ཞི་ཅིན་ཕིན་རྒྱ་གར་ནང་སྐོར་སྐྱོད་སྐབས་རྒྱ་གར་གཞུང་ལ། ༧གོང་ས་མཆོག་གི་གནང་ཕྱོགས་དང་བོད་མིའི་སྒྲིག་འཛུགས་དྷ་རམ་ས་ལར་གནས་ཆོག་མིན་གླེང་སློང་ཡོང་གི་རེད་ཟེར།
གཟའ་སྤེན་པའི་ཉིན་རྒྱ་གར་དུས་བབ་དྲ་རྒྱའི་ཐོག པེ་ཅིན་ནང་ཡོད་པའི་རྒྱ་ནག་དམར་ཤོག་ཚོགས་པའི་སློབ་གྲྭའི་རྒྱ་གར་གནད་དོན་ཆེད་མཁས་པ་མཱ་ཅཱ་ལི་ (Ma Jiali) ཡིས་ཟླ་འདིའི་ནང་རྒྱ་ནག་གི་སྲིད་འཛིན་ཞི་ཅིན་ཕིན་རྒྱ་གར་ནང་སྐོར་སྐྱོད་བྱེད་སྐབས། རྒྱ་གར་གྱི་དཔོན་རིགས་ཚོར་༧གོང་ས་མཆོག་གི་གནང་སྒོ་ཇི་ཡིན་དང་རྒྱ་གར་ནང་བོད་ མིའི་སྒྲིག་འཛུགས་གནས་ཆོག་མིན་ཐོག་གླེང་སློང་ཡོང་རྒྱུ་ཡིན་སྐོར་སོགས་བརྗོད་འདུག
འདིའི་ཐད་མཱ་ཅཱ་ལིས། “ཐེངས་འདིར་སྲིད་འཛིན་ཞི་ཅིན་ཕིན་གྱིས་རྒྱ་གར་གྱི་དབུ་ཁྲིད་ཐུག་སྐབས་རྒྱ་གར་གཞུང་གིས་དེ་སྔོན་ཁས་ལེན་གནང་པ་ལྟར། བོད་མི་ཚོས་རྒྱ་ནག་ལ་དམིགས་པའི་ཆབ་སྲིད་ལས་འགུལ་རིགས་སྤེལ་རྒྱུ་མཚམས་འཇོག་དགོས་པ་ནན་སྐུལ་བྱ་སྲིད་པ་རེད”ཅེས་དང་། ད་དུང་ཁོས། “བཙན་བྱོལ་བོད་གཞུང་ནི་རྒྱ་ནག་ལ་དམིགས་པའི་ཆབ་སྲིད་ལས་འགུལ་སྤེལ་མཁན་གྱི་སྒྲིག་འཛུགས་ཤིག་ཡིན་སྟབས། དེ་སྔོན་རྒྱ་གར་གཞུང་གིས་རྒྱ་ནག་གཅིག་གི་ལམ་ལུགས་ལ་རྒྱབ་སྐྱོར་བྱ་རྒྱུའི་ཁས་ལེན་བྱས་པ་ལྟར་ལག་བསྟར་དོལ་འཁྱོལ་བྱས་ཏེ། རྒྱ་ནག་ཁ་བྲལ་གཏོང་མཁན་ལ་གཙིགས་ཆེན་བྱས་ན་འགྲིག་གི་མེད” ཅེས་སོགས་བརྗོད་འདུག
རྒྱ་གར་དུས་བབ་ཀྱིས་མཱ་ཅཱ་ལི་ལ། ད་རེབ་ཞི་ཅིན་ཕིན་གྱིས་དྷ་རམ་ས་ལར་ཡོད་པའི་བཙན་བྱོལ་བོད་གཞུང་སྒོ་རྒྱག་དགོས་པའི་ཐད་གླེང་སློང་བྱེད་སྲིད་སྐོར་དྲིས་པར་ཁོས། “ང་ཚོའི་ངོས་ནས་ད་རེབ་སྲིད་འཛིན་གྱིས་གནད་དོན་དེའི་སྐོར་གླེང་སློང་བྱེད་པར་རེ་བ་བྱེད་ཀྱིན་ཡོད། ཞི་ཆིན་ཕིན་ཁོ་རང་གི་ངོས་ནས་ཀྱང་རྒྱ་གར་གྱི་དབུ་ཁྲིད་ཚོར་ཐུག་འཕྲད་སྐབས་གནད་དོན་འདིའི་ཐད་གོ་བསྡུར་བྱ་དགོས་པ་ཞིག་ཆགས་ཡོད” ཅེས་བརྗོད་འདུག
