན་ཐོགས་ཡོང་ངེས་སྐོར་ཅེས་གསུངས་འདུག

ཟླ་འདིའི་ཚེས་ ༢༧ ཉིན་༸གོང་ས་མཆོག་བོད་མིའི་སྒྲིག་འཛུགས་དང་ཡུ་རོབ་དམིགས་བསལ་དོན་གཅོད་ལས་ཁུངས་ཟུང་འབྲེལ་ཐོག་གོ་སྒྲིག་གནང་བའི་ཡུ་རོབ་དང་ཨ་རི། ཨེ་ཤ་ཡ། ཨོ་སི་ཊོ་ལི་ཡ་བཅས་ནས་ཕེབས་པའི་རྒྱ་རིགས་ཤེས་ཡོན་པ་དང་དཔོན་རིགས། ལས་འགུལ་བ། རྩོམ་པ་པོ་བཅས་དང་། བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག ཕྱི་དྲིལ་བཀའ་བློན་བདེ་སྐྱིད་ཆོས་དབྱངས་མཆོག ཡུ་རོབ་དམིགས་བསལ་སྐུ་ཚབ་སྐལ་བཟང་རྒྱལ་མཚན་མཆོག་བཅས་མི་ ༧༠ ལྷག་འཛོམས་པའི་༼ཐུན་མོང་གི་གཞི་རྟེན་འཚོལ་བ༽ཅེས་པའི་བོད་རྒྱའི་ཚོགས་འདུའི་ཐོག་ཆིབས་སྒྱུར་གནང་སྟེ་བཀའ་སློབ་གནང་ཡོད་འདུག

སྐབས་དེར་༧གོང་ས་མཆོག་གིས་བཀའ་སློབ་གནང་དོན། དེ་རིང་རྒྱ་རིགས་གྲོགས་པོ་ཚོ་ཉིན་འགའ་ཤས་སྔོན་ནས་ཡོང་བ་ཁྱེད་རང་ཚོ་དང་ཐུག་རྒྱུ་བྱུང་བར་ཧ་ཅང་དགའ་པོ་བྱུང་། ཁྱེད་རང་ཚོ་ཚང་མར་འཚམས་འདྲིའི་བཀྲ་ཤིས་བདེ་ལེགས་ཡོད། ངོས་ཀྱིས་ས་གནས་འདྲ་མིན་ནང་གནས་སྡོད་བོད་མི་ཚོར་ཡིན་གཅིག་མིན་གཅིག་རྒྱ་རིགས་དང་གྲོགས་པོ་འགྲིག་དགོས་པ་མ་ཟད། རྒྱ་རིགས་ཚོ་ཐུག་སྟེ་དངོས་ཡོད་གནས་ཚུལ་འགྲེལ་བཤད་རྒྱག་དགོས་རྒྱུ་ཧ་ཅང་གལ་ཆེན་པོ་རེད་ཅེས་བརྗོད་ཀྱི་ཡོད། ངོས་རང་དེ་སྔ་རྒྱ་ནག་གི་རྒྱལ་ས་པེ་ཅིན་དུ་བསྐྱོད་དེ་མའོ་ཙེ་ཏུང་དང་ཐུག་ནས་ལག་པ་བཏང་སྟེ། ཕ་བུ་ལྟར་གྱི་གྲོགས་པོ་ཆགས་མྱོང་མཁན་ཕལ་ཆེར་ངོས་རང་མ་གཏོགས་ཁྱེད་རང་ཚོའི་ནང་མེད། དངོས་ཡོད་གནས་ཚུལ་ལ་རྒྱ་ནག་མི་དམངས་སྤྱི་མཐུན་རྒྱལ་ཁབ་ནི་མི་འབོར་མང་ཤོས་ཀྱི་རྒྱལ་ཁབ་ཅིག་ཆགས་ཡོད། དེ་ལྟ་བུའི་རྒྱལ་ཁབ་དེར་དཔལ་འབྱོར་ཐོག་ནས་ནུས་པ་ཆེན་པོ་ཡོད་སྟབས། འཛམ་གླིང་འདིའི་ཐོག་བྱས་རྗེས་ཆེན་པོ་འཇོག་ཐུབ་པའི་ནུས་པ་ཡོད། གང་ལྟར། རྒྱ་ནག་མི་དམངས་སྤྱི་མཐུན་རྒྱལ་ཁབ་ལ་ཡོད་པའི་ནུས་པ་དེ་འདོན་ཐུབ་པ་ཞིག་བྱུང་ན། དྲག་པོའི་གོ་ལག་ཐོགས་ནས་ནུས་པ་འདོན་རྒྱུ་ཞིག་རྩ་བ་ནས་མ་རེད། རྒྱ་ནག་ནི་རིག་གཞུང་དང་མི་འབོར་ཆེ་ཤོས་ཀྱི་རྒྱལ་ཁབ་ཅིག་ཡིན་པ་མ་ཟད། དཔལ་འབྱོར་གྱི་ནུས་པ་ཡོད་པར་བརྟེན་ཡག་པོ་ཞིག་བསྐྱོད་ཐུབ་ན། ཏན་ཏན་འཛམ་གླིང་སྤྱི་ལ་ཕན་ཐོགས་ཡོང་གི་རེད་བསམས་པ་དྲན་གྱི་འདུག དེ་བཞིན། རྒྱ་ནག་མི་དམངས་དུང་ཕྱུར་བཅུ་གསུམ་ལ་དངོས་ཡོད་གནས་ཚུལ་ཤེས་རྒྱུའི་ཐོབ་ཐང་ཡོད། དངོས་ཡོད་གནས་ཚུལ་ཤེས་ན། བཟང་ངན་རྣམ་པར་འབྱེད་རྒྱུའི་རྣམ་དཔྱོད་ལྡན་ཡོད།

དེར་བརྟེན། ཕྱི་གསལ་ནང་གསལ་དགོས་རྒྱུ་ཧ་ཅང་གལ་ཆེན་པོ་ཆགས་ཡོད། ལྷག་པར་གསར་འགྱུར་ཐོག་དམ་བསྒྲགས་བྱེད་རྒྱུ་དེ་རྩ་བ་ནས་ཡག་པོ་མ་རེད། དེས་ཕན་རྒྱུའི་ཚབ་ལ་གནོད་ཀྱི་རེད། ཅེས་ཤོད་ཀྱི་ཡོད། གལ་ཆེ་ཤོས་ཤིག་ལ་རྒྱ་ནག་གི་ཁྲིམས་རྒྱལ་སྤྱིའི་ཁྲིམས་ཀྱི་གནས་སྟངས་ལྟར་ཡོང་ཐུབ་པ་བྱེད་དགོས། སྤྱིར་བཏང་ཁྲིམས་མཐུན་དགོས་ཀྱི་རེད། ཅེས་དེང་སྐབས་གང་ཙམ་བགྲོ་གླེང་ཡོང་གི་འདུག མདོར་ན། རྒྱལ་སྤྱིའི་ཁྲིམས་དང་མཐུན་པ་ཞིག་དགོས་རྒྱུ་གལ་ཆེན་པོ་རེད། དེ་བཞིན། བོད་ཀྱི་ཁོར་ཡུག་སྲུང་སྐྱོབ་བྱེད་རྒྱུ་དེ་ཤིན་ཏུ་ནས་གལ་འགངས་ཆེན་པོ་ཆགས་ཡོད། བོད་ཀྱི་ཁོར་ཡུག་ལ་དོ་ཕོག་ཕྱིན་པ་དེས་བོད་ཀྱི་རྒྱུག་ཆུ་ལ་བརྟེན་ནས་འཚོ་བཞིན་པའི་མི་འབོར་ཐེར་