༢༠༠༢ ལོར་རྒྱ་ནག་གཞུང་དང་བོད་མིའི་སྒྲིག་འཛུགས་བར་གྱི་འབྲེལ་ལམ་བསྐྱར་གསོ་བྱུང་བ་ནས་བཟུང་། ད་བར་༧གོང་ས་མཆོག་གི་དམིགས་བསལ་སྐུ་ཚབ་དང་རྒྱ་ནག་འཐབ་ཕྱོགས་གཅིག་འགྱུར་པུའུ་ཡི་དཔོན་རིགས་བར་འབྲེལ་མོལ་ཐེངས་ ༩ ཙམ་བྱས་ཡོད་ཀྱང་། རྒྱ་ནག་གཞུང་གིས་བོད་དབང་བསྒྱུར་བྱས་པར་༧གོང་ས་མཆོག་གིས་ངོ་རྒོལ་དང་ངོས་བཞེས་གང་ཡང་གནང་གི་མེད་པའི་འགྲེལ་བརྗོད་དང་། ༧གོང་ས་མཆོག་གིས་བོད་སྐད་བོད་ཡིག་སྤྱོད་ཡུལ་གྱི་བོད་ས་ཡོངས་རྫོགས་རྒྱ་ནག་མེས་རྒྱལ་ཁྱིམ་ཚང་ཆེན་མོའི་མངའ་ཁོངས་ཡིན་པ་ངོས་བཞེས་མ་གནང་ཚེ། རྒྱ་ནག་གཞུང་དང་བོད་མིའི་སྒྲིག་འཛུགས་བར་དོན་ཕན་ལྡན་པའི་འབྲེལ་མོལ་ཞིག་ཡོང་ཐབས་མེད་སྐོར་སྔ་རྗེས་རིམ་པར་བརྗོད་ཡོད་ཀྱང་། ཉེ་ལམ་བོད་ཀྱི་རྒྱལ་ས་ལྷ་སའི་གསར་འགྱུར་བརྒྱུད་ལམ་ཞིག་ཐོག་རྒྱ་ནག་གི་འབྲེལ་ཡོད་མགོ་ཁྲིད་ཅིག་གིས་༧གོང་ས་མཆོག་གི་དམིགས་བསལ་སྐུ་ཚབ་དང་རྒྱ་ནག་གཞུང་བར་བོད་དོན་དཀའ་རྙོག་སེལ་ཐབས་བྱ་རྒྱུའི་འདོད་མོས་ཡོད་སྐོར་ཞིག་ཀྱང་བསྒྲགས་ཡོད།
གནས་ཚུལ་དེའི་ཐོག་མཱ་ཅཱ་ལི་ལ་བསམ་ཚུལ་གང་ཡོད་དྲིས་པར་ཁོས། “ཏཱ་ལའི་བླ་མས་བོད་སྐད་བོད་ཡིག་སྤྱོད་ཡུལ་གྱི་བོད་ས་ཡོངས་རྫོགས་ནང་ཚད་མཐོའི་རང་སྐྱོང་གནས་བབ་དགོས་ལུགས་བརྗོད་དེ། དོན་དངོས་ཐོག་བོད་མི་ཚོར་བོད་རང་བཙན་སྒྲུབ་ཐབས་བརྒྱུད་སྐུལ་བྱེད་བཞིན་ཡོད་ཀྱང་། ང་ཚོས་ད་དུང་ཁོང་གི་སྐུ་ཚབ་དང་མཉམ་དུ་འབྲེལ་མོལ་བྱས་ཏེ་བོད་དོན་དཀའ་རྙོག་སེལ་ཐབས་བྱ་རྒྱུའི་འདོད་པ་ཡོད” ཅེས་སོགས་བརྗོད་འདུག
གསར་འགོད་པ། དོན་གྲུབ།
ཞི་རྒྱ་གར་ལ་མ་སླེབས་གོང་དུ་རྒྱ་གར་གྱི་བརྙན་འཕྲིན་ཚན་པ་ཞིག་བརྒྱུད་རྒྱ་གར་གྱི་མཁས་པ་དང་དེ་བཞིན་ཕྱི་རྒྱལ་གྱི་མཁས་པ། བོད་པའི་མཁས་པའི་བར་བོད་འདི་རྒྱ་གར་གྱི་འདས་མ་ད་གསུམ་ཐོག་གནད་འགག་ཅིག་ཡིན་སྐོར་དང་། སྔ་མོ་ཡང་རྒྱ་གར་གྱིས་བོད་ཐོག་འཛིན་པའི་སྲིད་བྱུས་ནོར་འཁྲུལ་ཅན་གྱིས་ད་བར་རྒྱ་གར་གྱི་ས་མཚམས་ཁག་ཏུ་དཀའ་ངལ་རིམ་ཕྲད་དང་། དེ་ལ་བརྟེན་ནས་རྒྱ་གར་གྱི་དཔལ་འབྱོར་ལ་དོ་ཕོག་ཆེན་པོ་འགྲོ་བཞིན་པ་སོགས་རྒྱ་གར་མི་མང་བྱིངས་ལ་ཤེས་སུ་འཇུག་ཐུབ་པའི་ལས་འགུལ་ཞིག་སྤེལ་དགོས། ལས་འགུལ་འདི་བཞིན་བོད་ཀྱི་བུད་མེད་ཚོགས་པ་དང་། གཞོན་ནུ་ཚོགས་པ། བོད་རང་བཙན་སློབ་ཕྲུག་ཚོགས་པ། དེ་མིན་གཞུང་འབྲེལ་དྲིལ་བསྒྲགས་ལས་ཁུངས་སོགས་ཀྱིས་འགན་འཁྱེར་ཡང་ཆོག་པ་ཞིག་རེད།
ལོ་འགའ་ཡི་སྔོན་ཨབ་གྷན་རྒྱལ་ཁབ་སྐྱོ་པོ་ཡིན་ན་ཡང་རང་ཉིད་ལ་སྐྱབས་བཅོལ།རྦི་ལ་ལྡན་གྱི་ཆེད་དུ་སྟོབས་ཆེན་ཨ་རི་རྒྱལ་ཁབ་ལ་ཤི་འཛིང་རོ་འཛིང་བྱས་སོང། འོན་ཀྱང་ད་ཕྱིད་ཆེད་རྒྱ་གར་གྱི་རང་ལ་སྐྱབས་བཅོལ་ཏཱ་ལ་བླ་མ་འཁོར་བཅས་ལྟ་སྟང་བྱེད་སྟང་ག་འདྲ་ཞིག་བྱེད་རྩིས་ཡོད་ན།
རྡ་སའི་གནད་དོན་ཟེར་བ་འདི་གོ་ཐེངས་དང་པོ་ཡིན།
རྒྱ་དཀར་ནག་གཉིས་སྤུན་བསྒྲིགས་མྱོང་ནི་རེད། དྲུག་བཅུ་རེ་གཉིས་ལོར་དམག་འཁྲུག་རྒྱབ་སྟེ་རྒྱ་གར་བཟུང་དམག་ཚོ་ལྷ་སར་ཁྲོམ་ལ་དེད་ནས་བསྙོས་བཅོས་ཚད་མེད་མྱངས། རྡ་ས་གླེང་སྲིད་ནའང་བློ་གཏད་མེད་པའི་རྒྱ་གཞུང་གིས་རྒྱ་གར་ལ་ཁེ་སང་ག་རེ་སྤྲད་མིན་ལ་རག་ལས་ཡོད་རྒྱུ་རེད། དེ་བཞིན་རྒྱ་གར་གྱིས་ཀྱང་དཀྱེལ་ཡངས་ཡོད་མདོག་གིས་བསྟུན་མཁས་བྱ་ངེས་རེད། འོན་ཀྱང་། རང་ཉིད་ཀྱི་ལྕགས་རི་ལྟ་བུའི་བོད་འདི་སྔོན་མ་ནས་གཡོ་བཙོང་བྱས་ཚར་བ་རེད། དེའི་མཇུག་འབྲས་གམ་རྒྱུ་འབྲས་མངོན་སུམ་དུ་འཁོར་ཡོང་གི་ཡོད་། ཆོས་རིག་གཞུང་གི་འབྲེལ་ལམ་ཟབ་པའི་ལོ་སྟོང་ཕྲག་འབྲེལ་བཟང་པོ་སྐུ་ཞབས་ནེ་རོས་དྲན་གསོ་ཙམ་ཡང་མ་བྱས་པ་རེད། ད་གང་ལྟར། བྱི་ལ་དཀར་ནག་གཉིས་ཞི་དྲག་གི་ཁྱད་པར་ཙམ་ལས་ཤ་ཟ་ནོ་གཅིག་པ་ཡིན།
དགྱ་གཙོག་འདིའི་གདོང་ལ་བལྟས་པ་ཙམ་གྱིས་སྤྱང་གཏོགས་འདྲ་ཞིག་མི་འདུག་གམ། ང་ཚོ་བཙན་བྱོལ་གཞུང་འདི་རྒྱ་གར་བས་བསམ་ཤེས་ན་རྒྱ་གར་སྲུང་སྐྱོབ་ཀྱི་སྒོ་ཆེན་ཞིག་ཡིན། སྐྱབས་བཅོལ་སྒྲིག་འཛུགས་འདི་བཞིན་རྒྱ་གར་གྱི་གཞུང་འཛིན་སྔ་མ་དག་གིས་ཐག་བཅད་པ་ཞིག་ཡིན་སྟབས། རང་དགར་ལག་པ་འཆང་ཆོག་ཆོག་ཅིག་ཀྱང་ཡིན་མི་སྲིད་སྙམ། གལ་སྲིད་རྒྱ་ནག་གི་སྲིད་འཛིན་ཞིས་ད་རེས་རྒྱ་གར་གཞུང་ལ་དེ་འདྲ་ཞིག་འབོད་སྐུལ་ཞུས་ཚེ། རྒྱ་ནག་དམར་ཤོག་དཔོན་རིགས་རིམ་བྱོན་ནང་མའོ་རྗེས་ནས་བོད་ཐོག་སྲིད་བྱུས་འཛིན་མཁན་ཆེས་སྡུག་ཤོས་དེ་ཞི་འདི་ཡིན་པར་ངོས་འཛིན་བྱས་ཆོག
ད་ལམ་རྒྱ་དཀར་ནག་གཉིས་བཙན་བྱོལ་བོད་པའི་ལས་དབང་ཐག་གཅོད་བྱེད་རན་ཡོད་ས་མ་རེད་དམ།