འབུམ་གཅིག་ཙམ་ལ་ཉེན་ཁ་དང་དཀའ་ངལ་འཕྲད་ངེས་ཆགས་ཡོད། ལྷག་པར་བོད་ཀྱི་ཐུན་མོང་མ་ཡིན་པའི་རིག་གཞུང་ནི་འཚེ་མེད་ཞི་བའི་ལྟ་གྲུབ་ལ་གཞི་བཅོལ་བ་ཞིག་ཡིན་སྟབས། བོད་བརྒྱུད་ནང་བསྟན་བདག་གཅེས་བྱེད་རྒྱུ་ཧ་ཅང་གལ་ཆེན་པོ་ཆགས་ཡོད། དེང་སྐབས་བོད་མིའི་ཆབ་སྲིད་ཀྱི་འགན་ཡོངས་རྫོགས་སྲིད་སྐྱོང་བློ་བཟང་སེང་གེ་སོགས་ཀྱིས་འགན་འཁུར་བཞིན་ཡོད་སྟབས། ངོས་རང་ལ་ཆབ་སྲིད་ཀྱི་འགན་དབང་གང་ཡང་མེད། ཅེས་སོགས་ཀྱི་བཀའ་སློབ་སྩལ་ཡོད།

རྒྱ་རིགས་ཚོགས་བཅར་བ་ཁག་ཅིག་གིས་མང་གཙོ་དང་ཚོང་འབྲེལ། ༸གོང་ས་མཆོག་རྒྱ་ནག་ཏུ་ཕེབས་འདོད་ཡོད་མེད་སོགས་ཀྱི་དྲི་བ་ཕུལ་བའི་ལན་དུ། སྔོན་མ་རྒྱ་ནག་ལ་ཚོང་འབྲེལ་གྱི་དམིགས་བསལ་ཐོབ་ཐང་སྐོར་ལ་གོ་བསྡུར་ཝ་ཤིན་ཌོན་དུ་བྱེད་སྐབས་ངོས་རང་དེ་ཁུལ་ལ་བསླེབས་ཡོད། དེ་དུས་ངོས་ལ་བསམ་ཚུལ་གང་ཡོད་དམ། ཞེས་འདྲི་མཁན་བྱུང། ངོས་ཀྱིས་ཐོབ་ཐང་དེ་ངེས་པར་དུ་རྒྱ་ནག་ལ་སྤྲོད་དགོས། གང་ལགས་ཞེ་ན། རྒྱ་ནག་ནི་མི་འབོར་མང་ཤོས་ཀྱི་རྒྱལ་ཁབ་ཅིག་ཆགས་ཡོད། དེ་བཞིན་ཨོ་ལིམ་ཕིག་རྩེད་འགྲན་སྐབས་ངོས་རང་ལ་སྐད་ཆ་དྲིས་མཁན་བྱུང། དེ་ཡང་རྒྱ་ནག་ལ་འོས་པ་དང། ངེས་པར་དུ་རྒྱ་ནག་ནང་ཚོགས་དགོས་པ་རེད། དེ་བཞིན་རྒྱ་ནག་ལ་དཔལ་འབྱོར་གྱི་ཐོབ་ཐང་ཡང་ངེས་པར་དགོས་ཀྱི་རེད། ཅེས་བརྗོད་པ་དང་ལྷན་འཛམ་གླིང་འདིའི་ནང་གནས་པའི་རང་དབང་མང་གཙོའི་རྒྱལ་ཁབ་ཚོར་འགན་འཁྲི་གང་ཞིག་ཡོད་དམ་ཞེ་ན། རྒྱ་ནག་ལ་མང་གཙོ་དགོས་རྒྱུ་དེ་རེད། ཅེས་བརྗོད་པ་ཡིན། ཕྱོགས་མཚུངས་ཁྱེད་རང་ཚོས་ངོས་རང་རྒྱ་ནག་ཏུ་བསླེབ་ཐུབ་རྒྱུའི་སྐོར་ལ་བརྗོད་སོང། ངོས་རང་ནང་པ་ཞིག་རེད། རྒྱ་ནག་རི་བོ་རྩེ་ལྔ་ང་ཚོས་ནང་པའི་གནས་རྩ་ཆེན་ཞིག་ལ་རྩི་བཞིན་ཡོད། དེ་གར་གནས་སྐོར་ལ་བསྐྱོད་རྒྱུར་ ༡༩༥༤ ལོར་ངོས་ཀྱིས་རེ་འདུན་བཏོན་ཡོད་ཀྱང་དོན་འབྲས་མ་སོན་པ་རེད། ཉེ་ཆར་རྒྱ་ནག་གི་སྲིད་འཛིན་ཞི་ཅིན་ཕིན་གིས་རྒྱ་ནག་གི་རིག་གཞུང་ནང་དུ་ནང་ཆོས་གལ་ཆེ་ཡིན་སྐོར་ཡོངས་གྲགས་གསུང་གི་འདུག དེ་ལྟ་བུའི་གོ་སྐབས་ཤིག་ཡོད་ན། ངོས་རང་ནང་པ་ཞིག་གི་ངོས་ནས་རིམ་པ་དང་པོ་རྒྱ་ནག་ནང་གི་ནང་པ་ས་ཡ་སུམ་བརྒྱ་བཞི་བརྒྱ་ཡོད་པ་ཚོར་གང་ཐུབ་ཅི་ཐུབ་ཀྱིས་ཞབས་འདེགས་བསྒྲུབ་ཐུབ་ན་བསམས་པ་དྲན་བཞིན་ཡོད། ནང་ཆོས་ཐོག་འགྲེལ་བཤད་རྒྱག་དགོས་བྱུང་ན་ངོས་རང་ལ་གང་ཙམ་ཡོད། སྤྱིར་བཏང་རྒྱ་ནག་གཞུང་གིས་ངོས་རང་བདུད་རེད་ཅེས་བརྗོད་ཀྱི་ཡོད་སྟབས། བདུད་ཚོད་ཚོད་རྒྱ་ནག་ལ་ཕྱིན་ན། བདུད་ཀྱི་ཕོ་བྲང་བཙོན་ཁང་རེད། བཙོན་ཁང་ནང་འགྲོ་རྒྱུའི་ཉེན་ཁ་ཡོད། ཅེས་ཞལ་ཤོབ་དང་འབྲེལ་བཀའ་ལན་སྩལ་ཡོད་འདུག

དེ་རིང་སྔ་དྲོའི་ཆུ་ཚོད་ ༡༠།༣༠ ཡས་མས་སུ་༧གོང་ས་མཆོག་གིས་འཇར་མན་རྒྱལ་ཁབ་ཀྱི་མཛད་འཕྲིན་ཁག་ལེགས་པར་གྲུབ་ཏེ། བོད་མིའི་སྒྲིག་འཛུགས་ཀྱི་སྲིད་ཚབ་ཆོས་རིག་བཀའ་བློན་པདྨ་ཆོས་འབྱོར་མཆོག་དང་། སྤྱི་འཐུས་ཚོགས་གཞོན་མཁན་པོ་བསོད་ནམས་བསྟན་འཕེལ་མཆོག བདེ་སྲུང་བཀའ་བློན་འབྲོང་ཆུང་དངོས་གྲུབ་མཆོག དེ་བཞིན། དྷ་རམ་ས་ལའི་གཞུང་དང་གཞུང་འབྲེལ་མིན་པའི་ཚོགས་པ་ཁག་གི་སྐུ་ཚབ་དང་སེར་སྐྱ་མི་མང་བཅས་ཀྱིས་ཕེབས་བསུའི་ཁྲོད་ཕྱིར་བཞུགས་སྒར་ཕོ་བྲང་དུ་ཞབས་སོར་བདེ་བར་བཀོད་གནང་སོང་།

གསར་འགོད་པ། དོན་གོ